ಶ್ರೀಜಗದ್ಧಾತ್ರೀಸ್ತೋತ್ರಮ್

ಶ್ರೀಜಗದ್ಧಾತ್ರೀಸ್ತೋತ್ರಮ್

    (ಶ್ರೀಜಗದ್ಧಾತ್ರೀ ಕಲ್ಪಾಂತರ್ಗತಮ್)     

ಆಧಾರಭೂತೇಚಾಧೇಯೇ  ಧೃತಿರೂಪೇ ಧುರಂಧರೇ |

ಧ್ರುವೇ ಧ್ರುವಪದೇ ಧೀರೇ ಜಗದ್ಧಾತ್ರಿ ನಮೋಽಸ್ತು ತೇ || ೧ ||

ಶಿವಾಕಾರೇ ಶಕ್ತಿರೂಪೇ ಶಕ್ತಿಸ್ಥೇ ಶಕ್ತಿವಿಗ್ರಹೇ |

ಶಾಕ್ತಾಚಾರ ಪ್ರಿಯೇ ದೇವಿ ಜಗದ್ಧಾತ್ರಿ ನಮೋಽಸ್ತು ತೇ || ೨ ||

ಜಯದೇ ಜಗದಾನನ್ದೇ ಜಗದೇಕಪ್ರಪೂಜಿತೇ |

ಜಯ ಸರ್ವಗತೇ ದುರ್ಗೇ ಜಗದ್ಧಾತ್ರಿ ನಮೋಽಸ್ತು ತೇ || ೩ ||

ಸೂಕ್ಷ್ಮಾತಿಸೂಕ್ಷ್ಮರೂಪೇ ಚ ಪ್ರಾಣಾಪಾನಾದಿರೂಪಿಣಿ |

ಭಾವಾಭಾವಸ್ವರೂಪೇ ಚ ಜಗದ್ಧಾತ್ರಿ ನಮೋಽಸ್ತು ತೇ || ೪ ||

ಕಾಲಾದಿರೂಪೇ ಕಾಲೇಶೇ ಕಾಲಕಾಲ ವಿಭೇದಿನಿ |

ಸರ್ವಸ್ವರೂಪೇ ಸರ್ವಜ್ಞೇ ಜಗದ್ಧಾತ್ರಿ ನಮೋಽಸ್ತು ತೇ || ೫ ||

ಮಹಾವಿಘ್ನೇ ಮಹೋತ್ಸಾಹೇ ಮಹಾಮಾಯೇ ವರಪ್ರದೇ |

ಪ್ರಪಞ್ಚಸಾರೇ ಸಾಧ್ವೀಶೇ ಜಗದ್ಧಾತ್ರಿ ನಮೋಽಸ್ತು ತೇ || ೬ ||

ಅಗಮ್ಯೇ ಜಗತಾಮಾದ್ಯೇ ಮಾಹೇಶ್ವರಿ ವರಾಂಗನೇ |

ಅಶೇಷರೂಪೇ ರೂಪಸ್ಥೇ ಜಗದ್ಧಾತ್ರಿ ನಮೋಽಸ್ತು ತೇ || ೭ ||

ತೀರ್ಥಯಜ್ಞತಪೋದಾನಯೋಗಸಾರೇ ಜಗನ್ಮಯಿ |

ತ್ವಮೇವ ಸರ್ವಂ ಸರ್ವಸ್ಥೇ ಜಗದ್ಧಾತ್ರಿ ನಮೋಽಸ್ತು ತೇ || ೮ ||

ದಯಾರೂಪೇ ದಯಾದೃಷ್ಟೇ ದಯಾರ್ದ್ರೇ ದುಃಖಮೋಚನಿ |

ಸರ್ವಾಪತ್ತಾರಿಕೇ ದುರ್ಗೇ ಜಗದ್ಧಾತ್ರಿ ನಮೋಽಸ್ತು ತೇ || ೯ ||

ಅಗಮ್ಯಧಾಮಧಾಮಸ್ಥೇ ಮಹಾಯೋಗೀಶಹೃತ್ಪುರೇ |

ಅಮೇಯಭಾವಕೂಟಸ್ಥೇ ಜಗದ್ಧಾತ್ರಿ ನಮೋಽಸ್ತು ತೇ || ೧೦ ||