ಗೋವಿನ್ದದಾಮೋದರಸ್ತೋತ್ರಮ್
ಅಗ್ರೇ ಕುರೂಣಾಮಥ ಪಾಣ್ಡವಾನಾಂ ದುಃಶಾಸನೇನಾಹೃತವಸ್ತ್ರಕೇಶಾ |
ಕೃಷ್ಣಾ ತದಾಕ್ರೋಶದನನ್ಯನಾಥಾ ಗೋವಿನ್ದ ದಾಮೋದರ ಮಾಧವೇತಿ || ೧ ||
ಶ್ರೀ ಕೃಷ್ಣ ವಿಷ್ಣೋ ಮಧುಕೈಟಭಾರೇ ಭಕ್ತಾನುಕಮ್ಪಿನ್ ಭಗವನ್ ಮುರಾರೇ |
ತ್ರಾಯಸ್ವ ಮಾಂ ಕೇಶವ ಲೋಕನಾಥ ಗೋವಿನ್ದ ದಾಮೋದರ ಮಾಧವೇತಿ || ೨ ||
ವಿಕ್ರೇತುಕಾಮಾಖಿಲಗೋಪಕನ್ಯಾ ಮುರಾರಿಪಾದಾರ್ಪಿತಚಿತ್ತವೃತ್ತಿಃ |
ದಧ್ಯಾದಿಕಂ ಮೋಹವಶಾದವೋಚದ್ ಗೋವಿನ್ದ ದಾಮೋದರ ಮಾಧವೇತಿ || ೩ ||
ಉಲೂಖಲೇ ಸಂಭೃತತಣ್ಡುಲಾಂಶ್ಚ ಸಂಘಟ್ಟಯನ್ತ್ಯೋ ಮುಸಲೈಃ ಪ್ರಮುಗ್ಧಾಃ |
ಗಾಯನ್ತಿ ಗೋಪ್ಯೋ ಜನಿತಾನುರಾಗಾ ಗೋವಿನ್ದ ದಾಮೋದರ ಮಾಧವೇತಿ || ೪ ||
ಕಾಚಿತ್ಕರಾಂಭೋಜಪುಟೇ ನಿಷಣ್ಣಂ ಕ್ರೀಡಾಶುಕಂ ಕಿಂಶುಕರಕ್ತತುಣ್ಡಂ |
ಅಧ್ಯಾಪಯಾಮಾಸ ಸರೋರುಹಾಕ್ಷೀ ಗೋವಿನ್ದ ದಾಮೋದರ ಮಾಧವೇತಿ || ೫ ||
ಗೃಹೇ ಗೃಹೇ ಗೋಪವಧೂ ಸಮೂಹಃ ಪ್ರತಿಕ್ಷಣಂ ಪಿನ್ಞ್ಜರಸಾರಿಕಾಣಾಂ |
ಸ್ಖಲದ್ಗಿರಂ ವಾಚಯಿತುಂ ಪ್ರವೃತ್ತೋ ಗೋವಿನ್ದ ದಾಮೋದರ ಮಾಧವೇತಿ || ೬ ||
ಪರ್ಯಙ್ಕಿಕಾಭಾಜಮಲಂ ಕುಮಾರಂ ಪ್ರಸ್ವಾಪಯನ್ತ್ಯೋಽಖಿಲಗೋಪಕನ್ಯಾಃ |
ಜಗುಃ ಪ್ರಬನ್ಧಂ ಸ್ವರತಾಲಬನ್ಧಂ ಗೋವಿನ್ದ ದಾಮೋದರ ಮಾಧವೇತಿ || ೭ ||
ರಾಮಾನುಜಂ ವೀಕ್ಷಣಕೇಲಿಲೋಲಂ ಗೋಪೀ ಗೃಹೀತ್ವಾ ನವನೀತಗೋಲಂ |
ಆಬಾಲಕಂ ಬಾಲಕಮಾಜುಹಾವ ಗೋವಿನ್ದ ದಾಮೋದರ ಮಾಧವೇತಿ || ೮ ||
ವಿಚಿತ್ರವರ್ಣಾಭರಣಾಭಿರಾಮೇಽಭಿಧೇಹಿ ವಕ್ತ್ರಾಂಬುಜರಾಜಹಂಸಿ |
