ಶ್ರೀಸ್ತುತಿಃ (ಶ್ರೀ ವೇದಾನ್ತದೇಶಿಕವಿರಚಿತಮ್)

.  ಶ್ರೀಸ್ತುತಿಃ (ಶ್ರೀ ವೇದಾನ್ತದೇಶಿಕವಿರಚಿತಮ್)

ಮಾನಾತೀತಪ್ರಥಿತವಿಭವಾಂ ಮಙ್ಗಲಂ ಮಙ್ಗಲಾನಾಂ

ವಕ್ಷಃಪೀಠೀಂ ಮಧುವಿಜಯಿನೋ ಭೂಷಯನ್ತೀಂ ಸ್ವಕಾನ್ತ್ಯಾ |

ಪ್ರತ್ಯಕ್ಷಾನುಶ್ರವಿಕಮಹಿಮಪ್ರಾರ್ಥನೀನಾಂ ಪ್ರಜಾನಾಂ

ಶ್ರೇಯೋಮೂರ್ತಿಂ ಶ್ರಿಯಮಶರಣಃ ತ್ವಾಂ ಶರಣ್ಯಾಂ ಪ್ರಪದ್ಯೇ || ೧ ||

ಆವಿರ್ಭಾವಃ ಕಲಶಜಲಧಾವಧ್ವರೇ ವಾಪಿ ಯಸ್ಯಾಃ

ಸ್ಥಾನಂ ಯಸ್ಯಾಃ ಸರಸಿಜವನಂ ವಿಷ್ಣುವಕ್ಷಸ್ಥಲಂ ವಾ |

ಭೂಮಾ ಯಸ್ಯಾ ಭುವನಮಖಿಲಂ ದೇವಿ ದಿವ್ಯಂ ಪದಂ ವಾ

ಸ್ತೋಕಪ್ರಜ್ಞೈರನವಧಿಗುಣಾ ಸ್ತೂಯಸೇ ಸಾ ಕಥಂ ತ್ವಮ್ || ೨ ||

ಸ್ತೋತವ್ಯತ್ವಂ ದಿಶತಿ ಭವತೀ ದೇಹಿಭಿಃ ಸ್ತೂಯಮಾನಾ

ತಾಮೇವ ತ್ವಾಮನಿತರಗತಿಃ ಸ್ತೋತುಮಾಶಂಸಮಾನಃ|

ಸಿದ್ಧಾರಮ್ಭಃ ಸಕಲಭುವನಶ್ಲಾಘನೀಯೋ ಭವೇಯಂ

ಸೇವಾಪೇಕ್ಷಾ ತವ ಚರಣಯೋಃ ಶ್ರೇಯಸೇ ಕಸ್ಯ ನ ಸ್ಯಾತ್ || ೩ ||

ಯತ್ ಸಙ್ಕಲ್ಪಾತ್ ಭವತಿ ಕಮಲೇ ಯತ್ರ ದೇಹಿನ್ಯಮೀಷಾಂ

ಜನ್ಮಸ್ಥೇಮಪ್ರಲಯರಚನಾ ಜಙ್ಗಮಾಜಙ್ಗಮಾನಾಮ್ |

ತತ್ ಕಲ್ಯಾಣಂ ಕಿಮಪಿ ಯಮಿನಾಮೇಕಲಕ್ಷ್ಯಂ ಸಮಾಧೌ

ಪೂರ್ಣಂ ತೇಜಃ ಸ್ಫುರತಿ ಭವತೀ ಪಾದಲಾಕ್ಷಾರಸಾಙ್ಕಮ್ || ೪ ||

ನಿಷ್ಪ್ರತ್ಯೂಹಪ್ರಣಯಘಟಿತಂ ದೇವಿ ನಿತ್ಯಾನಪಾಯಂ

ವಿಷ್ಣುಸ್ತ್ವಂ ಚೇತ್ಯನವಧಿಗುಣಂ ದ್ವನ್ದ್ವಮನ್ಯೋನ್ಯಲಕ್ಷ್ಯಮ್ |

