ಶ್ರೀ ಚಿದಂಬರೇಶ್ವರಸ್ತೋತ್ರಮ್

ಶ್ರೀ ಚಿದಂಬರೇಶ್ವರಸ್ತೋತ್ರಮ್

ಕೃಪಾಸಮುದ್ರಂ ಸುಮುಖಂ ತ್ರಿನೇತ್ರಂ

ಜಟಾಧರಂ ಪಾರ್ವತೀ ವಾಮಭಾಗಮ್ |

ಸದಾಶಿವಂ ರುದ್ರಮನನ್ತರೂಪಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧ ||

ವಾಚಾಮತೀತಂ ಫಣಿಭೂಷಣಾಂಗಂ

ಗಣೇಶತಾತಂ ಧನದಸ್ಯ ಮಿತ್ರಮ್ |

ಕನ್ದರ್ಪನಾಶಂ ಕಮಲೋತ್ಪಲಾಕ್ಷಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೨ ||

ರಮೇಶವನ್ದ್ಯಂ ರಜತಾದ್ರಿನಾಥಂ

ಶ್ರೀವಾಮದೇವಂ ಭವದುಃಖನಾಶಮ್ |

ರಕ್ಷಾಕರಂ ರಾಕ್ಷಸಪೀಡಿತಾನಾಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೩ ||

ದೇವಾದಿದೇವಂ ಜಗದೇಕನಾಥಂ

ದೇವೇಶವನ್ದ್ಯಂ ಶಶಿಖಣ್ಡಚೂಡಮ್ |

ಗೌರೀಸಮೇತಂ ಕೃತವಿಘ್ನದಕ್ಷಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೪ ||

ವೇದಾನ್ತವೇದ್ಯಂ ಸುರವೈರಿವಿಘ್ನಂ

ಶುಭಪ್ರದಂ ಭಕ್ತಿಮದನ್ತರಾಣಾಮ್ |

ಕಾಲಾನ್ತಕಂ ಶ್ರೀಕರುಣಾಕಟಾಕ್ಷಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೫ ||

ಹೇಮಾದ್ರಿಚಾಪಂ ತ್ರಿಗುಣಾತ್ಮಭಾವಂ

ಗುಹಾತ್ಮಜಂ ವ್ಯಾಘ್ರಪುರೀಶಮಾದ್ಯಮ್ |

ಶ್ಮಶಾನವಾಸಂ ವೃಷವಾಹನಸ್ಥಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೬ ||

ಆದ್ಯನ್ತಶೂನ್ಯಂ ತ್ರಿಪುರಾರಿಮೀಶಂ

ನನ್ದೀಶಮುಖ್ಯಸ್ತುತವೈಭವಾಢ್ಯಮ್ |

ಸಮಸ್ತದೇವೈಃ ಪರಿಪೂಜಿತಾಙ್ಘ್ರಿಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೭ ||

ತಮೇವ ಭಾನ್ತಂ ಹ್ಯನುಭಾತಿ ಸರ್ವಂ

ಅನೇಕರೂಪಂ ಪರಮಾರ್ಥಮೇಕಮ್ |

ಪಿನಾಕಪಾಣಿಂ ಭವನಾಶಹೇತುಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೮ ||

ವಿಶ್ವೇಶ್ವರಂ ನಿತ್ಯಮನನ್ತಮಾದ್ಯಂ

ತ್ರಿಲೋಚನಂ ಚನ್ದ್ರಕಲಾವತಂಸಂ |

ಪತಿಂ ಪಶೂನಾಂ ಹೃದಿ ಸನ್ನಿವಿಷ್ಟಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೯ ||

ವಿಶ್ವಾಧಿಕಂ ವಿಷ್ಣುಮುಖೈರುಪಾಸ್ಯಂ

ತ್ರಿಲೋಚನಂ ಪಞ್ಚಮುಖಂ ಪ್ರಸನ್ನಮ್ |

ಉಮಾಪತಿಂ ಪಾಪಹರಂ ಪ್ರಶಾನ್ತಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೦ ||

ಕರ್ಪೂರಗಾತ್ರಂ ಕಮನೀಯನೇತ್ರಂ

ಕಂಸಾರಿಮಿತ್ರಂ ಕಮಲೇನ್ದುವಕ್ತ್ರಮ್ |

ಕನ್ದರ್ಪಗಾತ್ರಂ ಕಮಲೇಶಮಿತ್ರಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೧ ||

ವಿಶಾಲನೇತ್ರಂ ಪರಿಪೂರ್ಣಗಾತ್ರಂ

ಗೌರೀಕಲತ್ರಂ ಹರಿದಮ್ಬರೇಶಮ್ |

ಕುಬೇರಮಿತ್ರಂ ಜಗತಃ ಪವಿತ್ರಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೨ ||

ಕಲ್ಯಾಣಮೂರ್ತಿಂ ಕನಕಾದ್ರಿಚಾಪಂ

ಕಾನ್ತಾಸಮಾಕ್ರಾನ್ತನಿಜಾರ್ದ್ಧದೇಹಮ್ |

ಕಪರ್ದಿನಂ ಕಾಮರಿಪುಂ ಪುರಾರಿಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೩ ||

ಕಲ್ಪಾನ್ತಕಾಲಾಹಿತಚಣ್ಡನೃತ್ತಂ

ಸಮಸ್ತವೇದಾನ್ತವಚೋನಿಗೂಢಮ್ |

ಅಯುಗ್ಮನೇತ್ರಂ ಗಿರಿಜಾಸಹಾಯಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೪ ||

ದಿಗಂಬರಂ ಶಙ್ಖಸಿತಾಲ್ಪಹಾಸಂ

ಕಪಾಲಿನಂ ಶೂಲಿನಮಪ್ರಮೇಯಮ್ |

ನಗಾತ್ಮಜಾವಕ್ತ್ರಪಯೋಜಸೂರ್ಯಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೫ ||

ಸದಾಶಿವಂ ಸತ್ಪುರುಷೈರನೇಕೈಃ

ಸದಾರ್ಚಿತಂ ಸಾಮಶಿರಸ್ಸುಗೀತಮ್ |

ವೈಯ್ಯಾಘ್ರಚರ್ಮಾಂಬರಮುಗ್ರಮೀಶಂ

ಚಿದಮ್ಬರೇಶಂ ಹೃದಿ ಭಾವಯಾಮಿ || ೧೬ ||

ಚಿದಂಬರಸ್ಯ ಸ್ತವನಂ ಪಠೇದ್ಯಃ

ಪ್ರದೋಷಕಾಲೇಷು ಪುಮಾನ್ ಸ ಧನ್ಯಃ |

ಭೋಗಾನಶೇಷಾನನುಭೂಯ ಭೂಯಃ

ಸಾಯುಜ್ಯಮಪ್ಯೇತಿ ಚಿದಂಬರಸ್ಯ || ೧೭ ||