ಶಿವಮಙ್ಗಲಾಷ್ಟಕಮ್

ಶಿವಮಙ್ಗಲಾಷ್ಟಕಮ್

 

ಭವಾಯ ಚನ್ದ್ರಚೂಡಾಯ ನಿರ್ಗುಣಾಯ ಗುಣಾತ್ಮನೇ |

ಕಾಲಕಾಲಾಯ ರುದ್ರಾಯ ನೀಲಗ್ರೀವಾಯ ಮಙ್ಗಲಮ್ || ೧ ||

ವೃಷಾರೂಢಾಯ ಭೀಮಾಯ ವ್ಯಾಘ್ರಚರ್ಮಾಮ್ಬರಾಯ ಚ |

ಪಶೂನಾಂ ಪತಯೇ ತುಭ್ಯಂ ಗೌರೀಕಾನ್ತಾಯ ಮಙ್ಗಲಮ್ || ೨ ||

ಭಸ್ಮೋದ್ಧೂಲಿತದೇಹಾಯ ವ್ಯಾಲಯಜ್ಞೋಪವೀತಿನೇ |

ರುದ್ರಾಕ್ಷಮಾಲಾಭೂಷಾಯ ವ್ಯೋಮಕೇಶಾಯ ಮಙ್ಗಲಮ್ || ೩ ||

ಸೂರ್ಯಚನ್ದ್ರಾಗ್ನಿನೇತ್ರಾಯ ನಮಃ ಕೈಲಾಸವಾಸಿನೇ |

ಸಚ್ಚಿದಾನನ್ದರೂಪಾಯ ಪ್ರಮಥೇಶಾಯ ಮಙ್ಗಲಮ್ || ೪ ||

ಮೃತ್ಯುಂಜಯಾಯ ಸಾಂಬಾಯ ಸೃಷ್ಟಿಸ್ಥಿತ್ಯನ್ತಕಾರಿಣೇ |

ತ್ರ್ಯಂಬಕಾಯ ಸುಶಾನ್ತಾಯ ತ್ರಿಲೋಕೇಶಾಯ ಮಙ್ಗಲಮ್ || ೫ ||

ಗಂಗಾಧರಾಯ ಸೋಮಾಯ ನಮೋ ಹರಿಹರಾತ್ಮನೇ |

ಉಗ್ರಾಯ ತ್ರಿಪುರಘ್ನಾಯ ವಾಮದೇವಾಯ ಮಙ್ಗಲಮ್ || ೬ ||

ಸದ್ಯೋಜಾತಾಯ ಶರ್ವಾಯ ದಿವ್ಯಜ್ಞಾನಪ್ರದಾಯಿನೇ |

ಈಶಾನಾಯ ನಮಸ್ತುಭ್ಯಂ ಪಞ್ಚವಕ್ತ್ರಾಯ ಮಙ್ಗಲಮ್ || ೭ ||

ಸದಾಶಿವಸ್ವರೂಪಾಯ ನಮಸ್ತತ್ಪುರುಷಾಯ ಚ |

ಅಘೋರಾಯ ಚ ಘೋರಾಯ ಮಹಾದೇವಾಯ ಮಙ್ಗಲಮ್ || ೮ ||

ಮಙ್ಗಲಾಷ್ಟಕಮೇತದ್ವೈ ಶಂಭೋರ್ಯಃ ಕೀರ್ತಯೇದ್ದಿನೇ |

ತಸ್ಯ ಮೃತ್ಯುಭಯಂ ನಾಸ್ತಿ ರೋಗಪೀಡಾಭಯಂ ತಥಾ || ೯ ||