ಶ್ರೀಗಣಪತಿದ್ವಾದಶನಾಮಸ್ತೋತ್ರಮ್

 ಶ್ರೀಗಣಪತಿದ್ವಾದಶನಾಮಸ್ತೋತ್ರಮ್

            (ಪಾದ್ಮಪುರಾಣಾಂತರ್ಗತಂ)

ಗಣಪತಿರ್ವಿಘ್ನರಾಜೋ ಲಂಬತುಣ್ಡೋ ಗಜಾನನಃ

ದ್ವೈಮಾತುರಶ್ಚ ಹೇರಂಬ ಏಕದಂತೋ ಗಣಾಧಿಪಃ

ವಿನಾಯಕಶ್ಚಾರುಕರ್ಣಃ ಪಶುಪಾಲೋ ಭವಾತ್ಮಜಃ || ೧ ||

ದ್ವಾದಶೈತಾನಿ ನಾಮಾನಿ ಪ್ರಾತರುತ್ಥಾಯ ಯಃ ಪಠೇತ್ |

ವಿಶ್ವಂ ತಸ್ಯ ಭವೇದ್ವಶ್ಯಂ ನಚ ವಿಘ್ನಂ ಭವೇತ್ ಕ್ವಚಿತ್ || ೨ ||

ಮಹಾಪ್ರೇತಾಃ ಶಮಂ ಯಾನ್ತಿ ಪೀಡ್ಯತೇ ವ್ಯಾಧಿಭಿರ್ನ ಚ |

ಸರ್ವಪಾಪಾದ್ವಿನಿರ್ಮುಕ್ತೋಹ್ಯಕ್ಷಯಂ ಸ್ವರ್ಗಮಶ್ನುತೇ || ೩ ||

ಶ್ರೀನಾಮರಾಮಾಯಣಮ್

ಶ್ರೀನಾಮರಾಮಾಯಣಮ್

    (ಬಾಲಕಾಣ್ಡಮ್)

ಶುದ್ಧಬ್ರಹ್ಮಪರಾತ್ಪರ ರಾಮ  

ಕಾಲಾತ್ಮಕ ಪರಮೇಶ್ವರ ರಾಮ  |

ಶೇಷತಲ್ಪ ಸುಖನಿದ್ರಿತ ರಾಮ

ಬ್ರಹ್ಮಾದ್ಯಮರಪ್ರಾರ್ತ್ಥಿತ ರಾಮ || ೧ ||

ಚಣ್ಡಕಿರಣಕುಲಮಣ್ಡನ ರಾಮ

ಶ್ರೀಮದ್ದಶರಥನನ್ದನ ರಾಮ |

ಕೌಸಲ್ಯಾಸುಖವರ್ಧನ ರಾಮ

ವಿಶ್ವಾಮಿತ್ರಪ್ರಿಯಧನ ರಾಮ || ೨ ||

ಘೋರತಾಟಕಾಘಾತಕ ರಾಮ

ಮಾರೀಚಾದಿನಿಪಾತಕ ರಾಮ |

ಕೌಶಿಕಮಖಸಂರಕ್ಷಕ ರಾಮ

ಶ್ರೀಮದಹಲ್ಯೋದ್ಧಾರಕ ರಾಮ || ೩ ||

ಗೌತಮಮುನಿಸಂಪೂಜಿತ ರಾಮ

ಸುರಮುನಿವರಗಣಸಂಸ್ತುತ ರಾಮ |

ನಾವಿಕಧಾವಿತಮೃದುಪದ ರಾಮ

ಮಿಥಿಲಾಪುರಜನಮೋದಕ ರಾಮ || ೪ ||

ಮೈಥಿಲಿಮಾನಸರಞ್ಜಕ ರಾಮ

ತ್ರ್ಯೈಮ್ಬಕಕಾರ್ಮುಕಭಞ್ಜನ ರಾಮ |

ಸೀತಾರ್ಪಿತವರಮಾಲಿಕ ರಾಮ

ಕೃತವೈವಾಹಿಕಕೌತುಕ ರಾಮ || ೫ ||

ಭಾರ್ಗವದರ್ಪವಿನಾಶಕ ರಾಮ

ಶ್ರೀಮದಯೋಧ್ಯಾಪಾಲಕ ರಾಮ || ೬ ||

(ಅಯೋದ್ಧ್ಯಾಕಾಣ್ಡಮ್)