ಶೇಷಶ್ಚಿತ್ತಂ ವಿಮಲಮನಸಾಂ ಮೌಲಯಶ್ಚ ಶ್ರುತೀನಾಂ

ಸಂಪದ್ಯನ್ತೇ ವಿಹರಣವಿಧೌ ಯಸ್ಯ ಶಯ್ಯಾವಿಶೇಷಾಃ || ೫ ||

ಉದ್ದೇಶ್ಯತ್ವಂ ಜನನಿ ಭಜತೋರುಝಿತೋಪಾಧಿಗನ್ಧಂ

ಪ್ರತ್ಯಗ್ರೂಪೇ ಹವಿಷಿ ಯುವಯೋರೇಕಶೇಷಿತ್ವಯೋಗಾತ್ |

ಪದ್ಮೇ ಪತ್ಯುಸ್ತವ ಚ ನಿಗಮೈರ್ನಿತ್ಯಮನ್ವಿಷ್ಯಮಾಣೋ

ನಾವಚ್ಛೇದಂ ಭಜತಿ ಮಹಿಮಾ ನರ್ತಯನ್ ಮಾನಸಂ ನಃ || ೬ ||

ಪಶ್ಯನ್ತೀಷು ಶ್ರುತಿಷು ಪರಿತಃ ಸೂರಿಬೃನ್ದೇನಸಾರ್ಧಂ

ಮಧ್ಯೇಕೃತ್ಯ ತ್ರಿಗುಣಫಲಕಂ ನಿರ್ಮಿತಸ್ಥಾನಭೇದಮ್ |

ವಿಶ್ವಾಧೀಶಪ್ರಣಯಿನಿ ಸದಾ ವಿಭ್ರಮದ್ಯೂತವೃತ್ತೌ

ಬ್ರಹ್ಮೇಶಾದ್ಯಾ ದಧತಿ ಯುವಯೋರಕ್ಷಶಾರ ಪ್ರಚಾರಮ್ || ೭ ||

ಅಸ್ಯೇಶಾನಾ ತ್ವಮಸಿ ಜಗತಃ ಸಂಶ್ರಯನ್ತೀ ಮುಕುನ್ದಂ

ಲಕ್ಷ್ಮೀಃ ಪದ್ಮಾ ಜಲಧಿತನಯಾ ವಿಷ್ಣುಪತ್ನೀನ್ದಿರೇತಿ |

ಯನ್ನಾಮಾನಿ ಶ್ರುತಿಪರಿಪಣಾನ್ಯೇವಮಾವರ್ತಯನ್ತೋ

ನಾವರ್ತನ್ತೇ ದುರಿತಪವನಪ್ರೇರಿತೇ ಜನ್ಮಚಕ್ರೇ || ೮ ||

ತ್ವಾಮೇವಾಹುಃ ಕತಿಚಿದಪರೇ ತ್ವತ್ಪ್ರಿಯಂ ಲೋಕನಾಥಂ

ಕಿಂತೈರನ್ತಃಕಲಹಮಲಿನೈಃ ಕಿಞ್ಚಿದುತ್ತೀರ್ಯಮಗ್ನೈಃ |

ತ್ವತ್ಸಂಪ್ರೀತ್ಯೈ ವಿಹರತಿ ಹರೌ ಸಮ್ಮುಖೀನಾಂ ಶ್ರುತೀನಾಂ

ಭಾವಾರೂಢೌ ಭಗವತಿ ಯುವಾಂ ದೈವತಂ ದಂಪತೀ ನಃ || ೯ ||

ಆಪನ್ನಾರ್ತಿಪ್ರಶಮನವಿಧೌ ಬದ್ಧದೀಕ್ಷಸ್ಯ ವಿಷ್ಣೋಃ

ಆಚಖ್ಯುಸ್ತ್ವಾಂ ಪ್ರಿಯಸಹಚರೀಮೈಕಮತ್ಯೋಪಪನ್ನಾಂ |

