ಶ್ರೀರಾಮಚನ್ದ್ರಸ್ತುತಿಃ

               ಶ್ರೀರಾಮಚನ್ದ್ರಸ್ತುತಿಃ

         (ಗೋಸ್ವಾಮಿ ತುಲಸೀದಾಸಕೃತಮ್)

ನಮಾಮಿ ಭಕ್ತವತ್ಸಲಂ ಕೃಪಾಲುಶೀಲಕೋಮಲಂ

ಭಜಾಮಿ ತೇ ಪದಾಮ್ಬುಜಂ ಅಕಾಮಿನಾಂ ಸ್ವಧಾಮದಮ್ |

ನಿಕಾಮಶ್ಯಾಮಸುನ್ದರಂ ಭವಾಮ್ಬುನಾಥಮನ್ದರಂ

ಪ್ರಫುಲ್ಲಕಞ್ಜಲೋಚನಂ ಮದಾದಿದೋಷಮೋಚನಮ್ || ೧ ||

ಪ್ರಲಮ್ಬಬಾಹುವಿಕ್ರಮಂ ಪ್ರಭೋಽಪ್ರಮೇಯವೈಭವಂ

ನಿಷಙ್ಗಚಾಪಸಾಯಕಂ ಧರಂ ತ್ರಿಲೋಕನಾಯಕಮ್ |

ದಿನೇಶವಂಶಮಣ್ಡನಂ ಮಹೇಶಚಾಪಖಣ್ಡನಂ

ಮುನೀನ್ದ್ರಸನ್ತರಞ್ಜನಂ ಸುರಾರಿಬೃನ್ದಭಞ್ಜನಮ್ || ೨ ||

ಮನೋಜವೈರಿವನ್ದಿತಂ ಅಜಾದಿದೇವಸೇವಿತಂ

ವಿಶುದ್ಧಬೋಧವಿಗ್ರಹಂ ಸಮಸ್ತದೂಷಣಾಪಹಮ್ |

ನಮಾಮಿ ಇನ್ದಿರಾಪತಿಂ ಸುಖಾಕರಂ ಸತಾಂ ಗತಿಂ

ಭಜೇ ಸಶಕ್ತಿಸಾನುಜಂ ಶಚೀಪತಿಪ್ರಿಯಾನುಜಮ್ || ೩ ||

ತ್ವದಙ್ಘ್ರಿಮೂಲ ಯೇ ನರಾ ಭಜನ್ತಿ ಹೀನಮತ್ಸರಾಃ

ಪತನ್ತಿ ನೋ ಭವಾರ್ಣವೇ ವಿತರ್ಕವೀಚಿಸಙ್ಕುಲೇ |

ವಿವಿಕ್ತವಾಸಿನಃ ಸದಾ ಭಜನ್ತಿ ಮುಕ್ತಯೇ ಮುದಾ

ನಿರಸ್ಯ ಇನ್ದ್ರಿಯಾದಿಕಂ ಪ್ರಯಾನ್ತಿ ತೇ ಗತಿಂ ಸ್ವಕಾಮ್ || ೪ ||

ತ್ವಮೇಕಮದ್ಭುತಂ ಪ್ರಭುಂ ನಿರೀಹಮೀಶ್ವರಂ ವಿಭುಂ

ಜಗತ್ಗುರುಂ ಚ ಶಾಶ್ವತಂ ತುರೀಯಮೇವ ಕೇವಲಮ್ |

ಭಜಾಮಿ ಭಾವವಲ್ಲಭಂ ಕುಯೋಗಿನಾಂ ಸುದುರ್ಲಭಂ

ಸ್ವಭಕ್ತಕಲ್ಪಪಾದಪಂ ಸಮಸ್ತಸೇವ್ಯಮನ್ವಹಮ್ || ೫ ||

ಅನೂಪರೂಪಭೂಪತಿಂ ನತೋಽಹಮುರ್ವಿಜಾಪತಿಂ

ಪ್ರಸೀದ ಮೇ ನಮಾಮಿ ತೇ ಪದಾಬ್ಜಭಕ್ತಿ ದೇಹಿ ಮೇ |

ಪಠನ್ತಿ ಯೇ ಸ್ತವಂ ಇದಂ ನರಾದರೇಣ ತೇ ಪದಂ

ವ್ರಜನ್ತಿ ನಾತ್ರ ಸಂಶಯಸ್ತ್ವದೀಯಭಾವಸಂಯುತಮ್ || ೬ ||