ಜಟಾಯುಕೃತಶ್ರೀರಾಮಸ್ತೋತ್ರಮ್

           ಜಟಾಯುಕೃತಶ್ರೀರಾಮಸ್ತೋತ್ರಮ್

         (ಅಧ್ಯಾತ್ಮರಾಮಾಯ‘ಣಾನ್ತರ್ಗತಮ್)

 ಜಟಾಯುರುವಾಚ

 ಅಗಣಿತಗುಣಮಪ್ರಮೇಯಮಾದ್ಯಂ ಸಕಲಜಗತ್ಸ್ಥಿತಿಸಂಯಮಾದಿಹೇತುಮ್ |

ಉಪರಮಪರಮಂ ಪರಾತ್ಮಭೂತಂ ಸತತಮಹಂ ಪ್ರಣತೋಽಸ್ಮಿ ರಾಮಚನ್ದ್ರಮ್ || ೨ ||

ನಿರವಧಿಸುಖಮಿನ್ದಿರಾಕಟಾಕ್ಷಂ ಕ್ಷಪಿತಸುರೇನ್ದ್ರಚತುರ್ಮುಖಾದಿದುಃಖಮ್ |

ನರವರಮನಿಶಂ ನತೋಽಸ್ಮಿ ರಾಮಂ ವರದಮಹಂ ವರಚಾಪಬಾಣಹಸ್ತಮ್ || ೨ ||

ತ್ರಿಭುವನಕಮನೀಯರೂಪಮೀಡ್ಯಂ ರವಿಶತಭಾಸುರಮೀಹಿತಪ್ರದಾನಮ್ |

ಶರಣದಮನಿಶಂ ಸುರಾಗಮೂಲೇ ಕೃತನಿಲಯಂ ರಘುನನ್ದನಂ ಪ್ರಪದ್ಯೇ || ೩ ||

ಭವವಿಪಿನದವಾಗ್ನಿನಾಮಧೇಯಂ ಭವಮುಖದೈವತದೈವತಂ ದಯಾಲುಮ್ |

ದನುಜಪತಿಸಹಸ್ರಕೋಟಿನಾಶಂ ರವಿತನಯಾಸದೃಶಂ ಹರಿಂ ಪ್ರಪದ್ಯೇ || ೪ ||

ಅವಿರತಭವಭಾವನಾತಿದೂರಂ ಭವವಿಮುಖೈರ್ಮುನಿಭಿಸ್ಸದೈವ ದೃಶ್ಯಮ್ |

ಭವಜಲಧಿಸುತಾರಣಾಙ್ಘ್ರಿಪೋತಂ ಶರಣಮಹಂ ರಘುನನ್ದನಂ ಪ್ರಪದ್ಯೇ || ೫ ||

ಗಿರಿಶಗಿರಿಸುತಾಮನೋನಿವಾಸಂ ಗಿರಿವರಧಾರಿಣಮೀಹಿತಾಭಿರಾಮಮ್ |

ಸುರವರದನುಜೇನ್ದ್ರಸೇವಿತಾಙ್ಘ್ರಿಂ ಸುರವರದಂ ರಘುನಾಯಕಂ ಪ್ರಪದ್ಯೇ || ೬ ||

ಪರಧನಪರದಾರವರ್ಜಿತಾನಾಂ ಪರಗುಣಭೂತಿಷು ತುಷ್ಟಮಾನಸಾನಾಮ್ |

ಪರಹಿತನಿರತಾತ್ಮನಾಂ ಸುಸೇವ್ಯಂ ರಘುವರಮಮ್ಬುಜಲೋಚನಂ ಪ್ರಪದ್ಯೇ || ೭ ||

ಸ್ಮಿತರುಚಿರವಿಕಾಸಿತಾನನಾಬ್ಜಮತಿಸುಲಭಂ ಸುರರಾಜನೀಲನೀಲಮ್ |

ಸಿತಜಲರುಹಚಾರುನೇತ್ರಶೋಭಂ ರಘುಪತಿಮೀಶಗುರೋರ್ಗುರುಂ ಪ್ರಪದ್ಯೇ || ೮ ||

ಹರಿಕಮಲಜಶಂಭುರೂಪಭೇದಾತ್ತ್ವಮಿಹ ವಿಭಾಸಿ ಗುಣತ್ರಯಾನುವೃತ್ತಃ |

ರವಿರಿವ ಜಲಪೂರಿತೋದಪಾತ್ರೇಷ್ವಮರಪತಿಸ್ತುತಿಪಾತ್ರಮೀಶಮೀಡೇ || ೯ ||

ರತಿಪತಿಶತಕೋಟಿಸುನ್ದರಾಙ್ಗಂ ಶತಪಥಗೋಚರಭಾವನಾವಿದೂರಮ್ |

ಯತಿಪತಿಹೃದಯೇ ಸದಾ ವಿಭಾತಂ ರಘುಪತಿಮಾರ್ತಿಹರಂ ಪ್ರಭುಂ ಪ್ರಪದ್ಯೇ || ೧೦ ||

ಇತ್ಯೇವಂ ಸ್ತುವತಸ್ತಸ್ಯ ಪ್ರಸನ್ನೋಽಭೂದ್ರಘೂತ್ತಮಃ |

ಉವಾಚ ಗಚ್ಛ ಭದ್ರಂ ತೇ ಮಮ ವಿಷ್ಣೋಃ ಪರಂ ಪದಮ್ || ೧೨ ||

ಶೃಣೋತಿ ಯ ಇದಂ ಸ್ತೋತ್ರಂ ಲಿಖೇದ್ವಾ ನಿಯತಃ ಪಠೇತ್ |

ಸ ಯಾತಿ ಮಮ ಸಾರೂಪ್ಯಂ ಮರಣೇ ಮತ್ಸ್ಮೃತಿಂ ಲಭೇತ್ || ೧೩ ||

ಇತಿ ರಾಘವಭಾಷಿತಂ ತದಾ ಶ್ರುತವಾನ್ ಹರ್ಷಸಮಾಕುಲೋ ದ್ವಿಜಃ

ರಘುನನ್ದನಸಾಮ್ಯಮಾಸ್ಥಿತಃ ಪ್ರಯಯೌ ಬ್ರಹ್ಮಸುಪೂಜಿತಂ ಪದಮ್ || ೧೪ ||