ಅಂಬಾಸ್ತೋತ್ರಂ

ಅಂಬಾಸ್ತೋತ್ರಂ

   (ಸ್ವಾಮಿ ವಿವೇಕಾನನ್ದಕೃತಂ)

ಕಾ ತ್ವಂ ಶುಭೇ ಶಿವಕರೇ ಸುಖದುಃಖಹಸ್ತೇ

ಆಘೂರ್ಣಿತಂ ಭವಜಲಂ ಪ್ರಬಲೋರ್ಮಿಭಙ್ಗೈಃ |

ಶಾನ್ತಿಂ ವಿಧಾತುಮಿಹ ಕಿಂ ಬಹುಧಾ ವಿಭಗ್ನಾಮ್

ಮಾತಃ ಪ್ರಯತ್ನಪರಮಾಸಿ ಸದೈವ ವಿಶ್ವೇ || ೧ ||

ಸಂಪಾದಯನ್ತ್ಯವಿರತಂ ತ್ವವಿರಾಮವೃತ್ತಾ

ಯಾ ವೈ ಸ್ಥಿತಾ ಕೃತಫಲಂ ತ್ವಕೃತಸ್ಯ ನೇತ್ರೀ |

ಸಾ ಮೇ ಭವತ್ವನುದಿನಂ ವರದಾ ಭವಾನೀ

ಜಾನಾಮ್ಯಹಂ ಧ್ರುವಮಿಯಂ ಧೃತಕರ್ಮಪಾಶಾ || ೨ ||

ಕಿಂ ವಾ ಕೃತಂ ಕಿಮಕೃತಂ ಕ್ವ ಕಪಾಲಲೇಖಃ

ಕಿಂ ಕರ್ಮ ವಾ ಫಲಮಿಹಾಸ್ತಿ ಹಿ ಯಾಂ ವಿನಾ ಭೋಃ |

ಇಚ್ಛಾಗುಣೈರ್ನಿಯಮಿತಾ ನಿಯಮಃ ಸ್ವತನ್ತ್ರೈಃ

ಯಸ್ಯಾಃ ಸದಾ ಭವತು ಸಾ ಶರಣಂ ಮಮಾದ್ಯಾ || ೩ ||

ಸನ್ತಾರಯನ್ತಿ ಜಲಧಿಂ ಜನಿಮೃತ್ಯುಜಾಲಂ

ಸಂಭಾವಯನ್ತ್ಯವಿಕೃತಂ ವಿಕೃತಂ ವಿಭಗ್ನಮ್ |

ಯಸ್ಯಾಃ ವಿಭೂತಯಃ ಇಹಾಮಿತಶಕ್ತಿಪಾಲಾಃ

ನಾಶ್ರಿತ್ಯ ತಾಂ ವದ ಕುತಃ ಶರಣಂ ವ್ರಜಾಮಃ || ೪ ||

ಮಿತ್ರೇ ರಿಪೌ ತ್ವವಿಷಮಂ ತವ ಪದ್ಮನೇತ್ರಮ್

ಸ್ವಸ್ಥೇಽಸುಖೇ ತ್ವವಿತಥಸ್ತವ ಹಸ್ತಪಾತಃ |

ಛಾಯಾ ಮೃತೇಸ್ತವ ದಯಾತ್ವಮೃತಂ ಚ ಮಾತಃ

ಮುಞ್ಚನ್ತು ಮಾಂ ನ ಪರಮೇ ಶುಭದೃಷ್ಟಯಸ್ತೇ || ೫ ||

ಕ್ವಾಮ್ಬಾ ಶಿವಾ ಕ್ವ ಗೃಣನಂ ಮಮ ಹೀನಬುದ್ಧೇಃ

ದೋರ್ಭ್ಯಾಂ ವಿಧರ್ತುಮಿವ ಯಾಮಿ ಜಗದ್ವಿಧಾತ್ರೀಮ್ |

ಚಿನ್ತ್ಯಂ ಶ್ರಿಯಾ ಸುಚರಣಂ ತ್ವಭಯಪ್ರತಿಷ್ಠಂ

ಸೇವಾಪರೈರಭಿನುತಂ ಶರಣಂ ಪ್ರಪದ್ಯೇ || ೬ ||

ಯಾ ಮಾ ಚಿರಾಯ ವಿನಯತ್ಯತಿದುಃಖಮಾರ್ಗೈಃ

ಆಸಿದ್ಧಿತಃ ಸ್ವಕಲಿತೈರ್ಲಲಿತೈರ್ವಿಲಾಸೈಃ |

ಯಾ ಮೇ ಮತಿಂ ಸುವಿದಧೇ ಸತತಂ ಧರಣ್ಯಾಮ್

ಸಾಮ್ಬಾ ಶಿವಾ ಮಮ ಗತಿಃ ಸಫಲೇಽಫಲೇ ವಾ || ೭ ||