ಶಿವಾಷ್ಟಕಮ್- ೨

ಶಿವಾಷ್ಟಕಮ್- ೨

     (ಬ್ರಹ್ಮವೈವರ್ತಪುರಾಣಾನ್ತರ್ಗತಮ್)

ಪ್ರಭುಂ ಪ್ರಾಣನಾಥಂ ವಿಭುಂ ವಿಶ್ವನಾಥಂ

ಜಗನ್ನಾಥನಾಥಂ ಸದಾಽಽನನ್ದಭಾಜಾಂ |

ಭವತ್ಭವ್ಯಭೂತೇಶ್ವರಂ ಭೂತನಾಥಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೧ ||

ಗಲೇ ರುಣ್ಡಮಾಲಂ ತನೌ ಸರ್ಪಜಾಲಂ

ಮಹಾಕಾಲಕಾಲಂ ಗಣೇಶಾದಿಪಾಲಮ್ |

ಜಟಾಜೂಟಗಙ್ಗೋತ್ತರಙ್ಗೋತ್ತಮಾಙ್ಗಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೨ ||

ಮುದಾಮಾಕರಂ ಮಣ್ಡನಂ ಮಣ್ಡನಾನಾಂ

ಮಹೋಮಣ್ಡಲಂ ಭಸ್ಮಭೂಷಾಧರಂ ತಮ್ |

ಅನಾದಿಂ ಹ್ಯಪಾರಂ ಮಹಾಮೋಹಮಾರಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೩ ||

ವಟಾಧೋನಿವಾಸಂ ಮಹಾಟ್ಟಾಟ್ಟಹಾಸಂ

ಮಹಾಪಾಪನಾಶಂ ಸದಾ ಸುಪ್ರಕಾಶಮ್ |

ಗಿರೀಶಂ ಗಣೇಶಂ ಸುರೇಶಂ ಮಹೇ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೪ ||

ಗಿರೀನ್ದ್ರಾತ್ಮಜಾಸಂಗೃಹೀತಾರ್ಧದೇಹಂ

ಗಿರೌ ಸಂಸ್ಥಿತಂ ಸರ್ವದಾಽಽಸನ್ನಗೇಹಮ್ |

ಪರಂ ಬ್ರಹ್ಮ ದೇವಾದಿಭಿರ್ವನ್ದ್ಯಮಾನಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೫ ||

ಕಪಾಲಂ ತ್ರಿಶೂಲಂ ಕರಾಭ್ಯಾಂ ದಧಾನಂ

ಪದಾಂಭೋಜನಮ್ರಾಯ ಕಾಮಂ ದದಾನಮ್ |

ವಲೀವರ್ದಯಾನಂ ಸುರಾಣಾಂ ಪ್ರಧಾನಂ

 ಶಿವಂ ಶಂಕರಂ ಶಂಭುಮೀಶಾನಮೀಡೇ || ೬ ||

ಶರಚ್ಚನ್ದ್ರಗಾತ್ರಂ ಗಣಾನನ್ದಪಾತ್ರಂ

ತ್ರಿನೇತ್ರಂ ಪವಿತ್ರಂ ಧನೇಶಸ್ಯ ಮಿತ್ರಮ್ |

ಅಪರ್ಣಾಕಲತ್ರಂ ಸದಾ ಸಚ್ಚರಿತ್ರಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೭ ||

ಹರಂ ಸರ್ಪಹಾರಾನ್ವಿತಂ ಗೋವಿಹಾರಂ

ಭವಂ ವೇದಸಾರಂ ಸದಾ ನಿರ್ವಿಕಾರಮ್ |

ಶ್ಮಶಾನೇ ವಸನ್ತಂ ಮನೋಜಂ ದಹನ್ತಂ

ಶಿವಂ ಶಂಕರಂ ಶಂಭುಮೀಶಾನಮೀಡೇ || ೮ ||

ಸ್ತವಂ ಯಃ ಪ್ರಭಾತೇ ನರಃ ಶೂಲಪಾಣೇಃ

ಪಠೇತ್ ಸರ್ವದಾ ಭರ್ಗಭಾವಾನುರಕ್ತಃ |

ಸ ಪುತ್ರಂ ಧನಂ ಧಾನ್ಯಮಿತ್ರಂ ಕಲತ್ರಂ

ವಿಚಿತ್ರಃ ಸಮಾಸಾದ್ಯ ಮೋಕ್ಷಂ ಪ್ರಯಾತಿ || ೯ ||