ಸಂಕಟನಾಶಗಣೇಶಾಷ್ಟಕಮ್

ಸಂಕಟನಾಶಗಣೇಶಾಷ್ಟಕಮ್

        (ನಾರದಪುರಾಣಾಂತರ್ಗತಂ)

ಪ್ರಣಮ್ಯ ಶಿರಸಾ ದೇವಂ ಗೌರೀಪುತ್ರಂ ವಿನಾಯಕಮ್ |

ಭಕ್ತಾವಾಸಂ ಸ್ಮರೇನ್ನಿತ್ಯಂ ಆಯುಃಕಾಮಾರ್ಥ ಸಿದ್ಧಯೇ || ೧ ||

ಪ್ರಥಮಂ ವಕ್ರತುಣ್ಡಂ ಚ ಏಕದನ್ತಂ ದ್ವಿತೀಯಕಮ್ |

ತೃತೀಯಂ ಕೃಷ್ಣಪಿಂಗಾಕ್ಷಂ ಗಜವಕ್ತ್ರಂ ಚತುರ್ಥಕಮ್ || ೨ ||

ಲಂಬೋದರಂ ಪಞ್ಚಮಂ ಚ ಷಷ್ಠಂ ವಿಕಟಮೇವ ಚ |

ಸಪ್ತಮಂ ವಿಘ್ನರಾಜಂ ಚ ಧೂಮ್ರವರ್ಣಂ ತಥಾಽಷ್ಟಮಮ್ || ೩ ||

ನವಮಂ ಫಾಲಚನ್ದ್ರಂ ಚ ದಶಮಂ ತು ವಿನಾಯಕಮ್ |

ಏಕಾದಶಂ ಗಣಪತಿಂ ದ್ವಾದಶಂ ತು ಗಜಾನನಮ್ || ೪ ||

ದ್ವಾದಶೈತಾನಿ ನಾಮಾನಿ ತ್ರಿಸಂಧ್ಯಂ ಯಃ ಪಠೇನ್ನರಃ|

ನ ಚ ವಿಘ್ನಭಯಂ ತಸ್ಯ ಸರ್ವಸಿದ್ಧಿಕರಂ ಪರಮ್ || ೫ ||

ವಿದ್ಯಾರ್ಥೀ ಲಭತೇ ವಿದ್ಯಾಂ ಧನಾರ್ಥೀ ಲಭತೇ ಧನಮ್ |

ಪುತ್ರಾರ್ಥೀ ಲಭತೇ ಪುತ್ರಾನ್ ಮೋಕ್ಷಾರ್ಥೀ ಮೋಕ್ಷಮಾಪ್ನುಯಾತ್ || ೬ ||

ಜಪೇತ್ ಗಣಪತಿಸ್ತೋತ್ರಂ ಷಣ್ಮಾಸಾತ್ ಸ ಫಲಂ ಭಜೇತ್ |

ಸಂವತ್ಸರೇಣ ಸಿದ್ಧಿಂ ಚ ಲಭತೇ ನಾತ್ರ ಸಂಶಯಃ || ೭ ||

ಅಷ್ಟಾನಾಂ ಬ್ರಾಹ್ಮಣಾನಾಂ ಚ ಲಿಖಿತ್ವಾ ಯಃ ಸಮರ್ಪಯೇತ್ |

ತಸ್ಯ ವಿದ್ಯಾ ಭವೇತ್ ಸರ್ವಾ ಗಣೇಶಸ್ಯ ಪ್ರಸಾದತಃ || ೮ ||

   

