ನಟರಾಜಧ್ಯಾನಮ್

ನಟರಾಜಧ್ಯಾನಮ್

ಸಪ್ತಾರ್ಣವಪರಿಕ್ಷಿಪ್ತಾಂ ದ್ವೀಪೈಃ ಸಪ್ತಭಿರನ್ವಿತಾಮ್ |

ಪಞ್ಚಾಶತ್ಕೋಟಿ ವಿಸ್ತೀರ್ಣಾಂ ಧ್ಯಾಯೇತ್ಸರ್ವಾಂ ಸಭಾಂ ಮಹೀಮ್ || ೧ ||

ತಸ್ಯಾಶ್ಚ ಹೃದಯಾಮ್ಭೋಜೇ ಮಾತೃಕಾಕ್ಷರಕೇಸರಮ್ |

ಧ್ಯಾಯೇದಷ್ಟದಲಂ ಧೀಮಾನ್ ಮಹಾಹೃದಯಮತ್ರ ಚ || ೨ ||

ತಸ್ಯ ಮಧ್ಯೇ ತ್ರಿಕೋಣೇ ತು ತರುಣೇನ್ದುಶಿಖಾಮಣಿಮ್ |

ಚಾರುಚೂಡಜಟಾಪಾಶಂ ಚಲದ್ಭೋಗೀನ್ದ್ರಕುಣ್ಡಲಮ್ || ೩ ||

ತ್ರಿಪುಣ್ಡ್ರವಿಲಸತ್ಫಾಲಂ ಚನ್ದ್ರಾರ್ಕಾನಲಲೋಚನಮ್ |

ವಾಮಭಾಗಸ್ಥಿತಾಂ ದೇವೀಂ ವೀಕ್ಷಯನ್ತಮಪಾಂಗತಃ || ೪ ||

ಅಧರೋಲ್ಲಙ್ಘನಾಕಾರಸಂಜಿಹಾನಸ್ಮಿತಾಂಕುರಮ್ |

ಕಸ್ತೂರಿಕಾಸಿತೋದ್ದಾಮಕಾಲಕೂಟಲಸದ್ಗಲಮ್ || ೫ ||

ಮಹಾಡಮರುವಾದ್ಯೂದ್‌ರ್ಧ್ವದಕ್ಷಪಾಣಿಸರೋರುಹಮ್ |

ತದನ್ಯಕರಪದ್ಮಾನ್ತಚಲದುತ್ಥಿತಪಾವಕಮ್ || ೬ ||

ದಕ್ಷಾಧಃಕರಪದ್ಮೇನ ಹರನ್ತಂ ಪ್ರಾಣಿನಾಂ ಭಯಮ್ |

ವಿಕ್ಷಿಪ್ತಾನ್ಯಕರಂ ತಿರ್ಯಕ್ ಕುಞ್ಚಿತೇನಾಙ್ಘ್ರಿಣಾಽಧಮಮ್ || ೭ ||

ವಾಮೇತರಪ್ರಕೋಷ್ಠಾನ್ತರ್ನೃತ್ಯತ್ ಫಣಧರೇಶ್ವರಮ್ |

ಕಲ್ಪಬ್ರಹ್ಮಕಪಾಲಾನಾಂ ಮಾಲಯಾ ಲಮ್ಬಮಾನಯಾ || ೮ ||

ಸ್ವತನ್ತ್ರಮಾತ್ಮನೋ ರೂಪಂ ಆಚಕ್ಷಾಣಂ ಸ್ವಭಾವತಃ

ವ್ಯಾಘ್ರಚರ್ಮಾಮ್ಬರಧರಂ ಕಟಿಸೂತ್ರಿತಪನ್ನಗಮ್  |

ದಕ್ಷಪಾದಾಬ್ಜವಿನ್ಯಾಸಾತ್ ಅಧಃಕೃತತಮೋಗುಣಮ್ || ೯ ||

         

ಭಸ್ಮೋದ್ಧೂಲಿತಸರ್ವಾಂಗಂ ಪರಮಾನನ್ದತಾಣ್ಡವಮ್ |

ಏವಂ ಧ್ಯಾಯೇತ್ ಪುರೇಶಾನಂ ಪುಣ್ಡರೀಕಪುರೇಶ್ವರಮ್ || ೧೦ ||