ಲಕ್ಷ್ಮ್ಯಷ್ಟೋತ್ತರಶತನಾಮ್ಸ್ತೋತ್ರಮ್

ಲಕ್ಷ್ಮ್ಯಷ್ಟೋತ್ತರಶತನಾಮ್ಸ್ತೋತ್ರಮ್

ಪ್ರಕ್ರುತಿಂ ವಿಕೃತಿಂ ವಿದ್ಯಾಂ ಸರ್ವಭೂತಹಿತಪ್ರದಾಂ

ಶ್ರದ್ಧಾಂ ವಿಭೂತಿಂ ಸುರಭಿಂ ನಮಾಮಿ ಪರಮಾತ್ಮಿಕಾಂ ||೧-೮||

ವಾಚಂ ಪದ್ಮಾಲಯಾಂ ಪದ್ಮಾಂ ಶುಚಿಂ ಸ್ವಾಹಾಂ ಸ್ವಧಾಂ ಸುಧಾಂ

ಧನ್ಯಾಂ ಹಿರಣ್ಮಯೀಂ ಲಕ್ಷ್ಮೀಂ ನಿತ್ಯಪುಷ್ಟಾಂ ವಿಭಾವರೀಂ ||೯-೨೦||

ಅದಿತಿಂ ಚ ದಿತಿಂ ದೀಪ್ತಾಂ ವಸುಧಾಂ ವಸುಧಾರೀಣೀಂ

ನಮಾಮಿ ಕಮಲಾಂ ಕಾನ್ತಾಂ ಕಾಮಾಕ್ಷೀಂ ಕ್ರೋಧಸಂಭವಾಂ ||೨೧-೨೯||

ಅನುಗ್ರಹಪ್ರದಾಂ ಬುದ್ಧಿಂ ಅನಘಾಂ ಹರಿವಲ್ಲಭಾಂ

ಅಶೋಕಾಮಮೃತಾಂ ದೀಪ್ತಾಂ ಲೋಕಶೋಕವಿನಾಶಿನೀಂ ||೩೦-೩೭||

ನಮಾಮಿ ಧರ್ಮನಿಲಯಾಂ ಕರುಣಾಂ ಲೋಕಮಾತರಂ

ಪದ್ಮಪ್ರಿಯಾಂ ಪದ್ಮಹಸ್ತಾಂ ಪದ್ಮಾಕ್ಷೀಂ ಪದ್ಮಸುನ್ದರೀಂ ||೩೮-೪೪||

ಪದ್ಮೋದ್ಭವಾಂ ಪದ್ಮಮುಖೀಂ ಪದ್ಮನಾಭಪ್ರಿಯಾಂ ರಮಾಂ

ಪದ್ಮಮಾಲಾಧರಾಂ ದೇವೀಂ ಪದ್ಮಿನೀಂ ಪದ್ಮಗನ್ಧಿನೀಂ  ||೪೫-೫೨||

ಪುಣ್ಯಗನ್ಧಾಂ ಸುಪ್ರಸನ್ನಾಂ ಪ್ರಸಾದಾಭಿಮುಖೀಂ ಪ್ರಭಾಂ

ನಮಾಮಿ ಚನ್ದವದನಾಂ ಚನ್ದ್ರಾಂ ಚನ್ದ್ರಸಹೋದರೀಂ ||೫೩-೫೯||

ಚತುರ್ಭುಜಾಂ ಚನ್ದ್ರರೂಪಾಮಿನ್ದಿರಾಮಿನ್ದುಶೀತಲಾಂ

