ಚನ್ದ್ರಶೇಖರಾಷ್ಟಕಮ್

 ಚನ್ದ್ರಶೇಖರಾಷ್ಟಕಮ್

      (ಮಾರ್ಕಣ್ಡೇಯಕೃತಂ)

ಸಂಸಾರಸರ್ಪದಷ್ಟಾನಾಂ ಜನ್ತೂನಾಮವಿವೇಕಿನಾಂ

ಚನ್ದ್ರಶೇಖರಪಾದಾಬ್ಜಸ್ಮರಣಂ ಪರಮೌಷಧಮ್ |

ಚನ್ದ್ರಶೇಖರ ಚನ್ದ್ರಶೇಖರ ಚನ್ದ್ರಶೇಖರ ಪಾಹಿ ಮಾಂ

ಚನ್ದ್ರಶೇಖರ ಚನ್ದ್ರಶೇಖರ ಚನ್ದ್ರಶೇಖರ ರಕ್ಷ ಮಾಂ || ೧ ||

ರತ್ನಸಾನುಶರಾಸನಂ ರಜತಾದ್ರಿಶೃಙ್ಗನಿಕೇತನಂ

ಶಿಞ್ಜಿನೀಕೃತಪನ್ನಗೇಶ್ವರಮಚ್ಯುತಾನನಸಾಯಕಮ್ |

ಕ್ಷಿಪ್ರದಗ್ಧಪುರತ್ರಯಂ ತ್ರಿದಿವಾಲಯೈರಭಿವನ್ದಿತಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೨ ||

ಪಂಚಪಾದಪಪುಷ್ಪಗನ್ಧಪದಾಮ್ಬುಜದ್ವಯಶೋಭಿತಂ

ಫಾಲಲೋಚನಜಾತಪಾವಕದಗ್ದ್ಧಮನ್ಮಥವಿಗ್ರಹಮ್ |

ಭಸ್ಮದಿಗ್ಧಕಲೇಬರಂ ಭವನಾಶನಂ ಭವಮವ್ಯಯಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ  || ೩ ||

ಮತ್ತವಾರಣಮುಖ್ಯಚರ್ಮಕೃತೋತ್ತರೀಯಮನೋಹರಂ

ಪಙ್ಕಜಾಸನ ಪದ್ಮಲೋಚನಪೂಜಿತಾಂಘ್ರಿಸರೋರುಹಮ್ |

ದೇವಸಿನ್ಧುತರಂಗಶೀಕರಸಿಕ್ತಶುಭ್ರಜಟಾಧರಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೪ ||

ಯಕ್ಷರಾಜಸಖಂ ಭಗಾಕ್ಷಹರಂ ಭುಜಂಗವಿಭೂಷಣಂ

ಶೈಲರಾಜಸುತಾಪರಿಷ್ಕೃತಚಾರುವಾಮಕಲೇಬರಮ್ |

ಕ್ಷ್ವೇಲನೀಲಗಲಂ ಪರಶ್ವಧಧಾರಿಣಂ ಮೃಗಧಾರಿಣಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೫ ||

ಕುಣ್ಡಲೀಕೃತಕುಣ್ಡಲೀಶ್ವರಮಣ್ಡಲಂ ವೃಷವಾಹನಂ

ನಾರದಾದಿಮುನೀಶ್ವರಸ್ತುತವೈಭವಂ ಭುವನೇಶ್ವರಮ್ |

ಅನ್ಧಕಾನ್ತಕಮಾಶ್ರಿತಾಮರಪಾದಪಂ ಶಮನಾನ್ತಕಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೬ ||

ಭೇಷಜಂ ಭವರೋಗಿಣಾಮಖಿಲಾಪದಾಮಪಹಾರಿಣಂ

ದಕ್ಷಯಜ್ಞವಿನಾಶನಂ ತ್ರಿಗುಣಾತ್ಮಕಂ ತ್ರಿವಿಲೋಚನಮ್ |

ಭುಕ್ತಿ ಮುಕ್ತಿ ಫಲಪ್ರದಂ ಸಕಲಾಘಸಂಘನಿಬರ್ಹಣಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೭ ||

ಭಕ್ತವತ್ಸಲಮರ್ಚತಾಂ ನಿಧಿಮಕ್ಷಯಂ ಹರಿದಮ್ಬರಂ

ಸರ್ವಭೂತಪತಿಂ ಪರಾತ್ಪರಮಪ್ರಮೇಯಮನುತ್ತಮಮ್ |

ಸೋಮವಾರಿನಭೂಹುತಾಶನಸೋಮಪಾನಿಲಖಾಕೃತಿಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ  || ೮ ||

ವಿಶ್ವಸೃಷ್ಟಿವಿಧಾಯಿನಂ ಪುನರೇವ ಪಾಲನತತ್ಪರಂ

ಸಂಹರನ್ತಮಪಿ ಪ್ರಪಞ್ಚಮಶೇಷಲೋಕನಿವಾಸಿನಮ್ |

ಕ್ರೀಡಯನ್ತಮಹರ್ನಿಶಂ ಗಣನಾಥಯೂಥಸಮನ್ವಿತಂ

ಚನ್ದ್ರಶೇಖರಮಾಶ್ರಯೇ ಮಮ ಕಿಂ ಕರಿಷ್ಯತಿ ವೈ ಯಮಃ || ೯ ||

ಮೃತ್ಯುಭೀತಮೃಕಣ್ಡುಸೂನುಕೃತಸ್ತವಂ ಶಿವಸನ್ನಿಧೌ

ಯತ್ರ ಕುತ್ರ ಚ ಯಃ ಪಠೇನ್ನ ಹಿ ತಸ್ಯ ಮೃತ್ಯುಭಯಂ ಭವೇತ್ |

ಪೂರ್ಣಮಾಯುರರೋಗತಾಮಖಿಲಾರ್ಥಸಂಪದಮಾದರಾತ್

ಚನ್ದ್ರಶೇಖರ ಏವ ತಸ್ಯ ದದಾತಿ ಮುಕ್ತಿಮಯತ್ನತಃ || ೧೦ ||