. ಸದಾಶಿವಾಷ್ಟಕಮ್

. ಸದಾಶಿವಾಷ್ಟಕಮ್

         `

ಸುವರ್ಣಪದ್ಮಿನೀತಟಾನ್ತದಿವ್ಯಹರ್ಮ್ಯವಾಸಿನೇ

ಸುಪರ್ಣವಾಹನಪ್ರಿಯಾಯ ಸೂರ್ಯಕೋಟಿತೇಜಸೇ |

ಅಪರ್ಣಯಾ ವಿಹಾರಿಣೇ ಫಣಾಧರೇನ್ದ್ರಧಾರಿಣೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೧ ||  

ಸತುಙ್ಗಭಙ್ಗಜಹ್ನುಜಾಸುಧಾಂಶುಖಣ್ಡಮೌಲಯೇ

ಪತಙ್ಗಪಙ್ಕಜಾಸುಹೃತ್ಕೃಪೀಟಯೋನಿಚಕ್ಷುಷೇ |

ಭುಜಙ್ಗರಾಜಮಣ್ಡನಾಯ ಪುಣ್ಯಶಾಲಿಬನ್ಧವೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೨ ||

ಚತುರ್ಮುಖಾನನಾರವಿನ್ದವೇದಗೀತಭೂತಯೇ

ಚತುರ್ಭುಜಾನುಜಾಶರೀರಶೋಭಮಾನಮೂರ್ತಯೇ |

ಚತುರ್ವಿಧಾರ್ಥದಾನ-ಶೌಣ್ಡತಾಣ್ಡವಸ್ವರೂಪಿಣೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೩ ||

ಶರನ್ನಿಶಾಕರಪ್ರಕಾಶಮನ್ದಹಾಸಮನ್ಜುಲಾ-

ಧರಪ್ರವಾಲಭಾಸಮಾನವಕ್ತ್ರಮಣ್ಡಲಶ್ರಿಯೇ |

ಕರಸ್ಫುರತ್ಕಪಾಲಮುಕ್ತವಿಷ್ಣುರಕ್ತಪಾಯಿನೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೪ ||

ಸಹಸ್ರಪುಣ್ಡರೀಕಪೂಜನೈಕಶೂನ್ಯದರ್ಶನಾತ್

ಸಹಸ್ರನೇತ್ರಕಲ್ಪಿತಾರ್ಚನಾಚ್ಯುತಾಯ ಭಕ್ತಿತಃ |

ಸಹಸ್ರಭಾನುಮಣ್ಡಲಪ್ರಕಾಶಚಕ್ರದಾಯಿನೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೫ ||

ರಸಾರಥಾಯ ರಮ್ಯಪತ್ರಭೃದ್ರಥಾಙ್ಗಪಾಣಯೇ

ರಸಾಧರೇನ್ದ್ರಚಾಪಶಿಞ್ಜಿನೀಕೃತಾನಿಲಾಶಿನೇ |

ಸ್ವಸಾರಥೀಕೃತಾಬ್ಜಯೋನಿನುನ್ನವೇದವಾಜಿನೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೬ ||

ಅತಿಪ್ರಗಲ್ಭವೀರಭದ್ರಸಿಂಹನಾದಗರ್ಜಿತ-

ಶ್ರುತಿಪ್ರಭೀತದಕ್ಷಯಾಗಭಾಗಿನಾಕಸದ್ಮನಾಮ್ |

ಗತಿಪ್ರದಾಯ ಗರ್ಜಿತಾಖಿಲಪ್ರಪಞ್ಚಸಾಕ್ಷಿಣೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ  || ೭ ||

ಮೃಕಣ್ಡುಸೂನುರಕ್ಷಣಾವಧೂತದಣ್ಡಪಾಣಯೇ

ಸುಗಣ್ಡಮಣ್ಡಲಸ್ಫುರತ್ ಪ್ರಭಾಜಿತಾಮೃತಾಂಶವೇ |

ಅಖಣ್ಡಭೋಗಸಂಪದರ್ಥಲೋಕಭಾವಿತಾತ್ಮನೇ

ಸದಾ ನಮಶ್ಶಿವಾಯ ತೇ ಸದಾಶಿವಾಯ ಶಂಭವೇ || ೮ ||

ಮಧುರಿಪುವಿಧಿಶಕ್ರಮುಖ್ಯದೇವೈ-

ರಪಿ ನಿಯಮಾರ್ಚಿತಪಾದಪಙ್ಕಜಾಯ |

ಕನಕಗಿರಿಶರಾಸನಾಯ ತುಭ್ಯಂ

ರಜತಸಭಾಪತಯೇ ನಮಃ ಶಿವಾಯ || ೯ ||