ಆಹ್ಲಾದಜನನೀಂ ಪುಷ್ಟಿಂ ಶಿವಾಂ ಶಿವಕರೀಂ  ಸತೀಂ ||೬೦-೬೮||

ವಿಮಲಾಂ ವಿಶ್ವಜನನೀಂ ತುಷ್ಟಿಮ್ ದಾರಿದ್ರ್ಯನಾಶಿನೀಂ

ಪ್ರೀತಿಪುಷ್ಕರಿಣೀಂ ಶಾನ್ತಾಂ ಶುಕ್ಲಮಾಲ್ಯಾಂಬರಾಂ ಶ್ರಿಯಂ ||೬೯-೭೬||

ಭಾಸ್ಕರೀಂ ಬಿಲ್ವನಿಲಯಾಂ ವರಾರೋಹಾಂ ಯಶಸ್ವಿನೀಂ

ವಸುನ್ಧರಾಮುದಾರಾಂಗಾಂ ಹರಿಣೀಂ ಹೇಮಮಾಲಿನೀಂ ||೭೭-೮೪||

ಧನಧಾನ್ಯಕರೀಂ ಸಿದ್ಧಿಂ ಸ್ತ್ರೈಣಸೌಮ್ಯಾಂ ಶುಭಪ್ರದಾಂ

ನೃಪವೇಶ್ಮಗತಾನನ್ದಾಂ ವರಲಕ್ಷ್ಮೀಂ ವಸುಪ್ರಾದಾಂ   ||೮೫-೯೧||

ಶುಭಾಂ ಹಿರಣ್ಯಪ್ರಾಕಾರಾಂ ಸಮುದ್ರತನಯಾಂ ಜಯಾಂ

ನಮಾಮಿ ಮಂಗಲಾಂ ದೇವೀಂ ವಿಷ್ಣುವಕ್ಷಃಸ್ಥಲಸ್ಥಿತಾಂ ||೯೨-೯೭||

ವಿಷ್ಣೂಪತ್ನೀಂ ಪ್ರಸನ್ನಾಕ್ಷೀಂ ನಾರಾಯಣಸಮಾಶ್ರಿತಾಂ

ದಾರಿದ್ರ್ಯಧ್ವಂಸಿನೀಂ ದೇವೀಂ ಸರ್ವೋಪದ್ರವವಾರಿಣೀಂ  ||೯೮-೧೦೩||

ನವದುರ್ಗಾಂ ಮಹಾಕಾಲೀಂ ಬ್ರಹ್ಮವಿಷ್ಣುಶಿವಾತ್ಮಿಕಾಂ

ತ್ರಿಕಾಲಜ್ಞಾನ್ಸಂಪನ್ನಾಂ ನಮಾಮಿ ಭುವನೇಶ್ವರೀಂ  ||೧೦೪-೧೦೮||

Note: ಮಂಗಲಾ ದೇವೀ ಇತ್ಯೇಕಂ ನಾಮ ಸವಿಶೇಷಣಮ್

ಇನ್ದ್ರಕೃತ ಶ್ರೀ ಮಹಾಲಕ್ಷ್ಮೀ ಸ್ತೋತ್ರಮ್

ಇನ್ದ್ರಕೃತ ಶ್ರೀ ಮಹಾಲಕ್ಷ್ಮೀ ಸ್ತೋತ್ರಮ್ 

 (ದೇವೀ ಭಾಗವತಂಮ್ ೯,೪೩)

