ಇನ್ದ್ರಕೃತಶ್ರೀರಾಮಸ್ತೋತ್ರಮ್

            ಇನ್ದ್ರಕೃತಶ್ರೀರಾಮಸ್ತೋತ್ರಮ್

            (ಅಧ್ಯಾತ್ಮರಾಮಾಯಣಾನ್ತರ್ಗತಮ್)

ಇನ್ದ್ರ ಉವಾಚ

ಭಜೇಽಹಂ ಸದಾ ರಾಮಮಿನ್ದೀವರಾಭಂ

ಭವಾರಣ್ಯದಾವಾನಲಾಭಾಭಿಧಾನಮ್ |

ಭವಾನೀಹೃದಾ ಭಾವಿತಾನನ್ದರೂಪಂ

ಭವಾಭಾವಹೇತುಂ ಭವಾದಿಪ್ರಪನ್ನಮ್ || ೧ ||

ಸುರಾನೀಕದುಃಖೌಘನಾಶೈಕಹೇತುಂ

ನರಾಕಾರದೇಹಂ ನಿರಾಕಾರಮೀಡ್ಯಮ್ |

ಪರೇಶಂ ಪರಾನನ್ದರೂಪಂ ವರೇಣ್ಯಂ

ಹರಿಂ ರಾಮಮೀಶಂ ಭಜೇ ಭಾರನಾಶಮ್ || ೨ ||

ಪ್ರಪನ್ನಾಖಿಲಾನನ್ದದೋಹಂ ಪ್ರಪನ್ನಂ

ಪ್ರಪನ್ನಾರ್ತಿನಿಃಶೇಷನಾಶಾಭಿಧಾನಮ್ |

ತಪೋಯೋಗಯೋಗೀಶಭಾವಾಭಿಭಾವ್ಯಂ

ಕಪೀಶಾದಿಮಿತ್ರಂ ಭಜೇ ರಾಮಮಿತ್ರಮ್ || ೩ ||

ಸದಾ ಭೋಗಭಾಜಾಂ ಸುದೂರೇ ವಿಭಾನ್ತಂ

ಸದಾ ಯೋಗಭಾಜಾಮದೂರೇ ವಿಭಾನ್ತಮ್ |

ಚಿದಾನನ್ದಕನ್ದಂ ಸದಾ ರಾಘವೇಶಂ

ವಿದೇಹಾತ್ಮಜಾನನ್ದರೂಪಂ ಪ್ರಪದ್ಯೇ || ೪ ||

ಮಹಾಯೋಗಮಾಯಾವಿಶೇಷಾನುಯುಕ್ತೋ

ವಿಭಾಸೀಶ ಲೀಲಾನರಾಕಾರವೃತ್ತಿಃ |

ತ್ವದಾನನ್ದಲೀಲಾಕಥಾಪೂರ್ಣಕರ್ಣಾಃ

ಸದಾನನ್ದರೂಪಾ ಭವನ್ತೀಹ ಲೋಕೇ || ೫ ||

ಅಹಂ ಮಾನಪಾನಾಭಿಮತ್ತಪ್ರಮತ್ತೋ

ನ ವೇದಾಖಿಲೇಶಾಭಿಮಾನಾಭಿಮಾನಃ |

ಇದಾನೀಂ ಭವಾತ್ಪಾದಪದ್ಮಪ್ರಸಾದಾತ್

ತ್ರಿಲೋಕಾಧಿಪತ್ಯಾಭಿಮಾನೋ ವಿನಷ್ಟಃ || ೬ ||

ಸ್ಫುರದ್ರತ್ನಕೇಯೂರಹಾರಾಭಿರಾಮಂ

ಧರಾಭಾರಭೂತಾಸುರಾನೀಕದಾವಮ್ |

ಶರಚ್ಚನ್ದ್ರವಕ್ತ್ರಂ ಲಸದ್ಪದ್ಮನೇತ್ರಂ

ದುರಾವಾರಪಾರಂ ಭಜೇ ರಾಘವೇಶಮ್ || ೭ ||

ಸುರಾಧೀಶನೀಲಾಭ್ರನೀಲಾಙ್ಗಕಾನ್ತಿಂ

ವಿರಾಧಾದಿರಕ್ಷೋವಧಾಲ್ಲೋಕಶಾನ್ತಿಮ್ |

ಕಿರೀಟಾದಿಶೋಭಂ ಪುರಾರಾತಿಲಾಭಂ

ಭಜೇ ರಮಚನ್ದ್ರಂ ರಘೂಣಾಮಧೀಶಮ್ || ೮ ||

ಲಸಚ್ಚನ್ದ್ರಕೋಟಿಪ್ರಕಾಶಾದಿಪೀಠೇ

ಸಮಾಸೀನಮಙ್ಕೇ ಸಮಾಧಾಯ ಸೀತಾಮ್ |

ಸ್ಫುರದ್ಧೇಮವರ್ಣಾಂ ತಡಿತ್ಪುಞ್ಜಭಾಸಾಂ

ಭಜೇ ರಾಮಚನ್ದ್ರಂ ನಿವೃತ್ತಾರ್ತಿತನ್ದ್ರಮ್ || ೯ ||