ಸದಾ ಮದೀಯೇ ರಸನೇಽಗ್ರರಙ್ಗೇ ಗೋವಿನ್ದ ದಾಮೋದರ ಮಾಧವೇತಿ || ೯ ||
ಅಙ್ಕಾಧಿರೂಢಂ ಶಿಶುಗೋಪಗೂಢಂ ಸ್ತನಂಧಯನ್ತಂ ಕಮಲೈಕಕಾನ್ತಂ |
ಸಂಬೋಧಯಾಮಾಸ ಮುದಾ ಯಶೋದಾ ಗೋವಿನ್ದ ದಾಮೋದರ ಮಾಧವೇತಿ || ೧೦ ||
ಕ್ರೀಡನ್ತಮನ್ತರ್ವ್ರಜಮಾತ್ಮಜಂ ಸ್ವಂ ಸಮಂ ವಯಸ್ಯೈಃ ಪಶುಪಾಲಬಾಲೈಃ |
ಪ್ರೇಮ್ಣಾ ಯಶೋದಾ ಪ್ರಜುಹಾವ ಕೃಷ್ಣಂ ಗೋವಿನ್ದ ದಾಮೋದರ ಮಾಧವೇತಿ || ೧೧ ||
ಯಶೋದಯಾ ಗಾಢಮುಲೂಖಲೇನ ಗೋಕಣ್ಠಪಾಶೇನ ನಿಬಧ್ಯಮಾನಃ |
ರುರೋದ ಮನ್ದಂ ನವನೀತಭೋಜೀ ಗೋವಿನ್ದ ದಾಮೋದರ ಮಾಧವೇತಿ || ೧೨ ||
ನಿಜಾಙ್ಗಣೇ ಕಙ್ಕಣಕೇಲಿಲೋಲಂ ಗೋಪೀ ಗೃಹೀತ್ವಾ ನವನೀತಗೋಲಂ |
ಆಮರ್ದಯತ್ಪಾಣಿತಲೇನ ನೇತ್ರೇ ಗೋವಿನ್ದ ದಾಮೋದರ ಮಾಧವೇತಿ || ೧೩ ||
ಗೃಹೇ ಗೃಹೇ ಗೋಪವಧೂಕದಮ್ಬಾಃ ಸರ್ವೇ ಮಿಲಿತ್ವಾ ಸಮವಾಯಯೋಗೇ |
ಪುಣ್ಯಾನಿ ನಾಮಾನಿ ಪಠನ್ತಿ ನಿತ್ಯಂ ಗೋವಿನ್ದ ದಾಮೋದರ ಮಾಧವೇತಿ || ೧೪ ||
ಮನ್ದಾರಮೂಲೇ ವದನಾಭಿರಾಮಂ ಬಿಮ್ಬಾಧರಾಪೂರಿತ ವೇಣುನಾದಂ |
ಗೋಗೋಪಗೋಪೀಜನಮಧ್ಯಸಂಸ್ಥಂ ಗೋವಿನ್ದ ದಾಮೋದರ ಮಾಧವೇತಿ || ೧೫ ||
ಉತ್ಥಾಯ ಗೋಪ್ಯೋಽಪರರಾತ್ರಭಾಗೇ ಸ್ಮೃತ್ವಾ ಯಶೋದಾಸುತಬಾಲಕೇಲಿಂ |
ಗಾಯನ್ತಿ ಪ್ರೋಚ್ಚೈರ್ದಧಿ ಮನ್ಥಯನ್ತ್ಯೋ ಗೋವಿನ್ದ ದಾಮೋದರ ಮಾಧವೇತಿ || ೧೬ ||
ಜಗ್ಧೋಽಥ ದತ್ತೋ ನವನೀತಪಿಣ್ಡೋ ಗೃಹೇ ಯಶೋದಾ ವಿಚಿಕ್ತ್ಸಯನ್ತೀ |
ಉವಾಚ ಸತ್ಯಂ ವದ ಹೇ ಮುರಾರೇ ಗೋವಿನ್ದ ದಾಮೋದರ ಮಾಧವೇತಿ || ೧೭ ||
ಅಭ್ಯರ್ಚ್ಯ ಗೇಹಂ ಯುವತಿಃ ಪ್ರವೃದ್ಧಪ್ರೇಮಪ್ರವಾಹಾ ದಧಿ ನಿರ್ಮಮನ್ಥ |