ಪುರನ್ದರ ಉವಾಚ-

 ನಮಃ ಕಮಲವಾಸಿನ್ಯೈ ನಾರಾಯಣ್ಯೈ ನಮೋ ನಮಃ|

 ಕೃಷ್ಣಪ್ರಿಯಾಯೈ ಸತತಂ ಮಹಾಲಕ್ಷ್ಮ್ಯೈ ನಮೋ ನಮಃ || ೧||

 ಪದ್ಮಪತ್ರೇಕ್ಷಣಾಯೈ ಚ ಪದ್ಮಾಸ್ಯಾಯೈ ನಮೋ ನಮಃ|

 ಪದ್ಮಾಸನಾಯೈ ಪದ್ಮಿನ್ಯೈ ವೈಷ್ಣವ್ಯೈ ಚ ನಮೋ ನಮಃ || ೨||

 ಸರ್ವ ಸಂಪತ್ಸ್ವರೂಪಿಣ್ಯೈ ಸರ್ವಾರಾಧ್ಯೈ ನಮೋ ನಮಃ|

 ಹರಿಭಕ್ತಿಪ್ರದಾತ್ರ್ಯೈ ಚ ಹರ್ಷದಾತ್ರ್ಯೈ ನಮೋ ನಮಃ || ೩||

 ಕೃಷ್ಣವಕ್ಷಃಸ್ಥಿತಾಯೈ ಚ ಕೃಷ್ಣೇಶಾಯೈ ನಮೋ ನಮಃ|

 ಚನ್ದ್ರಶೋಭಾಸ್ವರೂಪಾಯೈ ಚ ರತ್ನಪದ್ಮೇ ಚ ಶೋಭನೇ|| ೪||

 ಸಮ್ಪತ್ಯಧಿಷ್ಠಾತೃ ದೇವ್ಯೈ ಮಹಾದೇವ್ಯೈ ನಮೋ ನಮಃ|

 ನಮೋ ವೃತ್ತಿಸ್ವರೂಪಾಯೈ ವೃತ್ತಿದಾಯೈ ನಮೋ ನಮಃ|| ೫||

 ವೈಕುಣ್ಠೇ ಯಾ ಮಹಾಲಕ್ಷ್ಮೀಃ ಯಾ ಲಕ್ಷ್ಮೀಃ ಕ್ಷೀರಸಾಗರೇ|

 ಸ್ವರ್ಗಲಕ್ಷ್ಮೀರಿನ್ದ್ರಗೇಹೇ ರಾಜಲಕ್ಷ್ಮೀರ್ನೃಪಾಲಯೇ || ೬||

 ಗೃಹಲಕ್ಷ್ಮೀಶ್ಚ ಗೃಹಿಣಾಂ ಗೇಹೇ ಚ ಗೃಹದೇವತಾ

 ಸುರಭಿಃ ಸಾಗರೇ ಜಾತಾ ದಕ್ಷಿಣಾ ಯಜ್ಞಗಾಮಿನೀ|| ೭||

 ಅದಿತಿರ್ದೇವಮಾತಾ ತ್ವಂ  ಕಮಲಾ ಕಮಲಾಲಯಾ|

 ಸ್ವಾಹಾ ತ್ವಂ ಚ ಹವಿರ್ದಾನೇ ಕವ್ಯದಾನೇ ಸ್ವಧಾ ಸ್ಮೃತಾ || ೮||

 ತ್ವಂ ಹಿ ವಿಷ್ಣುಸ್ವರೂಪಾ ಚ ಸರ್ವಾಧಾರಾ ವಸುನ್ಧರಾ|

 ಶುದ್ಧಸತ್ತ್ವಸ್ವರೂಪಾ ತ್ವಂ ನಾರಾಯಣಪರಾಯಣಾ|| ೯||

 ಕ್ರೋಧಹಿಂಸಾವರ್ಜಿತಾ ಚ ವರದಾ ಶಾರದಾ ಶುಭಾ|

 ಪರಮಾರ್ಥಪ್ರದಾ ತ್ವಂ ಚ ಹರಿದಾಸ್ಯಪ್ರದಾ ಪರಾ  || ೧೦||

  ಯಯಾ ವಿನಾ ಜಗತ್ಸರ್ವಂ ಭಸ್ಮೀಭೂತಮಸಾರಕಮ್|

  ಜೀವನ್ಮೃತಂ ಚ ವಿಶ್ವಂ ಚ ಶಶ್ವತ್ಸರ್ವಂ ಯಯಾ ವಿನಾ || ೧೧||

  ಸರ್ವೇಷಾಞ್ಚ ಪರಾ ಮಾತಾ ಸರ್ವಬಾನ್ಧವರೂಪಿಣೀ|

  ಧರ್ಮಾರ್ಥಕಾಮಮೋಕ್ಷಾಣಾಂ ತ್ವಂ ಚ ಕಾರಣರೂಪಿಣೀ|| ೧೨||     

   ಯಥಾ ಮಾತಾ ಸ್ತನಾನ್ಧಾನಾಂ ಶಿಶೂನಾಂ ಶೈಶವೇ ಸದಾ|

   ತಥಾ ತ್ವಂ ಸರ್ವದಾ ಮಾತಾ ಸರ್ವೇಷಾಂ ಸರ್ವರೂಪತಃ || ೧೩||