ಅಗಣಿತಗುಣಗಣಭೂಷಿತ ರಾಮ

ಅವನೀತನಯಾಕಾಮಿತ ರಾಮ |

ರಾಕಾಚನ್ದ್ರಸಮಾನನ ರಾಮ

ಪಿತೃವಾಕ್ಯಸ್ಥಿತಕಾನನ ರಾಮ || ೭ ||

ಪ್ರಿಯಗುಹವಿನಿವೇದಿತಪದ ರಾಮ

ತತ್ಕ್ಷಾಲಿತನಿಜಮೃದುಪದ ರಾಮ  |

ಭಾರದ್ವಾಜಸುಪೂಜಿತ ರಾಮ

ಚಿತ್ರಕೂಟಾದ್ರಿನಿಕೇತನ ರಾಮ || ೮ ||

ದಶರಥಸನ್ತತಚಿನ್ತಿತ ರಾಮ

ಕೈಕೇಯೀತನಯಾರ್ಥಿತ ರಾಮ |

ವಿರಚಿತನಿಜಪಿತೃಕರ್ಮಕ ರಾಮ

ಭರತಾರ್ಪಿತನಿಜಪಾದುಕ ರಾಮ  || ೯ ||

(ಆರಣ್ಯಕಾಣ್ಡಮ್)

ದಣ್ಡಕಕಾನನಪಾವನ ರಾಮ

ದುಷ್ಟವಿರಾಧವಿನಾಶನ ರಾಮ |

ಶರಭಂಗಸುತೀಕ್ಷ್ಣಾರ್ಚಿತ ರಾಮ 

ಅಗಸ್ತ್ಯಾನುಗ್ರಹ ವರ್ದ್ಧಿತ ರಾಮ || ೧೦ ||

ಗೃಧ್ರಾಧಿಪಸಂಸೇವಿತ ರಾಮ

ಪಂಚವಟೀತಟಸುಸ್ಥಿತ ರಾಮ |

ಖರದೂಷಣಮುಖಸೂದಕ ರಾಮ

ಸೀತಾಪ್ರಿಯಹರಿಣಾನುಗ ರಾಮ  || ೧೧ ||

ಮಾರೀಚಾರ್ತಿಕೃದಾಶುಗ ರಾಮ

ವಿನಷ್ಟಸೀತಾನ್ವೇಷಕ ರಾಮ |

ಗೃಧ್ರಾಧಿಪಗತಿದಾಯಕ ರಾಮ

ಶಬರೀದತ್ತಫಲಾಶನ ರಾಮ

ಕಬನ್ಧಬಾಹೂಚ್ಛೇದನ ರಾಮ || ೧೨ ||

    (ಕಿಷ್ಕಿನ್ಧಾಕಾಣ್ಡಮ್)

ಹನುಮತ್ಸೇವಿತನಿಜಪದ ರಾಮ

ತಸುಗ್ರೀವಾಭೀಷ್ಟದ ರಾಮ |

ಗರ್ವಿತಬಾಲಿನಿಷೂದನ ರಾಮ

ಹಿತಕರಲಕ್ಷ್ಮಣಸಂಯುತ ರಾಮ || ೧೩ ||

     (ಸುನ್ದರಕಾಣ್ಡಮ್)

