ತ್ರಿಪುರಸುನ್ದರ್ಯಷ್ಟಕಮ್

         ತ್ರಿಪುರಸುನ್ದರ್ಯಷ್ಟಕಮ್

        (ಶ್ರೀ ಶಂಕರಾಚಾರ್ಯಕೃತಂ)

ಕದಮ್ಬವನಚಾರಿಣೀಂ ಮುನಿಕದಮ್ಬಕಾದಮ್ಬಿನೀಂ 

ನಿತಮ್ಬಜಿತಭೂಧರಾಂ ಸುರನಿತಮ್ಬಿನೀಸೇವಿತಾಮ್ |

ನವಾಮ್ಬುರುಹಲೋಚನಾಮಭಿನವಾಮ್ಬುದಶ್ಯಾಮಲಾಂ

ತ್ರಿಲೋಚನಕುಟುಮ್ಬಿನೀಂ ತ್ರಿಪುರಸುನ್ದರೀಮಾಶ್ರಯೇ || ೧ ||

ಕದಮ್ಬವನವಾಸಿನೀಂ ಕನಕವಲ್ಲ್ಕೀಧಾರಿಣೀಂ

ಮಹಾರ್ಹಮಣಿಹಾರಿಣೀಂ ಮುಖಸಮುಲ್ಲಸದ್ವಾರುಣೀಮ್ |

ದಯಾವಿಭವಕಾರಿಣೀಂ ವಿಶದರೋಚನಾಚಾರಿಣೀಂ

ತ್ರಿಲೋಚನಕುಟುಮ್ಬಿನೀಂ ತ್ರಿಪುರಸುನ್ದರೀಮಾಶ್ರಯೇ || ೨ ||

ಕದಮ್ಬವನಶಾಲಯಾ ಕುಚಭರೋಲ್ಲಸನ್ಮಾಲಯಾ

ಕುಚೋಪಮಿತಶೈಲಯಾ ಗುರುಕೃಪಾಲಸದ್ವೇಲಯಾ |

ಮದಾರುಣಕಪೋಲಯಾ ಮಧುರಗೀತವಾಚಾಲಯಾ

ಕಯಾಪಿ ಘನನೀಲಯಾ ಕವಚಿತಾ ವಯಂ ಲೀಲಯಾ || ೩ ||

ಕದಮ್ಬವನಮಧ್ಯಗಾಂ ಕನಕಮಣ್ಡಲೋಪಸ್ಥಿತಾಂ

ಷಡಮ್ಬುರುಹವಾಸಿನೀಂ ಸತತಸಿದ್ಧಸೌದಾಮಿನೀಮ್ |

ವಿಡಮ್ಬಿತಜಪಾರುಚಿಂ ವಿಕಚಚನ್ದ್ರಚೂಡಾಮಣಿಂ

ತ್ರಿಲೋಚನಕುಟುಮ್ಬಿನೀಂ ತ್ರಿಪುರಸುನ್ದರೀಮಾಶ್ರಯೇ || ೪ ||

ಕುಚಾಞ್ಚಿತವಿಪಞ್ಚಿಕಾಂ ಕುಟಿಲಕುನ್ತಲಾಲಂಕೃತಾಂ

ಕುಶೇಶಯನಿವಾಸಿನೀಂ  ಕುಟಿಲಚಿತ್ತವಿದ್ವೇಷಿಣೀಮ್ |

ಮದಾರುಣವಿಲೋಚನಾಂ ಮನಸಿಜಾರಿಸಮ್ಮೋಹಿನೀಂ

ಮತಙ್ಗಮುನಿಕನ್ಯಕಾಂ ಮಧುರಭಾಷಿಣೀಮಾಶ್ರಯೇ || ೫ ||

ಸ್ಮರೇತ್ಪ್ರಥಮಪುಷ್ಪಿಣೀಂ  ರುಧಿರಬಿನ್ದುನೀಲಾಮ್ಬರಾಂ

ಗೃಹೀತಮಧುಪತ್ರಿಕಾಂ ಮದವಿಘೂರ್ಣನೇತ್ರಾಞ್ಚಲಾಮ್ |

ಘನಸ್ತನಭರೋನ್ನತಾಂ ಗಲಿತಚೂಲಿಕಾಂ ಶ್ಯಾಮಲಾಂ

ತ್ರಿಲೋಚನಕುಟುಮ್ಬಿನೀಂ  ತ್ರಿಪುರಸುನ್ದರೀಮಾಶ್ರಯೇ || ೬ ||

ಸಕುಙ್ಕುಮವಿಲೇಪನಾಮಲಕಚುಮ್ಬಿಕಸ್ತೂರಿಕಾಂ

ಸಮನ್ದಹಸಿತೇಕ್ಷಣಾಂ ಸಶರಚಾಪಪಾಶಾಙ್ಕುಶಾಮ್ |

ಅಶೇಷಜನಮೋಹಿನೀಮರುಣಮಾಲ್ಯಭೂಷಾಂಬರಾಂ

ಜಪಾಕುಸುಮಭಾಸುರಾಂ ಜಪವಿಧೌ ಸ್ಮರಾಮ್ಯಮ್ಬಿಕಾಮ್ || ೭ ||

ಪುರನ್ದರಪುರನ್ಧ್ರಿಕಾಚಿಕುರಬನ್ಧಸೈರನ್ಧ್ರಿಕಾಂ

ಪಿತಾಮಹಪತಿವ್ರತಾಪಟುಪಟೀರಚರ್ಚಾರತಾಮ್ |

ಮುಕುನ್ದರಮಣೀಮಣೀಲಸದಲಙ್ಕ್ರಿಯಾಕಾರಿಣೀಂ

ಭಜಾಮಿ ಭುವನಾಮ್ಬಿಕಾಂ ಸುರವಧೂಟಿಕಾಚೇಟಿಕಾಮ್ || ೮ ||