   ಮಾತೃಹೀನಃ ಸ್ತನಾನ್ಧಸ್ತು ಸ ಚ ಜೀವತಿ ದೈವತಃ|

   ತ್ವಯಾ ಹೀನೋ ಜನಃ ಕೋಽಪಿ ನ ಜೀವತ್ಯೇವ ನಿಶ್ಚಿತಮ್ || ೧೪||

    ಸುಪ್ರಸನ್ನಸ್ವರೂಪಾ ತ್ವಂ ಮಯಿ ಪ್ರಸನ್ನಾ ಭವಾಮ್ಬಿಕೇ|

    ವೈರಿಗ್ರಸ್ತಂ ಚ ವಿಷಯಂ ದೇಹಿ ಮಹ್ಯಂ ಸನಾತನೀ || ೧೫||

     ಅಹಂ ಯಾವತ್ ತ್ವಯಾ ಹೀನೊ ಬನ್ಧುಹೀನಶ್ಚ ಭಿಕ್ಷುಕಃ|

     ಸರ್ವಸಂಪದ್ವಿಹೀನಶ್ಚ ತಾವದೇವ ಹರಿಪ್ರಿಯೇ || ೧೬||

    

     ಜ್ಞಾನಂ ದೇಹಿ ಚ ಧರ್ಮಂ ಚ ಸರ್ವಸೌಭಾಗ್ಯಮೀಪ್ಸಿತಮ್|

     ಪ್ರಭಾವಂ ಚ ಪ್ರತಾಪಂ ಚ ಸರ್ವಾಧಿಕಾರಮೇವ ಚ || ೧೭||

     ಜಯಂ ಪರಾಕ್ರಮಂ ಯುದ್ಧೇ ಪರಮೈಶ್ವರ್ಯಮೇವ ಚ |

     ಇತ್ಯುಕ್ತ್ವಾ ಚ ಮಹೇನ್ದ್ರಶ್ಚ ಸರ್ವೈಸ್ಸುರಗಣೈಸ್ಸಹ|| ೧೮||

     ಪ್ರಣನಾಮ ಸಾಶ್ರುನೇತ್ರೋ ಮೂರ್ಧ್ನಾ ಚೈವ ಪುನಃ ಪುನಃ|

     ಬ್ರಹ್ಮಾ ಚ ಶಙ್ಕರಶ್ಚೈವ ಶೇಷೋ ಧರ್ಮಶ್ಚ ಕೇಶವಃ|| ೧೯||

      ಸರ್ವೇ ಚಕ್ರುಃ ಪರೀಹಾರಂ ಸುರಾರ್ಥೇ ಚ ಪುನಃ ಪುನಃ|

      ದೇವೇಭ್ಯಶ್ಚ  ವರಂ ದತ್ವಾ ಪುಷ್ಪಮಾಲಾಂ ಸುಮನೋಹರಮ್ || ೨೦||

       ಕೇಶವಾಯ ದದೌ ಲಕ್ಷ್ಮೀಃ ಸನ್ತುಷ್ಟಾ ಸುರಸಂಸದಿ|

       ಯಯುರ್ದೇವಾಶ್ಚ ಸನ್ತುಷ್ಟಾಃ ಸ್ವಂ ಸ್ವಂ ಸ್ಥಾನಂ ಚ ನಾರದ|| ೨೧||

      

        ದೇವೀ ಯಯೌ ಹರೇಃ ಸ್ಥಾನಂ ಹೃಷ್ಟಾ ಕ್ಷೀರೋದಶಾಯಿನಃ | 

        ಯಯತುಶ್ಚೈವ ಸ್ವಗೃಹಂ ಬ್ರಹ್ಮೇಶಾನೌ ಚ ನಾರದ || ೨೨||

        ದತ್ತ್ವಾ ಶುಭಾಶಿಷಂ ತೌ ಚ ದೇವೇಭ್ಯಃ ಪ್ರೀತಿಪೂರ್ವಕಮ್|

        ಇದಂ ಸ್ತೋತ್ರಂ ಮಹಾಪುಣ್ಯಂ ತ್ರಿಸನ್ಧ್ಯಂ ಯಃ ಪಠೇನ್ನರಃ || ೨೩||

        ಕುಬೇರತುಲ್ಯಃ ಸ ಭವೇತ್ ರಾಜರಾಜೇಶ್ವರೋ ಮಹಾನ್|

         ಪಞ್ಚಲಕ್ಷಜಪೇನೈವ ಸ್ತೋತ್ರಸಿದ್ಧಿಃ ಭವೇನ್ನೃಣಂ|| ೨೪||

        

