ಶ್ರೀಮೀನಾಕ್ಷೀಸ್ತೋತ್ರಮ್

       ಶ್ರೀಮೀನಾಕ್ಷೀಸ್ತೋತ್ರಮ್

      (ಶ್ರೀ ಶಂಕರಾಚಾರ್ಯಕೃತಂ)

ಶ್ರೀವಿದ್ಯೇ ಶಿವವಾಮಭಾಗನಿಲಯೇ ಶ್ರೀರಾಜರಾಜಾರ್ಚಿತೇ

ಶ್ರೀನಾಥಾದಿಗುರುಸ್ವರೂಪವಿಭವೇ ಚಿನ್ತಾಮಣೀಪೀಠಿಕೇ |

ಶ್ರೀವಾಣೀಗಿರಿಜಾನುತಾಙ್ಘ್ರಿಕಮಲೇ ಶ್ರೀಶಾಂಭವಿ ಶ್ರೀಶಿವೇ

ಮಧ್ಯಾಹ್ನೇ ಮಲಯಧ್ವಜಾಧಿಪಸುತೇ ಮಾಂ ಪಾಹಿ ಮೀನಾಮ್ಬಿಕೇ || ೧ ||

ಚಕ್ರಸ್ಥೇಽಚಪಲೇ ಚರಾಚರಜಗನ್ನಾಥೇ ಜಗತ್ಪೂಜಿತೇ

ಆರ್ತಾಲೀವರದೇ ನತಾಭಯಕರೇ ವಕ್ಷೋಜಭಾರಾನ್ವಿತೇ |

ವಿದ್ಯೇ ವೇದಕಲಾಪಮೌಲಿವಿದಿತೇ ವಿದ್ಯುಲ್ಲತಾವಿಗ್ರಹೇ

ಮಾತಃ ಪೂರ್ಣಸುಧಾರಸಾರ್ದ್ರಹೃದಯೇ ಮಾಂ ಪಾಹಿ ಮೀನಾಮ್ಬಿಕೇ || ೨ ||

ಕೋಟೀರಾಙ್ಗದರತ್ನಕುಣ್ಡಲಧರೇ ಕೋದಣ್ಡಬಾಣಾಞ್ಚಿತೇ

ಕೋಕಾಕಾರಕುಚದ್ವಯೋಪರಿಲಸತ್ಪ್ರಾಲಮ್ಬಿಹಾರಾನ್ವಿತೇ |

ಶಿಞ್ಜನ್ನೂಪುರಪಾದಸಾರಸಮಣಿಶ್ರೀಪಾದುಕಾಲಂಕೃತೇ

ಮದ್ದಾರಿದ್ರ್ಯಭುಜಂಗಗಾರುಡಖಗೇ ಮಾಂ ಪಾಹಿ ಮೀನಾಮ್ಬಿಕೇ || ೩ ||

ಬ್ರಹ್ಮೇಶಾಚ್ಯುತಗೀಯಮಾನಚರಿತೇ ಪ್ರೇತಾಸನಾನ್ತಃಸ್ಥಿತೇ

ಪಾಶೋದಙ್ಕುಶಚಾಪಬಾಣಕಲಿತೇ ಬಾಲೇನ್ದುಚೂಡಾಞ್ಚಿತೇ |

ಬಾಲೇ ಬಾಲಕುರಙ್ಗಲೋಲನಯನೇ ಬಾಲಾರ್ಕಕೋಟ್ಯುಜ್ಜ್ವಲೇ

ಮುದ್ರಾರಾಧಿತದೈವತೇ ಮುನಿನುತೇ ಮಾಂ ಪಾಹಿ ಮೀನಾಮ್ಬಿಕೇ || ೪ ||

ಗನ್ಧರ್ವಾಮರಯಕ್ಷಪನ್ನಗನುತೇ ಗಙ್ಗಾಧರಾಲಿಙ್ಗಿತೇ

ಗಾಯತ್ರೀಗರುಡಾಸನೇ ಕಮಲಜೇ ಸುಶ್ಯಾಮಲೇ ಸುಸ್ಥಿತೇ |

ಖಾತೀತೇ ಖಲದಾರುಪಾವಕಶಿಖೇ ಖದ್ಯೋತಕೋಟ್ಯುಜ್ಜ್ವಲೇ

ಮನ್ತ್ರಾರಾಧಿತದೈವತೇ ಮುನಿನುತೇ ಮಾಂ ಪಾಹಿ ಮೀನಾಮ್ಬಿಕೇ || ೫ ||

ನಾದೇ ನಾರದತುಮ್ಬುರಾದ್ಯವಿನುತೇ ನಾದಾನ್ತನಾದಾತ್ಮಿಕೇ

ನಿತ್ಯೇ ನೀಲಲತಾತ್ಮಿಕೇ ನಿರುಪಮೇ ನೀವಾರಶೂಕೋಪಮೇ |

ಕಾನ್ತೇ ಕಾಮಕಲೇ ಕದಮ್ಬನಿಲಯೇ ಕಾಮೇಶ್ವರಾಙ್ಕಸ್ಥಿತೇ

ಮದ್ವಿದ್ಯೇ ಮದಭೀಷ್ಟಕಲ್ಪಲತಿಕೇ ಮಾಂ ಪಾಹಿ ಮೀನಾಮ್ಬಿಕೇ || ೬ ||

ವೀಣಾನಾದನಿಮೀಲಿತಾರ್ಧನಯನೇ ವಿಸ್ರಸ್ತಚೂಲೀಭರೇ

ತಾಮ್ಬೂಲಾರುಣಪಲ್ಲವಾಧರಯುತೇ ತಾಟಙ್ಕಹಾರಾನ್ವಿತೇ |

ಶ್ಯಾಮೇ ಚನ್ದ್ರಕಲಾವತಂಸಕಲಿತೇ ಕಸ್ತೂರಿಕಾಫಾಲಕೇ

ಪೂರ್ಣೇ ಪೂರ್ಣಕಲಾಭಿರಾಮವದನೇ ಮಾಂ ಪಾಹಿ ಮೀನಾಮ್ಬಿಕೇ || ೭ ||

ಶಬ್ದಬ್ರಹ್ಮಮಯೀ ಚರಾಚರಮಯೀ ಜ್ಯೋತಿರ್ಮಯೀ ವಾಙ್ಮಯೀ

ನಿತ್ಯಾನನ್ದಮಯೀ ನಿರಞ್ಜನಮಯೀ ತತ್ತ್ವಂಮಯೀ ಚಿನ್ಮಯೀ |

ತತ್ತ್ವಾತೀತಮಯೀ ಪರಾತ್ಪರಮಯೀ ಮಾಯಾಮಯೀ ಶ್ರೀಮಯೀ

ಸರ್ವೈಶ್ವರ್ಯಮಯೀ ಸದಾಶಿವಮಯೀ ಮಾಂ ಪಾಹಿ ಮೀನಾಮ್ಬಿಕೇ || ೮ ||