ಶಾಸ್ತಾ ಅಷ್ಟಕಮ್

ಶಾಸ್ತಾ ಅಷ್ಟಕಮ್

ಹರಿವರಾಸನಂ ವಿಶ್ವಮೋಹನಂ

ಹರಿತದೀಶ್ವರಾಽಽರಾಧ್ಯಪಾದುಕಮ್ |

ಅರಿವಿಮರ್ದ್ದನಂ ನಿತ್ಯನರ್ತನಂ

ಹರಿಹರಾತ್ಮಜಂ ದೇವಮಾಶ್ರಯೇ || ೧ ||

ಚರಣಕೀರ್ತನಂ ಶಕ್ತಮಾನಸಂ

ಭರಣಲೋಲುಪಂ ನರ್ತನಾಲಯಮ್ |

ಅರುಣಭಾಸುರಂ ಭೂತನಾಯಕಂ

ಹರಿಹರಾತ್ಮಜಂ ದೇವಮಾಶ್ರಯೇ || ೨ ||

ಪ್ರಣಯ ಸತ್ಯಕಾ ಪ್ರಾಣನಾಯಕಂ

ಪ್ರಣತಕಲ್ಪಕಂ ಸುಪ್ರಭಾಞ್ಚಿತಂ |

ಪ್ರಣವಮನ್ದಿರಂ ಕೀರ್ತನಪ್ರಿಯಂ

ಹರಿಹರಾತ್ಮಜಂ ದೇವಮಾಶ್ರಯೇ || ೩ ||

ತುರಗವಾಹನಂ ಸುನ್ದರಾನನಂ

ವರಗದಾಯುಧಂ ದೇವವರ್ಣಿತಮ್ |

ಗುರುಕೃಪಾಕರಂ ಕೀರ್ತನಪ್ರಿಯಂ

ಹರಿಹರಾತ್ಮಜಂ ದೇವಮಾಶ್ರಯೇ || ೪ ||

ತ್ರಿಭುವನಾರ್ಚಿತಂ ದೇವತಾತ್ಮಕಂ

ತ್ರಿನಯನಪ್ರಭುಂ ದಿವ್ಯದೇಶಿಕಮ್ |

ತ್ರಿದಶಪೂಜಿತಂ ಚಿನ್ತಿತಪ್ರದಂ

ಹರಿಹರಾತ್ಮಜಂ ದೇವಮಾಶ್ರಯೇ || ೫ ||

ಭವಭಯಾಪಹಂ ಭಾವುಕಾವಹಂ

ಭುವನಮೋಹನಂ ಭೂತಿಭೂಷಣಮ್ |

ಧವಲವಾಹನಂ ದಿವ್ಯವಾರಣಂ

ಹರಿಹರಾತ್ಮಜಂ ದೇವಮಾಶ್ರಯೇ || ೬ ||

ಕಲಮೃದುಸ್ಮಿತಂ ಸುನ್ದರಾನನಂ

ಕಲಭಕೋಮಲಂ ಗಾತ್ರಮೋಹನಮ್ |

ಕಲಭಕೇಸರೀವಾಜಿವಾಹನಂ

ಹರಿಹರಾತ್ಮಜಂ ದೇವಮಾಶ್ರಯೇ || ೭ ||

ಶ್ರಿತಜನಪ್ರಿಯಂ ಚಿನ್ತಿತಪ್ರದಂ

ಶ್ರುತಿವಿಭೂಷಣಂ ಸಾಧುಜೀವನಮ್ |

ಶ್ರುತಿಮನೋಹರಂ ಗೀತಲಾಲಸಂ

ಹರಿಹರಾತ್ಮಜಂ ದೇವಮಾಶ್ರಯೇ || ೮ ||

ಶ್ರೀಧರ್ಮಶಾಸ್ತೃಭುಜಂಗಸ್ತೋತ್ರಮ್

ಶ್ರೀಧರ್ಮಶಾಸ್ತೃಭುಜಂಗಸ್ತೋತ್ರಮ್

ಶ್ರಿತಾನನ್ದ ಚಿನ್ತಾಮಣಿ ಶ್ರೀನಿವಾಸಂ

ಸದಾ ಸಚ್ಚಿದಾನನ್ದಪೂರ್ಣಪ್ರಕಾಶಮ್ |

ಉದಾರಂ ಸುದಾರಂ ಸುರಾಧಾರಮೀಶಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧ ||