         ಸಿದ್ಧ ಸ್ತೋತ್ರಂ ಯದಿ ಪಠೇತ್ ಮಾಸಮೇಕನ್ತು ಸನ್ತತಮ್|

         ಮಹಾಸುಖೀ ಚ ರಾಜೇನ್ದ್ರೋ ಭವಿಷ್ಯತಿ ನ ಸಂಶಯಃ|| ೨೫||

 ಇತಿ ಶ್ರೀದೇವೀಭಾಗವತೇ ಮಹಾಪುರಾಣೇ ಅಷ್ತಾದಶಸಾಹಸ್ರ್ಯಾಂ ಸಂಹಿತಾಯಾಂ ನವಮ ಸ್ಕನ್ಧೇ ಮಹಾಲಕ್ಷ್ಮ್ಯಾ ಧ್ಯಾನಸ್ತೋತ್ರವರ್ಣನಂ ನಾಮ ತ್ವಾರಿಂಶೋಽಧ್ಯಾಯಃ                                      

ಶ್ರೀ ಮಹಾಲಕ್ಷ್ಮೀ ಕವಚಮ್

             ಶ್ರೀ ಮಹಾಲಕ್ಷ್ಮೀ ಕವಚಮ್

ಮಹಾಲಕ್ಷ್ಯಾಃ ಪ್ರವಕ್ಷ್ಯಾಮಿ ಕವಚಂ ಸರ್ವಕಾಮದಮ್|

ಸರ್ವಪಾಪಪ್ರಶಮನಂ  ಸರ್ವವ್ಯಾಧಿ ನಿವಾರಣಮ್|| ೧||

ದುಷ್ಟಮೃತ್ಯುಪ್ರಶಮನಂ ದುಷ್ಟದಾರಿದ್ರ್ಯನಾಶನಮ್|

ಗ್ರಹಪೀಡಾ ಪ್ರಶಮನಂ ಅರಿಷ್ಟ ಪ್ರವಿಭಞ್ಜನಮ್|| ೨||

ಪುತ್ರಪೌತ್ರಾದಿಜನಕಂ ವಿವಾಹಪ್ರದಮಿಷ್ಟದಮ್|

ಚೋರಾರಿಹಾರಿ ಜಗತಾಂ ಅಖಿಲೇಪ್ಸಿತ ಕಲ್ಪಕಮ್|| ೩||

ಸಾವಧಾನಮನಾ ಭೂತ್ವಾ ಶೃಣು ತ್ವಂ ಶುಕಸತ್ತಮ|

ಅನೇಕಜನ್ಮಸಂಸಿದ್ಧಿ ಲಭ್ಯಂ ಮುಕ್ತಿಫಲಪ್ರದಮ್|| ೪||

ಧನಧಾನ್ಯ ಮಹಾರಾಜ್ಯ ಸರ್ವಸೌಭಾಗ್ಯದಾಯಕಮ್|

ಸಕೃತ್ಪಠನಮಾತ್ರೇಣ ಮಹಾಲಕ್ಷ್ಮೀಃ ಪ್ರಸೀದತಿ|| ೫||

ಕ್ಷೀರಾಬ್ಧಿಮಧ್ಯೇ ಪದ್ಮಾನಾಂ ಕಾನನೇ ಮಣಿಮಣ್ಟಪೇ|

ರತ್ನಸಿಂಹಾಸನೇ ದಿವ್ಯೇ ತನ್ಮಧ್ಯೇ ಮಣಿಪಙ್ಕಜೇ| ೬||

ತನ್ಮಧ್ಯೇ ಸುಸ್ಥಿತಾಂ ದೇವೀಂ ಮರೀಚಿಜನಸೇವಿತಾಮ್|

ಸುಸ್ನಾತಾಂ ಪುಷ್ಪಸುರಭಿಂ ಕುಟಿಲಾಲಕಬನ್ಧನಾಮ್ || ೭||

