. ಶ್ರೀಮುಕುನ್ದಮಾಲಾ

. ಶ್ರೀಮುಕುನ್ದಮಾಲಾ

         (ಶ್ರೀಕುಲಶೇಖರಕೃತಾ)

ವನ್ದೇ ಮುಕುನ್ದಮರವಿನ್ದದಲಾಯತಾಕ್ಷಮ್

ಕುನ್ದೇನ್ದುಶಙ್ಖದಶನಂ ಶಿಶುಗೋಪವೇಷಮ್ |

ಇನ್ದ್ರಾದಿದೇವಗಣವನ್ದಿತಪಾದಪೀಠಮ್

ವೃನ್ದಾವನಾಲಯಮಹಂ ವಸುದೇವಸೂನುಮ್ || ೧ ||

ಶ್ರೀವಲ್ಲಭೇತಿ ವರದೇತಿ ದಯಾಪರೇತಿ

ಭಕ್ತಪ್ರಿಯೇತಿ ಭವಲುಣ್ಠನಕೋವಿದೇತಿ |

ನಾಥೇತಿ ನಾಗಶಯನೇತಿ ಜಗನ್ನಿವಾಸೇ-

ತ್ಯಾಲಾಪನಂ ಪ್ರತಿಪದಂ ಕುರು ಮೇ ಮುಕುನ್ದ || ೨ ||

ಜಯತು ಜಯತು ದೇವೋ ದೇವಕೀನನ್ದನೋಽಯಮ್

ಜಯತು ಜಯತು ಕೃಷ್ಣೋ ವೃಷ್ಣಿವಂಶಪ್ರದೀಪಃ |

ಜಯತು ಜಯತು ಮೇಘಶ್ಯಾಮಲಃ ಕೋಮಲಾಙ್ಗಃ

ಜಯತು ಜಯತು ಪೃಥ್ವೀಭಾರನಾಶೋ ಮುಕುನ್ದಃ || ೩ ||

ಮುಕುನ್ದ ಮೂರ್ಧ್ನಾ ಪ್ರಣಿಪತ್ಯ ಯಾಚೇ

ಭವನ್ತಮೇಕಾನ್ತಮಿಯನ್ತಮರ್ಥಮ್ |

ಅವಿಸ್ಮೃತಿಃ ತ್ವಚ್ಚರಣಾರವಿನ್ದೇ

ಭವೇ ಭವೇ ಮೇಽಸ್ತು ಭವತ್ಪ್ರಸಾದಾತ್ || ೪ ||

ಶ್ರೀಗೋವಿನ್ದಪದಾಂಭೋಜಮಧುನೋ ಮಹದದ್ಭುತಮ್ |

ತತ್ಪಾಯಿನೋ ನ ಮುಞ್ಚನ್ತಿ ಮುಞ್ಚನ್ತಿ ಪದಪಾಯಿನಃ || ೫ ||

ನಾಹಂ ವನ್ದೇ ತವ ಚರಣಯೋರ್ದ್ವದ್ವಮದ್ವನ್ದ್ವಹೇತೋಃ

ಕುಂಭೀಪಾಕಂ ಗುರುಮಪಿ ಹರೇ ನಾರಕಂ ನಾಪನೇತುಮ್ |

ರಮ್ಯಾ ರಾಮಾ ಮೃದುತನುಲತಾನನ್ದನೇನಾಪಿ ರನ್ತುಮ್

ಭಾವೇ ಭಾವೇ ಹೃದಯಭವನೇ ಭಾವಯೇಯಂ ಭವನ್ತಮ್ || ೬ ||

ನಾಸ್ಥಾ ಧರ್ಮೇ ನ ಚ ವಸುನಿಚಯೇ ನೈವ ಕಾಮೋಪಭೋಗೇ

ಯದ್ಯದ್ಭವ್ಯಂ ಭವತು ಭಗವನ್ ಪೂರ್ವಕರ್ಮಾನುರೂಪಮ್ |