ಗಾಯನ್ತಿ ಗೋಪ್ಯೋಽಥ ಸಖೀಸಮೇತಾ ಗೋವಿನ್ದ ದಾಮೋದರ ಮಾಧವೇತಿ || ೧೮ ||
ಕ್ವಚಿತ್ ಪ್ರಭಾತೇ ದಧಿಪೂರ್ಣಪಾತ್ರೇ ನಿಕ್ಷಿಪ್ಯ ಮನ್ಥಂ ಯುವತೀ ಮುಕುನ್ದಂ |
ಆಲೋಕ್ಯ ಗಾನಂ ವಿವಿಧಂ ಕರೋತಿ ಗೋವಿನ್ದ ದಾಮೋದರ ಮಾಧವೇತಿ || ೧೯ ||
ಕ್ರೀಡಾಪರಂ ಭೋಜನಮಜ್ಜನಾರ್ಥಂ ಹಿತೈಷಿಣೀ ಸ್ತ್ರೀ ತನುಜಂ ಯಶೋದಾ |
ಆಜೂಹವತ್ ಪ್ರೇಮಪರಿಪ್ಲುತಾಕ್ಷೀ ಗೋವಿನ್ದ ದಾಮೋದರ ಮಾಧವೇತಿ || ೨೦ ||
ಸುಖಂ ಶಯಾನಂ ನಿಲಯೇ ಚ ವಿಷ್ಣುಂ ದೇವರ್ಷಿಮುಖ್ಯಾ ಮುನಯಃ ಪ್ರಪನ್ನಾಃ |
ತೇನಾಚ್ಯುತೇ ತನ್ಮಯತಾಂ ವ್ರಜನ್ತಿ ಗೋವಿನ್ದ ದಾಮೋದರ ಮಾಧವೇತಿ || ೨೧ ||
ವಿಹಾಯ ನಿದ್ರಾಮರುಣೋದಯೇ ಚ ವಿಧಾಯ ಕೃತ್ಯಾನಿ ಚ ವಿಪ್ರಮುಖ್ಯಾಃ |
ವೇದಾವಸಾನೇ ಪ್ರಪಠನ್ತಿ ನಿತ್ಯಂ ಗೋವಿನ್ದ ದಾಮೋದರ ಮಾಧವೇತಿ || ೨೨ ||
ವೃನ್ದಾವನೇ ಗೋಪಗಣಾಶ್ಚ ಗೋಪ್ಯೋ ವಿಲೋಕ್ಯ ಗೋವಿನ್ದ ವಿಯೋಗಖಿನ್ನಾಮ್ |
ರಾಧಾಂ ಜಗುಃ ಸಾಶ್ರುವಿಲೋಚನಾಭ್ಯಾಂ ಗೋವಿನ್ದ ದಾಮೋದರ ಮಾಧವೇತಿ || ೨೩ ||
ಪ್ರಭಾತಸಞ್ಚಾರಗತಾ ನು ಗಾವಸ್ತದ್ರಕ್ಷಣಾರ್ಥಂ ತನಯಂ ಯಶೋದಾ |
ಪ್ರಾಬೋಧಯತ್ ಪಾಣಿತಲೇನ ಮನ್ದಂ ಗೋವಿನ್ದ ದಾಮೋದರ ಮಾಧವೇತಿ || ೨೪ ||
ಪ್ರವಾಲಶೋಭಾ ಇವ ದೀರ್ಘಕೇಶಾ ವಾತಾಮ್ಬುಪರ್ಣಾಶನಪೂತದೇಹಾಃ |
ಮೂಲೇ ತರೂಣಾಂ ಮುನಯಃ ಪಠನ್ತಿ ಗೋವಿನ್ದ ದಾಮೋದರ ಮಾಧವೇತಿ || ೨೫ ||
ಏವಂ ಬೃವಾಣಾ ವಿರಹಾತುರಾ ಭೃಶಂ ವ್ರಜಸ್ತ್ರಿಯಃ ಕೃಷ್ಣವಿಷಕ್ತಮಾನಸಾಃ |
ವಿಸೃಜ್ಜ್ಯ ಲಜ್ಜಾಂ ರುರುದುಃ ಸ್ಮ ಸುಸ್ವರಂ ಗೋವಿನ್ದ ದಾಮೋದರ ಮಾಧವೇತಿ || ೨೬ ||
