ಶ್ರೀ ಹರಿಶರಣಾಷ್ಟಕಮ್

 ಶ್ರೀ ಹರಿಶರಣಾಷ್ಟಕಮ್

      (ಶ್ರೀ ಬ್ರಹ್ಮಾನನ್ದವಿರಚಿತಮ್)

ಧ್ಯೇಯಂ ವದನ್ತಿ ಶಿವಮೇವಹಿ ಕೇಚಿದನ್ಯೇ

ಶಕ್ತಿಂ ಗಣೇಶಮಪರೇ ತು ದಿವಾಕರಂ ವೈ |

ರೂಪೈಸ್ತು ತೈರಪಿ ವಿಭಾಸಿ ಯತಸ್ತ್ವಮೇವ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೧ ||

ನೋ ಸೋದರೋ ನ ಜನಕೋ ಜನನೀ ನ ಜಾಯಾ

ನೈವಾತ್ಮಜೋ ನ ಚ ಕುಲಂ ವಿಪುಲಂ ಬಲಂ ವಾ |

ಸಂದೃಶ್ಯತೇ ನ ಕಿಲ ಕೋಽಪಿ ಸಹಾಯಕೋ ಮೇ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೨ ||

ನೋಪಾಸಿತಾ ಮದಮಪಾಸ್ಯ ಮಯಾ ಮಹಾನ್ತಃ

ತೀರ್ಥಾನಿ ಚಾಸ್ತಿಕಧಿಯಾ ನಹಿ ಸೇವಿತಾನಿ |

ದೇವಾರ್ಚನಂ ಚ ವಿಧಿವನ್ನಕೃತಂ ಕದಾಪಿ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೩ ||

ದುರ್ವಾಸನಾ ಮಮ ಸದಾ ಪರಿಕರ್ಷಯನ್ತಿ

ಚಿತ್ತಂ ಶರೀರಮಪಿ ರೋಗಗಣಾ ದಹನ್ತಿ |

ಸಞ್ಜೀವನಂ ಚ ಪರಹಸ್ತಗತಂ ಸದೈವ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೪ ||

ಪೂರ್ವಂ ಕೃತಾನಿ ದುರಿತಾನಿ ಮಯಾ ತು ಯಾನಿ

ಸ್ಮೃತ್ವಾಽಖಿಲಾನಿ ಹೃದಯಂ ಪರಿಕಂಪತೇ ಮೇ |

ಖ್ಯಾತಾ ಚ ತೇ ಪತಿತಪಾವನತಾ ತು ಯಸ್ಮಾತ್

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೫ ||

ದುಃಖಂ ಜರಾಮರಣಜಂ ವಿವಿಧಾಶ್ಚ ರೋಗಾಃ

ಕಾಕಶ್ವಸೂಕರಜನಿರ್ನಿರಯೇ ಚ ಪಾತಃ |

ತೇ ವಿಸ್ಮೃತೇರ್ಫಲಮಿದಂ ವಿತತಂ ಹಿ ಲೋಕೇ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೬ ||

ನೀಚೋಽಪಿ ಪಾಪವಲಿತೋಽಪಿ ವಿನಿನ್ದಿತೋಽಪಿ

ಬ್ರೂಯಾತ್ ತವಾಹಮಿತಿ ಯಸ್ತು ಕಿಲೈಕವಾರಮ್ |

ತಂ ನೇಷ್ಯಸೀಶ ನಿಜಲೋಕಮಿತಿ ವ್ರತಂ ತೇ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೭ ||

ವೇದೇಷು ಧರ್ಮವಚನೇಷು ತಥಾಗಮೇಷು

ರಮಾಯಣೇಽಪಿ ಚ ಪುರಾಣಕದಮ್ಬಕೇ ವಾ |

ಸರ್ವತ್ರ ಸರ್ವ ವಿಧಿನಾ ಗದಿತಸ್ತ್ವಮೇವ

ತಸ್ಮಾತ್ ತ್ವಮೇವ ಶರಣಂ ಮಮ ಶಙ್ಖಪಾಣೇ || ೮ ||

              ***