ಏತತ್ಪ್ರಾರ್ಥ್ಯಂ ಮಮ ಬಹುಮತಂ ಜನ್ಮಜನ್ಮಾನ್ತರೇಽಪಿ

ತ್ವತ್ಪಾದಾಂಭೋರುಹಯುಗಗತಾ ನಿಶ್ಚಲಾ ಭಕ್ತಿರಸ್ತು || ೭ ||

ದಿವಿ ವಾ ಭುವಿ ವಾ ಮಮಾಸ್ತು ವಸೋ

ನರಕೇ ವಾ ನರಕಾನ್ತಕ ಪ್ರಕಾಮಮ್ |

ಅವಧೀರಿತ ಶಾರದಾರವಿನ್ದೌ

ಚರಣೌ ತೇ ಮರಣೇಽಪಿ ಚಿನ್ತಯಾಮಿ || ೮ ||

ಕೃಷ್ಣ ತ್ವದೀಯ ಪದಪಙ್ಕಜಪಞ್ಜರಾನ್ತ-

ರದ್ಯೈವ ಮೇ ವಿಶತು ಮಾನಸರಾಜಹಂಸಃ |

ಪ್ರಾಣಪ್ರಯಾಣಸಮಯೇ ಕಫವಾತಪಿತ್ತೈಃ

ಕಣ್ಠಾವರೋಧನವಿಧೌ ಸ್ಮರಣಂ ಕುತಸ್ತೇ || ೯ ||

ಸರಸಿಜನಯನೇ ಸಶಙ್ಖಚಕ್ರೇ

ಮುರಭಿದಿ ಮಾ ವಿರಮೇಹ ಚಿತ್ತ ರನ್ತುಂ |

ಸುಖಕರಮಪರಂ ನ ಜಾತು ಜಾನೇ

ಹರಿಚರಣಸ್ಮರಣಾಮೃತೇನ ತುಲ್ಯಮ್ || ೧೦ ||

ಮಾ ಭೈರ್ಮನ್ದಮನೋ ವಿಚಿನ್ತ್ಯ ಬಹುಧಾ ಯಾಮೀಶ್ಚಿರಂ ಯಾತನಾಃ

ತೇಽಮೀ ನ ಪ್ರಭವನ್ತಿ ಪಾಪರಿಪವಃ ಸ್ವಾಮೀ ನನು ಶ್ರೀಧರಃ |

ಆಲಸ್ಯಂ ವ್ಯಪನೀಯ ಭಕ್ತಿಸುಲಭಂ ಧ್ಯಾಯಸ್ವ ನಾರಾಯಣಮ್

ಲೋಕಸ್ಯ ವ್ಯಸನಾಪನೋದನಕರೋ ದಾಸಸ್ಯ ಕಿಂ ನ ಕ್ಷಮಃ || ೧೧ ||

ಭವಜಲಧಿಗತಾನಾಂ ದ್ವನ್ದ್ವವಾತಾಹತಾನಾಮ್

ಸುತದುಹಿತೃಕಲತ್ರತ್ರಾಣ ಭಾರಾರ್ದಿತಾನಾಮ್ |

ವಿಷಮವಿಷಯತೋಯೇ ಮಜ್ಜತಾಮಪ್ಲವಾನಾಮ್

ಭವತಿ ಶರಣಮೇಕೋ ವಿಷ್ಣುಪೋತೋ ನಾರಾಣಾಮ್ || ೧೨ ||

ಭವಜಲಧಿಮಗಾಧಂ ದುಸ್ತರಂ ನಿಸ್ತರೇಯಮ್

ಕಥಮಹಮಿತಿ ಚೇತೋ ಮಾ ಸ್ಮ ಗಾಃ ಕಾತರತ್ವಮ್ |

ಸರಸಿಜ ದೃಶಿ ದೇವೇ ತಾವಕೀ ಭಕ್ತಿರೇಕಾ

ನರಕಭಿದಿ ನಿಷಣ್ಣಾ ತಾರಯಿಷ್ಯತ್ಯವಶ್ಯಮ್ || ೧೩ ||

