ಶ್ರೀಗಙ್ಗಾಮಹಿಮ್ನಸ್ತೋತ್ರಮ್

ಶ್ರೀಗಙ್ಗಾಮಹಿಮ್ನಸ್ತೋತ್ರಮ್

ಪ್ರಣೇತಾರಃ –  ರಾಮಭದ್ರಾಚಾರ್ಯಾಃ

ಮಹಿಮ್ನಸ್ತೇಽಪಾರಂ ಸಕಲಸುಖಸಾರಂ ತ್ರಿಪಥಗೇ !

ಪ್ರತರ್ತ್ತುಂ ಕೂಪಾರಂ ಜಗತಿ ಮತಿಮಾನ್ ಪಾರಯತಿ ಕಃ |

ತಥಾಪಿ ತ್ವತ್ಪಾದಾಮ್ಬುಜತರಣಿರಜ್ಞೋಽಪಿ ಭವಿತುಂ

ಸಮೀಹೇ ತದ್ವಿಪ್ರುಟ್ಕ್ಷಪಿತಭವಪಙ್ಕಃ ಸುರಧುನಿ ||  ೧ ||

ಸಮುದ್ಭೂತಾ ಭೂಮ್ನಶ್ಚರಣವನಜಾತಾನ್ಮಧುರಿಪೋ-

ಸ್ತತೋ ಧಾತುಃ ಪಾತ್ರೇ ಗದಿತಗುಣಗಾತ್ರೇ ಸಮುಷಿತಾ |

ಪುನಃ ಶಮ್ಭೋಶ್ಚೂಡಾಸಿತಕುಸುಮಮಾಲಾಯಿತತನುಃ

ಸುರಾನ್ತ್ರೀನ್ಸತ್ಕರ್ತ್ತುಂ ಕಿಲ ಜಗತಿ ಜಾಗರ್ಷಿ ಜನನಿ ||  ೨ ||

ತವೈಶ್ವರ್ಯಂ ಸ್ವರ್ಯೋಷಿದಮಲಶಿರೋಗುಚ್ಛವಿಗಲ-

ತ್ಪ್ರಸೂನವ್ಯಾಲೋಲನ್ಮಧುಕರಸಮುದ್ಗೀತಚರಿತೇ |

ನ ಚೇಶೋ ಭೂತೇಶಃ ಪುನರಥ ನ ಶೇಷೋ ನ ಚ ಗುರುಃ

ಪರಿಜ್ಞಾತುಂ ವಕ್ತುಂ ಜನನಿ ಮಮ ಧೃಷ್ಟಾ ಮುಖರತಾ ||  ೩ ||

ಅನಙ್ಗಾರೇರಙ್ಗೇ ಕೃತರಮಣರಙ್ಗೇ ಶುಚಿತಯಾ

ಸಮಾಭಗ್ನಾಸಙ್ಗೇ ವಿಹಿತಭವಭಙ್ಗೇ ತು ಭಜತಾಮ್ |

ವಿನಶ್ಯದ್ವ್ಯಾಸಙ್ಗೇ ಪ್ರಣತಜನತಾಯಾಃ ಸ್ವಪಯಸಾ

ತರಙ್ಗಪ್ರೋತ್ತುಙ್ಗೇ ನನು ಜಗತಿ ಗಙ್ಗೇ ವಿಜಯಸೇ ||  ೪ ||

ಹರನ್ತೀ ಸನ್ತಾಪಂ ತ್ರಿವಿಧಮಥ ಪಾಪಂ ಜಲಜುಷಾಂ

ದಿಶನ್ತೀ ಸನ್ದೇಶಂ ಕ್ಷಪಿತಭವಲೇಶಂ ಸುಕೃತಿನಾಮ್ |

ತುದನ್ತೀ ನೈರಾಶ್ಯಂ ಕಲುಷಮಥ ದಾಸ್ಯಂ ಪ್ರದದತೀ

ವಿಲೋಲತ್ಕಲ್ಲೋಲೇ ವಿಬುಧವರವೀಥಿರ್ವಿಜಯಸೇ ||  ೫ ||

ದದಾನಾ ವಾತ್ಸಲ್ಯಂ ಶಮಿತಶಮಶಲ್ಯಂ ಸ್ವಪಯಸಾ

ದಧಾನಾ ತಾರುಣ್ಯಂ ತರುಣಕರುಣಾಪೂರ್ಣಹೃದಯಾ |

