ಶಿವಾಷ್ಟಕಮ್ - ೧

ಶಿವಾಷ್ಟಕಮ್ - ೧

   (ಶ್ರೀ ಶಂಕರಾಚರ್ಯಕೃತಮ್)

ತಸ್ಮೈ ನಮಃ ಪರಮಕಾರಣಕಾರಣಾಯ

ದೀಪ್ತೋಜ್ಜ್ವಲಜ್ವಲಿತಪಿಙ್ಗಲಲೋಚನಾಯ |

ನಾಗೇನ್ದ್ರಹಾರಕೃತಕುಣ್ಡಲಭೂಷಣಾಯ

ಬ್ರಹ್ಮೇನ್ದ್ರವಿಷ್ಣುವರದಾಯ ನಮಃ ಶಿವಾಯ || ೧ ||

ಶ್ರೀಮತ್ಪ್ರಸನ್ನಶಶಿಪನ್ನಗಭೂಷಣಾಯ

ಶೈಲೇನ್ದ್ರಜಾವದನಚುಮ್ಬಿತಲೋಚನಾಯ |

ಕೈಲಾಸಮನ್ದರಮಹೇನ್ದ್ರ ನಿಕೇತನಾಯ

ಲೋಕತ್ರಯಾರ್ತಿಹರಣಾಯ ನಮಃ ಶಿವಾಯ || ೨ ||

ಪದ್ಮಾವದಾತಮಣಿಕುಣ್ಡಲಗೋವೃಷಾಯ

ಕೃಷ್ಣಾಗರುಪ್ರಚುರಚನ್ದನಚರ್ಚಿತಾಯ |

ಭಸ್ಮಾನುಷಕ್ತವಿಕಚೋತ್ಪಲಮಲ್ಲಿಕಾಯ

ನೀಲಾಬ್ಜಕಣ್ಠಸದೃಶಾಯ ನಮಃ ಶಿವಾಯ || ೩ ||

ಲಮ್ಬತ್ಸಪಿಙ್ಗಲಜಟಾಮುಕುಟೋತ್ಕಟಾಯ

ದಂಷ್ಟ್ರಾಕರಾಲವಿಕಟೋತ್ಕಟಭೈರವಾಯ |

ವ್ಯಾಘ್ರಾಜಿನಾಮ್ಬರಧರಾಯ ಮನೋಹರಾಯ

ತ್ರೈಲೋಕ್ಯನಾಥನಮಿತಾಯ ನಮಃ ಶಿವಾಯ || ೪ ||

ದಕ್ಷಪ್ರಜಾಪತಿಮಹಾಮಖನಾಶನಾಯ

ಕ್ಷಿಪ್ರಂ ಮಹಾತ್ರಿಪುರದಾನವಘಾತನಾಯ |

ಬ್ರಹ್ಮೋರ್ಜಿತೋರ್ಧ್ವಗಕರೋಟಿನಿಕೃನ್ತನಾಯ

ಯೋಗಾಯಯೋಗನಮಿತಾಯ ನಮಃ ಶಿವಾಯ || ೫ ||

ಸಂಸಾರಸೃಷ್ಟಿಘಟನಾಪರಿವರ್ತನಾಯ

ರಕ್ಷಃಪಿಶಾಚಗಣಸಿದ್ಧಸಮಾಕುಲಾಯ |

ಸಿದ್ಧೋರಗಗ್ರಹಗಣೇನ್ದ್ರನಿಷೇವಿತಾಯ

ಶಾರ್ದೂಲಚರ್ಮವಸನಾಯ ನಮಃ ಶಿವಾಯ || ೬ ||

ಭಸ್ಮಾಙ್ಗರಾಗಕೃತರೂಪಮನೋಹರಾಯ

ಸೌಮ್ಯಾವದಾತವನಮಾಶ್ರಿತಮಾಶ್ರಿತಾಯ |

ಗೌರೀಕಟಾಕ್ಷನಯನಾರ್ಧನಿರೀಕ್ಷಣಾಯ

ಗೋಕ್ಷೀರಧಾರಧವಲಾಯ ನಮಃ ಶಿವಾಯ || ೭ ||

ಆದಿತ್ಯಸೋಮವರುಣಾನಿಲಸೇವಿತಾಯ

ಯಜ್ಞಾಗ್ನಿಹೋತ್ರವರಧೂಮನಿಕೇತನಾಯ |

ಋಕ್ಸಾಮವೇದಮುನಿಭಿಃ ಸ್ತುತಿಸಂಯುತಾಯ

ಗೋಪಾಯ ಗೋಪನಮಿತಾಯ ನಮಃ ಶಿವಾಯ || ೮ ||

ಶಿವಾಷ್ಟಕಮಿದಂ ಪುಣ್ಯಮ್ ಯಃ ಪಠೇತ್ ಶಿವಸನ್ನಿಧೌ |

ಶಿವಲೋಕಮವಾಪ್ನೋತಿ ಶಿವೇನ ಸಹ ಮೋದತೇ || ೯ ||