ಗೋಪೀ ಕದಾಚಿನ್ಮಣಿಪಿಞ್ಜರಸ್ಥಂ ಶುಕಂ ವಚೋ ವಾಚಯಿತುಂ ಪ್ರವೃತ್ತಾ |
ಆನನ್ದಕನ್ದ ವ್ರಜಚನ್ದ್ರಕೃಷ್ಣ ಗೋವಿನ್ದ ದಾಮೋದರ ಮಾಧವೇತಿ || ೨೭ ||
ಗೋವತ್ಸಬಾಲೈಃ ಶಿಶುಕಾಕಪಕ್ಷಂ ಬಧ್ನನ್ತಮಮ್ಭೋಜದಲಾಯತಾಕ್ಷಮ್ |
ಉವಾಚ ಮಾತಾ ಚಿಬುಕಂ ಗೃಹೀತ್ವಾ ಗೋವಿನ್ದ ದಾಮೋದರ ಮಾಧವೇತಿ || ೨೮ ||
ಪ್ರಭಾತಕಾಲೇ ವರವಲ್ಲವೌಘಾ ಗೋರಕ್ಷಣಾರ್ಥಂ ಧೃತವೇತ್ರದಣ್ಡಾಃ |
ಆಕಾರಯಾಮಾಸುರನನ್ತಮಾದ್ಯಂ ಗೋವಿನ್ದ ದಾಮೋದರ ಮಾಧವೇತಿ || ೨೯ ||
ಲಾಶಯೇ ಕಾಲಿಯಮರ್ದನಾಯ ಯದಾ ಕದಮ್ಬಾದಪತನ್ಮುರಾರಿಃ |
ಗೋಪಾಙ್ಗನಾಶ್ಚುಕ್ರುಶುರೇತ್ಯ ಗೋಪಾ ಗೋವಿನ್ದ ದಾಮೋದರ ಮಾಧವೇತಿ || ೩೦ ||
ಅಕ್ರೂರಮಾಸಾದ್ಯ ಯದಾ ಮುಕುನ್ದಶ್ಚಾಪೋತ್ಸವಾರ್ಥಂ ಮಥುರಾಂ ಪ್ರವಿಷ್ಟಃ |
ತದಾ ಸ ಪೌರೈರ್ಜಯತೀತ್ಯಭಾಷಿ ಗೋವಿನ್ದ ದಾಮೋದರ ಮಾಧವೇತಿ || ೩೧ ||
ಕಂಸಸ್ಯ ದೂತೇನ ಯದೈವ ನೀತೌ ವೃನ್ದಾವನಾನ್ತಾದ್ ವಸುದೇವಸೂನೂ |
ರುರೋದ ಗೋಪೀ ಭವನಸ್ಯ ಮಧ್ಯೇ ಗೋವಿನ್ದ ದಾಮೋದರ ಮಾಧವೇತಿ || ೩೨ ||
ಸರೋವರೇ ಕಾಲಿಯನಾಗಬದ್ಧಂ ಶಿಶುಂ ಯಶೋದಾತನಯಂ ನಿಶಮ್ಯ |
ಚಕ್ರುರ್ಲುಠನ್ತ್ಯಃ ಪಥಿ ಗೋಪಬಾಲಾ ಗೋವಿನ್ದ ದಾಮೋದರ ಮಾಧವೇತಿ || ೩೩ ||
ಅಕ್ರೂರಯಾನೇ ಯದುವಂಶನಾಥಂ ಸಂಗಚ್ಛಮಾನಂ ಮಥುರಾಂ ನಿರೀಕ್ಷ್ಯ |
ಊಚುರ್ವಿಯೋಗಾತ್ ಕಿಲ ಗೋಪಬಾಲಾ ಗೋವಿನ್ದ ದಾಮೋದರ ಮಾಧವೇತಿ || ೩೪ ||
ಚಕ್ರನ್ದ ಗೋಪೀ ನಲಿನೀವನಾನ್ತೇ ಕೃಷ್ಣೇನ ಹೀನಾ ಕುಸುಮೇ ಶಯಾನಾ |
ಪ್ರಫುಲ್ಲನೀಲೋತ್ಪಲಲೋಚನಾಭ್ಯಾಂ ಗೋವಿನ್ದ ದಾಮೋದರ ಮಾಧವೇತಿ || ೩೫ ||