ವಿಭುಂ ವೇದವೇದಾನ್ತವೇದ್ಯಂ ವರಿಷ್ಠಂ

ವಿಭೂತಿಪ್ರದಂ ವಿಶ್ರುತಂ ಬ್ರಹ್ಮನಿಷ್ಠಮ್ |

ವಿಭಾಸ್ವತ್ಪ್ರಭಾವಪ್ರಭಂ ಪುಷ್ಕಲೇಷ್ಟಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೨ ||

ಪರಿತ್ರಾಣದಕ್ಷಂ ಪರಬ್ರಹ್ಮಸೂತ್ರಂ

ಸ್ಫುರಚ್ಚಾರುಗಾತ್ರಂ ಭವಧ್ವಾನ್ತಮಿತ್ರಮ್ |

ಪರಂ ಪ್ರೇಮಪಾತ್ರಂ ಪವಿತ್ರಂ ವಿಚಿತ್ರಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೩ ||

ಪರೇಶಂ ಪ್ರಭುಂ ಪೂರ್ಣಕಾರುಣ್ಯರೂಪಂ

ಗಿರೀಶಾಧಿಪೀಠೋಜ್ವಲಚ್ಚಾರುದೀಪಮ್ |

ಸುರೇಶಾದಿಸಂಸೇವಿತಂ ಸುಪ್ರತಾಪಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೪ ||

ಹರೀಶಾನಸಂಯುಕ್ತಶಕ್ತ್ಯೈಕವೀರಂ

ಕಿರಾತಾವತಾರಂ ಕೃಪಾಪಾಙ್ಗಪೂರಂ |

ಕಿರೀಟಾವತಂಸೋಜ್ಜ್ವಲತ್ ಪಿಞ್ಛಭಾರಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೫ ||

ಗುರುಂ ಪೂರ್ಣಲಾವಣ್ಯಪಾದಾದಿಕೇಶಂ

ಗರೀಯಂ ಮಹತ್ಕೋಟಿಸೂರ್ಯಪ್ರಕಾಶಂ |

ಕರಾಮ್ಭೋರುಹನ್ಯಸ್ತವೇತ್ರಂ ಸುರೇಶಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೬ ||

ಮಹಾಯೋಗಪೀಠೇ ಜ್ವಲನ್ತಂ ಮಹಾನ್ತಂ

ಮಹಾವಾಕ್ಯಸಾರೋಪದೇಶಂ ಸುಶಾನ್ತಮ್ |

ಮಹರ್ಷಿಪ್ರಹರ್ಷಪ್ರದಂ ಜ್ಞಾನಕನ್ದಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೭ ||

ಮಹಾರಣ್ಯಮನ್ಮಾನಸಾನ್ತರ್ನಿವಾಸಾನ್

ಅಹಂಕಾರದುರ್ವಾರಹಿಂಸ್ರಾಮೃಗಾದೀನ್ |

ಹರನ್ತಂ ಕಿರಾತಾವತಾರಂ ಚರನ್ತಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೮ ||

ಪೃಥಿವ್ಯಾದಿಭೂತಪ್ರಪಞ್ಚಾನ್ತರಸ್ಥಂ

ಪೃಥಗ್ಭೂತಚೈತನ್ಯಜನ್ಯಂ ಪ್ರಶಸ್ತಮ್ |

ಪ್ರಧಾನಂ ಪ್ರಮಾಣಂ ಪುರಾಣಪ್ರಸಿದ್ಧಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೯ ||

ಜಗಜ್ಜೀವನಂ ಪಾವನಂ ಭಾವನೀಯಂ

ಜಗದ್ವ್ಯಾಪಕಂ ದೀಪಕಂ ಮೋಹನೀಯಂ |

ಸುಖಾಧಾರಮಾಧಾರಭೂತಂ ತುರೀಯಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧೦ ||

ಇಹಾಮುತ್ರ ಸತ್ಸೌಖ್ಯಸಂಪನ್ನಿದಾನಂ

ಮಹದ್ಯೋನಿಮವ್ಯಾಹತಾತ್ಮಾಭಿಧಾನಮ್ |

ಮಹತ್ ಪುಣ್ಡರೀಕಾಯನಂ ದೀಪ್ಯಮಾನಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧೧ ||

