ಶಿವಸ್ತೋತ್ರಮ್ (ಸ್ವಾಮಿ ವಿವೇಕಾನನ್ದಕೃತಮ್)

ಶಿವಸ್ತೋತ್ರಮ್ (ಸ್ವಾಮಿ ವಿವೇಕಾನನ್ದಕೃತಮ್)

ನಿಖಿಲಭುವನಜನ್ಮಸ್ಥೇಮಭಙ್ಗಪ್ರರೋಹಾಃ

ಅಕಲಿತಮಹಿಮಾನಃ ಕಲ್ಪಿತಾ ಯತ್ರ ತಸ್ಮಿನ್ |

ಸುವಿಮಲಗಗನಾಭೇ ಈಶಸಂಜ್ಞೇಽಪ್ಯನೀಶೇ

ಮಮ ಭವತು ಭವೇಽಸ್ಮಿನ್ ಭಾಸುರೋ ಭಾವಬನ್ಧಃ || ೧ ||

ನಿಹಿತನಿಖಿಲಮೋಹೇಽಧೀಶತಾ ಯತ್ರ ರೂಢಾ

ಪ್ರಕಟಿತ ಪರಪ್ರೇಮ್ಣಾ ಯೋ ಮಹಾದೇವ ಸಂಜ್ಞಃ |

ಅಶಿಥಿಲಪರಿರಮ್ಭಃ ಪ್ರೇಮರೂಪಸ್ಯ ಯಸ್ಯ

ಹೃದಿ ಪ್ರಣಯತಿ ವಿಶ್ವಂ ವ್ಯಾಜಮಾತ್ರಂ ವಿಭುತ್ವಮ್ || ೨ ||

ವಹತಿ ವಿಪುಲವಾತಃ ಪೂರ್ವಸಂಸ್ಕಾರರೂಪಃ

ವಿದಲತಿ ಬಲವೃನ್ದಂ ಘೂರ್ಣಿತೇವೋರ್ಮಿಮಾಲಾ |

ಪ್ರಚಲತಿ ಖಲು ಯುಗ್ಮಂ ಯುಷ್ಮದಸ್ಮತ್ಪ್ರತೀತಂ

ಅತಿವಿಕಲಿತರೂಪಂ ನೌಮಿ ಚಿತ್ತಂ ಶಿವಸ್ಥಮ್ || ೩ ||

ಜನಕಜನಿತಭಾವೋ ವೃತ್ತಯಃ ಸಂಸ್ಕೃತಾಶ್ಚ

ಅಗಣನಬಹುರೂಪೋ ಯತ್ರ ಚೈಕೋ ಯಥಾರ್ಥಃ |

ಶಮಿತವಿಕೃತಿವಾತೇ ಯತ್ರ ನಾನ್ತರ್ಬಹಿಶ್ಚ

ತಮಹಹ ಹರಮೀಡೇ ಚಿತ್ತವೃತ್ತೇರ್ನಿರೋಧಮ್ || ೪ ||

ಗಲಿತತಿಮಿರಮಾಲಃ ಶುಭ್ರತೇಜಃ ಪ್ರಕಾಶಃ

ಧವಲಕಮಲಶೋಭಃ ಜ್ಞಾನಪುಞ್ಜಾಟ್ಟಹಾಸಃ |

ಯಮಿಜನಹೃದಿಗಮ್ಯೋ ನಿಷ್ಕಲೋ ಧ್ಯಾಯಮಾನಃ

ಪ್ರಣತಮವತು ಮಾಂ ಸಃ ಮಾನಸೋ ರಾಜಹಂಸಃ || ೫ ||

ದುರಿತದಲನದಕ್ಷಂ ದಕ್ಷಜಾದತ್ತದೋಷಂ

ಕಲಿತಕಲಿಕಲಙ್ಕಂ ಕಮ್ರಕಲ್ಹಾರಕಾನ್ತಮ್ |

ಪರಹಿತಕರಣಾಯ ಪ್ರಾಣಪ್ರಚ್ಛೇದಪ್ರೀತಮ್

ನತನಯನನಿಯುಕ್ತಂ ನೀಲಕಣ್ಠಂ ನಮಾಮಃ || ೬ ||