ಶಿವಸ್ತೋತ್ರಮ್ (ಕಲ್ಕಿಕೃತಮ್)

. ಶಿವಸ್ತೋತ್ರಮ್ (ಕಲ್ಕಿಕೃತಮ್)

ಗೌರೀನಾಥಂ ವಿಶ್ವನಾಥಂ ಶರಣ್ಯಂ

ಭೂತಾವಾಸಂ ವಾಸುಕೀಕಣ್ಠಭೂಷಮ್ |

ತ್ರ್ಯಕ್ಷಂ ಪಞ್ಚಾಸ್ಯಾದಿದೇವಂ ಪುರಾಣಂ

ವನ್ದೇ ಸಾನ್ದ್ರಾನನ್ದಸಂದೋಹದಕ್ಷಮ್ || ೧ ||

ಯೋಗಾಧೀಶಂ ಕಾಮನಾಶಂ ಕರಾಲಂ

ಗಙ್ಗಾಸಙ್ಗಕ್ಲಿನ್ನಮೂರ್ಧಾನಮೀಶಮ್ |

ಜಟಾಜೂಟಾಟೋಪರಿ ಕ್ಷಿಪ್ತಭಾವಂ

ಮಹಾಕಾಲಂ ಚನ್ದ್ರಫಾಲಂ ನಮಾಮಿ || ೨ ||

 

ಯೋ ಭೂತಾದಿಃ ಪಞ್ಚಭೂತೈಃ ಸಿಸೃಕ್ಷುಃ

ತನ್ಮಾತ್ರಾತ್ಮಾ ಕಾಲಕರ್ಮಸ್ವಭಾವೈಃ |

ಪ್ರಹೃತ್ಯೇದಂ ಪ್ರಾಪ್ಯ ಜೀವತ್ವಮೀಶೋ

ಬ್ರಹ್ಮಾನನ್ದೇ ಕ್ರೀಡತೇ ತಂ ನಮಾಮಿ || ೩ ||

ಸ್ಥಿತೌ ವಿಷ್ಣುಃ ಸರ್ವಜಿಷ್ಣುಃ ಸುರಾತ್ಮಾ

ಲೋಕಾನ್ ಸಾಧೂನ್ ಧರ್ಮಸೇತೂನ್ ಬಿಭರ್ತಿ |

ಬ್ರಹ್ಮಾದ್ಯಂಶೇ ಯೋಽಭಿಮಾನೀ ಗುಣಾತ್ಮಾ

ಶಬ್ದಾದ್ಯಙ್ಗೈಃ ತಂ ಪರೇಶಂ ನಮಾಮಿ || ೪ ||

ಯಸ್ಯಾಜ್ಞಯಾ ವಾಯವೋ ವಾನ್ತಿ ಲೋಕೇ

ಜ್ವಲತ್ಯಗ್ನಿಃ ಸವಿತಾ ಯಾತಿ ತಪ್ಯನ್ |

ಶೀತಾಂಶುಃ ಖೇ ತಾರಕಾಸಂಗ್ರಹಶ್ಚ

ಪ್ರವರ್ತನ್ತೇ ತಂ ಪರೇಶಂ ಪ್ರಪದ್ಯೇ || ೫ ||

ಯಸ್ಯ ಶ್ವಾಸಾತ್ ಸರ್ವಧಾತ್ರೀ ಧರಿತ್ರೀ

ದೇವೋ ವರ್ಷತ್ಯಮ್ಬು ಕಾಲಃ ಪ್ರಮಾತಾ |

ಮೇರುರ್ಮಧ್ಯೇ ಭುವನಾನಾಂ ಚ ಭರ್ತಾ

ತಮೀಶಾನಂ ವಿಶ್ವರೂಪಂ ನಮಾಮಿ || ೬ ||