ವೀರವಿಂಶತಿಕಾವ್ಯಂ ಶ್ರೀಹನುಮತ್ಸ್ತೋತ್ರಮ್

ವೀರವಿಂಶತಿಕಾವ್ಯಂ ಶ್ರೀಹನುಮತ್ಸ್ತೋತ್ರಮ್

        (ಉಮಾಪತಿ ಕವಿವಿರಚಿತಮ್)

ಲಾಂಗೂಲಮೃಷ್ಟವಿಯದಮ್ಬುಧಿಮಧ್ಯಮಾರ್ಗ-

ಮುತ್ಪ್ಲುತ್ಯ ಯಾನ್ತಮಮರೇನ್ದ್ರಮುದೋ ನಿದಾನಮ್ |

ಆಸ್ಫಾಲಿತಸ್ವಕಭುಜಸ್ಫುಟಿತಾದ್ರಿಕಾಣ್ಡಂ

ದ್ರಾಙ್ಮೈಥಿಲೀನಯನನನ್ದನಮದ್ಯ ವನ್ದೇ || ೧ ||

ಮಧ್ಯೇನಿಶಾಚರಮಹಾಭಯದುರ್ವಿಷಹ್ಯಂ

ಘೋರಾದ್ಭುತವ್ರತಮಿದಂ ಯದದಶ್ಚಚಾರ |

ಪತ್ಯೇ ತದಸ್ಯ ಬಹುಧಾಪರಿಣಾಮದೂತಂ

ಸೀತಾಪುರಸ್ಕೃತತನುಂ ಹನುಮನ್ತಮೀಡೇ || ೨ ||

ಯಃ ಪಾದಪಙ್ಕಜಯುಗಂ ರಘುನಾಥಪತ್ನ್ಯಾ

ನೈರಾಶ್ಯರೂಷಿತವಿರಕ್ತಮಪಿ ಸ್ವರಾಗೈಃ |

ಪ್ರಾಗೇವ ರಾಗಿ ವಿದಧೇ ಬಹು ವನ್ದಮಾನೋ

ವನ್ದೇಽಞ್ಜನಾಜನುಷಮೇವ ವಿಶೇಷತುಷ್ಟ್ಯೈ || ೩ ||

ತಾಞ್ಜಾನಕೀವಿರಹವೇದನಹೇತುಭೂತಾನ್

ದ್ರಾಗಾಕಲಯ್ಯ ಸದಶೋಕವನೀಯವೃಕ್ಷಾನ್ |

ಲಙ್ಕಾಲಕಾನಿವ ಘನಾನುದಪಾಟಯದ್ಯ-

ಸ್ತಂ ಹೇಮಸುನ್ದರಕಪಿಂ ಪ್ರಣಮಾಮಿ ಪುಷ್ಟ್ಯೈ || ೪ ||

ಘೋಷಪ್ರತಿಧ್ವನಿತಶೈಲಗುಹಾಸಹಸ್ರ-

ಸಂಭ್ರಾನ್ತನಾದಿತವಲನ್ಮೃಗನಾಥಯೂಥಮ್ |

ಅಕ್ಷಕ್ಷಯಕ್ಷಣವಿಲಕ್ಷಿತರಾಕ್ಷಸೇನ್ದ್ರ-

ಮಿನ್ದ್ರಂ ಕಪೀನ್ದ್ರಪೃತನಾವಲಯಸ್ಯ ವನ್ದೇ || ೫ ||

ಹೇಲಾವಿಲಙ್ಘಿತಮಹಾರ್ಣವಮಪ್ಯಮನ್ದಂ

ಘೂರ್ಣದ್ಗದಾವಿಹತಿವಿಕ್ಷತರಾಕ್ಷಸೇಷು |

ಸ್ವಮ್ಮೋದವಾರಿಧಿಮಪಾರಮಿವೇಕ್ಷಮಾಣಂ

ವನ್ದೇಽಹಮಕ್ಷಯಕುಮಾರಕಮಾರಕೇಶಮ್ || ೬ ||

ಜಮ್ಭಾರಿಜಿತ್ಪ್ರಸಭಲಮ್ಬಿತಪಾಶಬನ್ಧಂ

ಬ್ರಹ್ಮಾನುರೋಧಮಿವ ತತ್ಕ್ಷಣಮುದ್ವಹನ್ತಮ್ |

ರೌದ್ರಾವತಾರಮಪಿ ರಾವಣದೀರ್ಘದೃಷ್ಟಿ-