ವಸಾನಾ ಕೌಶೇಯಂ ಶಶಿನಿಭಮಮೇಯಂ ಭಗವತಿ

ಪುನಾನಾ ತ್ರೈಲೋಕ್ಯಂ ಜಯಸಿ ನನು ಭಾಗೀರಥಿ ಶುಭೇ ||  ೬ ||

ನಿರಾಕಾರಂ ಕೇಚಿತ್ಪ್ರಣಿದಧತ ಆವರ್ಜಿತಧಿಯೋ

ನರಾಕಾರಂ ಚಾನ್ಯೇ ಪ್ರಣತಿರತಿಧನ್ಯೇ ಸ್ವಮನಸಿ |

ತ್ರಿಭಿಸ್ತಾಪೈಸ್ತಪ್ತಾಃ ಪುನರಥ ಪರಂ ಕೇಚನ ವಯಂ

ಸದಾ ನೀರಾಕಾರಂ ಸುರನದಿ ಭಜಾಮಸ್ತವ ಪದಮ್ ||  ೭ ||

ನ ಜಾನೇ ವಾಗೀಶಂ ನಹಿ ಕಿಲ ಶಚೀಶಂ ನ ಚ ಗುಹಮ್

ನ ಜಾನೇ ಗೌರೀಶಂ ನಹಿ ಕಿಲ ಗಣೇಶಂ ನಹಿ ಗುರುಮ್ |

ನ ಚೈವಾನ್ಯಾನ್ದೇವಾನ್ ಪ್ರಿಯವಿವಿಧಸೇವಾನ್ ತ್ರಿಪಥಗೇ

ಸದಾ ರಾಮಾಭಿನ್ನಂ ನನು ಜನನಿ ಜಾನೇ ತವ ಜಲಮ್ ||  ೮ ||

ಪಚತ್ಕಾಯಕ್ಲೇಶಂ ವಿವಿಧವಿಧಕರ್ಮಭ್ರಮಮಲಂ

ಹರನ್ಮಾಯಾಲೇಶಂ ರವಿಸುತನಿದೇಶಂ ವಿಫಲಯನ್ |

ದ್ರುತಂ ವಿಘ್ನದ್ವಿಘ್ನಾನ್ ಕುಟಿಲಕಲಿನಿಘ್ನಾನ್ ವಿಕಲಯ-

ನ್ಮಹಾಮೋಹಂ ಗಙ್ಗೇ ಜಯತಿ ಭುವಿ ತೇ ಜಾಹ್ನವಿ ಜಲಮ್ ||  ೯ ||

ಉದನ್ವನ್ನೈರಾಶ್ಯಂ ದಮಯಿತುಮಥಾವಿಷ್ಕೃತತನೋ-

ರ್ಮನೋರ್ವಂಶಂ ಹಂಸಾರ್ಪಿತವಿಮಲಕೀರ್ತಿಂ ಪ್ರಥಯಿತುಮ್ |

ಸುಧಾಸಾರಂ ಸಾರಸ್ವತಹತವಿಕಾರಂ ಶ್ರುತಮಯಂ

ತವಾಪೂರ್ವಂ ಪೂರ್ವಂ ಪ್ರಣಿಗದತಿ ಗಙ್ಗೇ ಜಲಮಲಮ್ ||  ೧೦ ||

ಕಿಮೇತತ್ಸೌನ್ದರ್ಯಂ ಧೃತವಪುರಥೋ ಬಾಲಶಶಿನಃ

ಕಿಮಾಹೋ ಮಾಧುರ್ಯಂ ಜನಕತನಯಾಪ್ರೇಮಮಹಿತಮ್ |

ದ್ರುತಬ್ರಹ್ಮೀಭೂತಂ ಪರಮಮಥ ಪೂತಂ ವಸುಮತೀ-

ವಿರಾಜತ್ಪೀಯೂಷಂ ಶುಚಿ ವಹತಿ ಗಾಙ್ಗಂ ಜಲಮಹೋ ||  ೧೧ ||

ಮುನೀನ್ದ್ರಾ ಯೋಗೀನ್ದ್ರಾ ಯಮನಿಯಮನಿಷ್ಠಾಃ ಶ್ರುತಿಪರಾ

ವಿರಕ್ತಾಃ ಸಂನ್ಯಸ್ತಾಃ ಸತತಮನುರಕ್ತಾ ದೃಢಧಿಯಃ |