ಪೂರ್ಣೇನ್ದುಬಿಮ್ಬವದನಾಂ ಅರ್ಧಚನ್ದ್ರಲಲಾಟಿಕಾಮ್|

ಇನ್ದೀವರೇಕ್ಷಣಾಂ ಕಾಮಾಂ ಸರ್ವಾಣ್ಡಭುವನೇಶ್ವರೀಮ್ || ೮||

ತಿಲಪ್ರಸವಸುಸ್ನಿಗ್ಧನಾಸಿಕಾಲಙ್ಕೃತಾಂ ಶ್ರಿಯಮ್|

ಕುನ್ದಾವದಾತರದನಾಂ ಬನ್ಧೂಕಾಧರಪಲ್ಲವಾಮ್ || ೯||

ದರ್ಪಣಾಕಾರವಿಮಲಕಪೋಲದ್ವಿತಯೋಜ್ಜ್ವಲಾಮ್|

ಮಾಙ್ಗಲ್ಯಾಭರಣೋಪೇತಾಂ ಕರ್ಣದ್ವಿತಯಸುನ್ದರಾಮ್ || ೧೦||

ಕಮಲೇಶಸುಭದ್ರಾಢ್ಯೇ ಅಭಯಂ ದಧತೀಂ ಪರಮ್|

ರೋಮರಾಜಿಲತಾ ಚಾರು ಮಗ್ನನಾಭಿ ತಲೋದರೀಮ್ || ೧೧||

ಪಟ್ಟವಸ್ತ್ರಸಮುದ್ಭಾಸಿ ಸುನಿತಮ್ಬಾದಿಲಕ್ಷಣಾಮ್|

ಕಾಞ್ಚನಸ್ಥಂಭವಿಭ್ರಾಜದ್ವರಜಾನೂರು ಶೋಭಿತಾಮ್ || ೧೨||

ಸ್ಮರಕಾಹಲಿಕಾಗರ್ವಹಾರಿಜಙ್ಘಾಂ ಹರಿಪ್ರಿಯಾಮ್|

ಕಮಠೀಪೃಷ್ಠಸದೃಶಪಾದಾಬ್ಜಾಂ ಚನ್ದ್ರವನ್ನಖಾಮ್ || ೧೩||

ಪಙ್ಕಜೋದರ ಲಾವಣ್ಯಾಂ ಸುತಲಾಂಘ್ರಿತಲಾಶ್ರಯಾಮ್|

ಸರ್ವಾಭರಣಸಂಯುಕ್ತಾಂ ಸರ್ವಲಕ್ಷಣಲಕ್ಷಿತಾಮ್ || ೧೪||

ಪಿತಾಮಹಮಹಾಪ್ರೀತಾಂ ನಿತ್ಯತೃಪ್ತಾಂ ಹರಿಪ್ರಿಯಾಂ|

ನಿತ್ಯಕಾರುಣ್ಯಲಲಿತಾಂ ಕಸ್ತೂರೀಲೇಪಿತಾಙ್ಗಿಕಾಮ್|| ೧೫||

ಸರ್ವಮನ್ತ್ರಮಯೀಂ ಲಕ್ಷ್ಮೀಂ ಶ್ರುತಿಶಾಸ್ತ್ರಸ್ವರೂಪಿಣೀಮ್|

ಪರಬ್ರಹ್ಮಮಯೀಂ ದೇವೀಂ ಪದ್ಮನಾಭಕುಟುಮ್ಬಿನೀಮ್ || ೧೬||

ಏವಂ ಧ್ಯಾಯೇತ್ ಮಹಾಲಕ್ಷ್ಮೀಂ ಯಃ ಪಠೇತ್ ಕವಚಂ ಪರಮ್ || ೧೭||

ಮಹಲಕ್ಷ್ಮೀಃ ಶಿರಃ ಪಾತು ಲಲಾಟಂ ಮಮ ಪಙ್ಕಜಾ| 

ಕರ್ಣದ್ವನ್ದ್ವಂ ರಮಾ ಪಾತು ನಯನೇ ನಲಿನಾಲಯಾ|| ೧೮||

