ಶ್ರೀ ಹರಿನಾಮಾಷ್ಟಕಮ್

ಶ್ರೀ ಹರಿನಾಮಾಷ್ಟಕಮ್

      (ಬ್ರಹ್ಮಾನನ್ದವಿರಚಿತಮ್)

ಶ್ರೀಕೇಶವಾಚ್ಯುತ ಮುಕುನ್ದ ರಥಾಙ್ಗಪಾಣೇ

ಗೋವಿನ್ದ ಮಾಧವ ಜನಾರ್ದನ ದಾನವಾರೇ |

ನಾರಾಯಣಾಮರಪತೇ ತ್ರಿಜಗನ್ನಿವಾಸ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೧ ||

ಶ್ರೀದೇವದೇವ ಮಧುಸೂದನ ಶಾಙ್‌ರ್ಗಪಾಣೇ

ದಾಮೋದರಾರ್ಣವನಿಕೇತನ ಕೈಟಭಾರೇ |

ವಿಶ್ವಂಭಾರಾಭರಣಭೂಷಿತ ಭೂಮಿಪಾಲ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ  || ೨ ||

ಶ್ರೀಪದ್ಮಲೋಚನ ಗದಾಧರ ಪದ್ಮನಾಭ

ಪದ್ಮೇಶ ಪದ್ಮಪದ ಪಾವನ ಪದ್ಮಪಾಣೇ |

ಪೀತಾಮ್ಬರಾಮ್ಬರರುಚೇ ರುಚಿರಾವತಾರ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೩ ||

ಶ್ರೀಕಾನ್ತ ಕೌಸ್ತುಭಧರಾರ್ತಿಹರಾಬ್ಜಪಾಣೇ

ವಿಷ್ಣೋ ತ್ರಿವಿಕ್ರಮ ಮಹೀಧರ ಧರ್ಮಸೇತೋ |

ವೈಕುಣ್ಠವಾಸ ವಸುಧಾಧಿಪ ವಾಸುದೇವ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೪ ||

ಶ್ರೀನಾರಸಿಂಹ ನರಕಾನ್ತಕ ಕಾನ್ತಮೂರ್ತೇ

ಲಕ್ಷ್ಮೀಪತೇ ಗರುಡವಾಹನ ಶೇಷಶಾಯಿನ್ |

ಕೇಶೀಪ್ರಣಾಶನ ಸುಕೇಶ ಕಿರೀಟಮೌಲೇ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೫ ||

ಶ್ರೀವತ್ಸಲಾಞ್ಛನ ಸುರರ್ಷಭ ಶಙ್ಖಪಾಣೇ

ಕಲ್ಪಾನ್ತವಾರಿಧಿವಿಹಾರ ಹರೇ ಮುರಾರೇ |

ಯಜ್ಞೇಶ ಯಜ್ಞಮಯ ಯಜ್ಞಭುಗಾದಿದೇವ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೬ ||

ಶ್ರೀರಾಮ ರಾವಣರಿಪೋ ರಘುವಂಶಕೇತೋ

ಸೀತಾಪತೇ ದಶರಥಾತ್ಮಜ ರಾಜಸಿಂಹ |

ಸುಗ್ರೀವಮಿತ್ರ ಮೃಗವೇಧನ ಚಾಪಪಾಣೇ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೭ ||

  

ಶ್ರೀಕೃಷ್ಣ ವೃಷ್ಣಿವರ ಯಾದವ ರಾಧಿಕೇಶ

ಗೋವರ್ದ್ಧನೋದ್ಧರಣ ಕಂಸವಿನಾಶ ಶೌರೇ |

ಗೋಪಾಲ ವೇಣುಧರ ಪಾಣ್ಡುಸುತೈಕಬನ್ಧೋ

ಜಿಹ್ವೇ ಜಪೇತಿ ಸತತಂ ಮಧುರಾಕ್ಷರಾಣಿ || ೮ ||

ಇತ್ಯಷ್ಟಕಂ ಭಗವತಃ ಸತತಂ ನರೋ ಯಃ

ನಾಮಾಙ್ಕಿತಂ ಪಠತಿ ನಿತ್ಯಮನನ್ಯಚೇತಾಃ |

ವಿಷ್ಣೋಃ ಪರಂ ಪದಮುಪೈತಿ ಪುನರ್ನ ಜಾತು

ಮಾತುಃ ಪಯೋಧರರಸಂ ಪಿಬತೀಹ ಸತ್ಯಮ್ || ೯ ||