ಶ್ರೀಭೂತನಾಥಸ್ತೋತ್ರದಶಕಮ್

ಶ್ರೀಭೂತನಾಥಸ್ತೋತ್ರದಶಕಮ್

ಪಾಣ್ಡ್ಯಭೂಪತೀನ್ದ್ರಪೂರ್ವಪುಣ್ಯಮೋಹನಾಕೃತೇ

ಪಣ್ಡಿತಾರ್ಚಿತಾಙ್ಘ್ರಿಪುಣ್ಡರೀಕ ಪಾವನಾಕೃತೇ |

ಪೂರ್ಣಚನ್ದ್ರತುಣ್ಡವೇತ್ರದಣ್ಡವೀರ್ಯವಾರಿಧೇ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೧ ||

ಆದಿಶಂಕರಾಚ್ಯುತಪ್ರಿಯಾತ್ಮಸಮ್ಭವ ಪ್ರಭೋ

ಆದಿಭೂತನಾಥ ಸಾಧುಭಕ್ತಚಿನ್ತಿತಪ್ರದ |

ಭೂತಿಭೂಷ ವೇದಘೋಷಪಾರಿತೋಷಶಾಶ್ವತ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೨ ||

ಪಞ್ಚಬಾಣಕೋಟಿಕೋಮಲಾಕೃತೇ ಕೃಪಾನಿಧೇ

ಪಞ್ಚಗವ್ಯಪಾಯಸಾನ್ನಪಾನಕಾದಿಮೋದಕ |

ಪಞ್ಚಭೂತಸಞ್ಚಯಪ್ರಪಞ್ಚಭೂತಪಾಲಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೩ ||

ಚನ್ದ್ರಸೂರ್ಯವೀತಿಹೋತ್ರನೇತ್ರನೇತ್ರಮೋಹನ

ಸಾನ್ದ್ರಸುನ್ದರಸ್ಮಿತಾರ್ದ್ರ ಕೇಸರೀನ್ದ್ರವಾಹನ |

ಇನ್ದ್ರವನ್ದನೀಯಪಾದ ಸಾಧುವೃನ್ದಜೀವನ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೪ ||

ವೀರಬಾಹುವರ್ಣನೀಯವೀರ್ಯಶೌರ್ಯವಾರಿಧೇ

ವಾರಿಜಾಸನಾದಿದೇವವನ್ದ್ಯ ಸುನ್ದರಾಕೃತೇ |

ವಾರಣೇನ್ದ್ರವಾಜಿಸಿಂಹವಾಹ ಭಕ್ತಶೇವಧೇ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೫ ||

ಅತ್ಯುದಾರಭಕ್ತಚಿತ್ತರಙ್ಗನರ್ತನಪ್ರಭೋ

ನಿತ್ಯಶುದ್ಧನಿರ್ಮಲಾದ್ವಿತೀಯ ಧರ್ಮಪಾಲಕ |

ಸತ್ಯರೂಪ ಮುಕ್ತಿರೂಪ ಸರ್ವದೇವತಾತ್ಮಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೬ ||

ಸಾಮಗಾನಲೋಲ ಶಾನ್ತಶೀಲ ಧರ್ಮಪಾಲಕ

ಸೋಮಸುನ್ದರಾಸ್ಯ ಸಾಧುಪೂಜನೀಯಪಾದುಕ |

ಸಾಮದಾನಭೇದದಣ್ಡಶಾಸ್ತ್ರನೀತಿ ಬೋಧಕ

ಪೂರ್ಣಪುಷ್ಕಲ ಸಮೇತ ಭೂತನಾಥ ಪಾಹಿ ಮಾಮ್ || ೭ ||

ಸುಪ್ರಸನ್ನದೇವದೇವ ಸದ್ಗತಿಪ್ರದಾಯಕ

ಚಿತ್ಪ್ರಕಾಶ ಧರ್ಮಪಾಲ ಸರ್ವಭೂತನಾಯಕ |

ಸುಪ್ರಸಿದ್ಧ ಪಞ್ಚಶೈಲಸನ್ನಿಕೇತನರ್ತಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೮ ||