ತೃಷ್ಣಾತೋಯೇ ಮದನಪವನೋದ್ಧೂತಮೋಹೋರ್ಮಿಜಾಲೇ

ದಾರಾವರ್ತೇ ತನಯಸಹಜಗ್ರಾಹಸಙ್ಘಾಕುಲೇ ಚ |

ಸಂಸಾರಾಖ್ಯೇ ಮಹತಿ ಜಲಧೌ ಮಜ್ಜತಾಂ ನಸ್ತ್ರಿಧಾಮನ್

ಪಾದಾಂಭೋಜೇ ವರದ ಭವತೋ ಭಕ್ತಿನಾವಂ ಪ್ರಯಚ್ಛ || ೧೪ ||

ಜಿಹ್ವೇ ಕೀರ್ತಯ ಕೇಶವಂ ಮುರರಿಪುಂ ಚೇತೋ ಭಜ ಶ್ರೀಧರಮ್

ಪಾಣಿದ್ವನ್ದ್ವ ಸಮರ್ಚಯಾಽಚ್ಯುತಕಥಾಃ ಶ್ರೋತ್ರದ್ವಯ ತ್ವಂ ಶೃಣು |

ಕೃಷ್ಣಂ ಲೋಕಯ ಲೋಚನದ್ವಯ ಹರೇರ್ಗಚ್ಛಾಙ್ಘ್ರಿಯುಗ್ಮಾಲಯಂ

ಜಿಘ್ರ ಘ್ರಾಣ ಮುಕುನ್ದಪಾದತುಲಸೀಂ ಮೂರ್ಧನ್ನಮಾಧೋಕ್ಷಜಮ್ || ೧೫ ||

ಹೇ ಮರ್ತ್ಯಾಃ ಪರಮಂ ಹಿತಂ ಶೃಣುತ ವೋ ವಕ್ಷ್ಯಾಮಿ ಸಂಕ್ಷೇಪತಃ

ಸಂಸಾರಾರ್ಣವಮಾಪದೂರ್ಮಿಬಹುಲಂ ಸಮ್ಯಕ್ ಪ್ರವಿಶ್ಯ ಸ್ಥಿತಾಃ |

ನಾನಾಜ್ಞಾನಮಪಾಸ್ಯ ಚೇತಸಿ ನಮೋ ನಾರಾಯಣಾಯೇತ್ಯಮುಮ್

ಮನ್ತ್ರಂ ಸಪ್ರಣವಂ ಪ್ರಣಾಮಸಹಿತಂ ಪ್ರಾವರ್ತಯಧ್ವಂ ಮುಹುಃ || ೧೬ ||

ಬದ್ಧೇನಾಞ್ಜಲಿನಾ ನತೇನಶಿರಸಾ ಗಾತ್ರೈಃ ಸರೋಮೋದ್ಗಮೈಃ

ಕಣ್ಠೇನ ಸ್ವರಗದ್ಗದೇನ ನಯನೇನೋದ್ಗೀರ್ಣಬಾಷ್ಪಾಮ್ಬುನಾ |

ನಿತ್ಯಂ ತ್ವಚ್ಚರಣಾರವಿನ್ದಯುಗಲಧ್ಯಾನಾಮೃತಾಸ್ವಾದಿನಾಮ್

ಅಸ್ಮಾಕಂ ಸರಸೀರುಹಾಕ್ಷ ಸತತಂ ಸಂಪದ್ಯತಾಂ ಜೀವಿತಮ್ || ೧೭ ||

ಭಕ್ತಾಪಾಯಭುಜಙ್ಗಗಾರುಡಮಣಿಃ ತ್ರಿಲೋಕ್ಯರಕ್ಷಾಮಣಿಃ

ಗೋಪೀಲೋಚನಚಾತಕಾಮ್ಬುದಮಣಿಃ ಸೌದರ್ಯಮುದ್ರಾಮಣಿಃ |

ಯಃ ಕಾನ್ತಾಮಣಿರುಕ್ಮಿಣೀಘನಕುಚದ್ವನ್ದ್ವೈಕಭೂಷಾಮಣಿಃ

ಶ್ರೇಯೋ ದೈವಶಿಖಾಮಣಿರ್ದಿಶತು ನೋ ಗೋಪಾಲಚೂಡಾಮಣಿಃ || ೧೮ ||