ಪ್ರಾದುರ್ಭಾವೈರಪಿ ಸಮತನುಃ ಪ್ರಾಕ್ತಮನ್ವೀಯಸೇ  ತ್ವಮ್

ದೂರೇಕ್ಷಿಪ್ತೈರಿವ ಮಧುರತಾ ದುಗ್ಧರಾಶೇಸ್ತರಙ್ಗೈಃ || ೧೦ ||

ಧತ್ತೇ ಶೋಭಾಂ ಹರಿಮರಕತೇ ತಾವಕೀಮೂರ್ತಿರಾದ್ಯಾ

ತನ್ವೀ ತುಙ್ಗಸ್ತನಭರನತಾ ತಪ್ತಜಾಂಬೂನದಾಭಾ |

ಯಸ್ಯಾಂ ಗಚ್ಛತ್ಯುದಯವಿಲಯೈರ್ನಿತ್ಯಮಾನನ್ದಸಿನ್ಧಾ-

ವಿಚ್ಛಾವೇಗೋಲ್ಲಸಿತಲಹರೀ ವಿಭ್ರಮಂ ವ್ಯಕ್ತಯಸ್ತೇ || ೧೧ ||

ಆಸಂಸಾರಂ ವಿತತಮಖಿಲಂ ವಾಙ್ಮಯಂ ಯದ್ವಿಭೂತಿಃ

ಯದ್ಭ್ರೂಭಙ್ಗಾತ್ ಕುಸುಮಧನುಷಃ ಕಿಙ್ಕರೋ ಮೇರುಧನ್ವಾ |

ಯಸ್ಯಾಂ ನಿತ್ಯಂ ನಯನಶತಕೈರೇಕಲಕ್ಷ್ಯೋ ಮಹೇನ್ದ್ರಃ

ಪದ್ಮೇ ತಾಸಾಂ ಪರಿಣತಿರಸೌ ಭಾವಲೇಶೈಸ್ತ್ವದೀಯೈಃ || ೧೨ ||

ಅಗ್ರೇ ಭರ್ತುಃ ಸರಸಿಜಮಯೇ ಭದ್ರಪೀಠೇ ನಿಷಣ್ಣಾಂ

ಅಮ್ಭೋರಾಶೇರಧಿಗತಸುಧಾಸಂಪ್ಲವಾದುತ್ಥಿತಾಂ ತ್ವಾಮ್ |

ಪುಷ್ಪಾಸಾರ ಸ್ಥಗಿತಭುವನೈಃ ಪುಷ್ಕಲಾವರ್ತಕಾದ್ಯೈಃ

ಕ್~ಳುಪ್ತಾರಮ್ಭಾಃ ಕನಕಕಲಶೈರಭ್ಯಷಿಞ್ಚನ್ ಗಜೇನ್ದ್ರಾಃ || ೧೩ ||

ಆಲೋಕ್ಯ ತ್ವಾಮಮೃತಸಹಜೇ ವಿಷ್ಣುವಕ್ಷಸ್ಥಲಸ್ಥಾಮ್

ಶಾಪಾಕ್ರಾನ್ತಾಃ ಶರಣಮಗಮನ್ ಸಾವರೋಧಾಃ ಸುರೇನ್ದ್ರಾಃ |

ಲಬ್ಧ್ವಾ ಭೂಯಸ್ತ್ರಿಭುವನಮಿದಂ ಲಕ್ಷಿತಂ ತ್ವತ್ ಕಟಾಕ್ಷೈಃ

ಸರ್ವಾಕಾರಸ್ಥಿರಸಮುದಯಾಂ ಸಂಪದಂ ನಿರ್ವಿಶನ್ತಿ || ೧೪ ||

ಆರ್ತತ್ರಾಣವ್ರತಿಭಿರಮೃತಾಸಾರನೀಲಾಮ್ಬುವಾಹೈಃ

ಅಮ್ಭೋಜಾನಾಮುಷಸಿಮಿಷತಾಮನ್ತರಂಗೈರಪಾಂಗೈಃ |