ಕಪಿವರಸನ್ತತಸಂಸ್ತುತ ರಾಮ

ತತ್ಗತಿವಿಘ್ನಧ್ವಂಸಕ ರಾಮ |

ಸೀತಾಪ್ರಾಣಾಧಾರಕ ರಾಮ

ದುಷ್ಟದಶಾನನದೂಷಿತ ರಾಮ || ೧೪ ||

ಶಿಷ್ಟಹನೂಮದ್ಭೂಷಿತ ರಾಮ

ಸೀತಾರೋದಿತಕೋಪನ ರಾಮ |

ಕೃತಚೂಡಾಮಣಿದರ್ಶನ ರಾಮ

ಕಪಿವರವಚನಾಶ್ವಾಸಿತ ರಾಮ  || ೧೫ ||

     (ಯುದ್ಧಕಾಣ್ಡಮ್)

ರಾವಣನಿಧನಪ್ರಸ್ಥಿತ ರಾಮ

ವಾನರಸೈನ್ಯಸಮಾವೃತ ರಾಮ |

ಶೋಷಿತತಟಿನೀಶಾರ್ಥಿತ ರಾಮ

ವಿಭೀಷಣಾಭಯದಾಯಕ ರಾಮ  || ೧೬ ||

ಸಾಗರಸೇತುನಿಬನ್ಧಕ ರಾಮ

ಕುಂಭಕರ್ಣಶಿರಚ್ಛೇದಕ ರಾಮ |

ರಾಕ್ಷಸಸಙ್ಘವಿಮರ್ದ್ದಕ ರಾಮ

ಅಮಹಿತರಾವಣ ವಾರಣ ರಾಮ || ೧೭ ||

ಸಂಹೃತದಶಮುಖರಾವಣ ರಾಮ

ವಿಧಿಭವಮುಖಸಂಸ್ತುತಪದ ರಾಮ |

ಖಸ್ಥಿತದಶರಥವೀಕ್ಷಿತ ರಾಮ

ಸೀತಾದರ್ಶನಮೋದಿತ ರಾಮ || ೧೮ ||

ಅಭಿಷಿಕ್ತವಿಭೀಷಣನತ ರಾಮ 

ಪುಷ್ಪಕಯಾನಾರೋಹಣ ರಾಮ |

ಭರದ್ವಾಜಾಭಿನಿಷೇವಣ ರಾಮ

ಸಾಕೇತಪುರೀಭೂಷಣ ರಾಮ || ೧೯ ||

ಸಕಲಸ್ವೀಯಸಮಾನತ ರಾಮ

ರತ್ನಲಸತ್ಪೀಠಸ್ಥಿತ ರಾಮ |

ಪಟ್ಟಾಭಿಷೇಕಾಲಂಕೃತ ರಾಮ

ಪಾರ್ಥಿವಕುಲಸಮ್ಮನಿತ ರಾಮ || ೨೦ ||

ಕೀಶಕುಲಾನುಗ್ರಾಹಕ ರಾಮ

ಸಕಲಜಗತ್ಪರಿಪಾಲಕ ರಾಮ |

ಸಕಲಾಭೀಷ್ಟವರಪ್ರದ ರಾಮ  || ೨೧ ||

ರಾಮ ರಾಮ ಜಯ ರಾಜಾರಾಮ್

ರಾಮ ರಾಮ ಯಯ ಸೀತರಾಮ್ || ೨೨ ||

 