ತ್ರಿಕಾಲಸ್ಥಿತಂ ಸುಸ್ಥಿರಂ ಜ್ಞಾನಸಂಸ್ಥಂ

ತ್ರಿಧಾಮಾದಿಮೂರ್ತ್ಯಾತ್ಮಕಂ ಬ್ರಹ್ಮಸಂಸ್ಥಮ್ |

ತ್ರಯೀಮೂರ್ತಿಮಾರ್ತಿಚ್ಛಿದಂ ಶಕ್ತಿಯುಕ್ತಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧೨ ||

ಇಡಾಪಿಙ್ಗಲಾಸುಷುಮ್ನಾ ವಿಶನ್ತಂ

ಸ್ಫುಟಂ ಬ್ರಹ್ಮರನ್ಧ್ರಸ್ವತನ್ತ್ರಂ ಸುಶಾನ್ತಂ |

ದೃಢಂ ನಿತ್ಯನಿರ್ವಾಣಮುದ್ಭಾಸಯನ್ತಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧೩ ||

ಅಣುಬ್ರಹ್ಮಪರ್ಯನ್ತ ಜೀವೈಕ್ಯಬಿಮ್ಬಂ

ಗುಣಾಕಾರಮತ್ಯನ್ತಭಕ್ತಾನುಕಮ್ಪಮ್ |

ಅನರ್ಘಂ ಶುಭೋದರ್ಕಮಾತ್ಮಾವಲಮ್ಬಂ

ಪರಂ ಜ್ಯೋತಿರೂಪಂ ಭಜೇ ಭೂತನಾಥಮ್ || ೧೪ ||

ಶ್ರೀಭೂತನಾಥಸ್ತೋತ್ರದಶಕಮ್

ಶ್ರೀಭೂತನಾಥಸ್ತೋತ್ರದಶಕಮ್

ಪಾಣ್ಡ್ಯಭೂಪತೀನ್ದ್ರಪೂರ್ವಪುಣ್ಯಮೋಹನಾಕೃತೇ

ಪಣ್ಡಿತಾರ್ಚಿತಾಙ್ಘ್ರಿಪುಣ್ಡರೀಕ ಪಾವನಾಕೃತೇ |

ಪೂರ್ಣಚನ್ದ್ರತುಣ್ಡವೇತ್ರದಣ್ಡವೀರ್ಯವಾರಿಧೇ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೧ ||

ಆದಿಶಂಕರಾಚ್ಯುತಪ್ರಿಯಾತ್ಮಸಮ್ಭವ ಪ್ರಭೋ

ಆದಿಭೂತನಾಥ ಸಾಧುಭಕ್ತಚಿನ್ತಿತಪ್ರದ |

ಭೂತಿಭೂಷ ವೇದಘೋಷಪಾರಿತೋಷಶಾಶ್ವತ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೨ ||

ಪಞ್ಚಬಾಣಕೋಟಿಕೋಮಲಾಕೃತೇ ಕೃಪಾನಿಧೇ

ಪಞ್ಚಗವ್ಯಪಾಯಸಾನ್ನಪಾನಕಾದಿಮೋದಕ |

ಪಞ್ಚಭೂತಸಞ್ಚಯಪ್ರಪಞ್ಚಭೂತಪಾಲಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೩ ||

ಚನ್ದ್ರಸೂರ್ಯವೀತಿಹೋತ್ರನೇತ್ರನೇತ್ರಮೋಹನ

ಸಾನ್ದ್ರಸುನ್ದರಸ್ಮಿತಾರ್ದ್ರ ಕೇಸರೀನ್ದ್ರವಾಹನ |

ಇನ್ದ್ರವನ್ದನೀಯಪಾದ ಸಾಧುವೃನ್ದಜೀವನ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೪ ||

ವೀರಬಾಹುವರ್ಣನೀಯವೀರ್ಯಶೌರ್ಯವಾರಿಧೇ

ವಾರಿಜಾಸನಾದಿದೇವವನ್ದ್ಯ ಸುನ್ದರಾಕೃತೇ |

ವಾರಣೇನ್ದ್ರವಾಜಿಸಿಂಹವಾಹ ಭಕ್ತಶೇವಧೇ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೫ ||

