ಶ್ರೀ ವರದವಲ್ಲಭಾ ಸ್ತೋತ್ರಮ್

ಶ್ರೀ ವರದವಲ್ಲಭಾ ಸ್ತೋತ್ರಮ್

ಕಾನ್ತಸ್ತೇ ಪುರುಷೋತ್ತಮಃ ಫಣಿಪತಿಃ ಶಯ್ಯಾಸನಂ ವಾಹನಮ್

ವೇದಾತ್ಮಾ ವಿಹಗೇಶ್ವರೋ ಜವನಿಕಾ ಮಾಯಾ ಜಗನ್ಮೋಹಿನೀ|

ಬ್ರಹ್ಮೇಶಾದಿ ಸುರವ್ರಜಃ ಸದಯಿತಃ ತ್ವದ್ದಾಸದಾಸೀಗಣಃ

ಶ್ರೀರಿತ್ಯೇವ ಚ ನಾಮ ತೇ ಭಗವತಿ ಬ್ರೂಮಃ ಕಥಂ ತ್ವಾಂ ವಯಮ್|| ೧||

ಯಸ್ಯಾಸ್ತೇ ಮಹಿಮಾನಮಾತ್ಮನ ಇವ ತ್ವದ್ವಲ್ಲಭೋಽಪಿ ಪ್ರಭುಃ|

ನಾಲಂ ಮಾತುಮಿಯತ್ತಯಾ ನಿರವಧಿಂ ನಿತ್ಯಾನುಕೂಲಂ ಸ್ವತಃ|

ತಾಂ ತ್ವಾಂ ದಾಸ ಇತಿ ಪ್ರಪನ್ನ ಇತಿ ಚ ಸ್ತೋಷ್ಯಾಮ್ಯಹಂ ನಿರ್ಭಯೋ

ಲೋಕೈಕೇಶ್ವರಿ! ಲೋಕನಾಥ ದಯಿತೇ! ದಾನ್ತೇ ದಯಾಂ ತೇ ವಿದನ್|| ೨||

ಈಷತ್ತ್ವತ್ಕರುಣಾನಿರೀಕ್ಷಣಸುಧಾಸನ್ಧುಕ್ಷಣಾತ್ ರಕ್ಷಸೇ

ನಷ್ಟಂ ಪ್ರಾಕ್ ತದಲಾಭತಸ್ತ್ರಿಭುವನಂ ಸಂಪ್ರತ್ಯನನ್ತೋದಯಮ್|

ಶ್ರೇಯೋ ನ ಹ್ಯರವಿನ್ದಲೋಚನಮನಃಕಾನ್ತಾ ಪ್ರಸಾದಾದೃತೇ

ಸಂಸೃತ್ಯಾಕ್ಷರವೈಷ್ಣವಾಧ್ವಸು ನೃಣಾಂ ಸಂಭಾವ್ಯತೇ ಕರ್ಹಿಚಿತ್|| ೩||

ಶಾನ್ತಾನನ್ದಮಹಾವಿಭೂತಿ ಪರಮಂ ಯದ್ಬ್ರಹ್ಮರೂಪಂ ಹರೇಃ

ಮೂರ್ತಂ ಬ್ರಹ್ಮ ತತೋಽಪಿ ಯತ್ಪ್ರಿಯತರಂ ರೂಪಂ ಯದತ್ಯದ್ಭುತಮ್|

ಯಾನ್ಯನ್ಯಾನಿ ಯಥಾಸುಖಂ ವಿಹರತೋ ರೂಪಾಣಿ ಸರ್ವಾಣಿ ತಾ-

ನ್ಯಾಹುಃ ಸ್ವೈರನುರೂಪ ರೂಪವಿಭವೈಃ ಗಾಢೋಪಗೂಢಾನಿ ತೇ || ೪||

ಆಧಾರತ್ರಯಸಂಪನ್ನಾಂ ಅರವಿನ್ದವಿಲಾಸಿನೀಮ್|

ಅಶೇಷ ಜಗದೀಶಿತ್ರೀಂ ವನ್ದೇ ವರದವಲ್ಲಭಾಮ್ || ೫||

Note: Varada Vallabha is the consort of Varadaraja

(also known as Devaraja),  an aspect of  Mahavishnu