ಗಣೇಶಪ್ರಾತಃಸ್ಮರಣಮ್

            ಗಣೇಶಪ್ರಾತಃಸ್ಮರಣಮ್

   ಪ್ರಾತಃ ಸ್ಮರಾಮಿ ಗಣನಾಥಮನಾಥಬನ್ಧುಂ

   ಸಿಂದೂರಪೂರಪರಿಶೋಭಿತ ಗಣ್ಡಯುಗ್ಮಮ್ |

   ಉದ್ದಣ್ಡವಿಘ್ನಪರಿಖಣ್ಡನಚಣ್ಡದಣ್ಡಂ   

   ಆಖಣ್ಡಲಾದಿ ಸುರನಾಯಕ ವೃನ್ದವನ್ದ್ಯಮ್ || ೧ ||

   ಪ್ರಾತರ್ನಮಾಮಿ ಚತುರಾನನ ವನ್ದ್ಯಮಾನಂ

   ಇಚ್ಛಾನುಕೂಲಮಖಿಲಂಚ ಫಲಂ ದದಾನಮ್ |

   ತಂ ತುಂದಿಲಂ ದ್ವಿರಸನಾಧಿಪ ಯಜ್ಞಸೂತ್ರಂ

   ಪುತ್ರಂ ವಿಲಾಸಚತುರಂ ಶಿವಯೋಃ ಶಿವಾಯ || ೨ ||

   ಪ್ರಾತರ್ಭಜಾಮ್ಯಭಯದಂ ಖಲು ಭಕ್ತ ಶೋಕ-

   ದಾವಾನಲಂ ಗಣವಿಭುಂ ವರಕುಂಜರಾಸ್ಯಮ್ |

   ಅಜ್ಞಾನಕಾನನವಿನಾಶನಹವ್ಯವಾಹಂ

   ಉತ್ಸಾಹವರ್ಧನಮಹಂ ಸುತಮೀಶ್ವರಸ್ಯ || ೩ ||

   ಶ್ಲೋಕತ್ರಯಮಿದಂ ಪುಣ್ಯಂ ಸದಾ ಸಾಮ್ರಾಜ್ಯದಾಯಕಮ್ |

   ಪ್ರಾತರುತ್ಥಾಯ ಸತತಂ ಯಃ ಪಠೇತ್ಪ್ರಯತಃ ಪುಮಾನ್ || ೪ ||

                 ***

ಶ್ರೀಗಣಪತಿಷೋಡಶನಾಮಸ್ತೋತ್ರಮ್

ಶ್ರೀಗಣಪತಿಷೋಡಶನಾಮಸ್ತೋತ್ರಮ್

 

ಸುಮುಖಶ್ಚೈಕದನ್ತಶ್ಚ ಕಪಿಲೋ ಗಜಕರ್ಣಕಃ |

ಲಮ್ಬೋದರಶ್ಚ ವಿಕಟೋ ವಿಘ್ನರಾಜೋ ವಿನಾಯಕಃ || ೧ ||

ಧೂಮಕೇತುರ್ಗಣಾಧ್ಯಕ್ಷಃ ಫಾಲಚಂದ್ರೋ ಗಜಾನನಃ |

ವಕ್ರತುಣ್ಡಃ ಶೂರ್ಪಕರ್ಣೋ ಹೇರಂಬಃ ಸ್ಕಂದಪೂರ್ವಜಃ || ೨ ||

ಷೋಡಶೈತಾನಿ ನಾಮಾನಿ ಯಃ ಪಠೇತ್ ಶೃಣುಯಾದಪಿ |

ವಿದ್ಯಾರಂಭೇ ವಿವಾಹೇ ಚ ಪ್ರವೇಶೇ ನಿರ್ಗಮೇ ತಥಾ

ಸಂಗ್ರಾಮೇ ಸರ್ವಕಾರ್ಯೇ ಚ ವಿಘ್ನಸ್ತಸ್ಯ ನ ಜಾಯತೇ || ೩ ||

                ***

       