ಅತ್ಯುದಾರಭಕ್ತಚಿತ್ತರಙ್ಗನರ್ತನಪ್ರಭೋ

ನಿತ್ಯಶುದ್ಧನಿರ್ಮಲಾದ್ವಿತೀಯ ಧರ್ಮಪಾಲಕ |

ಸತ್ಯರೂಪ ಮುಕ್ತಿರೂಪ ಸರ್ವದೇವತಾತ್ಮಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೬ ||

ಸಾಮಗಾನಲೋಲ ಶಾನ್ತಶೀಲ ಧರ್ಮಪಾಲಕ

ಸೋಮಸುನ್ದರಾಸ್ಯ ಸಾಧುಪೂಜನೀಯಪಾದುಕ |

ಸಾಮದಾನಭೇದದಣ್ಡಶಾಸ್ತ್ರನೀತಿ ಬೋಧಕ

ಪೂರ್ಣಪುಷ್ಕಲ ಸಮೇತ ಭೂತನಾಥ ಪಾಹಿ ಮಾಮ್ || ೭ ||

ಸುಪ್ರಸನ್ನದೇವದೇವ ಸದ್ಗತಿಪ್ರದಾಯಕ

ಚಿತ್ಪ್ರಕಾಶ ಧರ್ಮಪಾಲ ಸರ್ವಭೂತನಾಯಕ |

ಸುಪ್ರಸಿದ್ಧ ಪಞ್ಚಶೈಲಸನ್ನಿಕೇತನರ್ತಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೮ ||

ಶೂಲಚಾಪಬಾಣಖಡ್ಗವಜ್ರಶಕ್ತಿ ಶೋಭಿತ

ಬಾಲಸೂರ್ಯಕೋಟಿಭಾಸುರಾಙ್ಗ ಭೂತಸೇವಿತ |

ಕಾಲಚಕ್ರ ಸಂಪ್ರವೃತ್ತಿ ಕಲ್ಪನಾ ಸಮನ್ವಿತ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೯ ||

ಅದ್ಭುತಾತ್ಮಬೋಧಸತ್ಸನಾತನೋಪದೇಶಕ

ಬುದ್ಬುದೋಪಮಪ್ರಪಞ್ಚವಿಭ್ರಮಪ್ರಕಾಶಕ |

ಸಪ್ರಥಪ್ರಗಲ್ಭಚಿತ್ ಪ್ರಕಾಶ ದಿವ್ಯದೇಶಿಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೧೦ ||