ಸಙ್ಕೋಚಕಾರಣಮುದಾರಹರಿಂ ಭಜಾಮಿ || ೭ ||

ದರ್ಪೋನ್ನಮನ್ನಿಶಿಚರೇಶ್ವರಮೂರ್ಧಚಞ್ಚ-

ತ್ಕೋಟೀರಚುಮ್ಬಿ ನಿಜಬಿಮ್ಬಮುದೀಕ್ಷ್ಯ ಹೃಷ್ಟಮ್ |

ಪಶ್ಯನ್ತಮಾತ್ಮಭುಜಯನ್ತ್ರಣಪಿಷ್ಯಮಾಣ-

ತತ್ಕಾಯಶೋಣಿತನಿಪಾತಮಪೇಕ್ಷಿ ವಕ್ಷಃ || ೮ ||

ಅಕ್ಷಪ್ರಭೃತ್ಯಮರವಿಕ್ರಮವೀರನಾಶ-

ಕ್ರೋಧಾದಿವ ದ್ರುತಮುದಞ್ಚಿತಚನ್ದ್ರಹಾಸಾಮ್ |

ನಿದ್ರಾಪಿತಾಭ್ರಘನಗರ್ಜನಘೋರಘೋಷೈಃ

ಸಂಸ್ಥಮ್ಭಯನ್ತಮಭಿನೌಮಿ ದಶಾಸ್ಯಮೂರ್ತಿಮ್ || ೯ ||

ಆಶಂಸ್ಯಮಾನವಿಜಯಂ ರಘುನಾಥಧಾಮ

ಶಂಸನ್ತಮಾತ್ಮಕೃತಭೂರಿಪರಾಕ್ರಮೇಣ |

ದೌತ್ಯೇ ಸಮಾಗಮಸಮನ್ವಯಮಾದಿಶನ್ತಂ

ವನ್ದೇ ಹರೇಃ ಕ್ಷಿತಿಭೃತಃ ಪೃತನಾಪ್ರಧಾನಮ್ || ೧೦ ||

ಯಸ್ಯೌಚಿತೀಂ ಸಮುಪದಿಷ್ಟವತೋಽಧಿಪುಚ್ಛಂ

ದಮ್ಭಾನ್ಧಿತಾಂ ಧಿಯಮಪೇಕ್ಷ್ಯ ವಿವರ್ಧಮಾನಃ |

ನಕ್ತಞ್ಚರಾಧಿಪತಿರೋಷಹಿರಣ್ಯರೇತಾ

ಲಙ್ಕಾಂ ದಿಧಕ್ಷುರಪತತ್ತಮಹಂ ವೃಣೋಮಿ || ೧೧ ||

ಕ್ರನ್ದನ್ನಿಶಾಚರಕುಲಾಂ ಜ್ವಲನಾವಲೀಢೈಃ

ಸಾಕ್ಷಾದ್ಗೃಹೈರಿವ ಬಹಿಃ ಪರಿದೇವಮಾನಾಮ್ |

ಸ್ತಬ್ಧಸ್ವಪುಚ್ಛತಟಲಗ್ನಕೃಪೀಟಯೋನಿ-

ದನ್ದಹ್ಯಮಾನನಗರೀಂ ಪರಿಗಾಹಮಾನಾಮ್ || ೧೨ ||

ಮೂರ್ತೈರ್ಗೃಹಾಸುಭಿರಿವ ದ್ಯುಪುರಂ ವ್ರಜದ್ಭಿ-

ರ್ವ್ಯೋಮ್ನಿ ಕ್ಷಣಂ ಪರಿಗತಂ ಪತಗೈರ್ಜ್ವಲದ್ಭಿಃ |

ಪೀತಾಮ್ಬರಂ ದಧತುಮುಚ್ಛ್ರಿತದೀಪ್ತಿ ಪುಚ್ಛಂ

ಸೇನಾಂ ವಹದ್ವಿಹಗರಾಜಮಿವಾಹಮೀಡೇ || ೧೩ ||

ಸ್ಥಮ್ಭೀಭವತ್ಸ್ವಗುರುವಾಲಧಿಲಗ್ನವಹ್ನಿ-

ಜ್ವಾಲೋಲ್ಲಲದ್ಧ್ವಜಪಟಾಮಿವ ದೇವತುಷ್ಟ್ಯೈ |

ವನ್ದೇ ಯಥೋಪರಿ ಪುರೋ ದಿವಿ ದರ್ಶಯನ್ತ-

ಮದ್ಯೈವ ರಾಮವಿಜಯಾಜಿಕವೈಜಯನ್ತೀಮ್ || ೧೪ ||

