ಶ್ರೀಕೃಷ್ಣಮಾನಸಪೂಜಾಸ್ತೋತ್ರಮ್

.      ಶ್ರೀಕೃಷ್ಣಮಾನಸಪೂಜಾಸ್ತೋತ್ರಮ್

     (ಶ್ರೀಶಂಕರಾಚಾರ್ಯವಿರಚಿತಮ್)

 

ಹೃದಂಭೋಜೇ ಕೃಷ್ಣಸ್ಸಜಲಜಲದಶ್ಯಾಮಲತನುಃ

ಸರೋಜಾಕ್ಷಃ ಸ್ರಗ್ವೀ ಮಕುಟಕಟಕಾದ್ಯಾಭರಣವಾನ್ |

ಶರದ್ರಾಕಾನಾಥಪ್ರತಿಮವದನಃ ಶ್ರೀಮುರಲಿಕಾಂ

ವಹನ್ ಧ್ಯೇಯೋ ಗೋಪೀಗಣಪರಿವೃತಃ ಕುಙ್ಕುಮಚಿತಃ || ೧ ||

ಪಯಾಂಭೋಧೇರ್ದ್ವೀಪಾತ್ ಮಮಹೃದಯಮಾಯಾಹಿ ಭಗವನ್

ಮಣಿವ್ರಾತಭ್ರಾಜತ್ ಕನಕವರಪೀಠಂ ಭಜಹರೇ |

ಸುಚಿಹ್ನೌ ತೇ ಪಾದೌ ಯದುಕುಲಜ ನೇನೇಜ್ಮಿ ಸುಜಲೈಃ

ಗೃಹಾಣೇದಂ ದೂರ್ವಾದಲಜಲವದರ್ಘ್ಯಂ ಮುರರಿಪೋ || ೨ ||

ತ್ವಮಾಚಾಮೋಪೇನ್ದ್ರ ತ್ರಿದಶಸರಿದಂಭೋಽತಿಶಿಶಿರಂ

ಭಜಸ್ವೇಮಂ ಪಞ್ಚಾಮೃತರಚಿತಮಾಪ್ಲಾವಮಘಹನ್ |

ದ್ಯುನದ್ಯಾಃ ಕಾಲಿನ್ದ್ಯಾ ಅಪಿ ಕನಕಕುಂಭಸ್ಥಮಿದಂ

ಜಲಂ ತೇನ ಸ್ನಾನಂ ಕುರು ಕುರು ಕುರುಷ್ವಾಚಮನಕಮ್ || ೩ ||

ತಟಿದ್ವರ್ಣೇ ವಸ್ತ್ರೇ ಭಜ ವಿಜಯಕಾನ್ತಾಧಿಹರಣ

ಪ್ರಲಮ್ಬಾರಿಭ್ರಾತಃ ಮೃದುಲಮುಪವೀತಂ ಕುರು ಗಲೇ |

ಲಲಾಟೇ ಪಾಟೀರಂ ಮೃಗಮದಯುತಂ ಧಾರಯ ಹರೇ

ಗೃಹಾಣೇದಂ ಮಾಲ್ಯಂ ಶತದಲತುಲಸ್ಯಾದಿರಚಿತಮ್ || ೪ ||

ದಶಾಙ್ಗಂ ಧೂಪಂ ಸದ್ವರದ ಚರಣಾಗ್ರೇಽರ್ಪಿತಮಿದಂ

ಮುಖಂ ದೀಪೇನೇನ್ದುಪ್ರಭ ವಿರಜಸಂ ದೇವ ಕಲಯೇ |

ಇಮೌ ಪಾಣೀ ವಾಣೀಪತಿನುತ ಸುಕರ್ಪೂರರಜಸಾ

ವಿಶೋಧ್ಯಾಗ್ರೇ ದತ್ತಂ ಸಲಿಲಮಿದಮಾಚಾಮ ನೃಹರೇ || ೫ ||

ಸದಾ ತೃಪ್ತಾನ್ನಂ ಷಡ್ರಸವದಖಿಲವ್ಯಂಜನಯುತಂ