ವಸನ್ತಸ್ತ್ವತ್ತೀರೇ ಮಲಯಜಸಮೀರೇ ಸುಮನಸೋ

ಲಭನ್ತೇ ತತ್ತತ್ತ್ವಂ ಸುವಿಮಲಪರಬ್ರಹ್ಮಮಹಿತಮ್ ||  ೧೨ ||

ವಿರಕ್ತಾ ವೈರಾಗ್ಯಂ ಪರಮಮಥ ಭಾಗ್ಯಂ ಸುಕೃತಿನಃ

ಸುಸನ್ತಸ್ಸನ್ತೋಷಂ ವಿಮಲಗುಣಪೋಷಂ ಮುನಿಗಣಾ |

ನೃಪಾ ರಾಜ್ಯಂ ಪ್ರಾಜ್ಯಂ ಗೃಹಿಣ ಇತರೇ ಭೂರಿವಿಭವಂ

ಲಭನ್ತೇ ವೈ ತ್ವತ್ತಸ್ತ್ವಮಸಿ ಸುರಧೇನುಸ್ತನುಭೃತಾಮ್ ||  ೧೩ ||

ಗತೈಶ್ವರ್ಯಾನ್ ದೀನಾನ್ ಕಪಿಲಮುನಿಕೋಪಾಗ್ನಿಶಲಭಾನ್

ನಿಮಗ್ನಾಞ್ಛೋಕಾಬ್ಧೌ ಸಗರನೃಪತೇರ್ವೀಕ್ಷ್ಯ ತನಯಾನ್ |

ಕೃಪಾಸಿನ್ಧುರ್ಭಾಗೀರಥವಿನತಭಾವೋಗ್ರತಪಸಾ

ದ್ರುತಾಯಾತಾ ಗಙ್ಗಾ ನನು ಸಕರುಣಂ ಮಾತೃಹೃದಯಮ್ ||  ೧೪ ||

ಮುರಾರೇಃ ಪಾದಾಬ್ಜಸ್ಸ್ರುತಪರಮಮಾರನ್ದಮಮಲಂ

ದ್ರುತಂ ವ್ಯೋಮ್ನೋ ವೇಗಾನ್ಮಧುಮಥನಪಾದೋದಕಮಿತಿ |

ದಧೌ ಮೂರ್ಧ್ನಾ ಶರ್ವೋ ವಿಲುಲಿತಜಟಾಜೂಟಚಷಕೇ

ತತೋ ಲೋಕೇ ಖ್ಯಾತಸ್ತ್ರಿದಶನದಿ ಗಙ್ಗಾಧರ ಇತಿ ||  ೧೫ ||

ಪತನ್ತೀ ಪಾತಿತ್ಯಂ ಕ್ಷಪಯಿತುಮಹೋ ಗಾಞ್ಚ ಗಗನಾ-

ದ್ಗತಾ ಗಙ್ಗೇತ್ಯೇವಂ ಜನನಿ ಭುವನೇ ಖ್ಯಾತಿಮಗಮಃ |

ತತಃ ಪೀತ್ವೋನ್ಮುಕ್ತಾ ಪರಮಯಮಿನಾ ಜಹ್ನುಮುನಿನಾ

ಅತಸ್ತ್ವಾಂ ವೈ ಪ್ರಾಹುರ್ವಿಬುಧನಿಕರಾ ಜಹ್ನುತನಯಾಮ್ ||  ೧೬ ||

ಸುಧಾಧಾರಾ ಧಾರಾಹತಭವವಿಕಾರಾ ಪ್ರತಿಪೃಷ-

ದ್ವಹನ್ತೀ ರಾಜನ್ತೀ ರಜತಸುಮಮಾಲೇವ ಧರಣೇಃ |

ಸುವತ್ಸೇ ಶ್ರೀವತ್ಸಾಮ್ಬುಜಚರಣಸೌನ್ದರ್ಯಸುಷಮಾ

ಜಯತ್ಯೇಷಾ ಗಙ್ಗಾ ತರಲಿತತರಙ್ಗಾ ತ್ರಿಪಥಗಾ ||  ೧೭ ||

ಕ್ವಚಿದ್ವಿಷ್ಣೋಃ ಪಾರ್ಶ್ವೇ ಕೃತಕಮನಕನ್ಯಾವಪುರಹೋ

ಕ್ವಚಿದ್ಧಾತುಃ ಪಾತ್ರೇ ಗುಣಗರಿಮಸರ್ವಸ್ವಮಮಲಮ್ |

