ದಶಾವತಾರಸ್ತೋತ್ರಮ್

 ದಶಾವತಾರಸ್ತೋತ್ರಮ್

(ಜಯದೇವಕೃತಂ, ಅಷ್ಟಪದೀ ಅನ್ತರ್ಗತಮ್)

ಪ್ರಲಯಪಯೋಧಿಜಲೇ  ಧೃತವಾನಸಿ ವೇದಮ್

ವಿಹಿತವಹಿತ್ರಚರಿತ್ರಮಖೇದಮ್ |

ಕೇಶವ ಧೃತಮೀನಶರೀರ

ಜಯ ಜಗದೀಶ ಹರೇ || ೧ ||

   

ಕ್ಷಿತಿರತಿವಿಪುಲತರೇ ತವ ತಿಷ್ಠತಿ ಪೃಷ್ಠೇ

ಧರಣಿಧರಣಕಿಣಚಕ್ರಗರಿಷ್ಠೇ |

ಕೇಶವ ಧೃತಕಚ್ಛಪರೂಪ

ಜಯ ಜಗದೀಶ ಹರೇ || ೨ ||

ವಸತಿ ದಶನಶಿಖರೇ ಧರಣೀ ತವ ಲಗ್ನಾ

ಶಶಿನಿ ಕಲಙ್ಕಕಲೇವ ನಿಮಗ್ನಾ |

ಕೇಶವ ಧೃತಸೂಕರರೂಪ

ಜಯ ಜಗದೀಶ ಹರೇ || ೩ ||

ತವ ಕರಕಮಲವರೇ ನಖಮದ್ಭುತಶೃಙ್ಗಮ್

ದಲಿತಹಿರಣ್ಯಕಶಿಪುತನುಭೃಙ್ಗಮ್ |

ಕೇಶವ ಧೃತನರಹರಿರೂಪ

ಜಯ ಜಗದೀಶ ಹರೇ || ೪ ||

   

ಛಲಯಸಿ ವಿಕ್ರಮಣೇ ಬಲಿಮದ್ಭುತವಾಮನ

ಪದನಖನೀರಜನಿತ ಜನಪಾವನ |

ಕೇಶವ ಧೃತವಾಮನರೂಪ

ಜಯ ಜಗದೀಶ ಹರೇ || ೫ ||

ಕ್ಷತ್ರಿಯರುಧಿರಮಯೇ ಜಗದಪಗತಪಾಪಮ್

ಸ್ನಪಯಸಿಪಯಸಿ ಶಮಿತಭವತಾಪಮ್ |

ಕೇಶವ ಧೃತಭೃಗುಪತಿರೂಪ

ಜಯ ಜಗದೀಶ ಹರೇ || ೬ ||

   

ವಿತರಸಿ ದಿಕ್ಷು ರಣೇ ದಿಕ್ಪತಿಕಮನೀಯಮ್

ದಶಮುಖಮೌಲಿಬಲಿಂ ರಮಣೀಯಮ್ |

ಕೇಶವ ಧೃತರಘುಪತಿವೇಷ

ಜಯ ಜಗದೀಶ ಹರೇ || ೭ ||

   

ವಹಸಿ ವಪುಷಿ ವಿಶದೇ ವಸನಂ ಜಲದಾಭಮ್

ಹಲಹತಿಭೀತಿಮಿಲಿತಯಮುನಾಭಮ್ |

ಕೇಶವ ಧೃತಹಲಧರರೂಪ

ಜಯ ಜಗದೀಶ ಹರೇ || ೮ ||

   

ನಿನ್ದಸಿ ಯಜ್ಞವಿಧೇರಹಹ ಶ್ರುತಿಜಾತಮ್

ಸದಯಹೃದಯ ದರ್ಶಿತಪಶುಘಾತಮ್ |

ಕೇಶವ ಧೃತಬುದ್ಧಶರೀರ

ಜಯ ಜಗದೀಶ ಹರೇ || ೯ ||

ಮ್ಲೇಚ್ಛನಿವಹನಿಧನೇ ಕಲಯಸಿ ಕರವಾಲಮ್

ಧೂಮಕೇತುಮಿವ ಕಿಮಪಿ ಕರಾಲಮ್ |

ಕೇಶವ ಧೃತಕಲ್ಕಿಶರೀರ

ಜಯ ಜಗದೀಶ ಹರೇ || ೧೦ ||

ಶ್ರೀಜಯದೇವಕವೇರಿದಮುದಿತಮುದಾರಮ್

ಶೃಣು ಸುಖದಂ ಶುಭದಂ ಭವಸಾರಮ್ |

ಕೇಶವ ಧೃತದಶವಿಧರೂಪ

ಜಯ ಜಗದೀಶ ಹರೇ || ೧೧ ||

ವೇದಾನುದ್ಧರತೇ ಜಗನ್ನಿವಹತೇ ಭೂಗೋಲಮುದ್ಬಿಭ್ರತೇ

ದೈತ್ಯಂ ದಾರಯತೇ ಬಲಿಂ ಛಲಯತೇ ಕ್ಷತ್ರಕ್ಷಯಂ ಕುರ್ವತೇ |

ಪೌಲಸ್ತ್ಯಂ ಜಯತೇ ಹಲಂ ಕುಲಯತೇ ಕಾರುಣ್ಯಮಾತನ್ವತೇ

ಮ್ಲೇಚ್ಛಾನ್ ಮೂರ್ಚ್ಛಯತೇ ದಶಾಕೃತಿಕೃತೇ ಕೃಷ್ಣಾಯ ತುಭ್ಯಂ ನಮಃ || ೧೨ ||