ಶೂಲಚಾಪಬಾಣಖಡ್ಗವಜ್ರಶಕ್ತಿ ಶೋಭಿತ

ಬಾಲಸೂರ್ಯಕೋಟಿಭಾಸುರಾಙ್ಗ ಭೂತಸೇವಿತ |

ಕಾಲಚಕ್ರ ಸಂಪ್ರವೃತ್ತಿ ಕಲ್ಪನಾ ಸಮನ್ವಿತ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೯ ||

ಅದ್ಭುತಾತ್ಮಬೋಧಸತ್ಸನಾತನೋಪದೇಶಕ

ಬುದ್ಬುದೋಪಮಪ್ರಪಞ್ಚವಿಭ್ರಮಪ್ರಕಾಶಕ |

ಸಪ್ರಥಪ್ರಗಲ್ಭಚಿತ್ ಪ್ರಕಾಶ ದಿವ್ಯದೇಶಿಕ

ಪೂರ್ಣಪುಷ್ಕಲಾ ಸಮೇತ ಭೂತನಾಥ ಪಾಹಿ ಮಾಮ್ || ೧೦ ||

ಧರ್ಮಶಾಸ್ತೃಸ್ತುತಿದಶಕಮ್

ಧರ್ಮಶಾಸ್ತೃಸ್ತುತಿದಶಕಮ್

ಆಶಾನುರೂಪಫಲದಂ ಚರಣಾರವಿನ್ದ-

ಭಾಜಾಮಪಾರಕರುಣಾರ್ಣವಪೂರ್ಣಚನ್ದ್ರಮ್ |

ನಾಶಾಯ ಸರ್ವವಿಪದಾಮಪಿ ನೌಮಿ ನಿತ್ಯಂ

ಈಶಾನಕೇಶವಭುವಂ ಭುವನೈಕನಾಥಮ್ || ೧ ||

ಪಿಞ್ಛಾವಲೀವಲಯಿತಾಕಲಿತಪ್ರಸೂನ-

ಸಂಜಾತಕಾನ್ತಿಭರಭಾಸುರಕೇಶಭಾರಮ್ |

ಶಿಞ್ಜಾನಮಞ್ಜುಮಣಿಭೂಷಿತರಞ್ಜಿತಾಙ್ಗಂ

ಚನ್ದ್ರಾವತಂಸಹರಿನನ್ದನಮಾಶ್ರಯಾಮಿ || ೨ ||

ಆಲೋಲನೀಲಲಲಿತಾಲಕಹಾರರಮ್ಯಂ

ಆಕಮ್ರನಾಸಮರುಣಾಧರಮಾಯತಾಕ್ಷಮ್ |

ಆಲಮ್ಬನಂ ತ್ರಿಜಗತಾಂ ಪ್ರಮಥಾಧಿನಾಥಂ

ಆನಮ್ರಲೋಕಹರಿನನ್ದನಮಾಶ್ರಯಾಮಿ || ೩ ||

ಕರ್ಣಾವಲಮ್ಬಿಮಣಿಕುಣ್ಡಲಭಾಸಮಾನ-

ಗಣ್ಡಸ್ಥಲಂ ಸಮುದಿತಾನನಪುಣ್ಡರೀಕಮ್ |

ಅರ್ಣೋಜನಾಭಹರಯೋರಿವ ಮೂರ್ತಿಮನ್ತಂ