ಶ್ರೀಸೀತಾರಾಮಸ್ತೋತ್ರಮ್

           ಶ್ರೀಸೀತಾರಾಮಸ್ತೋತ್ರಮ್

ಅಯೋಧ್ಯಾಪುರನೇತಾರಂ ಮಿಥಿಲಾಪುರನಾಯಿಕಾಮ್ |

ರಘಾವಾಣಾಮಲಙ್ಕಾರಂ ವೈದೇಹಾನಾಮಲಙ್ಕ್ರಿಯಾಮ್ || ೧ ||

ರಘೂಣಾಂ ಕುಲದೀಪಂ ಚ ನಿಮೀನಾಂ ಕುಲದೀಪಿಕಾಮ್ |

ಸೂರ್ಯವಂಶಸಮುದ್ಭೂತಂ ಸೋಮವಂಶಸಮುದ್ಭವಾಮ್ || ೨ ||

ಪುತ್ರಂ ದಶರಥಸ್ಯಾದ್ಯಂ ಪುತ್ರೀಂ ಜನಕಭೂಪತೇಃ |

ವಸಿಷ್ಠಾನುಮತಾಚಾರಂ ಶತಾನನ್ದಮತಾನುಗಾಮ್ || ೩ ||

ಕೌಸಲ್ಯಾಗರ್ಭಸಂಭೂತಂ ವೇದಿಗರ್ಭೋದಿತಾಂ ಸ್ವಯಮ್ |

ಪುಣ್ಡರೀಕವಿಶಾಲಾಕ್ಷಂ ಸ್ಫುರದಿನ್ದೀವರೇಕ್ಷಣಾಮ್ || ೪ ||

ಚನ್ದ್ರಕಾನ್ತಾನನಾಮ್ಭೋಜಂ ಚನ್ದ್ರಬಿಮ್ಬೋಪಮಾನನಾಮ್ |

ಮತ್ತಮಾತಙ್ಗಗಮನಂ ಮತ್ತಹಂಸವಧೂಗತಾಮ್ || ೫ ||

ಚನ್ದನಾರ್ದ್ರಭುಜಾಮಧ್ಯಂ ಕುಂಕುಮಾರ್ದ್ರಕುಚಸ್ಥಲೀಮ್ |

ಚಾಪಾಲಂಕೃತಹಸ್ತಾಬ್ಜಂ ಪದ್ಮಾಲಂಕೃತಪಾಣಿಕಾಮ್ || ೬ ||

ಶರಣಾಗತಗೋಪ್ತಾರಂ ಪ್ರಣಿಪಾತಪ್ರಸಾದಿಕಾಮ್  |

ಕಾಲಮೇಘನಿಭಂ ರಾಮಂ ಕಾರ್ತಸ್ವರಸಮಪ್ರಭಾಮ್ || ೭ ||

ದಿವ್ಯಸಿಂಹಾಸನಾಸೀನಂ ದಿವ್ಯಸ್ರಗ್ವಸ್ತ್ರಭೂಷಣಾಮ್ |

ಅನುಕ್ಷಣಂ ಕಟಾಕ್ಷಾಭ್ಯಾಂ ಅನ್ಯೋನ್ಯೇಕ್ಷಣಕಾಂಕ್ಷಿಣೌ || ೮ ||

ಅನ್ಯೋನ್ಯಸದೃಶಾಕಾರೌ ತ್ರೈಲೋಕ್ಯಗೃಹದಂಪತೀ |

ಇಮೌ ಯುವಾಂ ಪ್ರಣಮ್ಯಾಹಂ ಭಜಾಮ್ಯದ್ಯ ಕೃತಾರ್ಥತಾಮ್ || ೯ ||

ಅನೇನ ಸ್ತೌತಿ ಯಃ ಸ್ತುತ್ಯಂ ರಾಮಂ ಸೀತಾಂ ಚ ಭಕ್ತಿತಃ |

ತಸ್ಯ ತೌ ತನುತಾಂ ಪುಣ್ಯಾಸ್ಸಂಪದಃ ಸಕಲಾರ್ಥದಾಃ || ೧೦ ||

                

 

ಶ್ರೀರಾಮಭುಜಙ್ಗಪ್ರಯಾತಸ್ತೋತ್ರಮ್

ಶ್ರೀರಾಮಭುಜಙ್ಗಪ್ರಯಾತಸ್ತೋತ್ರಮ್

     (ಶ್ರೀ ಶಂಕರಾಚಾರ್ಯಕೃತಮ್)