ಶತ್ರುಚ್ಛೇದೈಕಮನ್ತ್ರಂ ಸಕಲ್ಮುಪನಿಷದ್ವಾಕ್ಯಸಂಪೂಜ್ಯಮನ್ತ್ರಮ್

ಸಂಸಾರೋತ್ತಾರಮನ್ತ್ರಂ ಸಮುಪಚಿತತಮಸ್ಸಙ್ಘನಿರ್ಯಾಣಮನ್ತ್ರಮ್ |

ಸರ್ವೈಶ್ವರ್ಯೈಕಮನ್ತ್ರಂ ವ್ಯಸನಭುಜಗಸಂದಷ್ಟಸಂತ್ರಾಣಮನ್ತ್ರಮ್

ಜಿಹ್ವೇ ಶ್ರೀಕೃಷ್ಣಮನ್ತ್ರಂ ಜಪ ಜಪ ಸತತಂ ಜನ್ಮಸಾಫಲ್ಯಮನ್ತ್ರಮ್ || ೧೯ ||

ವ್ಯಾಮೋಹಪ್ರಶಮೌಷಧಂ ಮುನಿಮನೋವೃತಿಪ್ರವೃತ್ಯೌಷಧಮ್

ದೈತ್ಯೇನ್ದ್ರಾರ್ತಿಹರೌಷಧಂ ತ್ರಿಜಗತಾಂ ಸಞ್ಜೀವನೈಕೌಷಧಮ್ |

ಭಕ್ತಾತ್ಯನ್ತಹಿತೌಷಧಂ ಭವಭಯಪ್ರಧ್ವಂಸನೈಕೌಷಧಂ

ಶ್ರೇಯಃ ಪ್ರಾಪ್ತಿಕರೌಷಧಂ ಪಿಬ ಮನಃ ಶ್ರೀಕೃಷ್ಣದಿವ್ಯೌಷಧಮ್ || ೨೦ ||

ಮಜ್ಜನ್ಮನಃ ಫಲಮಿದಂ ಮಧುಕೈಟಭಾರೇ

ಮತ್ಪ್ರಾರ್ಥನೀಯ ಮದನುಗ್ರಹ ಏಷ ಏವ |

ತ್ವದ್ಭೃತ್ಯಭೃತ್ಯ ಪರಿಚಾರಕಭೃತ್ಯಭೃತ್ಯ-

ಭೃತ್ಯಸ್ಯ ಭೃತ್ಯ ಇತಿ ಮಾಂ ಸ್ಮರ ಲೋಕನಾಥ || ೨೧ ||

ಇದಂ ಶರೀರಂ ಪರಿಣಾಮಪೇಶಲಮ್

ಪತತ್ಯವಶ್ಯಂ ಶ್ಲಥಸನ್ಧಿಜರ್ಜರಮ್ |

ಕಿಮೌಷಧೈಃ ಕ್ಲಿಶ್ಯತಿ ಮೂಢ ದುರ್ಮತೇ

ನಿರಾಮಯಂ ಕೃಷ್ಣರಸಾಯನಂ ಪಿಬ || ೨೨ ||

ನಮಾಮಿ ನಾರಾಯಣ ಪಾದಪಙ್ಕಜಮ್

ಕರೋಮಿ ನಾರಾಯಣಪೂಜನಂ ಸದಾ |

ವದಾಮಿ ನಾರಾಯಣ್ನಾಮ ನಿರ್ಮಲಮ್

ಸ್ಮರಾಮಿ ನಾರಾಯಣತತ್ವಮವ್ಯಯಮ್ || ೨೩ ||

          

ಶ್ರೀನಾಥ ನಾರಾಯಣ ವಾಸುದೇವ

ಶ್ರೀಕೃಷ್ಣ ಭಕ್ತಪ್ರಿಯ ಚಕ್ರಪಾಣೇ |

ಶ್ರೀರಾಮ ಪದ್ಮಾಕ್ಷ ಹರೇ ಮುರಾರೇ

ಶ್ರೀರಙ್ಗನಾಥಾಯ ನಮೋ ನಮಸ್ತೇ || ೨೪ ||