ರಕ್ಷಕ್ಷಯೈಕಚಿತಕಕ್ಷಕಪೂಶ್ಚಿತೌ ಯಃ

ಸೀತಾಶುಚೋ ನಿಜವಿಲೋಕನತೋ ಮೃತಾಯಾಃ |

ದಾಹಂ ವ್ಯಧಾದಿವ ತದನ್ತ್ಯವಿಧೇಯಭೂತಂ

ಲಾಙ್ಗೂಲದತ್ತದಹನೇನ ಮುದೇ ಸ ನೋಽಸ್ತು || ೧೫ ||

ಆಶುದ್ಧಯೇ ರಘುಪತಿಪ್ರಣಯೈಕಸಾಕ್ಷ್ಯೇ

ವೈದೇಹರಾಜದುಹಿತುಃ ಸರಿದೀಶ್ವರಾಯ |

ನ್ಯಾಸಂ ದದಾನಮಿವ ಪಾವಕಮಾಪತನ್ತ-

ಮಬ್ಧೌ ಪ್ರಭಞ್ಜನತನೂಜನುಷಂ ಭಜಾಮಿ || ೧೬ ||

ರಕ್ಷಸ್ಸ್ವತೃಪ್ತಿರುಡಶಾನ್ತಿವಿಶೇಷಶೋಣ-

ಮಕ್ಷಕ್ಷಯಕ್ಷಣವಿಧಾನುಮಿತಾತ್ಮದಾಕ್ಷ್ಯಮ್ |

ಭಾಸ್ವತ್ಪ್ರಭಾತರವಿಭಾನುಭರಾವಭಾಸಂ

ಲಙ್ಕಾಭಯಙ್ಕರಮಮುಂ ಭಗವನ್ತಮೀಡೇ || ೧೭ ||

ತೀರ್ತ್ವೋದಧಿಂ ಜನಕಜಾರ್ಪಿತಮಾಪ್ಯ ಚೂಡಾ-

ರತ್ನಂ ರಿಪೋರಪಿ ಪುರಂ ಪರಮಸ್ಯ ದಗ್ಧ್ವಾ |

ಶ್ರೀರಾಮಹರ್ಷಗಲದಶ್ರ್ವಭಿಷಿಚ್ಯಮಾನಂ

ತಂ ಬ್ರಹ್ಮಚಾರಿವರವಾನರಮಾಶ್ರಯೇಽಹಮ್ || ೧೮ ||

ಯಃ ಪ್ರಾಣವಾಯುಜನಿತೋ ಗಿರಿಶಸ್ಯ ಶಾನ್ತಃ

ಶಿಷ್ಯೋಽಪಿ ಗೌತಮಗುರುರ್ಮುನಿಶಂಕರಾತ್ಮಾ |

ಹೃದ್ಯೋ ಹರಸ್ಯ ಹರಿವದ್ಧರಿತಾಂ ಗತೋಽಪಿ

ಧೀಧೈರ್ಯಶಾಸ್ತ್ರವಿಭವೇಽತುಲಮಾಶ್ರಯೇ ತಂ || ೧೯ ||

ಸ್ಕನ್ಧೇಽಧಿವಾಹ್ಯ ಜಗದುತ್ತರಗೀತಿರೀತ್ಯಾ

ಯಃ ಪಾರ್ವತೀಶ್ವರಮತೋಷಯದಾಶುತೋಷಮ್ |

ತಸ್ಮಾದವಾಪ ಚ ವರಾನಪರಾನವಾಪ್ಯಾನ್

ತಂ ವಾನರಂ ಪರಮವೈಷ್ಣವಮೀಶಮೀಡೇ || ೨೦ ||

ಉಮಾಪತೇಃ ಕವಿಪತೇಃ ಸ್ತುತಿರ್ಬಾಲ್ಯವಿಜೃಮ್ಭಿತಾ |

ಹನೂಮತಸ್ತುಷ್ಟಯೇಽಸ್ತು ವೀರವಿಂಶತಿಕಾಭಿಧಾ || ೨೧ ||

               ***

ಶ್ರೀ ಹನುಮತ್ಭುಜಂಗಸ್ತೋತ್ರಮ್

ಶ್ರೀ ಹನುಮತ್ಭುಜಂಗಸ್ತೋತ್ರಮ್

   (ಶ್ರೀ ಶಂಕರಾಚಾರ್ಯಕೃತಮ್)

