Tuesday, February 26, 2013

ಶ್ರೀಕೃಷ್ಣಕೇಶಾದಿಪಾದವರ್ಣನಸ್ತೋತ್ರಮ್


         ಶ್ರೀಕೃಷ್ಣಕೇಶಾದಿಪಾದವರ್ಣನಸ್ತೋತ್ರಮ್
            (ನಾರಾಯಣೀಯಾನ್ತರ್ಗತಮ್)

ಅಗ್ರೇ ಪಶ್ಯಾಮಿ ತೇಜೋ ನಿಬಿಡತರಕಲಾಯಾವಲೀಲೋಭನೀಯಂ
ಪೀಯೂಷಾಪ್ಲಾವಿತೋಽಹಂ ತದನು ತದುದರೇ ದಿವ್ಯಕೈಶೋರವೇಷಮ್ |
ತಾರುಣ್ಯಾರಮ್ಭರಮ್ಯಂ ಪರಮಸುಖರಸಾಸ್ವಾದರೋಮಾಞ್ಚಿತಾಙ್ಗೈ-
ರಾವೀತಂ ನಾರದಾದ್ಯೈರ್ವಿಲಸದುಪನಿಷದ್ಸುನ್ದರೀಮಣ್ಡಲೈಶ್ಚ || ||

ನೀಲಾಭಂ ಕುಞ್ಚಿತಾಗ್ರಂ ಘನಮಮಲತರಂ ಸಂಯತಂ ಚಾರುಭಙ್ಗ್ಯಾ
ರತ್ನೋತ್ತಂಸಾಭಿರಾಮಂ ವಲಯಿತಮುದಯಚ್ಚನ್ದ್ರಕೈಃ ಪಿಞ್ಛಜಾಲೈಃ |
ಮನ್ದಾರಸ್ರಙ್ನಿವೀತಂ ತವ ಪೃಥುಕಬರೀಭಾರಮಾಲೋಕಯೇಽಹಂ
ಸ್ನಿಗ್ದ್ಧಶ್ವೇತೋರ್ಧ್ವಪುಣ್ಡ್ರಾಮಪಿ ಸುಲಲಿತಾಂ ಫಾಲಬಾಲೇನ್ದುವೀಥೀಮ್ || ||

ಹೃದ್ಯಂ ಪೂರ್ಣಾನುಕಂಪಾರ್ಣವಮೃದುಲಹರೀ ಚಞ್ಚಲಭ್ರೂವಿಲಾಸೈಃ
ಆನೀಲಸ್ನಿಗ್ದ್ಧಪಕ್ಷ್ಮಾವಲಿ ಪರಿಲಸಿತಂ ನೇತ್ರಯುಗ್ಮಂ ವಿಭೋ ತೇ |
ಸಾನ್ದ್ರಚ್ಛಾಯಂ ವಿಶಾಲಾರುಣಕಮಲದಲಾಕಾರಮಾಮುಗ್ಧತಾರಂ
ಕಾರುಣ್ಯಾಲೋಕಲೀಲಾ ಶಿಶಿರಿತಭುವನಂ ಕ್ಷಿಪ್ಯತಾಂ ಮಯ್ಯನಾಥೇ || ||

ಉತ್ತುಙ್ಗೋಲ್ಲಾಸಿನಾಸಂ ಹರಿಮಣಿಮುಕುರಪ್ರೋಲ್ಲಸದ್ಗಣ್ಡಪಾಲೀ-
ವ್ಯಾಲೋಲತ್ ಕರ್ಣಪಾಶಾಞ್ಚಿತಮಕರಮಣೀ ಕುಣ್ಡಲದ್ವನ್ದ್ವದೀಪ್ರಮ್ |
ಉನ್ಮೀಲದ್ದನ್ತಪಙ್ಕ್ತಿಃ ಸ್ಫುರದರುಣತರಚ್ಛಾಯ ಬಿಮ್ಬಾಧರಾನ್ತಃ
ಪ್ರೀತಿಪ್ರಸ್ಯನ್ದಿಮನ್ದಸ್ಮಿತಮಧುರತರಂ ವಕ್ತ್ರಮುದ್ಭಾಸತಾಂ ಮೇ || ||

ಬಾಹುದ್ವನ್ದ್ವೇನ ರತ್ನಾಙ್ಗುಲಿವಲಯಭೃತಾ ಶೋಣಪಾಣಿಪ್ರವಾಲೇ-
ನೋಪಾತ್ತಾಂ ವೇಣುನಾಲೀಂ ಪ್ರಸೃತನಖಮಯೂಖಾಙ್ಗುಲೀಸಙ್ಗಶಾರಾಮ್ |
ಕೃತ್ವಾ ವಕ್ತ್ರಾರವಿನ್ದೇ ಸುಮಧುರವಿಕಸದ್ರಾಗಮುದ್ಭಾವ್ಯಮಾನೈಃ
ಶಬ್ದಬ್ರಹ್ಮಾಮೃತೈಸ್ತ್ವಂ ಶಿಶಿರಿತಭುವನೈಃ ಸಿಞ್ಚ ಮೇ ಕರ್ಣವೀಥೀಮ್ || ||

