ಬ್ರಹ್ಮದೇವಕೃತಾ ಶ್ರೀರಾಮಸ್ತುತಿಃ

     ಬ್ರಹ್ಮದೇವಕೃತಾ ಶ್ರೀರಾಮಸ್ತುತಿಃ  

  (ಅಧ್ಯಾತ್ಮರಾಮಾಯಣಾಂತರ್ಗತಮ್)

ವನ್ದೇ ದೇವಂ ವಿಷ್ಣುಮಶೇಷಸ್ಥಿತಿಹೇತುಂ

ತ್ವಾಮಧ್ಯಾತ್ಮಜ್ಞಾನಿಭಿರನ್ತರ್ಹೃದಿ ಭಾವ್ಯಮ್ |

ಹೇಯಾಹೇಯದ್ವನ್ದ್ವವಿಹೀನಂ ಪರಮೇಕಂ

ಸತ್ತಾಮಾತ್ರಂ ಸರ್ವಹೃದಿಸ್ಥಂ ದೃಶಿರೂಪಮ್ || ೧ ||

ಪ್ರಾಣಾಪಾನೌ ನಿಶ್ಚಯಬುದ್ಧ್ಯಾ ಹೃದಿ ರುದ್ಧ್ವಾ

ಛಿತ್ತ್ವಾ ಸರ್ವಂ ಸಂಶಯಬನ್ಧಂ ವಿಷಯೌಘಾನ್ |

ಪಶ್ಯನ್ತೀಶಂ ಯಂ ಗತಮೋಹಾ ಯತಯಸ್ತಂ

ವನ್ದೇ ರಾಮಂ ರತ್ನಕಿರೀಟಂ ರವಿಭಾಸಮ್ || ೨ ||

ಮಾಯಾತೀತಂ ಯೋಗವಿಧಾನಂ ಜಗದಾದಿಂ

ಮಾನಾತೀತಂ ಮೋಹವಿನಾಶಂ ಮುನಿವನ್ದ್ಯಮ್ |

ಯೋಗಿಧ್ಯೇಯಂ ಯೋಗವಿಧಾನಂ ಪರಿಪೂರ್ಣಂ

ವನ್ದೇ ರಾಮಂ ರಞ್ಜಿತಲೋಕಂ ರಮಣೀಯಮ್ || ೩ ||

ಭಾವಾಭಾವಪ್ರತ್ಯಯಹೀನಂ ಭವಮುಖ್ಯೈ-

ರ್ಯೋಗಾಸಕ್ತೈರರ್ಚಿತಪಾದಾಂಬುಜಯುಗ್ಮಮ್ |

ನಿತ್ಯಂ ಶುದ್ಧಂ ಬುದ್ಧಮನನ್ತಂ ಪ್ರಣವಾಖ್ಯಂ

ವನ್ದೇ ರಾಮಂ ವೀರಮಶೇಷಾಸುರದಾವಮ್ || ೪ ||

ತ್ವಂ ಮೇ ನಾಥೋ ನಾಥಿತಕಾರ್ಯಾಖಿಲಕಾರೀ

ಮಾನಾತೀತೋ ಮಾಧವರೂಪೋಽಖಿಲಾಧಾರೀ |

ಭಕ್ತ್ಯಾ ಗಮ್ಯೋ ಭಾವಿತರೂಪೋ ಭವಹಾರೀ

ಯೋಗಾಭ್ಯಾಸೈರ್ಭಾವಿತಚೇತಃಸಹಚಾರೀ || ೫ ||

ತ್ವಾಮಾದ್ಯನ್ತಂ ಲೋಕತತೀನಾಂ ಪರಮೀಶಂ

ಲೋಕಾನಾಂ ನೋ  ಲೌಕಿಕಮಾನೈರಧಿಗಮ್ಯಮ್ |

ಭಕ್ತಿಶ್ರದ್ಧಾಭಾವಸಮೇತೈರ್ಭಜನೀಯಂ

ವನ್ದೇ ರಾಮಂ ಸುನ್ದರಮಿನ್ದೀವರನೀಲಮ್ || ೭ ||

ಕೋ ವಾ ಜ್ಞಾತುಂ ತ್ವಾಮತಿಮಾನಂ ಗತಮಾನಂ

ಮಾಯಾ ಸಕ್ತೋ ಮಾಧವ ಶಕ್ತೋ ಮುನಿಮಾನ್ಯಮ್ |

ವೃನ್ದಾರಣ್ಯೇ ವನ್ದಿತವೃನ್ದಾರಕವೃನ್ದಂ

ವನ್ದೇ ರಾಮಂ ಭವಮುಖವನ್ದ್ಯಂ ಸುಖಕನ್ದಮ್ || ೮ ||

ನಾನಾಶಾಸ್ತ್ರೈರ್ವೇದಕದಮ್ಬೈಃ ಪ್ರತಿಪಾದ್ಯಂ

ನಿತ್ಯಾನನ್ದಂ ನಿರ್ವಿಷಯಜ್ಞಾನಮನಾದಿಮ್ |

ಮತ್ಸೇವಾರ್ಥಂ ಮಾನುಷಭಾವಂ ಪ್ರತಿಪನ್ನಂ

ವನ್ದೇ ರಾಮಂ ಮರಕತವರ್ಣಂ ಮಥುರೇಶಮ್ || ೯ ||

ಶ್ರದ್ಧಾಯುಕ್ತೋ ಯಃ ಪಠತೀಮಂ ಸ್ತವಮಾದ್ಯಂ

ಬ್ರಾಹ್ಮಂ ಬ್ರಹ್ಮಜ್ಞಾನವಿಧಾನಂ ಭುವಿ ಮರ್ತ್ಯಃ |

ರಾಮಂ ಶ್ಯಾಮಂ ಕಾಮಿತಕಾಮಪ್ರದಮೀಶಂ

ಧ್ಯಾತ್ವಾ ಪಾತಕಜಾಲೈರ್ವಿಗತಃ ಸ್ಯಾತ್ || ೧೦ ||