ಶ್ರೀರಾಮಮಙ್ಗಲಾಶಾಸನಮ್

               ಶ್ರೀರಾಮಮಙ್ಗಲಾಶಾಸನಮ್  

            (ಶ್ರೀವರವರಮುನಿಸ್ವಾಮಿಕೃತಮ್ )

ಮಙ್ಗಲಂ ಕೋಸಲೇನ್ದ್ರಾಯ ಮಹನೀಯಗುಣಾಬ್ಧಯೇ |

ಚಕ್ರವರ್ತಿ ತನೂಜಾಯ ಸಾರ್ವಭೌಮಾಯ ಮಙ್ಗಲಮ್ || ೧ ||

ವೇದವೇದಾನ್ತವೇದ್ಯಾಯ ಮೇಘಶ್ಯಾಮಲರೂಪಿಣೇ |

ಪುಂಸಾಂ ಮೋಹನರೂಪಾಯ ಪುಣ್ಯಶ್ಲೋಕಾಯ ಮಙ್ಗಲಮ್ || ೨ ||

ವಿಶ್ವಾಮಿತ್ರಾನ್ತರಙ್ಗಾಯ ಮಿಥಿಲಾನಗರೀಪತೇಃ |

ಭಾಗ್ಯಾನಾಂ ಪರಿಪಾಕಾಯ ಭವ್ಯರೂಪಾಯ ಮಙ್ಗಲಮ್ || ೩ ||

ಪಿತೃಭಕ್ತಾಯ ಸತತಂ ಭ್ರಾತೃಭಿಃ ಸಹ ಸೀತಯಾ |

ನನ್ದಿತಾಖಿಲಲೋಕಾಯ ರಾಮಭದ್ರಾಯ ಮಙ್ಗಲಮ್ ||೪ ||

ತ್ಯಕ್ತಸಾಕೇತವಾಸಾಯ ಚಿತ್ರಕೂಟವಿಹಾರಿಣೇ |

ಸೇವ್ಯಾಯ ಸರ್ವಯಮಿನಾಂ ಧೀರೋದಾತ್ತಾಯ ಮಙ್ಗಲಮ್ || ೫ ||

ಸೌಮಿತ್ರಿಣಾ ಚ ಜಾನಕ್ಯಾ ಚಾಪಬಾಣಾಸಿಧಾರಿಣೇ |

ಸಂಸೇವ್ಯಾಯ ಸದಾ ಭಕ್ತ್ಯಾ ಸ್ವಾಮಿನೇ ಮಮ ಮಙ್ಗಲಮ್ || ೬ ||

ದಣ್ಡಕಾರಣ್ಯವಾಸಾಯ ಖರದೂಷಣಶತ್ರವೇ |

ಗೃಧ್ರರಾಜಾಯ ಭಕ್ತಾಯ ಮುಕ್ತಿದಾಯಾಸ್ತು ಮಙ್ಗಲಮ್ || ೭ ||

ಸಾದರಂ ಶಬರೀದತ್ತಫಲಮೂಲಾಭಿಲಾಷಿಣೇ |

ಸೌಲಭ್ಯ ಪರಿಪೂರ್ಣಾಯ ಸತ್ತ್ವೋದ್ರಿಕ್ತಾಯ ಮಙ್ಗಲಮ್ || ೮ ||

ಹನುಮತ್ಸಮವೇತಾಯ ಹರೀಶಾಭೀಷ್ಟದಾಯಿನೇ |

ವಾಲಿಪ್ರಮಥನಾಯಾಸ್ತು ಮಹಾಧೀರಾಯ ಮಙ್ಗಲಮ್ || ೯ ||

ಶ್ರೀಮತೇ ರಘುವೀರಾಯ ಸೇತೂಲ್ಲಙ್ಘಿತಸಿನ್ಧವೇ |

ಜಿತರಾಕ್ಷಸರಾಜಾಯ ರಣಧೀರಾಯ ಮಙ್ಗಲಮ್ || ೧೦ ||

ವಿಭೀಷಣಕೃತೇ ಪ್ರೀತ್ಯಾ ಲಙ್ಕಾಭೀಷ್ಟಪ್ರದಾಯಿನೇ |

ಸರ್ವಲೋಕಶರಣ್ಯಾಯ ರಾಘವಾಯಾಽಸ್ತು ಮಙ್ಗಲಮ್ || ೧೧ ||

ಅಸಾದ್ಯ ನಗರೀಂ ರಮ್ಯಾಂ ಅಭಿಷಿಕ್ತಾಯ ಸೀತಯಾ |

ರಾಜಾಧಿರಾಜರಾಜಾಯ ರಾಮಭದ್ರಾಯ ಮಙ್ಗಲಮ್ || ೧೨ ||

ಬ್ರಹ್ಮಾದಿದೇವಸೇವ್ಯಾಯ ಬ್ರಹ್ಮಣ್ಯಾಯ ಮಹಾತ್ಮನೇ |

ಜಾನಕೀಪ್ರಾಣನಾಥಾಯ ರಘುನಾಥಾಯ ಮಙ್ಗಲಮ್ || ೧೩ ||

ಶ್ರೀಸೌಮ್ಯಜಾಮಾತೃಮುನೇಃ ಕೃಪಯಾಸ್ಮಾನುಪೇಯುಷೇ |

ಮಹತೇ ಮಮ ನಾಥಾಯ ರಘುನಾಥಾಯ ಮಙ್ಗಲಮ್ || ೧೪ ||

ಮಙ್ಗಲಾಶಾಸನಪರೈಃ ಮದಾಚಾರ್ಯಪುರೋಗಮೈಃ |

ಸರ್ವೈಶ್ಚ ಪೂರ್ವೈರಾಚಾರ್ಯೈಃ ಸತ್ಕೃತಾಯಾಸ್ತು ಮಙ್ಗಲಮ್ || ೧೫ ||

ರಮ್ಯಜಾಮಾತೃಮುನಿನಾ ಮಙ್ಗಲಾಶಾಸನಂ ಕೃತಮ್ |

ತ್ರೈಲೋಕ್ಯಾಧಿಪತಿಃ ಶ್ರೀಮಾನ್ ಕರೋತು ಮಙ್ಗಲಂ ಸದಾ || ೧೬ ||