ನಾಸಿಕಾಮವತಾದಮ್ಬಾ ವಾಚಂ ವಾಗ್ರೂಪಿಣೀ ಮಮ|

ದನ್ತಾನವತು ಜಿಹ್ವಾಂ ಶ್ರೀಃ ಅಧರೋಷ್ಠಂ ಹರಿಪ್ರಿಯಾ || ೧೯||

ಚಿಬುಕಂ ಪಾತು ವರದಾ ಕಣ್ಠಂ ಗನ್ಧರ್ವಸೇವಿತಾ|

ವಕ್ಷಃ ಕುಕ್ಷಿಕರೌ ಪಾಯುಂ ಪೃಷ್ಠಮವ್ಯಾತ್ ರಮಾ ಸ್ವಯಮ್|| ೨೦||

ಕಟ್ಯೂರುದ್ವಯಕಂ ಜಾನು ಜಙ್ಘೇ ಪಾದದ್ವಯಂ ಶಿವಾ|

ಸರ್ವಾಙ್ಗಮಿನ್ದ್ರಿಯಂ ಪ್ರಾಣಾನ್ ಪಾಯಾದಾಯಾಸಹಾರಿಣೀ|| ೨೧||

ಸಪ್ತಧಾತೂನ್ ಸ್ವಯಞ್ಜಾತಾ ರಕ್ತಂ ಶುಕ್ಲಂ ಮನೋಽಸ್ಥಿ ಚ|

ಜ್ಞಾನಂ ಭುಕ್ತಿರ್ಮನೋತ್ಸಾಹಾನ್ ಸರ್ವಂ ಮೇ ಪಾತು ಪದ್ಮಜಾ || ೨೨||

ಮಯಾ ಕೃತನ್ತು ಯತ್ ತದ್ವೈ ತತ್ಸರ್ವಂ ಪಾತು ಮಙ್ಗಲಾ|

ಮಮಾಯುರಙ್ಗಕಾನ್ ಲಕ್ಷ್ಮೀಃ ಭಾರ್ಯಾಪುತ್ರಾಂಶ್ಚ ಪುತ್ರಿಕಾಃ|| ೨೩||

ಮಿತ್ರಾಣಿ ಪಾತು ಸತತಂ ಅಖಿಲಂ ಮೇ ವರಪ್ರದಾ|

ಮಮಾರಿನಾಶನಾರ್ಥಾಯ ಮಾಯಾ ಮೃತ್ಯುಞ್ಜಯಾ ಬಲಮ್|| ೨೪||

ಸರ್ವಾಭೀಷ್ಟನ್ತು ಮೇ ದದ್ಯಾತ್ ಪಾತು ಮಾಂ ಕಮಲಾಲಯಾ|

ಸಹಜಾಂ ಸೋದರಞ್ಚೈವ ಶತ್ರುಸಂಹಾರಿಣೀ ವಧೂಃ|| ೨೫||

ಬನ್ಧುವರ್ಗಂ ಪರಾಶಕ್ತಿಃ ಪಾತು ಮಾಂ ಸರ್ವಮಙ್ಗಲಾ||

        ಫಲಶ್ರುತಿಃ

ಯ ಇದಂ ಕವಚಂ ದಿವ್ಯಂ ರಮಾಯಾಃ ಪ್ರಯತಃ ಪಠೇತ್|

ಸರ್ವಸಿದ್ಧಿಮವಾಪ್ನೋತಿ ಸರ್ವರಕ್ಷಾಂ ಚ ಶಾಶ್ವತೀಮ್|| ೧||

ದೀರ್ಘಾಯುಷ್ಮಾನ್ಭವೇನ್ನಿತ್ಯಂ ಸರ್ವಸೌಭಾಗ್ಯಶೋಭಿತಮ್|

ಸರ್ವಜ್ಞಃ ಸರ್ವದರ್ಶೀ ಚ ಸುಖಿತಶ್ಚ ಸುಖೋಜ್ಜ್ವಲಃ|| ೨||

ಸುಪುತ್ರೋ ಗೋಪತಿಃ ಶ್ರೀಮಾನ್ ಭವಿಷ್ಯತಿ ನ ಸಂಶಯಃ |

