ದ್ವಾದಶಜ್ಯೋತಿರ್ಲಿಂಗಸ್ತೋತ್ರಮ್

ದ್ವಾದಶಜ್ಯೋತಿರ್ಲಿಂಗಸ್ತೋತ್ರಮ್

    (ಶ್ರೀ ಶಂಕರಾಚಾರ್ಯಕೃತಮ್)

ಸೌರಾಷ್ಟ್ರದೇಶೇ ವಿಶದೇಽತಿರಮ್ಯೇ

ಜ್ಯೋತಿರ್ಮಯಂ ಚನ್ದ್ರಕಲಾವತಂಸಮ್ |

ಭಕ್ತಿಪ್ರದಾನಾಯ ಕೃಪಾವತೀರ್ಣಂ

ತಂ ಸೋಮನಾಥಂ ಶರಣಂ ಪ್ರಪದ್ಯೇ || ೧ ||

ಶ್ರೀಶೈಲಶೃಙ್ಗೇ ವಿಬುಧಾದಿಸಙ್ಗೇ

ತುಲಾದ್ರಿತುಙ್ಗೇಽಪಿ ಮುದಾ ವಸನ್ತಮ್ |

ತಮರ್ಜುನಂ ಮಲ್ಲಿಕಪೂರ್ವಮೇಕಂ

ನಮಾಮಿ ಸಂಸಾರಸಮುದ್ರಸೇತುಮ್ || ೨ ||

ಅವನ್ತಿಕಾಯಾಂ ವಿಹಿತಾವತಾರಂ

ಮುಕ್ತಿಪ್ರದಾನಾಯ ಚ ಸಜ್ಜನಾನಾಮ್ |

ಅಕಾಲಮೃತ್ಯೋಃ ಪರಿರಕ್ಷಣಾರ್ಥಂ

ವನ್ದೇ ಮಹಾಕಾಲಮಹಾಸುರೇಶಮ್ || ೩ ||

ಕಾವೇರಿಕಾನರ್ಮದಯೋಃ ಪವಿತ್ರೇ

ಸಮಾಗಮೇ ಸಜ್ಜನತಾರಣಾಯ |

ಸದೈವ ಮಾನ್ಧಾತೃಪುರೇ ವಸನ್ತಂ

ಓಂಕಾರಮೀಶಂ ಶಿವಮೇಕಮೀಡೇ || ೪ ||

ಪೂರ್ವೋತ್ತರೇ ಪ್ರಜ್ವಲಿಕಾನಿಧಾನೇ

ಸದಾ ವಸನ್ತಂ ಗಿರಿಜಾಸಮೇತಮ್ |

ಸುರಾಸುರಾರಾಧಿತಪಾದಪದ್ಮಂ

ಶ್ರೀ ವೈದ್ಯನಾಥಂ ತಮಹಂ ನಮಾಮಿ || ೫ ||

ಯಂ ಡಾಕಿನೀಶಾಕಿನಿಕಾಸಮಾಜೇ

ನಿಷೇವ್ಯಮಾಣಂ ಪಿಶಿತಾಶನೈಶ್ಚ |

ಸದೈವ ಭೀಮಾದಿಪದಪ್ರಸಿದ್ಧಂ

ತಂ ಶಂಕರಂ ಭಕ್ತಹಿತಂ ನಮಾಮಿ || ೬ ||

ಸುತಾಮ್ರಪರ್ಣೀಜಲರಾಶಿಯೋಗೇ

ನಿಬಧ್ಯ ಸೇತುಂ ವಿಶಿಖೈರಸಂಖ್ಯೈಃ |

ಶ್ರೀರಾಮಚನ್ದ್ರೇಣ ಸಮರ್ಚಿತಂ ತಂ

ರಾಮೇಶ್ವರಾಖ್ಯಂ ನಿಯತಂ ನಮಾಮಿ || ೭ ||

ಯಾಮ್ಯೇ ಸದಂಗೇ ನಗರೇಽತಿರಮ್ಯೇ

ವಿಭೂಷಿತಾಙ್ಗಂ ವಿಬುಧೈಶ್ಚ ಭೋಗೈಃ |

ಸದ್ಭಕ್ತಿಮುಕ್ತಿಪ್ರದಮೀಶಮೇಕಂ

ಶ್ರೀ ನಾಗನಾಥಂ ಶರಣಂ ಪ್ರಪದ್ಯೇ || ೮ ||

ಸಾನನ್ದಮಾನನ್ದವನೇ ವಸನ್ತಂ

ಆನನ್ದಕನ್ದಂ ಹತಪಾಪವೃನ್ದಮ್ |

ವಾರಾಣಸೀನಾಥಮನಾಥನಾಥಂ

ಶ್ರೀ ವಿಶ್ವನಾಥಂ ಶರಣಂ ಪ್ರಪದ್ಯೇ || ೯ ||

ಸಹ್ಯಾದ್ರಿಶೀರ್ಷೇ ವಿಮಲೇ ವಸನ್ತಂ

ಗೋದಾವರೀತೀರಪವಿತ್ರದೇಶೇ |

ಯದ್ದರ್ಶನಾತ್ ಪಾತಕಮಾಶು ನಾಶಂ

ಪ್ರಯಾತಿ ತಂ ತ್ರ್ಯಮ್ಬಕಮೀಶಮೀಡೇ || ೧೦ ||

ಮಹಾದ್ರಿಪಾರ್ಶ್ವೇ ಚ ತಟೇ ರಮನ್ತಂ

ಸಂಪೂಜ್ಯಮಾನಂ ಸತತಂ ಮುನೀನ್ದ್ರೈಃ |

ಸುರಾಸುರೈಃ ಯಕ್ಷಮಹೋರಗಾದ್ಯೈಃ

ಕೇದಾರಮೀಶಂ ಶಿವಮೇಕಮೀಡೇ || ೧೧ ||

ಇಲಾಪುರೇ ರಮ್ಯವಿಶಾಲಕೇಽಸ್ಮಿನ್

ಸಮುಲ್ಲಸನ್ತಂ ಚ ಜಗದ್ವರೇಣ್ಯಂ |

ವನ್ದೇ ಮಹೋದಾರತರಸ್ವಭಾವಂ

ಧೃಷ್ಣೇಶ್ವರಾಖ್ಯಂ ಶರಣಂ ಪ್ರಪದ್ಯೇ || ೧೨ ||

ಜ್ಯೋತಿರ್ಮಯದ್ವಾದಶಲಿಂಗಕಾನಾಂ

ಶಿವಾತ್ಮನಾಂ ಪ್ರೋಕ್ತಮಿದಂ ಕ್ರಮೇಣ |

ಸ್ತೋತ್ರಂ ಪಠಿತ್ವಾ ಮನುಜೋಽತಿಭಕ್ತ್ಯಾ

ಫಲಂ ತದಾಲೋಕ್ಯ ನಿಜಂ ಭಜೇಚ್ಚ || ೧೩ ||