ಧರ್ಮಶಾಸ್ತೃಸ್ತುತಿದಶಕಮ್

ಧರ್ಮಶಾಸ್ತೃಸ್ತುತಿದಶಕಮ್

ಆಶಾನುರೂಪಫಲದಂ ಚರಣಾರವಿನ್ದ-

ಭಾಜಾಮಪಾರಕರುಣಾರ್ಣವಪೂರ್ಣಚನ್ದ್ರಮ್ |

ನಾಶಾಯ ಸರ್ವವಿಪದಾಮಪಿ ನೌಮಿ ನಿತ್ಯಂ

ಈಶಾನಕೇಶವಭುವಂ ಭುವನೈಕನಾಥಮ್ || ೧ ||

ಪಿಞ್ಛಾವಲೀವಲಯಿತಾಕಲಿತಪ್ರಸೂನ-

ಸಂಜಾತಕಾನ್ತಿಭರಭಾಸುರಕೇಶಭಾರಮ್ |

ಶಿಞ್ಜಾನಮಞ್ಜುಮಣಿಭೂಷಿತರಞ್ಜಿತಾಙ್ಗಂ

ಚನ್ದ್ರಾವತಂಸಹರಿನನ್ದನಮಾಶ್ರಯಾಮಿ || ೨ ||

ಆಲೋಲನೀಲಲಲಿತಾಲಕಹಾರರಮ್ಯಂ

ಆಕಮ್ರನಾಸಮರುಣಾಧರಮಾಯತಾಕ್ಷಮ್ |

ಆಲಮ್ಬನಂ ತ್ರಿಜಗತಾಂ ಪ್ರಮಥಾಧಿನಾಥಂ

ಆನಮ್ರಲೋಕಹರಿನನ್ದನಮಾಶ್ರಯಾಮಿ || ೩ ||

ಕರ್ಣಾವಲಮ್ಬಿಮಣಿಕುಣ್ಡಲಭಾಸಮಾನ-

ಗಣ್ಡಸ್ಥಲಂ ಸಮುದಿತಾನನಪುಣ್ಡರೀಕಮ್ |

ಅರ್ಣೋಜನಾಭಹರಯೋರಿವ ಮೂರ್ತಿಮನ್ತಂ

ಪುಣ್ಯಾತಿರೇಕಮಿವ ಭೂತಪತಿಂ ನಮಾಮಿ || ೪ ||

ಉದ್ದಣ್ಡಚಾರುಭುಜದಣ್ಡಯುಗಾಗ್ರಸಂಸ್ಥ-

ಕೋದಣ್ಡಬಾಣಮಹಿತಾನ್ತಮದಾನ್ತವೀರ್ಯಮ್ |

ಉದ್ಯತ್ಪ್ರಭಾಪಟಲದೀಪ್ರಮದಭ್ರಸಾರಂ

ನಿತ್ಯಂ ಪ್ರಭಾಪತಿಮಹಂ ಪ್ರಣತೋ ಭವಾಮಿ || ೫ ||

ಮಾಲೇಯಪಙ್ಕಸಮಲಙ್ಕೃತಭಾಸಮಾನ-

ದೋರನ್ತರಾಲತರಲಾಮಲಹಾರಜಾಲಮ್ |

ನೀಲಾತಿನಿರ್ಮಲದುಕೂಲಧರಂ ಮುಕುನ್ದ-

ಕಾಲಾನ್ತಕಪ್ರತಿನಿಧಿಂ ಪ್ರಣತೋಽಸ್ಮಿ ನಿತ್ಯಮ್ || ೬ ||

ಯತ್ಪಾದಪಙ್ಕಜಯುಗಂ ಮುನಯೋಽಪ್ಯಜಸ್ರಂ

ಭಕ್ತ್ಯಾ ಭಜನ್ತಿ ಭವರೋಗನಿವಾರಣಾಯ |

ಪುತ್ರಂ ಪುರಾನ್ತಕಮುರಾನ್ತಕಯೋರುದಾರಂ

ನಿತ್ಯಂ ನಮಾಮ್ಯಹಮಮಿತ್ರಕುಲಾನ್ತಕಂ ತಮ್ || ೭ ||

ಕಾನ್ತಂ ಕಲಾಯಕುಸುಮದ್ಯುತಿ ಲೋಭನೀಯ-

ಕಾನ್ತಿಪ್ರವಾಹವಿಲಸತ್ ಕಮನೀಯರೂಪಮ್ |

ಕಾನ್ತಾತನೂಜಸಹಿತಂ ನಿಖಿಲಾಮಯೌಘ

ಶನ್ತಿಪ್ರದಂ ಪ್ರಮಥನಾಥಮಹಂ ನಮಾಮಿ || ೮ ||

ಭೂತೇಶ ಭೂರಿಕರುಣಾಮೃತಪೂರಪೂರ್ಣ-

ವಾರಾನ್ನಿಧೇ ವರದ ಭಕ್ತಜನೈಕಬನ್ಧೋ |

ಪಾಯಾತ್ ಭವಾನ್ ಪ್ರಣತಮೇನಮಪಾರಘೋರ-

ಸಂಸಾರಭೀತಮಿಹ ಮಾಮಖಿಲಾಮಯೇಭ್ಯಃ || ೯ ||

ಹೇ ಭೂತನಾಥ ಭಗವನ್ ಭವದೀಯಚಾರು-

ಪಾದಾಮ್ಬುಜೇ ಭವತು ಭಕ್ತಿರಚಞ್ಚಲಾ ಮೇ |

ನಾಥಾಯ ಸರ್ವಜಗತಾಂ ಭಜತಾಂ ಭವಾಬ್ಧಿ-

ಪೋತಾಯ ನಿತ್ಯಮಖಿಲಾಙ್ಗಭುವೇ ನಮಸ್ತೇ || ೧೦ ||