ಕ್ವಚಿತ್ಕಾನ್ತಾ ಶಾನ್ತಾ ಪುರಹರಜಟಾಜೂಟಲಸಿತಾ

ವಿಧತ್ಸೇ ಸೌಭಾಗ್ಯಂ ತ್ರಿಷು ತ್ರಿವಿಧರೂಪಾ ತ್ರಿಪಥಗೇ ||  ೧೮ ||

ದ್ರವನ್ತೀ ತ್ವಂ ವೇಗಾದಭಿಜಲನಿಧಿಂ ಗೋಮುಖತಲಾ-

ತ್ಸಹಸ್ರೈರ್ಧಾರಾಣಾಂ ನಿಹತಶತಶೈಲೇನ್ದ್ರಶಿಖರಾ |

ಸಮುದ್ಧರ್ತುಂ ಮಾತರ್ನಿರಯಪತಿತಾನ್ ರಾಜತನಯಾನ್

ಸ್ವವತ್ಸಾನ್ ವಾತ್ಸಲ್ಯಾತ್ ಕಿಲ ಗವಸಿ ಗೌರೀಸಹಚರೀ ||  ೧೯ ||

ಪ್ರಯಾತಾ ಶೈಲೇನ್ದ್ರಾದ್ವಿಮಲಿತಹರಿದ್ವಾರಧರಣೀ

ಪ್ರಯಾಗೇ ಸದ್ರಾಗೇ ಸಮಗತಮುದಾ ಸೂರ್ಯಸುತಯಾ |

ತತೋಽಕಾರ್ಷೀಃ ಕಾಶೀಂ ಸುಕೃತಸುಖರಾಶಿಂ ಸ್ವಪಯಸಾ

ಮಹೀಯಾಂಸಂ ಮಾತಸ್ತವ ಚ ಮಹಿಮಾ ಕಂ ನ ಕುರುತೇ ||  ೨೦ ||

ಮಹಾಪಾಪಾಸ್ತಾಪಾಪಹತಮನಸೋ ಮನ್ದಮತಯಃ

ಕ್ಷಪಾಟಾ ವಾಚಾಟಾಃ ಪತಿತಪತಿತಾ ಮೋಹಮಲಿನಾಃ |

ತ್ವಯಿ ಸ್ನಾತ್ವಾ ಶುದ್ಧಾ ವಿಮಲವಪುಷೋ ವಿಷ್ಣುಸದನಂ

ವ್ರಜನ್ತ್ಯೇತೇಽಗಮ್ಯೋಽಮರನದಿ ತವ ಸ್ನಾನಮಹಿಮಾ ||  ೨೧ ||

ರಟನ್ತಃ ಸಾಮ್ರೇಡಂ ಹರಹರಹರೇತಿಧ್ವನಿಮಹೋ

ಕಟನ್ತಃ ಕಾರುಣ್ಯಂ ಕ್ಷಪಿತನಿಜಭಕ್ತಾಘನಿಕರಾಃ |

ವಟನ್ತೋ ವಾತ್ಸಲ್ಯಂ ತುಲಿತರಘುನಾಥೈಕಯಶಸೋ

ಜಯನ್ತ್ಯೇತೇ ಗಾಙ್ಗಾ ದಿಶಿ ದಿಶಿ ತರಙ್ಗಾಸ್ತರಲಿತಾಃ ||  ೨೨ ||

ವಸನ್ಗಙ್ಗಾತೀರೇ ಕೃತತೃಣಕುಟೀರೇ ಪ್ರತಿದಿನಂ

ನಿಮಜ್ಜಂಸ್ತ್ವತ್ತೀರೇ ಶಿಶಿರಿತಸಮೀರೇಽಮೃತಜಲಮ್ |

ಮುದಾಚಾಮನ್ಸೀತಾಪತಿಪದಸರೋಜಾರ್ಚನಪರೋ

ಯಮಾದ್ರಾಮಾನನ್ದಃ ಕಥಮುಪರಿ ಭೀತೋ ಭುವಿ ಭವೇತ್ ||  ೨೩ ||

ತವಾದ್ಭಿಃ ಸ್ಯಾಂ ವಿಷ್ಣುರ್ನಹಿ ನಹಿ ತದಾ ಸ್ಯಾನ್ಮಮ ಪದೇ

ಅಥೋ ಶಮ್ಭುಶ್ಚೇನ್ನೋ ಶಿವಸಮತಯಾ ಸ್ಯಾಮಹಮಘೀ |