ಮಾತಾಪಿತೃಭ್ಯಾಂ ಪರಿವಾರ್ಯಮಾಣಾ ಗೇಹಂ ಪ್ರವಿಷ್ಟಾ ವಿಲಲಾಪ ಗೋಪೀ |
ಆಗತ್ಯ ಮಾಂ ಪಾಲಯ ವಿಶ್ವನಾಥ ಗೋವಿನ್ದ ದಾಮೋದರ ಮಾಧವೇತಿ || ೩೬ ||
ವೃನ್ದಾವನಸ್ಥಂ ಹರಿಮಾಶು ಬುದ್ಧ್ವಾ ಗೋಪೀ ಗತಾ ಕಾಪಿ ವನಂ ನಿಶಾಯಾಮ್ |
ತತ್ರಾಪ್ಯದೃಷ್ಟ್ವಾತಿಭಯಾದವೋಚದ್ ಗೋವಿನ್ದ ದಾಮೋದರ ಮಾಧವೇತಿ || ೩೭ ||
ಸುಖಂ ಶಯಾನಾ ನಿಲಯೇ ನಿಜೇಽಪಿ ನಾಮಾನಿ ವಿಷ್ಣೋಃ ಪ್ರವದನ್ತಿ ಮರ್ತ್ಯಾಃ |
ತೇ ನಿಶ್ಚಿತಂ ತನ್ಮಯತಾಂ ವ್ರಜನ್ತಿ ಗೋವಿನ್ದ ದಾಮೋದರ ಮಾಧವೇತಿ || ೩೮ ||
ಸಾ ನೀರಜಾಕ್ಷೀಮವಲೋಕ್ಯ ರಾಧಾಂ ರುರೋದ ಗೋವಿನ್ದವಿಯೋಗಖಿನ್ನಾಮ್ |
ಸಖೀ ಪ್ರಫುಲ್ಲೋತ್ಪಲಲೋಚನಾಭ್ಯಾಂ ಗೋವಿನ್ದ ದಾಮೋದರ ಮಾಧವೇತಿ || ೩೯ ||
ಜಿಹ್ವೇ ರಸಜ್ಞೇ ಮಧುರಪ್ರಿಯಾ ತ್ವಂ ಸತ್ಯಂ ಹಿತಂ ತ್ವಾಂ ಪರಮಂ ವದಾಮಿ |
ಆವರ್ಣಯೇಥಾ ಮಧುರಾಕ್ಷರಾಣಿ ಗೋವಿನ್ದ ದಾಮೋದರ ಮಾಧವೇತಿ || ೪೦ ||
ಆತ್ಯನ್ತಿಕವ್ಯಾಧಿಹರಂ ಜನಾನಾಂ ಚಿಕಿತ್ಸಕಂ ವೇದವಿದೋ ವದನ್ತಿ |
ಸಂಸಾರತಾಪತ್ರಯನಾಶಬೀಜಂ ಗೋವಿನ್ದ ದಾಮೋದರ ಮಾಧವೇತಿ || ೪೧ ||
ತಾತಾಜ್ಞಯಾ ಗಚ್ಛತಿ ರಾಮಚನ್ದ್ರೇ ಸಲಕ್ಷ್ಮಣೇಽರಣ್ಯಚಯೇ ಸಸೀತೇ |
ಚಕ್ರನ್ದ ರಾಮಸ್ಯ ನಿಜಾ ಜನಿತ್ರೀ ಗೋವಿನ್ದ ದಾಮೋದರ ಮಾಧವೇತಿ || ೪೨ ||
ಏಕಾಕಿನೀ ದಣ್ಡಕಕಾನನಾನ್ತಾತ್ ಸಾ ನೀಯಮಾನಾ ದಶಕನ್ಧರೇಣ |
ಸೀತಾ ತದಾಕ್ರನ್ದದನನ್ಯನಾಥಾ ಗೋವಿನ್ದ ದಾಮೋದರ ಮಾಧವೇತಿ || ೪೩ ||
ರಾಮಾದ್ವಿಯುಕ್ತಾ ಜನಕಾತ್ಮಜಾ ಸಾ ವಿಚಿನ್ತಯನ್ತೀ ಹೃದಿ ರಾಮರೂಪಮ್ |
ರುರೋದ ಸೀತಾ ರಘುನಾಥ ಪಾಹಿ ಗೋವಿನ್ದ ದಾಮೋದರ ಮಾಧವೇತಿ || ೪೪ ||
