ಗಣೇಶಭುಜಂಗಮ್

ಗಣೇಶಭುಜಂಗಮ್

  (ಶ್ರೀ ಶಂಕರಾಚಾರ್ಯಕೃತಮ್)

ರಣತ್ಕ್ಷುದ್ರಘಣ್ಟಾ ನಿನಾದಾಭಿರಾಮಂ

ಚಲತ್ತಾಣ್ಡವೋದ್ದಣ್ಡವತ್ ಪದ್ಮತಾಲಮ್ |

ಲಸತ್ತುನ್ದಿಲಾಂಗೋಪರಿ ವ್ಯಾಲಹಾರಂ

ಗಣಾಧೀಶಮೀಶಾನಸೂನುಂ ತಮೀಡೇ || ೧ ||

ಧ್ವನಿಧ್ವಂಸವೀಣಾಲಯೋಲ್ಲಾಸಿ ವಕ್ತ್ರಂ

ಸ್ಫುರಚ್ಛುಣ್ಡದಣ್ಡೋಲ್ಲಸದ್ ಬೀಜಪೂರಮ್ |

ಗಲದ್ದರ್ಪ ಸೌಗನ್ಧ್ಯ ಲೋಲಾಲಿಮಾಲಂ

ಗಣಾಧೀಶಮೀಶಾನಸೂನುಂ ತಮೀಡೇ || ೨ ||

ಪ್ರಕಾಶಜ್ಜಪಾರಕ್ತರತ್ನಪ್ರಸೂನ-

ಪ್ರವಾಲಪ್ರಭಾತಾರುಣಜ್ಯೋತಿರೇಕಮ್ |

ಪ್ರಲಂಬೋದರಂ ವಕ್ರತುಣ್ಡೈಕದಂತಂ

ಗಣಾಧೀಶಮೀಶಾನಸೂನುಂ ತಮೀಡೇ || ೩ ||

ವಿಚಿತ್ರಸ್ಫುರದ್ರತ್ನಮಾಲಾಕಿರೀಟಂ

ಕಿರೀಟೋಲ್ಲಸಚ್ಚಂದ್ರರೇಖಾವಿಭೂಷಮ್ |

ವಿಭೂಷೈಕಭೂಷಂ ಭವಧ್ವಂಸಹೇತುಂ

ಗಣಾಧೀಶಮೀಶಾನಸೂನುಂ ತಮೀಡೇ || ೪ ||

ಉದಞ್ಚದ್ಭುಜಾವಲ್ಲರೀದೃಶ್ಯಮೂಲೋ-

ಚ್ಚಲದ್ಭ್ರೂಲತಾವಿಭ್ರಮಭ್ರಾಜದಕ್ಷಮ್ |

ಮರುತ್ಸುಂದರೀಚಾಮರೈಸ್ಸೇವ್ಯಮಾನಂ

ಗಣಾಧೀಶಮೀಶಾನಸೂನುಂ ತಮೀಡೇ || ೫ ||

ಸ್ಫುರನ್ನಿಷ್ಠುರಾಲೋಲಪಿಂಗಾಕ್ಷಿತಾರಂ

ಕೃಪಾಕೋಮಲೋದಾರಲೀಲಾವತಾರಮ್ |

ಕಲಾಬಿಂದುಗಂ ಗೀಯತೇ ಯೋಗಿವರ್ಯೈಃ

ಗಣಾಧೀಶಮೀಶಾನಸೂನುಂ ತಮೀಡೇ || ೬ ||

 

ಯಮೇಕಾಕ್ಷರಂ ನಿರ್ಮಲಂ ನಿರ್ವಿಕಲ್ಪಂ

ಗುಣಾತೀತಮಾನನ್ದಮಾಕಾರಶೂನ್ಯಮ್ |

ಪರಂಪಾರಮೋಂಕಾರಮಾಮ್ನಾಯಗರ್ಭಂ

ವದನ್ತಿ ಪ್ರಗಲ್ಭಂ ಪುರಾಣಂ ತಮೀಡೇ || ೭ ||

ಚಿದಾನನ್ದ ಸಾನ್ದ್ರಾಯ ಶಾನ್ತಾಯ ತುಭ್ಯಂ

ನಮೋ ವಿಶ್ವಕರ್ತ್ರೇ ಚ ಹರ್ತ್ರೇ ಚ ತುಭ್ಯಮ್ |

ನಮೋಽನನ್ತಲೀಲಾಯ ಕೈವಲ್ಯಭಾಸೇ

ನಮೋವಿಶ್ವಬೀಜ ಪ್ರಸೀದೇಶಸೂನೋ || ೮ ||

ಇಮಂ ಸುಸ್ತವಂ ಪ್ರಾತರುತ್ಥಾಯ ಭಕ್ತ್ಯಾ

ಪಠೇದ್ಯಸ್ತು ಮರ್ತ್ಯೋ ಲಭೇತ್ಸರ್ವಕಾಮಾನ್

ಗಣೇಶಪ್ರಸಾದೇನ ಸಿದ್ಧ್ಯನ್ತಿ ವಾಚೋ

ಗಣೇಶೇ ವಿಭೌ ದುರ್ಲಭಂ ಕಿಂ ಪ್ರಸನ್ನೇ || ೯ ||