ವಿಶುದ್ಧಂ ಪರಂ ಸಚ್ಚಿದಾನನ್ದರೂಪಂ

ಗುಣಾಧಾರಮಾಧಾರಹೀನಂ ವರೇಣ್ಯಮ್ |

ಮಹಾನ್ತಂ ವಿಭಾನ್ತಂ ಗುಹಾನ್ತಂ ಗುಣಾನ್ತಂ

ಸುಖಾನ್ತಂ ಸ್ವಯಂ ಧಾಮ ರಾಮಂ ಪ್ರಪದ್ಯೇ || ೧ ||

ಶಿವಂ ನಿತ್ಯಮೇಕಂ ವಿಭುಂ ತಾರಕಾಖ್ಯಂ

ಸುಖಾಕಾರಮಾಕಾರಶೂನ್ಯಂ ಸುಮಾನ್ಯಮ್ |

ಮಹೇಶಂ ಕಲೇಶಂ ಸುರೇಶಂ ಪರೇಶಮ್

ನರೇಶಂ ನಿರೀಶಂ ಮಹೀಶಂ ಪ್ರಪದ್ಯೇ || ೨ ||

ಯದಾವರ್ಣಯತ್ಕರ್ಣಮೂಲೇಽನ್ತಕಾಲೇ

ಶಿವೋ ರಾಮರಾಮೇತಿ ರಾಮೇತಿ ಕಾಶ್ಯಾಮ್ |

ತದೇಕಂ ಪರಂ ತಾರಕಬ್ರಹ್ಮರೂಪಂ

ಭಜೇಽಹಂ ಭಜೇಽಹಂ ಭಜೇಽಹಂ ಭಜೇಽಹಂ || ೩ ||

ಮಹಾರತ್ನಪೀಠೇ ಶುಭೇ ಕಲ್ಪಮೂಲೇ

ಸುಖಾಸೀನಮಾದಿತ್ಯಕೋಟಿಪ್ರಕಾಶಮ್ |

ಸದಾ ಜಾನಕೀಲಕ್ಷ್ಮಣೋಪೇತಮೇಕಂ

ಸದಾ ರಾಮಚನ್ದ್ರಂ ಭಜೇಽಹಂ ಭಜೇಽಹಂ || ೪ ||

ಕ್ವಣದ್ರತ್ನಮಞ್ಜೀರಪಾದಾರವಿನ್ದಂ

ಲಸನ್ಮೇಖಲಾಚಾರುಪೀತಾಮ್ಬರಾಢ್ಯಮ್ |

ಮಹಾರತ್ನಹಾರೋಲ್ಲಸತ್ಕೌಸ್ತುಭಾಙ್ಗಂ

ನದಚ್ಚಞ್ಚರೀಮನ್ಞ್ಜರೀಲೋಲಮಾಲಮ್ || ೫ ||

ಲಸಚ್ಚನ್ದ್ರಿಕಾಸ್ಮೇರಶೋಣಾಧರಾಭಂ

ಸಮುದ್ಯತ್ಪತಙ್ಗೇನ್ದುಕೋಟಿಪ್ರಕಾಶಮ್  |

ನಮದ್ಬ್ರಹ್ಮರುದ್ರಾದಿಕೋಟೀರರತ್ನ-

ಸ್ಫುರತ್ಕಾನ್ತಿನೀರಾಜನಾರಾಧಿತಾಙ್ಘ್ರಿಮ್ || ೬ ||

ಪುರಃ ಪ್ರಾಞ್ಜಲೀನಾಞ್ಜನೇಯಾದಿಭಕ್ತಾನ್

ಸ್ವಚಿನ್ಮುದ್ರಯಾ ಭದ್ರಯಾ ಬೋಧಯನ್ತಮ್ |

ಭಜೇಽಹಂ ಭಜೇಽಹಂ ಸದಾ ರಾಮಚನ್ದ್ರಂ

ತ್ವದನ್ಯಂ ನ ಮನ್ಯೇ ನ ಮನ್ಯೇ ನ ಮನ್ಯೇ || ೭ ||

ಯದಾ ಮತ್ಸಮೀಪಂ ಕೃತಾನ್ತಃ ಸಮೇತ್ಯ