ಶ್ರೀಮಹಾಗಣೇಶಪಂಚರತ್ನಸ್ತೋತ್ರಮ್

ಶ್ರೀಮಹಾಗಣೇಶಪಂಚರತ್ನಸ್ತೋತ್ರಮ್

ಸರಾಗಲೋಕದುರ್ಲಭಂ ವಿರಾಗಿಲೋಕಪೂಜಿತಂ

ಸುರಾಸುರೈರ್ನಮಸ್ಕೃತಂ ಜರಾಪಮೃತ್ಯುನಾಶಕಮ್ |

ಗಿರಾಗುರುಂ ಶ್ರಿಯಾಹರಿಂ ಜಯನ್ತಿ ಯತ್ಪದಾರ್ಚಕಾಃ

ನಮಾಮಿ ತಂ ಗಣಾಧಿಪಂ ಕೃಪಾಪಯಃಪಯೋನಿಧಿಮ್ || ೧ ||

ಗಿರೀನ್ದ್ರಜಾಮುಖಾಂಬುಜ-ಪ್ರಮೋದದಾನ-ಭಾಸ್ಕರಂ

ಕರೀನ್ದ್ರವಕ್ತ್ರ-ಮಾನತಾಘಸಂಘ-ವಾರಣೋದ್ಯತಮ್ |

ಸರೀಸೃಪೇಶ-ಬದ್ಧಕುಕ್ಷಿ-ಮಾಶ್ರಯಾಮಿ ಸಂತತಂ

ಶರೀರಕಾನ್ತಿ-ನಿರ್ಜಿತಾಬ್ಜಬನ್ಧು-ಬಾಲಸಂತತಿಮ್ || ೨ ||

ಶುಕಾದಿಮೌನಿವನ್ದಿತಂ ಗಕಾರವಾಚ್ಯಮಕ್ಷರಂ

ಪ್ರಕಾಮಮಿಷ್ಟದಾಯಿನಂ ಸಕಾಮನಮ್ರಪಂಕ್ತಯೇ |

ಚಕಾಸತಂ ಚತುರ್ಭುಜೈಃ ವಿಕಾಸಪದ್ಮ ಪೂಜಿತಂ

ಪ್ರಕಾಶಿತಾತ್ಮತತ್ವಕಂ ನಮಾಮ್ಯಹಂ ಗಣಾಧಿಪಮ್ || ೩ ||

ನರಾಧಿಪತ್ವದಾಯಕಂ ಸ್ವರಾದಿಲೋಕದಾಯಕಂ

ಜ್ವರಾದಿರೋಗವಾರಕಂ ನಿರಾಕೃತಾಸುರವ್ರಜಮ್ |

ಕರಾಂಬುಜೋಲ್ಲಸತ್ಸೃಣಿಂ ವಿಕಾರಶೂನ್ಯಮಾನಸೈಃ

ಹೃದಾ ಸದಾ ವಿಭಾವಿತಂ ಮುದಾ ನಮಾಮಿ ವಿಘ್ನಪಮ್ || ೪ ||

ಶ್ರಮಾಪನೋದನಕ್ಷಮಂ ಸಮಾಹಿತಾನ್ತರಾತ್ಮನಾಂ

ಸುಮಾದಿಭಿಸ್ಸದಾರ್ಚಿತಂ ಕ್ಷಮಾನಿಧಿಂ ಗಣಾಧಿಪಮ್ |

ರಮಾಧವಾದಿಪೂಜಿತಂ ಯಮಾನ್ತಕಾತ್ಮಸಂಭವಂ

ಶಮಾದಿಷಡ್ಗುಣಪ್ರದಂ ನಮಾಮಿ ತಂ ವಿಭೂತಯೇ || ೫ ||

ಗಣಾಧಿಪಸ್ಯ ಪಂಚಕಂ ನೃಣಾಮಭೀಷ್ಟದಾಯಕಂ

ಪ್ರಣಾಮಪೂರ್ವಕಂ ಜನಾಃ ಪಠನ್ತಿ ಯೇ ಮುದಾಯುತಾಃ |

ಭವನ್ತಿ ತೇ ವಿದಾಂಪುರಃ ಪ್ರಗೀತವೈಭವಾ ಜವಾತ್

ಚಿರಾಯುಷೋಽಧಿಕಶ್ರಿಯಸ್ಸುಸೂನವೋ ನ ಸಂಶಯಃ || ೬ ||