ಪ್ರಸೀದ ವಿಷ್ಣೋ ರಘುವಂಶನಾಥ ಸುರಾಸುರಾಣಾಂ ಸುಖದುಃಖಹೇತೋ |
ರುರೋದ ಸೀತಾ ತು ಸಮುದ್ರಮಧ್ಯೇ ಗೋವಿನ್ದ ದಾಮೋದರ ಮಾಧವೇತಿ || ೪೫ ||
ಅನ್ತರ್ಜಲೇ ಗ್ರಾಹಗೃಹೀತಪಾದೋ ವಿಸೃಷ್ಟವಿಕ್ಲಿಷ್ಟ ಸಮಸ್ತಬನ್ಧುಃ |
ತದಾ ಗಜೇನ್ದ್ರೋ ನಿತರಾಂ ಜಗಾದ ಗೋವಿನ್ದ ದಾಮೋದರ ಮಾಧವೇತಿ || ೪೬ ||
ಹಂಸಧ್ವಜಃ ಶಙ್ಖಯುತೋ ದದರ್ಶ ಪುತ್ರಂ ಕಟಾಹೇ ಪ್ರಪನ್ತಮೇನಂ |
ಪುಣ್ಯಾನಿ ನಾಮಾನಿ ಹರೇರ್ಜಪನ್ತಂ ಗೋವಿನ್ದ ದಾಮೋದರ ಮಾಧವೇತಿ || ೪೭ ||
ದುರ್ವಾಸಸೋ ವಾಕ್ಯಮುಪೇತ್ಯ ಕೃಷ್ಣಾ ಸಾಚಾಬ್ರವೀತ್ ಕಾನನವಾಸಿನೀಶಮ್ |
ಅನ್ತಃಪ್ರವಿಷ್ಟಂ ಮನಸಾಜುಹಾವ ಗೋವಿನ್ದ ದಾಮೋದರ ಮಾಧವೇತಿ || ೪೮ ||
ಧ್ಯೇಯಃ ಸದಾ ಯೋಗಿಭಿರಪ್ರಮೇಯಶ್ಚಿನ್ತಾಹರಶ್ಚಿನ್ತಿತಪಾರಿಜಾತಃ |
ಕಸ್ತೂರಿಕಾಕಲ್ಪಿತನೀಲವರ್ಣೋ ಗೋವಿನ್ದ ದಾಮೋದರ ಮಾಧವೇತಿ || ೪೯ ||
ಸಂಸಾರಕೂಪೇ ಪತಿತೋಽತ್ಯಗಾಧೇ ಮೋಹಾನ್ಧಪೂರ್ಣೇ ವಿಷಯಾಭಿತಪ್ತೇ |
ಕರಾವಲಂಬಂ ಮಮ ದೇಹಿ ವಿಷ್ಣೋ ಗೋವಿನ್ದ ದಾಮೋದರ ಮಾಧವೇತಿ || ೫೦ ||
ತ್ವಾಮೇವ ಯಾಚೇ ಮಮ ದೇಹಿ ಜಿಹ್ವೇ ಸಮಾಗತೇ ದಣ್ಡಧರೇ ಕೃತಾನ್ತೇ |
ವಕ್ತವ್ಯಮೇವಂ ಮಧುರಂ ಸುಭಕ್ತ್ಯಾ ಗೋವಿನ್ದ ದಾಮೋದರ ಮಾಧವೇತಿ || ೫೧ ||
ಭಜಸ್ವ ಮನ್ತ್ರಂ ಭವಬನ್ಧಮುಕ್ತ್ಯೈ ಜಿಹ್ವೇ ರಸಜ್ಞೇ ಸುಲಭಂ ಮನೋಜ್ಞಂ |
ದ್ವೈಪಾಯನಾದ್ಯೈರ್ಮುನಿಭಿಃ ಪ್ರಜಪ್ತಂ ಗೋವಿನ್ದ ದಾಮೋದರ ಮಾಧವೇತಿ || ೫೨ ||
ಗೋಪಾಲ ವಂಶೀಧರ ರೂಪಸಿನ್ಧೋ ಲೋಕೇಶ ನಾರಾಯಣ ದೀನಬನ್ಧೋ |