ತದ್ಗೃಹೇ ನ ಭವೇದ್ಬ್ರಹ್ಮನ್ ದಾರಿದ್ರ್ಯದುರಿತಾದಿಕಮ್|| ೩||

ನಾಗ್ನಿನಾ ದಹ್ಯತೇ ಗೇಹಂ ನ ಚೋರಾದ್ಯೈಶ್ಚ ಪೀಡ್ಯತೇ|

ಭುತಪ್ರೇತಪಿಶಾಚಾದ್ಯಾಃ ತ್ರಸ್ತಾ ಧಾವನ್ತಿ ದೂರತಃ || ೪||

ಲಿಖಿತ್ವಾ ಸ್ಥಾಪಿತಂ ಯನ್ತ್ರಂ ತತ್ರ ವೃದ್ಧಿರ್ಭವೇತ್ ಧ್ರುವಮ್ |

ನಾಪಮೃತ್ಯುಮವಾಪ್ನೋತಿ ದೇಹಾನ್ತೇ ಮುಕ್ತಿಮಾನ್ ಭವೇತ್ || ೫||

ಸಾಯಂ ಪ್ರಾತಃ ಪಠೇದ್ಯಸ್ತು ಮಹಾಧನಪತಿರ್ಭವೇತ್ |

ಆಯುಷ್ಯಂ ಪೌಷ್ಟಿಕಂ ಮೇಧ್ಯಂ ಪಾಪಂ ದುಸ್ಸ್ವಪ್ನನಾಶನಮ್ || ೬||

ಪ್ರಜ್ಞಾಕರಂ ಪವಿತ್ರಞ್ಚ ದುರ್ಭಿಕ್ಷಾಗ್ನಿವಿನಾಶನಮ್ |

ಚಿತ್ತಪ್ರಸಾದಜನಕಂ ಮಹಾಮೃತ್ಯುಪ್ರಶಾನ್ತಿದಮ್ || ೭||

ಮಹಾರೋಗಜ್ವರಹರಂ ಬ್ರಹ್ಮಹತ್ಯಾದಿ ಶೋಧಕಮ್|

ಮಹಾಸುಖಪ್ರದಞ್ಚೈವ ಪಠಿತವ್ಯಂ ಸುಖಾರ್ಥಿಭಿಃ || ೮||

ಧನಾರ್ಥೀ ಧನಮಾಪ್ನೋತಿ ವಿವಾಹಾರ್ಥೀ ಲಭೇತ್ ವಧೂಃ|

ವಿದ್ಯಾರ್ಥೀ ಲಭತೇ ವಿದ್ಯಾಂ ಪುತ್ರಾರ್ಥೀ ಗುಣವತ್ಸುತಾನ್|| ೯||

ರಾಜ್ಯಾರ್ಥೀ ಲಭತೇ ರಾಜ್ಯಂ ಸತ್ಯಮುಕ್ತಂ ಮಯಾ ಶುಕ|

ಮಹಾಲಕ್ಷ್ಮ್ಯಾಃ ಮನ್ತ್ರಸಿದ್ಧಿಃ ಜಪಾತ್ ಸದ್ಯಃ ಪ್ರಜಾಯತೇ|| ೧೦||

ಏವಂ ದೇವ್ಯಾಃ ಪ್ರಸಾದೇನ ಶುಕಃ ಕವಚಮಾಪ್ತವಾನ್|

ಕವಚಾನುಗ್ರಹೇಣೈವ ಸರ್ವಾನ್ ಕಾಮಾನವಾಪ್ನುಯಾತ್|| ೧೧||

ಸರ್ವಲಕ್ಷಣಸಂಪನ್ನಾಂ ಲಕ್ಷ್ಮೀಂ ಸರ್ವೇಶ್ವರೇಶ್ವರೀಮ್ |

ಪ್ರಪದ್ಯೇ ಶರಣಂ ದೇವೀಂ ಪದ್ಮಪತ್ರಾಕ್ಷವಲ್ಲಭಾಮ್|| ೧೨||

 ಶ್ರೀ ಮಹಾಲಕ್ಷ್ಮೀ ಕವಚಂ ಸಂಪೂರ್ಣಮ್