ವೇದಸಾರಶಿವಸ್ತೋತ್ರಮ್

ವೇದಸಾರಶಿವಸ್ತೋತ್ರಮ್

      (ಶ್ರೀ ಶಂಕರಾಚಾರ್ಯಕೃತಮ್)

ಪಶೂನಾಂಪತಿಂ ಪಾಪನಾಶಂ ಪರೇಶಂ

ಗಜೇನ್ದ್ರಸ್ಯಕೃತ್ತಿಂ ವಸಾನಂ ವರೇಣ್ಯಮ್ |

ಜಟಾಜೂಟಮಧ್ಯೇ ಸ್ಫುರದ್ಗಾಙ್ಗವಾರಿಂ

ಮಹಾದೇವಮೇಕಂ ಸ್ಮರಾಮಿ ಸ್ಮರಾಮಿ || ೧ ||

ಮಹೇಶಂ ಸುರೇಶಂ ಸುರಾರಾತಿನಾಶಂ

ವಿಭುಂ ವಿಶ್ವನಾಥಂ ವಿಭೂತ್ಯಙ್ಗಭೂಷಮ್ |

ವಿರೂಪಾಕ್ಷಮಿನ್ದ್ವರ್ಕವಹ್ನಿತ್ರಿನೇತಂ

ಸದಾನನ್ದಮೀಡೇ ಪ್ರಭುಂ ಪಞ್ಚವಕ್ತ್ರಮ್ || ೨ ||

 ಗಿರೀಶಂ ಗಣೇಶಂ ಗಲೇ ನೀಲವರ್ಣಂ

ಗವೇನ್ದ್ರಾಧಿರೂಢಂ ಗುಣಾತೀತರೂಪಮ್ |

ಭವಂ ಭಾಸ್ವರಂ ಭಸ್ಮನಾ ಭೂಷಿತಾಂಗಂ

ಭವಾನೀಕಲತ್ರಂ ಭಜೇ ಪಞ್ಚವಕ್ತ್ರಮ್ || ೩ ||

ಶಿವಾಕಾನ್ತ ಶಂಭೋ ಶಶಾಙ್ಕಾರ್ಧಮೌಲೇ

ಮಹೇಶಾನ ಶೂಲಿನ್ ಜಟಾಜೂಟಧಾರಿನ್ |

ತ್ವಮೇಕೋ ಜಗದ್ವ್ಯಾಪಕೋ ವಿಶ್ವರೂಪಃ

ಪ್ರಸೀದ ಪ್ರಸೀದ ಪ್ರಭೋ ಪೂರ್ಣರೂಪ || ೪ ||

ಪರಾತ್ಮಾನಮೇಕಂ ಜಗದ್ಬೀಜಮಾದ್ಯಂ

ನಿರೀಹಂ ನಿರಾಕಾರಮೋಙ್ಕಾರವೇದ್ಯಮ್ |

ಯತೋ ಜಾಯತೇ ಪಾಲ್ಯತೇ ಯೇನ ವಿಶ್ವಂ

ತಮೀಶಂ ಭಜೇ ಲೀಯತೇ ಯತ್ರ ವಿಶ್ವಮ್ || ೫ ||

ನ ಭೂಮಿರ್ನ ಚಾಪೋ ನ ವಹ್ನಿರ್ನ ವಾಯು:

ನ ಚಾಕಾಶಮಾಸ್ತೇ ನ ತನ್ದ್ರಾ ನ ನಿದ್ರಾ |

ನ ಚೋಷ್ಣಂ ನ ಶೀತಂ ನ ದೇಶೋ ನ ವೇಷೋ

ನ ಯಸ್ಯಾಸ್ತಿಮೂರ್ತಿಃ ತ್ರಿಮೂರ್ತಿಂ ತಮೀಡೇ || ೬ ||

ಅಜಂ ಶಾಶ್ವತಂ ಕಾರಣಂ ಕಾರಣಾನಾಂ

ಶಿವಂ ಕೇವಲಂ ಭಾಸಕಂ ಭಾಸಕಾನಾಮ್ |

ತುರೀಯಂ ತಮಃಪಾರಮಾದ್ಯನ್ತಹೀನಂ

ಪ್ರಪದ್ಯೇ ಪರಂ ಪಾವನಂ ದ್ವೈತಹೀನಮ್ || ೭ ||

ನಮಸ್ತೇ ನಮಸ್ತೇ ವಿಭೋ ವಿಶ್ವಮೂರ್ತೇ

ನಮಸ್ತೇ ನಮಸ್ತೇ ಚಿದಾನನ್ದಮೂರ್ತೇ |

ನಮಸ್ತೇ ನಮಸ್ತೇ ತಪೋಯೋಗಗಮ್ಯ

ನಮಸ್ತೇನಮಸ್ತೇ ಶ್ರುತಿಜ್ಞಾನಗಮ್ಯ || ೮ ||

ಪ್ರಭೋ ಶೂಲಪಾಣೇ ವಿಭೋ ವಿಶ್ವನಾಥ

ಮಹಾದೇವ ಶಂಭೋ ಮಹೇಶ ತ್ರಿನೇತ್ರ |

ಶಿವಾಕಾನ್ತ ಶಾನ್ತ ಸ್ಮರಾರೇ ಪುರಾರೇ

ತ್ವದನ್ಯೋ ವರೇಣ್ಯೋ ನ ಮಾನ್ಯೋ ನ ಗಣ್ಯಃ || ೯ ||

ಶಮ್ಭೋ ಮಹೇಶ ಕರುಣಾಮಯ ಶೂಲಪಾಣೇ

ಗೌರೀಪತೇ ಪಶುಪತೇ ಪಶುಪಾಶನಾಶಿನ್ |

ಕಾಶೀಪತೇ ಕರುಣಯಾ ಜಗದೇತದೇಕ-

ಸ್ತ್ವಂ ಹಂಸಿ ಪಾಸಿ ವಿದಧಾಸಿ ಮಹೇಶ್ವರೋಽಸಿ || ೧೦ ||

ತ್ವತ್ತೋ ಜಗತ್ ಭವತಿ ದೇವ ಭವ ಸ್ಮರಾರೇ

ತ್ವಯ್ಯೇವ ತಿಷ್ಠತಿ ಜಗನ್ಮೃಡ ವಿಶ್ವನಾಥ |

ತ್ವಯ್ಯೇವ ಗಚ್ಛತಿ ಲಯಂ ಜಗದೇತದೀಶ

ಲಿಙ್ಗಾತ್ಮಕೇ ಹರ ಚರಾಚರವಿಶ್ವರೂಪಿನ್ || ೧೧ ||