ಸುವರ್ಣಾಮತ್ರೇ ಗೋಘೃತಚಷಕಯುಕ್ತೇ ಸ್ಥಿತಮಿದಮ್ |

ಯಶೋದಾಸೂನೋ ತತ್ ಪರಮದಯಯಾಽಶಾನ ಸಖಿಭಿಃ

ಪ್ರಸಾದಂ ವಾಞ್ಛದ್ಭಿಃ ಸಹ ತದನು ನೀರಂ ಪಿಬ ವಿಭೋ || ೬ ||

ಸಚೂರ್ಣಂ ತಾಮ್ಬೂಲಂ ಮುಖಶುಚಿಕರಂ ಭಕ್ಷಯ ಹರೇ

ಫಲಂ ಸ್ವಾದು ಪ್ರೀತ್ಯಾ ಪರಿಮಲವದಾಸ್ವಾದಯ ಚಿರಮ್ |

ಸಪರ್ಯಾಪರ್ಯಾಪ್ತ್ಯೈ ಕನಕಮಣಿಜಾತಂ ಸ್ಥಿತಮಿದಂ

ಪ್ರದೀಪೈರಾರಾರ್ತಿಂ ಜಲಧಿತನಯಾಶ್ಲಿಷ್ಟ ರಚಯೇ || ೭ ||

ವಿಜಾತೀಯೈಃ ಪುಷ್ಪೈರತಿಸುರಭಿಭಿರ್ಬಿಲ್ವತುಲಸೀ-

ಯುತೈಶ್ಚೇಮಂ ಪುಷ್ಪಾಞ್ಜಲಿಮಜಿತ ತೇ ಮೂರ್ಧ್ನಿ ನಿದಧೇ |

ತವ ಪ್ರಾದಕ್ಷಿಣ್ಯಕ್ರಮಣಮಘವಿದ್ಧ್ವಂಸಿ ರಚಿತಂ

ಚತುರ್ವಾರಂ ವಿಷ್ಣೋ ಜನಿಪಥಗತಿಶ್ರಾನ್ತಿದ ವಿಭೋ || ೮ ||

ನಮಸ್ಕಾರೋಽಷ್ಟಾಙ್ಗಸ್ಸಕಲದುರಿತಧ್ವಂಸನಪಟುಃ

ಕೃತಂ ನೃತ್ಯಂ ಗೀತಂ ಸ್ತುತಿರಪಿ ರಮಾಕಾನ್ತ ಸತತಂ |

ತವ ಪ್ರೀತ್ಯೈ ಭೂಯಾದಹಮಪಿ ಚ ದಾಸಸ್ತವ ವಿಭೋ

ಕೃತಂ ಛಿದ್ರಂ ಪೂರ್ಣಂ ಕುರು ಕುರು ನಮಸ್ತೇಽಸ್ತು ಭಗವನ್ || ೯ ||

ಸದಾ ಸೇವ್ಯಃ ಕೃಷ್ಣಸ್ಸಜಲಘನನೀಲಃ ಕರತಲೇ

ದಧಾನೋ ದಧ್ಯನ್ನಂ ತದನು ನವನೀತಂ ಮುರಲಿಕಾಮ್ |

ಕದಾಚಿತ್ ಕಾನ್ತಾನಾಂ ಕುಚಕಲಶಪತ್ರಾಲಿರಚನಾ-

ಸಮಾಸಕ್ತಃ ಸ್ನಿಗ್ದ್ಧೈಸ್ಸಹ ಶಿಶುವಿಹಾರಂ ವಿರಚಯನ್ || ೧೦ ||

ಮಣಿಕರ್ಣೀಚ್ಛಯಾ ಜಾತಮಿದಂ ಮಾನಸಪೂಜನಮ್ |

ಯಃ ಕುರ್ವೀತೋಷಸಿ ಪ್ರಾಜ್ಞಃ ತಸ್ಯ ಕೃಷ್ಣಃ ಪ್ರಸೀದತಿ || ೧೧ ||