ಶ್ರೀರಾಘವಾಷ್ಟಕಮ್

              ಶ್ರೀರಾಘವಾಷ್ಟಕಮ್

ರಾಮ ರಾಮ ನಮೋಽಸ್ತು ತೇ ಜಯ ರಾಮಭದ್ರ ನಮೋಽಸ್ತು ತೇ

ರಾಮಚನ್ದ್ರ ನಮೋಽಸ್ತು ತೇ ಜಯ ರಾಘವಾಯ ನಮೋಽಸ್ತು ತೇ |

ದೇವದೇವ ನಮೋಽಸ್ತು ತೇ ಜಯ ದೇವರಾಜ ನಮೋಽಸ್ತು ತೇ

ವಾಸುದೇವ ನಮೋಽಸ್ತು ತೇ ಜಯ ವೀರರಾಜ ನಮೋಽಸ್ತು ತೇ || ೧ ||

ರಾಘವಂ ಕರುಣಾಕರಂ ಮುನಿಸೇವಿತಂ ಸುರವನ್ದಿತಂ

ಜಾನಕೀವದನಾರವಿನ್ದದಿವಾಕರಂ ಗುಣಭಾಜನಮ್ |

ವಾಲಿಸೂನುಭೃದೀಕ್ಷಣಂ ಹನುಮತ್ಪ್ರಿಯಂ ಕಮಲೇಕ್ಷಣಂ

ಯಾತುಧಾನಭಯಂಕರಂ ಪ್ರಣಮಾಮಿ ರಾಘವಕುಞ್ಜರಮ್ || ೨ ||

ಮೈಥಿಲೀಕುಚಭೂಷಣಾಮಲನೀಲಮೌಕ್ತಿಕಮೀಶ್ವರಂ

ರಾವಣಾನುಜಪಾಲನಂ ರಘುಪುಙ್ಗವಂ ಮಮ ದೈವತಮ್ |

ಮೇದಿನೀತನಯಾಮುಖಾಮ್ಬುಜಬೋಧಕಾರಿದಿವಾಕರಂ

ಸೂರ್ಯವಂಶವಿವರ್ದ್ಧನಂ ಪ್ರಣಮಾಮಿ ರಾಘವಕುಞ್ಜರಮ್ || ೩ ||

ಹೇಮಕುಣ್ಡಲಮಣ್ಡಿತಾಮಲಗಣ್ಡದೇಶಮರಿನ್ದಮಂ

ಶಾತಕುಂಭಮಯೂರನೇತ್ರವಿಭೂಷಣೇನ ವಿಭೂಷಿತಮ್ |

ಚಾರುನೂಪುರಹಾರಕೌಸ್ತುಭಕರ್ಣಭೂಷಣಭೂಷಿತಂ

ಭಾನುವಂಶವಿವರ್ದ್ಧನಂ ಪ್ರಣಮಾಮಿ ರಾಘವಕುಞ್ಜರಮ್ || ೪ ||

ದಣ್ಡಕಾಖ್ಯವನೇ ರತಂ ಸುರಸಿದ್ಧಯೋಗಿಗಣಾಶ್ರಯಂ

ಶಿಷ್ಟಪಾಲನತತ್ಪರಂ ಧೃತಿಶಾಲಿವಾಲಿಕೃತಸ್ತುತಿಮ್ |

ಕುಂಭಕರ್ಣಭುಜಾಭುಜಙ್ಗವಿಕರ್ತನೇ ಸುವಿಶಾರದಂ

ಲಕ್ಷ್ಮಣಾನುಜವತ್ಸಲಂ ಪ್ರಣಮಾಮಿ ರಾಘವಕುಞ್ಜರಮ್ || ೫ ||

ಕೇತಕೀಕರವೀರಜಾತಿಸುಗನ್ಧಮಾಲ್ಯಸುಶೋಭಿತಂ

ಶ್ರೀಧರಂ ಮಿಥಿಲಾತ್ಮಜಾಕುಚಕುಙ್ಕುಮಾರುಣವಕ್ಷಸಂ |

ದೇವದೇವಮಶೇಷಭೂತಮನೋಹರಂ ಜಗತಾಂ ಪತಿಂ

ದಾಸಭೂತಜನಾವನಂ ಪ್ರಣಮಾಮಿ ರಾಘವಕುಞ್ಜರಮ್ || ೬ ||

ಯಾಗದಾನಸಮಾಧಿಹೋಮಜಪಾದಿಕರ್ಮಕರೈರ್ದ್ವಿಜೈಃ

ವೇದಪಾರಗತೈರಹರ್ನಿಶಮಾದರೇಣ ಸುಪೂಜಿತಂ |

ತಾಟಕಾವಧಧೀರಮಙ್ಗದನಾಥವಾಲಿನಿಷೂದನಂ

ಪೈತೃಕೋದಿತಪಾಲಕಂ ಪ್ರಣಮಾಮಿ ರಾಘವಕುಞ್ಜರಮ್ || ೭ ||

ಲೀಲಯಾ ಖರದೂಷಣಾದಿನಿಶಾಚರಾಸುವಿನಾಶಿನಂ

ರಾವಣಾನ್ತಕಮಚ್ಯುತಂ ಹರಿಯೂಥಕೋಟಿಸಮಾವೃತಂ |

ನೀರಜಾನನಮಮ್ಬುಜಾಙ್ಘ್ರಿಯುಗಂ ಹರಿಂ ಭುವನಾಶ್ರಯಂ

ದೇವಕಾರ್ಯವಿಚಕ್ಷಣಂ ಪ್ರಣಮಾಮಿ ರಾಘವಕುಞ್ಜರಮ್ || ೮ ||

ಕೌಶಿಕೇನ ಸುಶಿಕ್ಷಿತಾಸ್ತ್ರಕಲಾಪಮಾಯತಲೋಚನಂ

ಚಾರುಹಾಸಮನಾಥಬನ್ಧುಮಶೇಷಲೋಕನಿವಾಸಿನಂ |

ವಾಸವಾದಿಸುರಾರಿರಾವಣಶಾಸನಂ ಚ ಪರಾಂ ಗತಿಂ

ನೀಲಮೇಘನಿಭಾಕೃತಿಂ ಪ್ರಣಮಾಮಿ ರಾಘವಕುಞ್ಜರಮ್ || ೯ ||

ರಾಘವಾಷ್ಟಕಮಿಷ್ಟಸಿದ್ಧಿದಮಚ್ಯುತಾಲಯಸಾಧಕಂ

ಭುಕ್ತಿಮುಕ್ತಿಫಲಪ್ರದಂ ಧನಧಾನ್ಯಪುತ್ರವಿವರ್ಧನಮ್ |

ರಾಮಚನ್ದ್ರಕೃಪಾಕಟಾಕ್ಷದಮಾದರೇಣ ಸದಾ ಪಠೇತ್

ರಾಮಚನ್ದ್ರಪದಾಮ್ಬುಜದ್ವಯಸನ್ತತಾರ್ಪಿತಮಾನಸಃ || ೧೦ ||

ನಿಗಮಸರಸಿರತ್ನಂ ನಿತ್ಯಮಾಸಕ್ತರತ್ನಂ

ನಿಖಿಲಸುಕೃತಿರತ್ನಂ ಜಾನಕೀರೂಪರತ್ನಮ್ |

ಭುವನವಲಯರತ್ನಂ ಭೂಭೃತಾಮೇಕರತ್ನಂ

ಪ್ರಕೃತಿಸುಲಭರತ್ನಂ ಮೈಥಿಲೀಪ್ರಾಣರತ್ನಮ್ || ೧೧ |