ಸ್ಫುರದ್ವಿದ್ಯುದುಲ್ಲಾಸವಾಲಾಗ್ರಘಣ್ಟಾ-

ಝಣತ್ಕಾರನಾದಪ್ರವೃದ್ಧಾಟ್ಟಹಾಸಮ್

ಭಜೇ ವಾಯುಸೂನುಂ ಭಜೇ ರಾಮದೂತಂ |

ಭಜೇ ವಜ್ರದೇಹಂ ಭಜೇ ಭಕ್ತಬನ್ಧುಮ್ || ೧ ||

ಪ್ರಪನ್ನಾನುರಾಗಂ ಪ್ರಭಾಕಾಞ್ಚನಾಙ್ಗಂ

ಜಗತ್ಗೀತಶೌರ್ಯಂ ತುಷಾರಾದ್ರಿಶೌರ್ಯಮ್ |

ತೃಣೀಭೂತಹೇತಿಂ ರಣೋದ್ಯದ್ವಿಭೂತಿಂ

ಭಜೇ ವಾಯುಪುತ್ರಂ ಪವಿತ್ರಾತ್ ಪವಿತ್ರಮ್ || ೨ ||

ಭಜೇ ರಾಮರಮ್ಭಾವನೀ ನಿತ್ಯವಾಸಂ

ಭಜೇ ಬಾಲಭಾನುಪ್ರಭಾಚಾರುಹಾಸಮ್ |

ಭಜೇ ಚನ್ದ್ರಿಕಾಕುನ್ದಮನ್ದಾರಭಾಸಂ

ಭಜೇ ಸನ್ತತಂ ರಾಮಭೂಪಾಲದಾಸಮ್ || ೩ ||

ಭಜೇ ಲಕ್ಷ್ಮಣಪ್ರಾಣರಕ್ಷಾತಿದಕ್ಷಂ

ಭಜೇ ತೋಷಿತಾನೇಕಗೀರ್ವಾಣಪಕ್ಷಂ |

ಭಜೇ ಘೋರಸಂಗ್ರಾಮಸೀಮಾಹತಾಕ್ಷಂ

ಭಜೇ ರಾಮನಾಮಾತಿಸಂಪ್ರಾಪ್ತರಕ್ಷಮ್ || ೪ ||

ಮೃಗಾಧೀಶನಾಥಂ ಕ್ಷಿತಿಕ್ಷಿಪ್ತಪಾದಂ

ಘನಾಕ್ರಾನ್ತಜಙ್ಘಂ ಕಟಿಸ್ಥೋಡುಸಙ್ಘಮ್ |

ವಿಯದ್ವ್ಯಾಪ್ತಕೇಶಂ ಭುಜಾಶ್ಲೇಷಿತಾಶಂ

ಜಯಶ್ರೀ ಸಮೇತಂ ಭಜೇ ರಾಮದೂತಮ್ || ೫ ||

ಚಲದ್ವಾಲಘಾತಭ್ರಮಚ್ಚಕ್ರವಾಲಂ

ಕಠೋರಾಟ್ಟಹಾಸಪ್ರಭಿನ್ನಾಬ್ಧಿಕಾಣ್ಡಮ್ |

ಮಹಾಸಿಂಹನಾದಾದ್ವಿಶೀರ್ಣತ್ರಿಲೋಕಂ

ಭಜೇ ಚಾಞ್ಜನೇಯಂ ಪ್ರಭುಂ ವಜ್ರಕಾಯಮ್ || ೬ ||

ರಣೇ ಭೀಷಣೇ ಮೇಘನಾದೇ ಸನಾದೇ

ಸರೋಷಂ ಸಮಾರೋಪ್ಯಸೌಮಿತ್ರಿಮಂಸೇ |

ಘನಾನಾಂ ಖಗಾನಾಂ ಸುರಾಣಾಂ ಚ ಮಾರ್ಗೇ

ನಟನ್ತಂ ಜ್ವಲನ್ತಂ ಹನೂಮನ್ತಮೀಡೇ || ೭ ||

ನಖಧ್ವಸ್ತ ಜಂಭಾರಿ ದಮ್ಭೋಲಿಧಾರಂ

ಭುಜಾಗ್ರೇಣ ನಿರ್ಧೂತ ಕಾಲಾಗ್ರದಣ್ಡಮ್ |