ಯಸ್ಯಾಂ ಯಸ್ಯಾಂ ದಿಶಿ ವಿಹರತೇ ದೇವಿ ದೃಷ್ಟಿಸ್ತ್ವದೀಯಾ

ತಸ್ಯಾಂ ತಸ್ಯಾಮಹಮಹಮಿಕಾಂ ತನ್ವತೇ ಸಂಪದೋಘಾಃ || ೧೫ ||

ಯೋಗಾರಮ್ಭತ್ವರಿತಮನಸೋ ಯುಷ್ಮದೈಕಾನ್ತ್ಯಯುಕ್ತಂ

ಧರ್ಮಂ ಪ್ರಾಪ್ತುಂ ಪ್ರಥಮಮಿಹ ಯೇ ಧಾರಯನ್ತೇ ಧನಾಯಾಮ್ |

ತೇಷಾಂ ಭೂಮೇರ್ಧನಪತಿಗೃಹಾದಂಬರಾದಂಬುಧೇರ್ವಾ

ಧಾರಾ ನಿರ್ಯಾನ್ತ್ಯಧಿಕಮಧಿಕಂ ವಾಞ್ಛಿತಾನಾಂ ವಸೂನಾಮ್ || ೧೬ ||

ಶ್ರೇಯಸ್ಕಾಮಾ ಕಮಲನಿಲಯೇ ಚಿತ್ರಮಾಮ್ನಾಯವಾಚಾಂ

ಚೂಡಾಪೀಡಂ ತವ ಪದಯುಗಂ ಚೇತಸಾ ಧಾರಯನ್ತಃ |

ಛತ್ರಛಾಯಾ ಸುಭಗಶಿರಸಶ್ಚಾಮರಸ್ಮೇರಪಾರ್ಶ್ವಾಃ

ಶ್ಲಾಘಾಶಬ್ದಶ್ರವಣಮುದಿತಾಃ ಸ್ರಗ್ವಿಣಃ ಸಞ್ಚರನ್ತಿ || ೧೭ ||

ಊರೀಕರ್ತುಂ ಕುಶಲಮಖಿಲಂ ಜೇತುಮಾದೀನರಾತೀನ್

ದೂರೀಕರ್ತುಂ ದುರಿತನಿವಹಂ ತ್ಯಕ್ತುಮಾದ್ಯಾಮವಿದ್ಯಾಮ್ |

ಅಂಬ ಸ್ತಂಬಾವಧಿಕ ಜನನಗ್ರಾಮಸೀಮಾನ್ತರೇಖಾಂ

ಆಲಂಬನ್ತೇ ವಿಮಲಮನಸೋ ವಿಷ್ಣುಕಾನ್ತೇ ದಯಾಂ ತೇ  || ೧೮ ||

ಜಾತಾಕಾಙ್ಕ್ಷಾ ಜನನಿ ಯುವಯೋರೇಕಸೇವಾಧಿಕಾರೇ

ಮಾಯಾಲೀಢಂ ವಿಭವಮಖಿಲಂ ಮನ್ಯಮಾನಾಸ್ತೃಣಾಯ |

ಪ್ರೀತ್ಯೈ ವಿಷ್ಣೋಸ್ತವಚ ಕೃತಿನಃ ಪ್ರೀತಿಮನ್ತೋ ಭಜನ್ತೇ

ವೇಲಾಭಙ್ಗಪ್ರಶಮನಫಲಂ ವೈದಿಕಂ ಧರ್ಮಸೇತುಮ್ || ೧೯ ||

ಸೇವೇ ದೇವಿ ತ್ರಿದಶಮಹಿಲಾಮೌಲಿಮಾಲಾರ್ಚಿತಂ ತೇ

ಸಿದ್ಧಿಕ್ಷೇತ್ರಂ ಶಮಿತವಿಪದಾಂ ಸಂಪದಾಂ ಪಾದಪದ್ಮಮ್ |

ಯಸ್ಮಿನ್ನೀಷನ್ನಮಿತಶಿರಸೋ  ಯಾಪಯಿತ್ವಾ ಶರೀರಂ

