ಶ್ರೀರಾಮಪ್ರೇಮಾಷ್ಟಕಮ್

         ಶ್ರೀರಾಮಪ್ರೇಮಾಷ್ಟಕಮ್

          (ಯಾಮುನಾಚಾರ್ಯಕೃತಮ್)

ಶ್ಯಾಮಾಮ್ಬುದಾಭಮರವಿನ್ದವಿಶಾಲನೇತ್ರಂ

ಬನ್ಧೂಕಪುಷ್ಪಸದೃಶಾಧರಪಾಣಿಪಾದಮ್ |

ಸೀತಾಸಹಾಯಮುದಿತಂ ಧೃತಚಾಪಬಾಣಂ

ರಾಮಂ ನಮಾಮಿ ಶಿರಸಾ ರಮಣೀಯವೇಷಮ್ || ೧ ||

ಪಟುಜಲಧರಧೀರಧ್ವಾನಮಾದಾಯ ಚಾಪಂ

ಪವನದಮನಮೇಕಂ ಬಾಣಮಾಕೃಷ್ಯ ತೂಣಾತ್ |

ಅಭಯವಚನದಾಯೀ ಸಾನುಜಃ ಸರ್ವತೋ ಮೇ

ರಣಹತದನುಜೇನ್ದ್ರೋ ರಾಮಚನ್ದ್ರಃ ಸಹಾಯಃ || ೨ ||

ದಶರಥಕುಲದೀಪೋಽಮೇಯಬಾಹುಪ್ರತಾಪೋ

ದಶವದನಸಕೋಪಃ ಕ್ಷಾಲಿತಾಶೇಷಪಾಪಃ |

ಕೃತಸುರರಿಪುತಾಪೋ ನನ್ದಿತಾನೇಕಭೂಪೋ

ವಿಗತತಿಮಿರಪಙ್ಕೋ ರಾಮಚನ್ದ್ರಃ ಸಹಾಯಃ || ೩ ||

ಕುವಲಯದಲನೀಲಃ ಕಾಮಿತಾರ್ಥಪ್ರದೋ ಮೇ

ಕೃತಮುನಿಜನರಕ್ಷೋ ರಕ್ಷಸಾಮೇಕಹನ್ತಾ |

ಅಪಹೃತದುರಿತೋಽಸೌ ನಾಮಮಾತ್ರೇಣ ಪುಂಸಾ-

ಮಖಿಲಸುರನೃಪೇನ್ದ್ರೋ ರಾಮಚನ್ದ್ರಃ ಸಹಾಯಃ || ೪ ||

ಅಸುರಕುಲಕೃಶಾನುರ್ಮಾನಸಾಮ್ಭೋಜಭಾನುಃ

ಸುರನರನಿಕರಾಣಾಮಗ್ರಣೀರ್ಮೇ ರಘೂಣಾಮ್ |

ಅಗಣಿತಗುಣಸೀಮಾ ನೀಲಮೇಘೌಘಧಾಮಾ

ಶಮದಮಿತಮುನೀನ್ದ್ರೋ ರಾಮಚನ್ದ್ರಃ ಸಹಾಯಃ || ೫ ||

ಕುಶಿಕತನಯಯಾಗಂ ರಕ್ಷಿತಾ ಲಕ್ಷ್ಮಣಾಢ್ಯಃ

ಪವನಶರನಿಕಾಯಕ್ಷಿಪ್ತಮಾರೀಚಮಾಯಃ |

ವಿದಲಿತಹರಚಾಪೋ ಮೇದಿನೀನನ್ದನಾಯಾ

ನಯನಕುಮುದಚನ್ದ್ರೋ ರಾಮಚನ್ದ್ರಃ ಸಹಾಯಃ || ೬ ||

ಪವನತನಯಹಸ್ತನ್ಯಸ್ತಪಾದಾಮ್ಬುಜಾತ್ಮಾ

ಕಲಶಭವವಚೋಭಿಃ ಪ್ರಾಪ್ತಮಾಹೇನ್ದ್ರಧನ್ವಾ |

ಅಪರಿಮಿತಶರೌಘೈಃ ಪೂರ್ಣತೂಣೀರಧೀರೋ

ಲಘುನಿಹತಕಪೀನ್ದ್ರೋ ರಾಮಚನ್ದ್ರಃ ಸಹಾಯಃ || ೭ ||

ಕನಕವಿಮಲಕಾನ್ತ್ಯಾ ಸೀತಯಾಲಿಙ್ಗಿತಾಙ್ಗೋ

ಮುನಿಮನುಜವರೇಣ್ಯಃ ಸರ್ವವಾಗೀಶವನ್ದ್ಯಃ |

ಸ್ವಜನನಿಕರಬನ್ಧುರ್ಲೀಲಯಾ ಬದ್ಧಸೇತುಃ

ಸುರಮನುಜಕಪೀನ್ದ್ರೋ ರಾಮಚನ್ದ್ರಃ ಸಹಾಯಃ || ೮ ||

ಯಾಮುನಾಚಾರ್ಯಕೃತಂ ದಿವ್ಯಂ ರಾಮಾಷ್ಟಕಮಿದಂ ಶುಭಮ್ |

ಯಃ ಪಠೇತ್ ಪ್ರಯತೋ ಭೂತ್ವಾ ಸ ಶ್ರೀರಾಮಾನ್ತಿಕಂ ವ್ರಜೇತ್ || ೯ ||