ಪ್ರಚಣ್ಡಪ್ರಕೋಪೈರ್ಭಟೈರ್ಭೀಷಯೇನ್ಮಾಮ್ |

ತದಾವಿಷ್ಕರೋಷಿ ತ್ವ್ದೀಯಂ ಸ್ವರೂಪಂ

ಸದಾಪತ್ಪ್ರಣಾಶಂ ಸಕೋದಣ್ಡಬಾಣಮ್ || ೮ ||

ನಿಜೇ ಮಾನಸೇ ಮನ್ದಿರೇ ಸನ್ನಿಧೇಹಿ

ಪ್ರಸೀದ ಪ್ರಸೀದ ಪ್ರಭೋ ರಾಮಚನ್ದ್ರ |

ಸಸೌಮಿತ್ರಿಣಾ ಕೈಕಯೀನನ್ದನೇನ

ಸ್ವಶಕ್ತ್ಯಾನುಭಕ್ತ್ಯಾ ಚ ಸಂಸೇವ್ಯಮಾನ || ೯ ||

ಸ್ವಭಕ್ತಾಗ್ರಗಣ್ಯೈಃ ಕಪೀಶೈರ್ಮಹೀಶೈ-

ರನೀಕೈರನೇಕೈಶ್ಚ ರಾಮ ಪ್ರಸೀದ |

ನಮಸ್ತೇ ನಮೋಽಸ್ತ್ವೀಶ ರಾಮ ಪ್ರಸೀದ

ಪ್ರಶಾಧಿ ಪ್ರಶಾಧಿ ಪ್ರಕಾಶಂ ಪ್ರಭೋ ಮಾಮ್ || ೧೦ ||

ತ್ವಮೇವಾಸಿ ದೈವಂ ಪರಂ ಮೇ ಯದೇಕಂ

ಸುಚೈತನ್ಯಮೇತತ್ತ್ವದನ್ಯಂ ನ ಮನ್ಯೇ |

ಯತೋಽಭೂದಮೇಯಂ ವಿಯದ್ವಾಯುತೇಜೋ-

ಜಲೋರ್ವ್ಯಾದಿಕಾರ್ಯಂ ಚರಂ ಚಾಚರಂ ಚ || ೧೧ ||

ನಮಃ ಸಚ್ಚಿದಾನನ್ದರೂಪಾಯ ತಸ್ಮೈ

ನಮೋ ದೇವದೇವಾಯ ರಾಮಾಯ ತುಭ್ಯಮ್ |

ನಮೋ ಜಾನಕೀಜೀವಿತೇಶಾಯ ತುಭ್ಯಂ

ನಮಃ ಪುಣ್ಡರೀಕಾಯತಾಕ್ಷಾಯ ತುಭ್ಯಮ್ || ೧೨ ||

ನಮೋ ಭಕ್ತಿಯುಕ್ತಾನುರಕ್ತಾಯ ತುಭ್ಯಮ್

ನಮಃ ಪುಣ್ಯಪುಞ್ಜೈಕಲಭ್ಯಾಯ ತುಭ್ಯಮ್ |

ನಮೋ ವೇದವೇದ್ಯಾಯ ಚಾದ್ಯಾಯ ಪುಂಸೇ

ನಮಃ ಸುನ್ದರಾಯೇನ್ದಿರಾವಲ್ಲಭಾಯ || ೧೩ ||

ನಮೋ ವಿಶ್ವಕರ್ತ್ರೇ ನಮೋ ವಿಶ್ವಹರ್ತ್ರೇ

ನಮೋ ವಿಶ್ವಭೋಕ್ತ್ರೇ ನಮೋ ವಿಶ್ವಮಾತ್ರೇ |

ನಮೋ ವಿಶ್ವನೇತ್ರೇ ನಮೋ ವಿಶ್ವಜೇತ್ರೇ

ನಮೋ ವಿಶ್ವಪಿತ್ರೇ ನಮೋ ವಿಶ್ವಮಾತ್ರೇ || ೧೪ ||

ನಮಸ್ತೇ ನಮಸ್ತೇ ಸಮಸ್ತಪ್ರಪಞ್ಚ-

ಪ್ರಭೋಗಪ್ರಯೋಗಪ್ರಮಾಣಪ್ರವೀಣ |