ಅತೋ ಯಾಚೇ ಭಾಗೀರಥಿ ಪುನರಹಂ ದೇವಿ ಭವತೀಂ

ವಸನ್ ತ್ವತ್ತೀರೇಷು ಸ್ವಮನಸಿ ಭಜೇಯಂ ರಘುಪತಿಮ್ ||  ೨೪ ||

ಕದಾ ಗಙ್ಗಾತೀರೇ ಮಲಯಜಸಮೀರೇ ಕಿಲ ವಸನ್

ಸ್ಮರನ್ಸೀತಾರಾಮೌ ಪುಲಕಿತತನುಃ ಸಾಶ್ರುನಯನಃ |

ಅಯೇ ಮಾತರ್ಗಙ್ಗೇ ರಘುಪತಿಪದಾಮ್ಭೋರುಹರತಿಂ

ಪ್ರದೇಹೀತ್ಯಾಯಾಚೇ ನನು ನಿಮಿಷಮೇಷ್ಯಾಮಿ ಸಸುಖಮ್ ||  ೨೫ ||

ವಿಶೇಷ್ಯಂ ಸೋದ್ದೇಶ್ಯಂ ಯದನಘಮನನ್ತಂ ಚಿದಚಿದೋ

ವಿಶಿಷ್ಟಂ ಯತ್ತಾಭ್ಯಾಂ ಶ್ರುತಿಗಣಗಿರಾ ಗೀತಚರಿತಮ್ |

ಯದದ್ವೈತಂ ಬ್ರಹ್ಮ ಪ್ರಥಿತಮಥ ಯದ್ವ್ಯಾಪಕಮಿದಂ

ಸದೇತತ್ತತ್ತತ್ತ್ವಂ ತ್ವಮಸಿ ಕಿಲ ಗಙ್ಗೇ ಭಗವತಿ ||  ೨೬ ||

ತ್ವಮಗ್ನಿಸ್ತ್ವಂ ವಾಯುಸ್ತ್ವಮಸಿ ರವಿಚನ್ದ್ರೌ ತ್ವಮಸಿ ಭೂ-

ಸ್ತ್ವಮಾಪಸ್ತ್ವಂ ವ್ಯೋಮ ತ್ವಮಸಿ ಶುಚಿಬುದ್ಧಿಸ್ತ್ವಮು ಮನಃ |

ತ್ವಮಾತ್ಮಾ ತ್ವಂ ಚಿತ್ತಂ ತ್ವಮಸಿ ಮಮ ಗೌಸ್ತ್ವಂ ಕಿಲ ಪರ-

ಸ್ತ್ವಮೇತತ್ಸರ್ವಂ ಮೇ ಭಗವತಿ ಸತತ್ತ್ವಂ ಜಗದಹೋ ||  ೨೭ ||

ವಿಲೋಲತ್ಕಲ್ಲೋಲಾಂ ಹೃತಕುಮತಿದೋಲಾಂ ಶುಚಿಪಯಃ

ಪವಿತ್ರತ್ಪಾತಾಲಾಂ ಕ್ಷಪಿತಜನಕಾಲಾಂ ಕಲಜಲಾಮ್ |

ದ್ರವಬ್ರಹ್ಮೀಭೂತಾಂ ಸಗರಸುತಸಂಸಾರತರಣೀಂ

ನಮಾಮಿ ತ್ವಾಂ ಗಙ್ಗಾಂ ತರಲಿತತರಙ್ಗಾಂ ಸ್ವಜನನೀಮ್ ||  ೨೮ ||

ನಮೋ ಧರ್ಮಿಷ್ಠಾಯೈ ನಿರುಪಮಮಹಿಮ್ನೇಽಸ್ತು ಚ ನಮೋ

ನಮೋ ನರ್ಮಿಷ್ಠಾಯೈ ನರಪತಿನರಿಮ್ಣೇಽಸ್ತು ಚ ನಮಃ |

ನಮೋ ನೇದಿಷ್ಠಾಯೈ ಲಘುಮತಿಲಘಿಮ್ನೇಽಸ್ತು ಚ ನಮೋ

ನಮಸ್ತೇ ಗಙ್ಗಾಯೈ ಗಿರಿಗತಿಗರಿಮ್ಣೇಽಸ್ತು ಚ ನಮಃ ||  ೨೯ ||