ಪದಾಘಾತಭೀತಾಹಿ ಜಾತಾಽಧಿವಾಸಂ

ರಣಕ್ಷೋಣಿದಕ್ಷಂ ಭಜೇ ಪಿಙ್ಗಲಾಕ್ಷಮ್ || ೮ ||

ಮಹಾಭೂತಪೀಡಾಂ ಮಹೋತ್ಪಾತಪೀಡಾಂ

ಮಹಾವ್ಯಾಧಿಪೀಡಾಂ ಮಹಾಧಿಪ್ರಪೀಡಾಮ್ |

ಹರತ್ಯಾಶು ತೇ ಪಾದಪದ್ಮಾನುರಕ್ತಿಃ

ನಮಸ್ತೇ ಕಪಿಶ್ರೇಷ್ಠ ರಾಮಪ್ರಿಯಾಯ || ೯ ||

ಸುಧಾಸಿನ್ಧುಮುಲ್ಲಙ್ಘ್ಯ ಸಾನ್ದ್ರೇ ನಿಶೀಥೇ

ಸುಧಾ ಚೌಷಧೀಸ್ತಾಃ ಪ್ರಗುಪ್ತಪ್ರಭಾವಾಃ |

ಕ್ಷಣೇ ದ್ರೋಣಶೈಲಸ್ಯ ಪೃಷ್ಠೇ ಪ್ರರೂಢಾಃ

ತ್ವಯಾ ವಾಯುಸೂನೋ ಕಿಲಾನೀಯ ದತ್ತಾಃ || ೯ ||

ಸಮುದ್ರಂ ತರಙ್ಗಾದಿರೌದ್ರಂ ವಿನಿದ್ರೋ

ವಿಲಙ್ಘ್ಯೋಡುಸಙ್ಘಂ ಸ್ತುತೋ ಮರ್ತ್ಯಸಂಘೈಃ |

ನಿರಾತಙ್ಕಮಾವಿಶ್ಯ ಲಙ್ಕಾಂ ವಿಶಙ್ಕೋ

ಭವಾನೇವ ಸೀತಾವಿಯೋಗಾಪಹಾರೀ || ೧೦ ||

ನಮಸ್ತೇ ಮಹಾಸತ್ವಬಾಹಾಯ ನಿತ್ಯಂ

ನಮಸ್ತೇ ಮಹಾವಜ್ರದೇಹಾಯ ತುಭ್ಯಮ್ |

ನಮಸ್ತೇ ಪರಾಭೂತಸೂರ್ಯಾಯ ತುಭ್ಯಂ

ನಮಸ್ತೇ ಕೃತಾಮರ್ತ್ಯಕಾರ್ಯಾಯ ತುಭ್ಯಮ್ || ೧೧ ||

ನಮಸ್ತೇ ಸದಾ ಬ್ರಹ್ಮಚರ್ಯಾಯ ತುಭ್ಯಂ

ನಮಸ್ತೇ ಸದಾ ವಾಯುಪುತ್ರಾಯ ತುಭ್ಯಮ್ |

ನಮಸ್ತೇ ಸದಾ ಪಿಙ್ಗಲಾಕ್ಷಾಯ ತುಭ್ಯಂ

ನಮಸ್ತೇ ಸದಾ ರಾಮಭಕ್ತಾಯ ತುಭ್ಯಂ || ೧೨ ||

ಹನೂಮತ್ಭುಜಂಗಪ್ರಯಾತಂ ಪ್ರಭಾತೇ

ಪ್ರದೋಷೇ ದಿವಾ ಚಾರ್ದ್ಧರಾತ್ರೇಽಪಿ ಮರ್ತ್ಯಃ |

ಪಠನ್ ಭಕ್ತಿಯುಕ್ತಃ ಪ್ರಮುಕ್ತಾಘಜಾಲಃ

ನರಾಃ ಸರ್ವದಾ ರಾಮಭಕ್ತಿಂ ಪ್ರಯಾನ್ತಿ || ೧೩ ||

ಆಪದುದ್ಧರಣಹನುಮತ್ಸ್ತೋತ್ರಮ್

ಆಪದುದ್ಧರಣಹನುಮತ್ಸ್ತೋತ್ರಮ್

          (ವಿಭೀಷಣಕೃತಮ್)

