ಆರ್ತತ್ರಾಣಪರಾಯಣಗಂಗಾಧರಾಷ್ಟಕಮ್

ಆರ್ತತ್ರಾಣಪರಾಯಣಗಂಗಾಧರಾಷ್ಟಕಮ್

ಕ್ಷೀರಾಮ್ಭೋನಿಧಿಮನ್ಥನೋದ್ಭವವಿಷಾತ್ ಸಂದಹ್ಯಮಾನಾನ್ ಸುರಾನ್

ಬ್ರಹ್ಮಾದೀನವಲೋಕ್ಯ ಯಃ ಕರುಣಯಾ ಹಾಲಾಹಲಾಖ್ಯಂ ವಿಷಮ್ |

ನಿಶ್ಶಂಕಂ ನಿಜಲೀಲಯಾ ಕಬಲಯನ್ ಲೋಕಾನ್ ರರಕ್ಷಾದರಾತ್

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೧ ||

ಕ್ಷೀರಂ ಸ್ವಾದು ನಿಪೀಯ ಮಾತುಲಗೃಹೇ ಗತ್ವಾ ಸ್ವಕೀಯಂ ಗೃಹಂ

ಕ್ಷೀರಾಲಾಭವಶೇನ ಖಿನ್ನಮನಸೇ ಘೋರಂ ತಪಃ ಕುರ್ವತೇ |

ಕಾರುಣ್ಯಾದುಪಮನ್ಯವೇ ನಿರವಧಿಂ ಕ್ಷೀರಾಂಬುಧಿಂ ದತ್ತವಾನ್

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೨ ||

ಮೃತ್ಯುಂ ವಕ್ಷಸಿ ತಾಡಯನ್ ನಿಜಪದಧ್ಯಾನೈಕಭಕ್ತಂ ಮುನಿಂ

ಮಾರ್ಕಣ್ಡೇಯಮಪಾಲಯತ್ ಕರುಣಯಾ ಲಿಙ್ಗಾದ್ವಿನಿರ್ಗತ್ಯ ಯಃ |

ನೇತ್ರಾಮ್ಭೋಜಸಮರ್ಪಣೇನ ಹರಯೇಽಭೀಷ್ಟಂ ರಥಾಂಗಂ ದದೌ

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೩ ||

ವ್ಯೂಢಂ ದ್ರೋಣಜಯದ್ರಥಾದಿರಥಿಕೈಃ ಸೈನ್ಯಂ ಮಹತ್ ಕೌರವಂ

ದೃಷ್ಟ್ವಾ ಕೃಷ್ಣಸಹಾಯವನ್ತಮಪಿ ತಂ ಭೀತಂ ಪ್ರಪನ್ನಾರ್ತಿಹಾ |

ಪಾರ್ಥಂ ರಕ್ಷಿತವಾನ್ ಅಮೋಘವಿಷಯಂ ದಿವ್ಯಾಸ್ತ್ರಮುದ್ಬೋಧಯನ್

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೪ ||

ಬಾಲಂ ಶೈವಕುಲೋದ್ಭವಂ ಪರಿಹಸತ್ ಸ್ವಜ್ಞಾತಿಪಕ್ಷಾಕುಲಂ

ಖಿದ್ಯನ್ತಂ ತವ ಮೂರ್ಧ್ನಿ ಪುಷ್ಪನಿಚಯಂ ದಾತುಂ ಸಮುದ್ಯತ್ಕರಮ್ |

ದೃಷ್ಟ್ವಾಽಽನಮ್ಯ ವಿರಿಞ್ಚಿರಮ್ಯನಗರೇ ಪೂಜಾಂ ತ್ವದೀಯಂ ಭಜನ್

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೫ ||

ಸಂತ್ರಸ್ತೇಷು ಪುರಾ ಪುರಾಸುರಭಯಾತ್ ಇನ್ದ್ರಾದಿಬೃನ್ದಾರಕೇ-

ಷ್ವಾರೂಢೋ ಧರಣೀರಥಂ ಶ್ರುತಿಹಯಂ ಕೃತ್ವಾ ಮುರಾರಿಂ ಶರಮ್ |

ರಕ್ಷನ್ ಯಃ ಕೃಪಯಾ ಸಮಸ್ತವಿಬುಧಾನ್ ಜಿತ್ವಾ ಸುರಾರೀನ್ ಕ್ಷಣಾತ್

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೬ ||

ಶ್ರೌತಸ್ಮಾರ್ತಪಥೇ ಪರಾಙ್ಮುಖಮಪಿ ಪ್ರೋದ್ಯನ್ಮಹಾಪಾತಕಂ

ವಿಶ್ವಾತೀತಮಪಿ ತ್ವಮೇವ ಗತಿರಿತ್ಯಾಲಾಪಯನ್ತಂ ಸಕೃತ್ |

ರಕ್ಷನ್ ಯಃ ಕರುಣಾಪಯೋನಿಧಿರಿತಿ ಪ್ರಾಪ್ತಪ್ರಸಿದ್ಧಿಃ ಪುರಾ

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೭ ||

ಗಾಂಗಂ ವೇಗಮವಾಪ್ಯ ಮಾನ್ಯವಿಬುಧೈಃ ವೋಢುಂ ಪುರಾ ಯಾಚಿತೋ

ದೃಷ್ಟ್ವಾ ಭಕ್ತಭಗೀರಥೇನ ವಿನುತೋ ರುದ್ರೋ ಜಟಾಮಣ್ಡಲೇ |

ಕಾರುಣ್ಯಾದವನೀತಲೇ ಸುರನದೀಂ ಆಪೂರಯನ್ ಪಾವನೀಂ

ಆರ್ತತ್ರಾಣಪರಾಯಣಃ ಸ ಭಗವಾನ್ ಗಂಗಾಧರೋ ಮೇ ಗತಿಃ || ೮ ||