ವಿಬುಧಸರಿತೇ ನಿತ್ಯಖ್ಯಾತ್ಯೈ ನಮೋಽಸ್ತು ನಮೋಽಸ್ತು ತೇ

ವಿಮಲರಜಸೇ ವೇದಸ್ತುತ್ಯೈ ನಮೋಽಸ್ತು ನಮೋಽಸ್ತು ತೇ |

ಧವಲಮಹಸೇ ವಿದ್ಯಾಭೂತ್ಯೈ ನಮೋಽಸ್ತು ನಮೋಽಸ್ತು ತೇ

ಅಮೃತಪಯಸೇ ಗಙ್ಗಾದೇವ್ಯೈ ನಮೋಽಸ್ತು ನಮೋಽಸ್ತು ತೇ ||   ೩೦ ||

ಕ್ವ ಚ ಕಲಿಮಲಲೀನಾ ಪಾಪಪೀನಾ ಮತಿರ್ಮೇ

ಕ್ವ ಚ ಪರಮಪವಿತ್ರಂ ಜಾಹ್ನವೀಸಚ್ಚರಿತ್ರಮ್ |

ತ್ವದನು ಚರಿತಭಕ್ತಿಃ ಪ್ರೈರಯನ್ಮಾಂ ಹಿ ರಾತುಂ

ಜನನಿ ತವ ಪದಾಬ್ಜೇ ಪದ್ಯಪುಷ್ಪೋಪಹಾರಮ್ ||  ೩೧ ||

ಹರಿಚರಣಸರೋಜಸ್ಯನ್ದಭೂತಾಞ್ಚ ಭೂಯಃ

ಶ್ರಿತವಿಧಿಜಲಪಾತ್ರಾಂ ಚನ್ದ್ರಚೂಡಾರ್ಯಮೌಲಿಮ್ |

ನೃಪರತಿರಥ ಭೂಮೌ ದರ್ಶಮಾಯಾಸ ಗಙ್ಗಾ-

ಮನುಯುಗಮಿಹ ಯತ್ನೋ ಭಾತಿ ಭಾಗೀರಥೋಽಯಮ್ ||  ೩೨ ||

ವನ್ದೇ ಭಗೀರಥಂ ಭೂಪಂ ಭಗ್ನಸಂಸಾರಕೂಪಕಮ್ |

ಯಶ್ಚಾನಿನಾಯ ಗಙ್ಗಾಖ್ಯಂ ವಸುಧಾಯಾಂ ಸುಧಾರಸಮ್ ||  ೩೩ ||

ಗಙ್ಗಾಸ್ನಾನಾತ್ಪರಂ ಸ್ನಾನಂ ನಾಸ್ತಿ ನಾಸ್ತೀಹ ಭೂತಲೇ |

ನಾಸ್ತಿ ಕಾಪಿ ಸ್ತುತಿರ್ಗಙ್ಗಾಮಹಿಮ್ನಸ್ತೋತ್ರತಃ ಪರಾ ||  ೩೪ ||

ಯಃ ಪಠೇಚ್ಛೃಣುಯಾದ್ವಾಪಿ ಗಙ್ಗಾಗ್ರೇ ಶ್ರದ್ಧಯಾನ್ವಿತಃ |

ಸರ್ವಪಾಪೈರ್ವಿನಿರ್ಮುಕ್ತೋ ವ್ರಜೇದ್ವಿಷ್ಣೋಃ ಪರಂ ಪದಮ್ ||  ೩೫ ||

ಷಡರ್ಣಾನ್ನ ಪರೋ ಮನ್ತ್ರೋ ಮಹಿಮ್ನೋ ನ ಪರಾ ಸ್ತುತಿಃ |

ಶ್ರೀರಾಮಾನ್ನ ಪರೋ ದೇವೋ ಗಙ್ಗಾಯಾ ನ ಪರಾ ನದೀ ||  ೩೬ ||

ಶ್ರೀರಾಮಚನ್ದ್ರಗುಣಗಾಯಕರಾಮಭದ್ರಾ-

ಚಾರ್ಯೇಣ ದೇವಗಿರಿ ಗೀತಮನುಸ್ಮರೇದ್ಯಃ |

ಸ್ತೋತ್ರಂ ಸುಭಕ್ತಿಕಲಿತಸ್ತನುತಾಂ ಪ್ರಸನ್ನಾ

ಗಙ್ಗಾಮಹಿಮ್ನಮಿತಿ ತಸ್ಯ ಸುಖಾನಿ ಗಙ್ಗಾ ||  ೩೭ ||