ವಾಮೇ ಕರೇ ವೈರಿಭಿದಂ ವಹನ್ತಂ

ಶೈಲಂ ಪರೇ ಶೃಙ್ಘಲಹಾರಿಟಙ್ಕಮ್ |

ದಧಾನಮಚ್ಛಚ್ಛವಿ ಯಜ್ಞಸೂತ್ರಂ

ಭಜೇ ಜ್ವಲತ್ಕುಣ್ಡಲಮಾಞ್ಜನೇಯಮ್ || ೧ ||

ಸುಪೀತಕೌಪೀನಮುದಞ್ಚಿತಾಂಗುಲಿಂ

ಸಮುಜ್ಜ್ವಲನ್ ಮೌಞ್ಜ್ಯಜಿನೋಪವೀತಿನಮ್ |

ಸಕುಣ್ಡಲಂ ಲಮ್ಬಶಿಖಾಸಮಾವೃತಂ

ತಮಾಞ್ಜನೇಯಂ ಶರಣಂ ಪ್ರಪದ್ಯೇ || ೨ ||

ಆಪನ್ನಾಖಿಲಲೋಕಾರ್ತಿಹಾರಿಣೇ ಶ್ರೀಹನೂಮತೇ |

ಅಕಸ್ಮಾದಾಗತೋತ್ಪಾತನಾಶನಾಯ ನಮೋಽಸ್ತು ತೇ || ೩ ||

ಸೀತಾವಿಯುಕ್ತಶ್ರೀರಾಮಶೋಕದುಃಖಭಯಾಪಹ |

ತಾಪತ್ರಿತಯಸಂಹಾರಿನ್ ಆಞ್ಜನೇಯ ನಮೋಽಸ್ತು ತೇ || ೪ ||

ಆಧಿವ್ಯಾಧಿಮಹಾಮಾರೀಗ್ರಹಪೀಡಾಪಹಾರಿಣೇ |

ಪ್ರಾಣಾಪಹರ್ತ್ರೇ ದೈತ್ಯಾನಾಂ ರಾಮಪ್ರಾಣಾತ್ಮನೇ ನಮಃ || ೫ ||

ಸಂಸಾರಸಾಗರಾವರ್ತೌ ಕರ್ತವ್ಯಭ್ರಾನ್ತಚೇತಸಾಮ್ |

ಶರಣಾಗತಮರ್ತ್ಯಾನಾಂ ಶರಣ್ಯಾಯ ನಮೋಽಸ್ತು ತೇ || ೬ ||

ರಾಜದ್ವಾರಿ ಬಿಲದ್ವಾರಿ ಪ್ರವೇಶೇ ಭೂತಸಙ್ಕುಲೇ |

ಗಜಸಿಂಹಮಹಾವ್ಯಾಘ್ರ ಚೋರಭೀಷಣಕಾನನೇ || ೭ ||

ಶರಣಾಯ ಶರಣ್ಯಾಯ ವಾತಾತ್ಮಜ ನಮೋಽಸ್ತು ತೇ |

