ರಾಮಾಷ್ಟಕಮ್

                                     ರಾಮಾಷ್ಟಕಮ್

ಕೃತಾರ್ತದೇವವನ್ದನಂ ದಿನೇಶವಂಶನನ್ದನಮ್ |

ಸುಶೋಭಿಭಾಲಚನ್ದನಂ ನಮಾಮಿ ರಾಮಮೀಶ್ವರಮ್ || ೧ ||

ಮುನೀನ್ದ್ರಯಜ್ಞಕಾರಕಂ ಶಿಲಾವಿಪತ್ತಿಹಾರಕಮ್ |

ಮಹಾಧನುರ್ವಿದಾರಕಂ ನಮಾಮಿ ರಾಮಮೀಶ್ವರಮ್ || ೨ ||

ಸ್ವತಾತವಾಕ್ಯಕಾರಿಣಂ ತಪೋವನೇ ವಿಹಾರಿಣಮ್ |

ಕರೇ ಸುಚಾಪಧಾರಿಣಂ ನಮಾಮಿ ರಾಮಮೀಶ್ವರಮ್ || ೩ ||

ಕುರಙ್ಗಮುಕ್ತಸಾಯಕಂ ಜಟಾಯುಮೋಕ್ಷದಾಯಕಮ್ |

ಪ್ರವಿದ್ಧಕೀಶನಾಯಕಂ ನಮಾಮಿ ರಾಮಮೀಶ್ವರಮ್ || ೪ ||

ಪ್ಲವಙ್ಗಸಙ್ಗಸಮ್ಮತಿಂ ನಿಬದ್ಧನಿಮ್ನಗಾಪತಿಮ್ |

ದಶಾಸ್ಯವಂಶಸಙ್ಕ್ಷತಿಂ ನಮಾಮಿ ರಾಮಮೀಶ್ವರಮ್ || ೫ ||

ವಿದೀನದೇವಹರ್ಷಣಂ ಕಪೀಪ್ಸಿತಾರ್ಥವರ್ಷಣಮ್ |

ಸ್ವಬನ್ಧುಶೋಕಕರ್ಷಣಂ ನಮಾಮಿ ರಾಮಮೀಶ್ವರಮ್ || ೬ ||

ಗತಾರಿರಾಜ್ಯರಕ್ಷಣಂ ಪ್ರಜಾಜನಾರ್ತಿಭಕ್ಷಣಮ್ |

ಕೃತಾಸ್ತಮೋಹಲಕ್ಷಣಂ ನಮಾಮಿ ರಾಮಮೀಶ್ವರಮ್ || ೭ ||

ಹೃತಾಖಿಲಾಚಲಾಭರಂ ಸ್ವಧಾಮನೀತನಾಗರಮ್ |

ಜಗತ್ತಮೋದಿವಾಕರಂ ನಮಾಮಿ ರಾಮಮೀಶ್ವರಮ್ || ೮ ||

ಇದಂ ಸಮಾಹಿತಾತ್ಮನಾ ನರೋ ರಘೂತ್ತಮಾಷ್ಟಕಮ್ |

ಪಠನ್ನಿರನ್ತರಂ ಭಯಂ ಭವೋದ್ಭವಂ ನ ವಿನ್ದತೇ || ೯ ||