ಪುಣ್ಯಾತಿರೇಕಮಿವ ಭೂತಪತಿಂ ನಮಾಮಿ || ೪ ||

ಉದ್ದಣ್ಡಚಾರುಭುಜದಣ್ಡಯುಗಾಗ್ರಸಂಸ್ಥ-

ಕೋದಣ್ಡಬಾಣಮಹಿತಾನ್ತಮದಾನ್ತವೀರ್ಯಮ್ |

ಉದ್ಯತ್ಪ್ರಭಾಪಟಲದೀಪ್ರಮದಭ್ರಸಾರಂ

ನಿತ್ಯಂ ಪ್ರಭಾಪತಿಮಹಂ ಪ್ರಣತೋ ಭವಾಮಿ || ೫ ||

ಮಾಲೇಯಪಙ್ಕಸಮಲಙ್ಕೃತಭಾಸಮಾನ-

ದೋರನ್ತರಾಲತರಲಾಮಲಹಾರಜಾಲಮ್ |

ನೀಲಾತಿನಿರ್ಮಲದುಕೂಲಧರಂ ಮುಕುನ್ದ-

ಕಾಲಾನ್ತಕಪ್ರತಿನಿಧಿಂ ಪ್ರಣತೋಽಸ್ಮಿ ನಿತ್ಯಮ್ || ೬ ||

ಯತ್ಪಾದಪಙ್ಕಜಯುಗಂ ಮುನಯೋಽಪ್ಯಜಸ್ರಂ

ಭಕ್ತ್ಯಾ ಭಜನ್ತಿ ಭವರೋಗನಿವಾರಣಾಯ |

ಪುತ್ರಂ ಪುರಾನ್ತಕಮುರಾನ್ತಕಯೋರುದಾರಂ

ನಿತ್ಯಂ ನಮಾಮ್ಯಹಮಮಿತ್ರಕುಲಾನ್ತಕಂ ತಮ್ || ೭ ||

ಕಾನ್ತಂ ಕಲಾಯಕುಸುಮದ್ಯುತಿ ಲೋಭನೀಯ-

ಕಾನ್ತಿಪ್ರವಾಹವಿಲಸತ್ ಕಮನೀಯರೂಪಮ್ |

ಕಾನ್ತಾತನೂಜಸಹಿತಂ ನಿಖಿಲಾಮಯೌಘ

ಶನ್ತಿಪ್ರದಂ ಪ್ರಮಥನಾಥಮಹಂ ನಮಾಮಿ || ೮ ||

ಭೂತೇಶ ಭೂರಿಕರುಣಾಮೃತಪೂರಪೂರ್ಣ-

ವಾರಾನ್ನಿಧೇ ವರದ ಭಕ್ತಜನೈಕಬನ್ಧೋ |

ಪಾಯಾತ್ ಭವಾನ್ ಪ್ರಣತಮೇನಮಪಾರಘೋರ-

ಸಂಸಾರಭೀತಮಿಹ ಮಾಮಖಿಲಾಮಯೇಭ್ಯಃ || ೯ ||

ಹೇ ಭೂತನಾಥ ಭಗವನ್ ಭವದೀಯಚಾರು-

ಪಾದಾಮ್ಬುಜೇ ಭವತು ಭಕ್ತಿರಚಞ್ಚಲಾ ಮೇ |

ನಾಥಾಯ ಸರ್ವಜಗತಾಂ ಭಜತಾಂ ಭವಾಬ್ಧಿ-

ಪೋತಾಯ ನಿತ್ಯಮಖಿಲಾಙ್ಗಭುವೇ ನಮಸ್ತೇ || ೧೦ ||

     

