ಗೋವಿನ್ದಾಷ್ಟಕಮ್

ಗೋವಿನ್ದಾಷ್ಟಕಮ್

          (ಶ್ರೀ ಶಂಕರಾಚಾರ್ಯಕೃತಮ್)

ಸತ್ಯಂ ಜ್ಞಾನಮನನ್ತಂ ನಿತ್ಯಮನಾಕಾಶಂ ಪರಮಾಕಾಶಮ್

ಗೋಷ್ಠಪ್ರಾಙ್ಗಣರಿಙ್ಗಣಲೋಲಮನಾಯಾಸಂ ಪರಮಾಯಾಸಮ್ |

ಮಾಯಾಕಲ್ಪಿತನಾನಾಕಾರಮನಾಕಾರಂ ಭುವನಾಕಾರಮ್

ಕ್ಷ್ಮಾಮಾನಾಥಮನಾಥಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೧ ||

ಮೃತ್ಸ್ನಾಮತ್ಸೀಹೇತಿ ಯಶೋದಾತಾಡನಶೈಶವಸನ್ತ್ರಾಸಮ್

ವ್ಯಾದಿತವಕ್ತ್ರಾಲೋಕಿತಲೋಕಾಲೋಕಚತುರ್ದಶಲೋಕಾಲಿಮ್ |

ಲೋಕತ್ರಯಪುರಮೂಲಸ್ತಂಭಂ ಲೋಕಾಲೋಕಮನಾಲೋಕಮ್

ಲೋಕೇಶಂ ಪರಮೇಶಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೨ ||

ತ್ರೈವಿಷ್ಟಪರಿಪುವೀರಘ್ನಂ ಕ್ಷಿತಿಭಾರಘ್ನಂ ಭವರೋಗಘ್ನಮ್

ಕೈವಲ್ಯಂ ನವನೀತಾಹಾರಮನಾಹಾರಂ ಭುವನಾಹಾರಮ್ |

ವೈಮಲ್ಯಸ್ಫುಟಚೇತೋವೃತ್ತಿವಿಶೇಷಾಭಾಸಮನಾಭಾಸಮ್

ಶೈವಂ ಕೇವಲಶಾನ್ತಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೩ ||

ಗೋಪಾಲಂ ಭೂಲೀಲಾವಿಗ್ರಹಗೋಪಾಲಂ ಕುಲಗೋಪಾಲಮ್

ಗೋಪೀಖೇಲನಗೋವರ್ದ್ಧನಧೃತಿಲೀಲಾಲಾಲಿತಗೋಪಾಲಮ್ |

ಗೋಭಿರ್ನಿಗದಿತಗೋವಿನ್ದಸ್ಫುಟನಾಮಾನಂ ಬಹುನಾಮಾನಮ್

ಗೋಪೀಗೋಚರದೂರಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೪ ||

ಗೋಪೀಮಣ್ಡಲಗೋಷ್ಠೀಭೇದಂ ಭೇದಾವಸ್ಥಮಭೇದಾಭಮ್

ಶಶ್ವತ್ಗೋಖುರನಿರ್ದ್ಧೂತೋದ್ಧತ ಧೂಲೀಧೂಸರಸೌಭಾಗ್ಯಮ್ |

ಶ್ರದ್ಧಾಭಕ್ತಿಗೃಹೀತಾನನ್ದಮಚಿನ್ತ್ಯಂ ಚಿನ್ತಿತಸದ್ಭಾವಮ್

ಚಿನ್ತಾಮಣಿ ಮಹಿಮಾನಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೫ ||

ಸ್ನಾನವ್ಯಾಕುಲಯೋಷಿದ್ವಸ್ತ್ರಮುಪಾದಾಯಾಗಮುಪಾರೂಢಮ್

ವ್ಯಾದಿತ್ಸನ್ತೀರಥ ದಿಗ್ವಸ್ತ್ರಾ ತಾಃ ದಾತುಮುಪಾಕರ್ಷನ್ತಮ್ |

ನಿರ್ದ್ಧೂತದ್ವಯಶೋಕವಿಮೋಹಂ ಬುದ್ಧಂ ಬುದ್ಧೇರನ್ತಸ್ಥಮ್

ಸತ್ತಾಮಾತ್ರಶರೀರಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೬ ||

ಕಾನ್ತಂ ಕಾರಣಕಾರಣಮಾದಿಮನಾದಿಂ ಕಾಲಘನಾಭಾಸಮ್

ಕಾಲಿನ್ದೀಗತಕಾಲಿಯಶಿರಸಿ ಸುನೃತ್ಯನ್ತಂ ಮುಹುರತ್ಯನ್ತಮ್ |

ಕಾಲಂ ಕಾಲಕಲಾತೀತಂ  ಕಲಿತಾಶೇಷಂ ಕಲಿದೋಷಘ್ನಮ್

ಕಾಲತ್ರಯಗತಿಹೇತುಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೭ ||

ವೃನ್ದಾವನಭುವಿ ವೃನ್ದಾರಕಗಣವೃನ್ದಾರಾಧಿತ ಪಾದಾಬ್ಜಮ್

ಕುನ್ದಾಭಾಮಲಮನ್ದಸ್ಮೇರಸುಧಾನನ್ದಂ ಸುಮಹಾನನ್ದಮ್ |

ವನ್ದ್ಯಾಶೇಷಮಹಾಮುನಿಮಾನಸವನ್ದ್ಯಾನನ್ದಪದದ್ವನ್ದ್ವಂ

ವನ್ದ್ಯಾಶೇಷಗುಣಾಬ್ಧಿಂ ಪ್ರಣಮತ ಗೋವಿನ್ದಂ ಪರಮಾನನ್ದಮ್ || ೮ ||

ಗೋವಿನ್ದಾಷ್ಟಕಮೇತದಧೀತೇ ಗೋವಿನ್ದಾರ್ಪಿತಚೇತೋ ಯೋ

ಗೋವಿನ್ದಾಚ್ಯುತ ಮಾಧವ ವಿಷ್ಣೋ ಗೋಕುಲನಾಯಕ ಕೃಷ್ಣೇತಿ |

ಗೋವಿನ್ದಾಙ್ಘ್ರಿಸರೋಜಧ್ಯಾನಸುಧಾಜಲಧೌತಸಮಸ್ತಾಘೋ

ಗೋವಿನ್ದಂ ಪರಮಾನನ್ದಾಮೃತಮನ್ತಃಸ್ಥಂ ಸ ಸಮಭ್ಯೇತಿ || ೯ ||