ಶ್ರೀ ರಾಧಾಕೃಷ್ಣಸ್ತೋತ್ರಮ್(ನಾರದಪಾಞ್ಚರಾತ್ರಾನ್ತರ್ಗತಮ್)

 ಶ್ರೀ ರಾಧಾಕೃಷ್ಣಸ್ತೋತ್ರಮ್(ನಾರದಪಾಞ್ಚರಾತ್ರಾನ್ತರ್ಗತಮ್)

ವನ್ದೇ ನವಘನಶ್ಯಾಮಂ ಪೀತಕೌಶೇಯವಾಸಸಮ್ |

ಸಾನನ್ದಂ ಸುನ್ದರಂ ಶುದ್ಧಂ ಶ್ರೀಕೃಷ್ಣಂ ಪ್ರಕೃತೇಃ ಪರಮ್ || ೧ ||

ರಾಧೇಶಂ ರಾಧಿಕಾಪ್ರಾಣವಲ್ಲಭಂ ವಲ್ಲವೀಸುತಮ್ |

ರಾಧಾಸೇವಿತಪಾದಾಬ್ಜಂ ರಾಧಾವಕ್ಷಸ್ಥಲಸ್ಥಿತಮ್ || ೨ ||

ರಾಧಾನುಗಂ ರಾಧಿಕೇಷ್ಟಂ ರಾಧಾಪಹೃತಮಾನಸಮ್ |

ರಾಧಾಧಾರಂ ಭವಾಧಾರಂ ಸರ್ವಾಧಾರಂ ನಮಾಮಿ ತಮ್ || ೩ ||

ರಾಧಾಹೃತ್ಪದ್ಮಮಧ್ಯೇ ಚ ವಸನ್ತಂ ಸನ್ತತಂ ಶುಭಮ್ |

ರಾಧಾಸಹಚರಂ ಶಶ್ವತ್ ರಾಧಾಜ್ಞಾಪರಿಪಾಲಕಮ್ || ೪ ||

ಧ್ಯಾಯನ್ತೇ ಯೋಗಿನೋ ಯೋಗಾನ್ ಸಿದ್ಧಾಃ ಸಿದ್ಧೇಶ್ವರಾಶ್ಚ ಯಮ್ |

ತಂ ಧ್ಯಾಯೇತ್ ಸತತಂ ಶುದ್ಧಂ ಭಗವನ್ತಂ ಸನಾತನಮ್ || ೫ ||

ನಿರ್ಲಿಪ್ತಂ ಚ ನಿರೀಹಂ ಚ ಪರಮಾತ್ಮಾನಮೀಶ್ವರಮ್ |

ನಿತ್ಯಂ ಸತ್ಯಂ ಚ ಪರಮಂ ಭಗವನ್ತಂ ಸನಾತನಮ್ || ೬ ||

ಯಃ ಸೃಷ್ಟೇರಾದಿಭೂತಂ ಚ ಸರ್ವಬೀಜಂ ಪರಾತ್ಪರಮ್ |

ಯೋಗಿನಸ್ತಂ ಪ್ರಪದ್ಯನ್ತೇ ಭಗವನ್ತಂ ಸನಾತನಮ್ || ೭ ||

ಬೀಜಂ ನಾನಾವತಾರಾಣಾಂ ಸರ್ವಕಾರಣಕಾರಣಮ್ |

ವೇದವೇದ್ಯಂ ವೇದಬೀಜಂ ವೇದಕಾರಣಕಾರಣಮ್ || ೮ ||

ಯೋಗಿನಸ್ತಂ ಪ್ರಪದ್ಯನ್ತೇ ಭಗವನ್ತಂ ಸನಾತನಮ್ |

ಗನ್ಧರ್ವೇಣ ಕೃತಂ ಸ್ತೋತ್ರಂ ಯಃ ಪಠೇತ್ ಪ್ರಯತಃ ಶುಚಿಃ |

ಇಹೈವ ಜೀವನ್ಮುಕ್ತಶ್ಚ ಪರಂ ಯಾತಿ ಪರಾಂ ಗತಿಮ್ || ೯ ||

ಹರಿಭಕ್ತಿಂ ಹರೇರ್ದಾಸ್ಯಂ ಗೋಲೋಕಂ ಚ ನಿರಾಮಯಮ್ |

ಪಾರ್ಷದಪ್ರವರತ್ವಂ ಚ ಲಭತೇ ನಾತ್ರ ಸಂಶಯಃ || ೧೦ ||