ಶ್ರೀಧರ್ಮಶಾಸ್ತುಃ ಅಷ್ಟಕಮ್

  ಶ್ರೀಧರ್ಮಶಾಸ್ತುಃ ಅಷ್ಟಕಮ್

 ಬನ್ಧೂಕಬನ್ಧುರರುಚಿಂ ಕಲಧೌತಭಾಸಂ

ಪಞ್ಚಾನನಂ ದುರಿತವಞ್ಚನಧೀರಮೀಶಮ್ |

ಪಾರ್ಶ್ವದ್ವಯಾಕಲಿತಶಕ್ತಿಕಟಾಕ್ಷಚಾರುಂ

ನೀಲೋತ್ಪಲಾರ್ಚಿತತನುಂ ಪ್ರಣತೋಽಸ್ಮಿ ದೇವಮ್ || ೧ ||

ಕಲ್ಯಾಣವೇಷರುಚಿರಂ ಕರುಣಾನಿಧಾನಂ

ಕನ್ದರ್ಪಕೋಟಿಸದೃಶಂ ಕಮನೀಯಭಾಸಮ್ |

ಕಾನ್ತಾದ್ವಯಾಕಲಿತಪಾರ್ಶ್ವಮಘಾರಿಮಾದ್ಯಂ

ಶಾಸ್ತಾರಮೇವ ಸತತಂ ಪ್ರಣತೋಽಸ್ಮಿ ನಿತ್ಯಮ್ || ೨ ||

ಯೋ ವಾ ಸ್ಮರೇದರುಣಕುಙ್ಕುಮಪಙ್ಕಶೋಣ-

ಗುಂಜಾಪಿನದ್ಧಕಚಭಾರಲಸತ್ಕಿರೀಟಮ್ |

ಶಾಸ್ತಾರಮೇವ ಸತತಂ ಸ ತು ಸರ್ವಲೋಕಾನ್

ವಿಸ್ಮಾಪಯೇನ್ನಿಜವಿಲೋಕನತೋ ನಿತಾನ್ತಮ್ || ೩ ||

ಪಞ್ಚೇಷುಕೈಟಭವಿರೋಧಿತನೂಭವಂ ತಂ

ಆರೂಢದನ್ತಿಪರಮಾದೃತಮನ್ದಹಾಸಮ್ |

ಹಸ್ತಾಮ್ಬುಜೈರವಿರತಂ ನಿಜಭಕ್ತಹಂಸೇ

ಷ್ವೃದ್ಧಿಂ ಪರಾಂ ಹಿ ದದತಂ ಭುವನೈಕವನ್ದ್ಯಮ್ || ೪ ||

ಗುಂಜಾಮಣಿಸ್ರಗುಪಲಕ್ಷಿತಕೇಶಹಸ್ತಂ

ಕಸ್ತೂರಿಕಾತಿಲಕಮೋಹನಸರ್ವಲೋಕಮ್ |

ಪಞ್ಚಾನನಾಮ್ಬುಜಲಸತ್ ಘನಕರ್ಣಪಾಶಂ

ಶಾಸ್ತಾರಮಮ್ಬುರುಹಲೋಚನಮೀಶಮೀಡೇ || ೫ ||

ಪಞ್ಚಾನನಂ ದಶಭುಜಂ ಧೃತಹೇತಿದಣ್ಡಂ

ಧಾರಾವತಾದಪಿ ಚ ರೂಷ್ಣಿಕಮಾಲಿಕಾಭಿಃ |

ಇಚ್ಛಾನುರೂಪಫಲದೋಽಸ್ಮ್ಯಹಮೇವ ಭಕ್ತೇ-

ಷ್ವಿತ್ಥಂ ಪ್ರತೀತವಿಭವಂ ಭಗವನ್ತಮೀಡೇ || ೬ ||

ಸ್ಮೇರಾನನಾದ್ ಭಗವತಃ ಸ್ಮರಶಾಸನಾಚ್ಚ

ಮಾಯಾಗೃಹೀತಮಹಿಲಾವಪುಷೋ ಹರೇಶ್ಚ |

ಯಃ ಸಂಗಮೇ ಸಮುದಭೂತ್ ಜಗತೀಹ ತಾದೃಗ್

ದೇವಂ ನತೋಽಸ್ಮಿ ಕರುಣಾಲಯಮಾಶ್ರಯೇಽಹಮ್ || ೭ ||

ಯಸ್ಯೈವ ಭಕ್ತಜನಮತ್ರ ಗೃಣನ್ತಿ ಲೋಕೇ

ಕಿಂ ವಾ ಮಯಃ ಕಿಮಥವಾ ಸುರವರ್ಧಕಿರ್ವಾ |

ವೇಧಾಃ ಕಿಮೇಷ ನನು ಶಮ್ಬರ ಏಷ ವಾ ಕಿಂ

ಇತ್ಯೇವ ತಂ ಶರಣಮಾಶುತರಂ ವ್ರಜಾಮಿ || ೮ ||