ನಮಃ ಪ್ಲವಗಸೈನ್ಯಾನಾಂ ಪ್ರಾಣಭೂತಾತ್ಮನೇ ನಮಃ || ೮ ||

ರಾಮೇಷ್ಟಂ ಕರುಣಾಪೂರ್ಣಂ ಹನೂಮನ್ತಂ ಭಯಾಪಹಮ್ |

ಶತ್ರುನಾಶಕರಂ ಭೀಮಂ ಸರ್ವಾಭೀಷ್ಟಫಲಪ್ರದಮ್ || ೯ ||

ಪ್ರದೋಷೇ ವಾ ಪ್ರಭಾತೇ ವಾ ಯೇ ಸ್ಮರನ್ತ್ಯಞ್ಜನಾಸುತಮ್ |

ಅರ್ಥಸಿದ್ಧಿಂ ಯಶಃ ಕೀರ್ತಿಂ ಪ್ರಾಪ್ನುವನ್ತಿ ನ ಸಂಶಯಃ || ೧೦ ||

ಕಾರಾಗೃಹೇ ಪ್ರಯಾಣೇ ಚ ಸಂಗ್ರಾಮೇ ದೇಶವಿಪ್ಲವೇ |

ಯೇ ಸ್ಮರನ್ತಿ ಹನೂಮನ್ತಂ ತೇಷಾಂ ನಾಸ್ತಿ ವಿಪದ್ಸದಾ || ೧೧ ||

ವಜ್ರದೇಹಾಯ ಕಾಲಾಗ್ನಿರುದ್ರಾಯಾಮಿತತೇಜಸೇ |

ಬ್ರಹ್ಮಾಸ್ತ್ರಸ್ಥಂಭನಾಯಾಸ್ಮೈ ನಮಃ ಶ್ರೀ ರುದ್ರಮೂರ್ತಯೇ || ೧೨ ||

ಜಪ್ತ್ವಾ ಸ್ತೋತ್ರಮಿದಂ ಮನ್ತ್ರಂ ಪ್ರತಿವಾರಂ ಪಠೇನ್ನರಃ |

ರಾಜಸ್ಥಾನೇ ಸಭಾಸ್ಥಾನೇ ಪ್ರಾಪ್ತವಾದೇ ಜಪೇತ್ ಧ್ರುವಮ್ || ೧೩ ||

ವಿಭೀಷಣಕೃತಂ ಸ್ತೋತ್ರಂ ಯಃ ಪಠೇತ್ ಪ್ರಯತೋ ನರಃ |

ಸರ್ವಾಪದ್ಭ್ಯೋ ವಿಮುಚ್ಯೇತ ನಾತ್ರ ಕಾರ್ಯಾ ವಿಚಾರಣಾ || ೧೪ ||

ಮರ್ಕಟೇಶ ಮಹೋತ್ಸಾಹ ಸರ್ವಶೋಕವಿನಾಶಕ |

ಶತ್ರೂನ್ ಸಂಹರ ಮಾಂ ರಕ್ಷ ಶ್ರಿಯಂ ದಾಸಾಯ ದೇಹಿ ಮೇ || ೧೫ ||