ಉಚ್ಚಸ್ವರೈಸ್ತ್ವಂ ವದ ಸರ್ವದೈವ ಗೋವಿನ್ದ ದಾಮೋದರ ಮಾಧವೇತಿ || ೫೩ ||
ಜಿಹ್ವೇ ಸದೈವಂ ಭಜ ಸುನ್ದರಾಣಿ ನಾಮಾನಿ ಕೃಷ್ಣಸ್ಯ ಮನೋಹರಾಣಿ |
ಸಮಸ್ತಭಕ್ತಾರ್ತಿವಿನಾಶನಾನಿ ಗೋವಿನ್ದ ದಾಮೋದರ ಮಾಧವೇತಿ || ೫೪ ||
ಗೋವಿನ್ದ ಗೋವಿನ್ದ ಹರೇ ಮುರಾರೇ ಗೋವಿನ್ದ ಗೋವಿನ್ದ ಮುಕುನ್ದ ಕೃಷ್ಣ |
ಗೋವಿನ್ದ ಗೋವಿನ್ದ ರಥಾಙ್ಗಪಾಣೇ ಗೋವಿನ್ದ ದಾಮೋದರ ಮಾಧವೇತಿ || ೫೫ ||
ಸುಖಾವಸಾನೇ ತ್ವಿದಮೇವ ಸಾರಂ ದುಃಖಾವಸಾನೇ ತ್ವಿದಮೇವ ಗೇಯಂ |
ದೇಹಾವಸಾನೇ ತ್ವಿದಮೇವ ಜಾಪ್ಯಂ ಗೋವಿನ್ದ ದಾಮೋದರ ಮಾಧವೇತಿ || ೫೬ ||
ದುರ್ವಾರವಾಕ್ಯಂ ಪರಿಗೃಹ್ಯ ಕೃಷ್ಣಾ ಮೃಗೀವ ಭೀತಾ ತು ಕಥಂ ಕಥಞ್ಚಿತ್ |
ಸಭಾಂ ಪ್ರವಿಷ್ಟಾ ಮನಸಾಜುಹಾವ ಗೋವಿನ್ದ ದಾಮೋದರ ಮಾಧವೇತಿ || ೫೭ ||
ಶ್ರೀಕೃಷ್ಣ ರಾಧಾವರ ಗೋಕುಲೇಶ ಗೋಪಾಲ ಗೋವರ್ಧನ ನಾಥ ವಿಷ್ಣೋ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೫೮ ||
ಶ್ರೀನಾಥ ವಿಶ್ವೇಶ್ವರ ವಿಶ್ವಮೂರ್ತೇ ಶ್ರೀ ದೇವಕೀನನ್ದನ ದೈತ್ಯಶತ್ರೋ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೫೯ ||
ಗೋಪೀಪತೇ ಕಂಸರಿಪೋ ಮುಕುನ್ದ ಲಕ್ಷ್ಮೀಪತೇ ಕೇಶವ ವಾಸುದೇವ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೦ ||
ಗೋಪೀಜನಾಹ್ಲಾದಕರ ವ್ರಜೇಶ ಗೋಚಾರಣಾರಣ್ಯಕೃತಪ್ರವೇಶ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೧ ||
ಪ್ರಾಣೇಶ ವಿಶ್ವಂಭರ ಕೈಟಭಾರೇ ವೈಕುಣ್ಠ ನರಾಯಣ ಚಕ್ರಪಾಣೇ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೨ ||