ವರ್ತಿಷ್ಯನ್ತೇ ವಿತಮಸಿ ಪದೇ ವಾಸುದೇವಸ್ಯ ಧನ್ಯಾಃ || ೨೦ ||

ಸಾನುಪ್ರಾಸಪ್ರಕಟಿತದಯೈಃ ಸಾನ್ದ್ರವಾತ್ಸಲ್ಯದಿಗ್ಧೈಃ

ಅಂಬ ಸ್ನಿಗ್ಧೈರಮೃತಲಹರೀಲಬ್ಧಸಬ್ರಹ್ಮಚರ್ಯೈಃ |

ಘರ್ಮೇ ತಾಪತ್ರಯವಿರಚಿತೇ ಗಾಢತಪ್ತಂ ಕ್ಷಣಂ ಮಾಂ

ಆಕಿಞ್ಚನ್ಯಗ್ಲಪಿತಮನಘೈರಾರ್ದ್ರಯೇಥಾಃ ಕಟಾಕ್ಷೈಃ || ೨೧ ||

ಸಂಪದ್ಯನ್ತೇ ಭವಭಯತಮೋಭಾನವಸ್ತ್ವತ್ ಪ್ರಸಾದಾತ್

ಭಾವಾಃ ಸರ್ವೇ ಭಗವತಿ ಹರೌ ಭಕ್ತಿಮುದ್ವೇಲಯನ್ತಃ |

ಯಾಚೇ ಕಿಂ ತ್ವಾಮಹಮಿಹ ಯತಃ ಶೀತಲೋದಾರಶೀಲಾ

ಭೂಯೋ ಭೂಯೋ ದಿಶಸಿ ಮಹತಾಂ ಮಙ್ಗಲಾನಾಂ ಪ್ರಬನ್ಧಾನ್ || ೨೨ ||

ಮಾತಾ ದೇವಿ ತ್ವಮಸಿ ಭಗವಾನ್ ವಾಸುದೇವಃ ಪಿತಾ ಮೇ

ಜಾತಃ ಸೋಹಂ ಜನನಿ ಯುವಯೋರೇಕಲಕ್ಷ್ಯಂ ದಯಾಯಾಃ |

ದತ್ತೋ ಯುಷ್ಮತ್ ಪರಿಜನತಯಾ ದೇಶಿಕೈರಪ್ಯತಸ್ತ್ವಂ

ಕಿಂ ತೇ ಭೂಯಃ ಪ್ರಿಯಮಿತಿ ಕಿಲ ಸ್ಮೇರವಕ್ತ್ರಾ ವಿಭಾಸಿ || ೨೩ ||

ಕಲ್ಯಾಣಾನಾಮವಿಕಲನಿಧಿಃ ಕಾಪಿ ಕಾರುಣ್ಯಸೀಮಾ

ನಿತ್ಯಾಮೋದಾ ನಿಗಮವಚಸಾಂ ಮೌಲಿಮನ್ದಾರಮಾಲಾ |

ಸಂಪದ್ದಿವ್ಯಾ ಮಧುವಿಜಯಿನಃ ಸನ್ನಿಧತ್ತಾಂ ಸದಾ ಮೇ

ಸೈಷಾ ದೇವೀ ಸಕಲಭುವನಪ್ರಾರ್ಥನಾ ಕಾಮಧೇನುಃ || ೨೪ ||

ಉಪಚಿತಗುರುಭಕ್ತೇರುತ್ಥಿತಂ ವೇಙ್ಕಟೇಶಾತ್

ಕಲಿಕಲುಷನಿವೃತ್ಯೈ ಕಲ್ಪ್ಯಮಾನಂ ಪ್ರಜಾನಾಮ್ |

ಸರಸಿಜನಿಲಯಾಯಾಃ ಸ್ತೋತ್ರಮೇತತ್ ಪಠನ್ತಃ

ಸಕಲಕುಶಲಸೀಮಾಃ ಸರ್ವಭೌಮಾ ಭವನ್ತಿ ||