ದತ್ತಪ್ರಬೋಧಮ್ (ದತ್ತಾತ್ರೇಯ ಸುಪ್ರಭಾತಮ್)

ದತ್ತಪ್ರಬೋಧಮ್ (ದತ್ತಾತ್ರೇಯ ಸುಪ್ರಭಾತಮ್)

ನಿತ್ಯೋ ಹಿ ಯಸ್ಯ ಮಹಿಮಾ ನ ಹಿ ಮಾನಮೇತಿ

 ಸ ತ್ವಂ ಮಹೇಶ ಭಗವನ್ ಮಘವನ್ಮುಖೇಡ್ಯ|

ಉತ್ಥಿಷ್ಠ ತಿಷ್ಠದಮೃತೈರಮೃತೈರಿವೋಕ್ತೈಃ

 ಗೀತಾಗಮೈಶ್ಚ ಪುರುಧಾ ಪುರುಧಾಮಶಾಲಿನ್ || ೧||

ಭಕ್ತೇಷು ಜಾಗೃಹಿ ಮುದಾಹಿಮುದಾರಭಾವಂ

ತಲ್ಪಂ ವಿಧಾಯ ಸವಿಶೇಷ ವಿಶೇಷಹೇತೋ

ಯಃ ಶೇಷ ಏಷ ಸಕಲಸ್ಸಕಲಸ್ವಗೀತೈಃ

ತ್ವಂ ಜಾಗೃಹಿ ಶೃತಪದೇ ತಪತೇ ನಮಸ್ತೇ || ೨||

ದೃಷ್ಟ್ವಾ ಜನಾನ್ ವಿವಿಧಕಷ್ಟವಶಾನ್ ದಯಾಲು-

ಸ್ತ್ರ್ಯಾತ್ಮಾ ಬಭೂವ ಸಕಲಾರ್ತಿಹರೋಽತ್ರ ದತ್ತಃ|

ಅತ್ರೇರ್ಮುನೇಸ್ಸುತಪಸೋಽಪಿ ಫಲಂ ಚ ದಾತುಂ

ಬುಧ್ಯಸ್ವ ಸ ತ್ವಮಿಹ ಯನ್ಮಹಿಮಾನಿಯತ್ತಃ|| ೩||

ಆಯಾತ್ಯಶೇಷವಿನುತೋಽಪ್ಯವಗಾಹನಾಯ

 ದತ್ತೋಽಧುನೇತಿ ಸುರಸಿನ್ಧುರಪೇಕ್ಷತೇ ತ್ವಾಂ|

ಕ್ಷೇತ್ರೇ ತಥೈವ ಗುರುಸಂಜ್ಞಕ ಏತ್ಯ ಸಿದ್ಧಾಃ

 ತಸ್ಥುಸ್ತವಾಗಮನದೇಶ ಇನೋದಯಾತ್ಪ್ರಾಕ್|| ೪||

ಸಾನ್ಧ್ಯಾಮುಪಾಸಿತುಮಜೋಽಪ್ಯಧುನಾ ಗಮಿಷ್ಯ-

 ತ್ಯಾಕಾಙ್ಕ್ಷತೇ ಕೃತಿಜನಃ ಪ್ರತಿವೀಕ್ಷತೇ ತ್ವಾಂ|

ಕೃಷ್ಣಾತಟೇಽಪಿ ನರಸಿಂಹ ಸುವಾಟಿಕಾಯಾಂ

 ಸಾರಾರ್ತಿಕಃ ಕೃತಿಜನಃ ಪ್ರತಿವೀಕ್ಷತೇ ತ್ವಾಂ || ೫||

ಗಾನ್ಧರ್ವಸಂಜ್ಞಕಪುರೇಽಪಿ ಸುಭಾವಿಕಾಸ್ತೇ

ಧ್ಯಾನಾರ್ಥಮತ್ರ ಭಗವಾನ್ ಸಮುಪೈಷ್ಯತೀತಿ|

ಮತ್ವಾ ಸ್ತುರಾಚರಿತ ಸಂನಿಯತಾಪ್ಲವಾದ್ಯಾಃ

ಉತ್ಥಿಷ್ಠ ದೇವ ಭಗವನ್ ನತ ಏವ ಶೀಘ್ರಮ್|| ೬||

ಪುತ್ರೀ ದಿವಃ ಖಗಗಣಾನ್ ಸುಚಿರಂ ಪ್ರಸುಪ್ತಾನ್

ಉತ್ಥಾಪಯತ್ಯರುಣಕಾ ಅಧಿರುಹ್ಯ ತೂಷಾ |

ಕಾಷಾಯವಸ್ತ್ರಮಪಿಧಾನಮಪಾವೃಣೋದ್ಯನ್

ತಾರ್ಕ್ಷ್ಯಾಗ್ರಜೋಽಯಮವಲೋಕಯ ತಂ ಪುರಸ್ತಾತ್ || ೭||

ಶಾಟೀನಿಭಾಭ್ರಪಟಲಾನಿ ತಂವೇನ್ದ್ರಕಾಷ್ಠಾ-

ಭಾಗಂ  ಯತೀನ್ದ್ರ ರುರುದುರ್ಗರುಡಾಗ್ರಜೋಽತಃ|

ಅಸ್ಮಾಭಿರೀಶ ವಿದಿತೋ ಹ್ಯುದಿತೋಽಯಮೇವಂ

ಚನ್ದ್ರೋಽಪಿ ತೇ ಮುಖರುಚಿಂ ಚಿರಗಾಂ ಜಹಾತಿ|| ೮||

ದ್ವಾರೇಽರ್ಜುನಸ್ತವ ತಿಷ್ಠತಿ ಕಾರ್ತವೀರ್ಯಃ

ಪ್ರಹ್ಲಾದ ಏಷ ಯದುರೇಷ ಮದಾಲಸಾಜಃ|

ತ್ವಾಂ ದ್ರ್ಷ್ಟುಕಾಮ ಇತರೇ ಮುನಯೋಽಪಿ ಚಾಹಂ

ಉತ್ತಿಷ್ಠ ದರ್ಶಯ ನಿಜಂ ಸುಮುಖಂ ಪ್ರಸೀದ|| ೯||

ಏವಂ ಪ್ರಬುದ್ಧ ಇವ ಸಂಸ್ತವನಾದಭೂತ್ ಸ

ಮಾಲಾಂ ಕಮಣ್ಡಲುಮಥೋ ಡಮರುಂ ತ್ರಿಶೂಲಮ್|

ಚಕ್ರಂ ಚ ಶಙ್ಖಮುಪರಿ ಸ್ವಕರರೈರ್ದಧಾನೋ

ನಿತ್ಯಂ ಸ ಮಾಮವತು ಭಾವಿತ ವಾಸುದೇವಃ|| ೧೦||

ಇತಿ ಶ್ರೀವಾಸುದೇವಾನನ್ದ ಸರಸ್ವತೀ ವಿರಚಿತೋ

      ದತ್ತಪ್ರಬೋಧಃ ಸಂಪೂರ್ಣಃ