ಉತ್ಸರ್ಪತ್ಕೌಸ್ತುಭಶ್ರೀತತಿಭಿರರುಣಿತಂ ಕೋಮಲಂ ಕಣ್ಠದೇಶಂ
ವಕ್ಷಃ ಶ್ರೀವತ್ಸರಮ್ಯಂ ತರಲತರಸಮುದ್ದೀಪ್ತಹಾರಪ್ರತಾನಮ್ |
ನಾನಾವರ್ಣಪ್ರಸೂನಾವಲಿಕಿಸಲಯಿನೀಂ ವನ್ಯಮಾಲಾಂ ವಿಲೋಲ-
ಲ್ಲೋಲಮ್ಬಾಂ ಲಮ್ಬಮಾನಾಮುರಸಿ ತವ ತಥಾ ಭಾವಯೇ ರತ್ನಮಾಲಾಮ್ || ||

ಅಂಗೇ ಪಂಚಾಂಗರಾಗೈರತಿಶಯವಿಕಸತ್ಸೌರಭಾಕೃಷ್ಟಲೋಕಂ
ಲೀನಾನೇಕತ್ರಿಲೋಕೀವಿತತಿಮಪಿ ಕೃಶಾಂ ಬಿಭ್ರತಂ ಮಧ್ಯವಲ್ಲೀಮ್ |
ಶಕ್ರಾಶ್ಮನ್ಯಸ್ತ ತಪ್ತೋಜ್ಜ್ವಲಕನಕನಿಭಂ ಪೀತಚೇಲಂ ದಧಾನಂ
ಧ್ಯಾಯಾಮೋ ದೀಪ್ತರಶ್ಮಿ ಸ್ಫುಟಮಣಿರಶನಾಕಿಙ್ಕಿಣೀ ಮಣ್ಡಿತಂ ತ್ವಾಮ್ || ||

ಊರೂ ಚಾರೂ ತವೋರೂ ಘನಮಸೃಣರುಚೌ ಚಿತ್ತಚೋರೌ ರಮಾಯಾಃ
ವಿಶ್ವಕ್ಷೋಭಂ ವಿಶಙ್ಕ್ಯ ಧ್ರುವಮನಿಶಮುಭೌ ಪೀತಚೇಲಾವೃತಾಙ್ಗೌ |
ಆನಮ್ರಾಣಾಂ ಪುರಸ್ತಾನ್ನ್ಯಸನಧೃತಸ್ಮಸ್ತಾರ್ಥಪಾಲೀಸಮುದ್ಗ-
ಚ್ಛಾಯಂ ಜಾನುದ್ವಯಂ ಕ್ರಮಪೃಥುಲಮನೋಜ್ಞೇ ಜಙ್ಘೇ ನಿಷೇವೇ || ||

ಮಞ್ಜೀರಂ ಮಞ್ಜುನಾದೈರಿವ ಪದಭಜನಂ ಶ್ರೇಯ ಇತ್ಯಾಲಪನ್ತಂ
ಪಾದಾಗ್ರಂ ಭ್ರಾನ್ತಿಮಜ್ಜತ್ ಪ್ರಣತಜನಮನೋಮನ್ದರೋದ್ಧಾರಕೂರ್ಮಮ್ |
ಉತ್ತುಙ್ಗಾತಾಮ್ರರಾಜನ್ನಖರಹಿಮಕರಜ್ಯೋತ್ಸ್ನಯಾ ಚಾಶ್ರಿತಾನಾಮ್
ಸಂತಾಪ ಧ್ವಾನ್ತಹನ್ತ್ರೀಂ ತತಿಮನುಕಲಯೇ ಮಙ್ಗಲಾಮಙ್ಗುಲೀನಾಮ್ || ||

ಯೋಗೀನ್ದ್ರಾಣಾಂ ತ್ವದಙ್ಗೇಷ್ವಧಿಕಸುಮಧುರಂ ಮುಕ್ತಿಭಾಜಾಂ ನಿವಾಸೋ
ಭಾಕ್ತಾನಾಂ ಕಾಮವರ್ಷದ್ಯುತರುಕಿಸಲಯಂ ನಾಥ ತೇ ಪಾದಮೂಲಮ್ |
ನಿತ್ಯಂ ಚಿತ್ತಸ್ಥಿತಂ ಮೇ ಪವನಪುರಪತೇ ಕೃಷ್ಣ ಕಾರುಣ್ಯಸಿನ್ಧೋ
ಹೃತ್ವಾ ನಿಶ್ಶೇಷತಾಪಾನ್ ಪ್ರದಿಶತು ಪರಮಾನನ್ದಸನ್ದೋಹಲಕ್ಷ್ಮೀಮ್  || ೧೦ ||

No comments:

Post a Comment