ಶ್ರೀದತ್ತ ಅಪರಾಧಕ್ಷಮಾಪಣಸ್ತೋತ್ರಮ್

ಶ್ರೀದತ್ತ ಅಪರಾಧಕ್ಷಮಾಪಣಸ್ತೋತ್ರಮ್

ದತ್ತಾತ್ರೇಯಂ ತ್ವಾಂ ನಮಾಮಿ ಪ್ರಸೀದ

ತ್ವಂ ಸರ್ವಾತ್ಮಾ ಸರ್ವಕರ್ತಾ ನ ವೇದ|

ಕೋಽಪ್ಯನ್ತಂ ತೇ ಸರ್ವದೇವಾಧಿದೇವ

ಜ್ಞಾತಾಜ್ಞಾತಾನ್ ಮೇಽಪರಾಧಾನ್ ಕ್ಷಮಸ್ವ ||೧||

ತ್ವದುದ್ಭವತ್ವಾತ್ ತ್ವದಧೀನವತ್ವಾತ್

ತ್ವಮೇವ ಮೇ ವನ್ದ್ಯ ಉಪಾಸ್ಯ ಆತ್ಮನ್|

ಅಥಾಪಿ ಮೌಢ್ಯಾತ್ ಸ್ಮರಣಂ ನ ತೇ ಮೇ

ಕೃತಂ ಕ್ಷಮಸ್ವ ಪ್ರಿಯಕೃನ್ಮಹಾತ್ಮನ್ ||೨||

ಭೋಗಾಪವರ್ಗಪ್ರದಮಾತ್ಮಬನ್ಧುಂ

ಕಾರುಣ್ಯಸಿನ್ಧುಂ ಪರಿಹಾಯ ಬನ್ಧುಮ್ |

ಹಿತಾಯ ಚಾನ್ಯಂ ಪರಿಮಾರ್ಗಯನ್ತಿ

ಹಾ ಮಾದೃಶೋ ನಷ್ಟದೃಶೋ ವಿಮೂಢಾಃ ||೩||

ನ ಮತ್ಸಮೋ ಯದ್ಯಪಿ ಪಾಪಕರ್ತಾ

ನ ತ್ವತ್ಸಮೋಽಥಾಪಿ ಹಿ ಪಾಪಹರ್ತಾ|

ನ ಮತ್ಸಮೋಽನ್ಯೋ ದಯನೀಯ ಆರ್ಯ

ನ ತ್ವತ್ಸಮಃ ಕ್ವಾಪಿ ದಯಾಲುವರ್ಯಃ ||೪||

ಅನಾಥನಾಥೋಽಸಿ ಸುದೀನಬನ್ಧೋ

ಶ್ರೀಶಾನುಕಂಪಾಮೃತಪೂರ್ಣಸಿನ್ಧೋ

ತ್ವತ್ ಪಾದಭಕ್ತಿಂ ತವ ದಾಸದಾಸ್ಯಂ

ತ್ವದೀಯಮನ್ತ್ರಾರ್ಥದೃಢೈಕನಿಷ್ಠಾಮ್ ||೫||

ಗುರುಸ್ಮೃತಿಂ ನಿರ್ಮಲಬುದ್ಧಿಮಾಧಿ-

ವ್ಯಾಧಿಕ್ಷಯಂ ಮೇ ವಿಜಯಂ ಚ ದೇಹಿ|

ಇಷ್ಟಾರ್ಥಸಿದ್ಧಿಂ ವರಲೋಕವಶ್ಯಂ

ಧನಾನ್ನವೃದ್ಧಿಂ ವರಗೋಸಮೃದ್ಧಿಮ್ ||೬||

ಪುತ್ರಾದಿಲಬ್ಧಿಂ ಮ ಉದಾರತಾಂ ಚ

ದೇಹೀಶ ಮೇ ಚಾಸ್ತ್ವಭಯಂ ಚ ಸರ್ವತಃ|

ಬ್ರಹ್ಮಾಗ್ನಿಭೂಭ್ಯೋ ನಮ ಔಷಧೀಭ್ಯಃ

ವಾಚೇ ನಮೋ ವಾಕ್ಪತಯೇ ಚ ವಿಷ್ಣವೇ||೭||

ಶಾನ್ತಾಽಸ್ತು ಭೂರ್ನಶ್ಶಿವಮನ್ತರಿಕ್ಷಂ

ದ್ಯೌಶ್ಚಾಭಯಂ ನೋಽಸ್ತು ದಿಶಃ ಶಿವಾಯ|

ಆಪಶ್ಚ ವಿದ್ಯುತ್ ಪರಿಪಾನ್ತು ದೇವಾಃ

ಶಂ ಸರ್ವತೋ ಮೇಽಭಯಮಸ್ತು ಶಾನ್ತಿಃ ||೮||