ಮದೀಯಂ ಮನಃ ತ್ವತ್ಪದದ್ವನ್ದ್ವಸೇವಾಂ

ವಿಧಾತುಂ ಪ್ರವೃತಂ ಸುಚೈತನ್ಯಸಿದ್ಧ್ಯೈ || ೧೫ ||

ಶಿಲಾಪಿ ತ್ವದಙ್ಘ್ರಿಕ್ಷಮಾಸಙ್ಗಿರೇಣು-

ಪ್ರಸಾದಾದ್ಧಿ ಚೈತನ್ಯಮಾಧತ್ತ ರಾಮ |

ನರಸ್ತ್ವತ್ಪದದ್ವನ್ದ್ವಸೇವಾವಿಧಾನಾ-

ತ್ಸುಚೈತನ್ಯಮೇತೀತಿ ಕಿಂ ಚಿತ್ರಮತ್ರ || ೧೬ ||

ಪವಿತ್ರಂ ಚರಿತ್ರಂ ವಿಚಿತ್ರಂ ತ್ವದೀಯಂ

ನರಾ ಯೇ ಸ್ಮರನ್ತ್ಯನ್ವಹಂ ರಾಮಚನ್ದ್ರ |

ಭವನ್ತಂ ಭವಾನ್ತಂ ಭರನ್ತಂ ಭಜನ್ತೋ

ಲಭನ್ತೇ ಕೃತಾನ್ತಂ ನ ಪಶ್ಯನ್ತ್ಯತೋಽನ್ತೇ || ೧೭ ||

ಸ ಪುಣ್ಯಃ ಸ ಗಣ್ಯಃ ಶರಣ್ಯೋ ಮಮಾಯಂ

ನರೋ ವೇದ ಯೋ ದೇವಚೂಡಾಮಣಿಂ ತ್ವಾಮ್ |

ಸದಾಕಾರಮೇಕಂ ಚಿದಾನನ್ದರೂಪಂ

ಮನೋವಾಗಗಮ್ಯಂ ಪರಂ ಧಾಮ ರಾಮ || ೧೮ ||

ಪ್ರಚಣ್ಡಪ್ರತಾಪಪ್ರಭಾವಾಭಿಭೂತ-

ಪ್ರಭೂತಾರಿವೀರ ಪ್ರಭೋ ರಾಮಚನ್ದ್ರ |

ಬಲಂ ತೇ ಕಥಂ ವರ್ಣ್ಯತೇಽತೀವ ಬಾಲ್ಯೇ

ಯತೋಽಖಣ್ಡಿ ಚಣ್ಡೀಶಕೋದಣ್ಡದಣ್ಡಮ್ || ೧೯ ||

ದಶಗ್ರೀವಮುಗ್ರಂ ಸಪುತ್ರಂ ಸಮಿತ್ರಂ

ಸರಿದ್ದುರ್ಗಮಧ್ಯಸ್ಥರಕ್ಷೋಗಣೇಶಮ್ |

ಭವನ್ತಂ ವಿನಾ ರಾಮ ವೀರೋ ನರೋ ವಾಽ-

ಸುರೋ ವಾಮರೋ ವಾ ಜಯೇತ್ ಕಸ್ತ್ರಿಲೋಕ್ಯಾಮ್ || ೨೦ ||

ಸದಾ ರಾಮ ರಾಮೇತಿ ರಾಮಾಮೃತಂ ತೇ

ಸದಾ ರಾಮಮಾನನ್ದನಿಷ್ಯನ್ದಕನ್ದಮ್ |

ಪಿಬನ್ತಂ ನಮನ್ತಂ ಸುದನ್ತಂ ಹಸನ್ತಂ

ಹನುಮನ್ತಮನ್ತರ್ಭಜೇ ತಂ ನಿತಾನ್ತಮ್ || ೨೧ ||

ಸದಾ ರಾಮ ರಾಮೇತಿ ರಾಮಾಮೃತಂ ತೇ

ಸದಾ ರಾಮಮಾನನ್ದನಿಷ್ಯನ್ದಕನ್ದಮ್ |