ಹರೇ ಮುರಾರೇ ಮಧುಸೂದನಾದ್ಯ ಶ್ರೀರಾಮ ಸೀತಾವರ ರಾವಣಾರೇ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೩ ||
ಶ್ರೀ ಯಾದವೇನ್ದ್ರಾದ್ರಿಧರಾಮ್ಬುಜಾಕ್ಷ ಗೋಗೋಪಗೋಪೀಸುಖದಾನದಕ್ಷ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೪ ||
ಧರಾಭರೋತ್ತಾರಣಗೋಪವೇಷ ವಿಹಾರಲೀಲಾಕೃತಬನ್ಧುಶೇಷ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೫ ||
ಬಕೀಬಕಾಘಾಸುರಧೇನುಕಾರೇ ಕೇಶೀತೃಣಾವರ್ತವಿಘಾತದಕ್ಷ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೬ ||
ಶ್ರೀಜಾನಕೀಜೀವನ ರಾಮಚನ್ದ್ರ ನಿಶಾಚರಾರೇ ಭರತಾಗ್ರಜೇಶ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೭ ||
ನಾರಾಯಣಾನನ್ತ ಹರೇ ನೃಸಿಂಹ ಪ್ರಹ್ಲಾದಬಾಧಾಹರ ಹೇ ಕೃಪಾಲೋ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೮ ||
ಲೀಲಾಮನುಷ್ಯಾಕೃತಿರಾಮರೂಪ ಪ್ರತಾಪದಾಸೀಕೃತಸರ್ವಭೂಪ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೬೯ ||
ಶ್ರೀಕೃಷ್ಣ ಗೋವಿನ್ದ ಹರೇ ಮುರಾರೇ ಹೇ ನಾಥ ನಾರಾಯಣ ವಾಸುದೇವ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೭೦ ||
ವಕ್ತುಂ ಸಮರ್ಥೋಽಪಿ ನ ವಕ್ತಿ ಕಶ್ಚಿದಹೋ ಜನಾನಾಂ ವ್ಯಸನಾಭಿಮುಖ್ಯಮ್ |
ಜಿಹ್ವೇ ಪಿಬಸ್ವಾಮೃತಮೇತದೇವ ಗೋವಿನ್ದ ದಾಮೋದರ ಮಾಧವೇತಿ || ೭೧ ||