ಪಿಬನ್ನನ್ವಹಂ ನನ್ವಹಂ ನೈವ ಮೃತ್ಯೋರ್-

ಬಿಭೇಮಿ ಪ್ರಸಾದಾದಸಾದಾತ್ತವೈವ || ೨೨ ||

ಅಸೀತಾಸಮೇತೈರಕೋದಣ್ಡಭೂಷೈ-

ರಸೌಮಿತ್ರಿವನ್ದ್ಯೈರಚಣ್ಡಪ್ರತಾಪೈಃ |

ಅಲಙ್ಕೇಶಕಾಲೈರಸುಗ್ರೀವಮಿತ್ರೈ-

ರರಾಮಾಭಿಧೇಯೈರಲಂ ದೈವತೈರ್ನಃ || ೨೩ ||

ಅವೀರಾಸನಸ್ಥೈರಚಿನ್ಮುದ್ರಿಕಾಢ್ಯೈ-

ರಭಕ್ತಾಞ್ಜನೇಯಾದಿತತ್ವಪ್ರಕಾಶೈಃ |

ಅಮನ್ದಾರಮೂಲೈರಮನ್ದಾರಮಾಲೈ-

ರರಾಮಾಭಿಧೇಯೈರಲಂ ದೈವತೈರ್ನಃ || ೨೪ ||

ಅಸಿನ್ಧುಪ್ರಕೋಪೈರವನ್ದ್ಯಪ್ರತಾಪೈ-

ರಬನ್ಧುಪ್ರಯಾಣೈರಮನ್ದಸ್ಮಿತಾಢ್ಯೈಃ |

ಅದಣ್ಡಪ್ರವಾಸೈರಖಣ್ಡಪ್ರಬೋಧೈ-

ರರಾಮಾಭಿಧೇಯೈರಲಂ ದೈವತೈರ್ನಃ || ೨೫ ||

ಹರೇ ರಾಮ ಸೀತಾಪತೇ ರಾವಣಾರೇ

ಖರಾರೇ ಮುರಾರೇಽಸುರಾರೇ ಪರೇತಿ |

ಲಪನ್ತಂ ನಯನ್ತಂ ಸದಾಕಾಲಮೇವಂ

ಸಮಾಲೋಕಯಾಲೋಕಯಾಶೇಷಬನ್ಧೋ || ೨೬ ||

ನಮಸ್ತೇ ಸುಮಿತ್ರಾಸುಪುತ್ರಾಭಿವನ್ದ್ಯ

ನಮಸ್ತೇ ಸದಾ ಕೈಕಯೀನನ್ದನೇಡ್ಯ |

ನಮಸ್ತೇ ಸದಾ ವಾನರಾಧೀಶವನ್ದ್ಯ

ನಮಸ್ತೇ ನಮಸ್ತೇ ಸದಾ ರಾಮಚನ್ದ್ರ || ೨೭ ||

ಪ್ರಸೀದ ಪ್ರಸೀದ ಪ್ರಚಣ್ಡಪ್ರತಾಪ

ಪ್ರಸೀದ ಪ್ರಸೀದ ಪ್ರಚಣ್ಡಾರಿಕಾಲ |

ಪ್ರಸೀದ ಪ್ರಸೀದ ಪ್ರಪನ್ನಾನುಕಂಪಿನ್

ಪ್ರಸೀದ ಪ್ರಸೀದ ಪ್ರಭೋ ರಾಮಚನ್ದ್ರ  || ೨೮ ||

ಭುಜನ್ಙ್ಗಪ್ರಯಾತಂ ಪರಂ ವೇದಸಾರಂ

ಮುದಾ ರಾಮಚನ್ದ್ರಸ್ಯ ಭಕ್ತ್ಯಾ ಚ ನಿತ್ಯಮ್ |

ಪಠನ್ ಸನ್ತತಂ ಚಿನ್ತಯನ್ ಸ್ವಾನ್ತರಙ್ಗೇ

ಸ ಏವ ಸ್ವಯಂ ರಾಮಚನ್ದ್ರಃ ಸ ಧನ್ಯಃ || ೨೯ ||