ಶ್ರೀ ನಾರಾಯಣಾಷ್ಟಕಮ್

ಶ್ರೀ ನಾರಾಯಣಾಷ್ಟಕಮ್

   (ಶ್ರೀ ಕೂರೇಶಸ್ವಾಮಿಕೃತಮ್)

               

ವಾತ್ಸಲ್ಯಾದಭಯಪ್ರದಾನಸಮಯಾದಾರ್ತಾರ್ತಿನಿರ್ವಾಪಣಾ-

ದೌದಾರ್ಯಾದಘಶೋಷಣಾದಗಣಿತಶ್ರೇಯಃಪದಪ್ರಾಪಣಾತ್ |

ಸೇವ್ಯಃ ಶ್ರೀಪತಿರೇಕ ಏವ ಜಗತಾಮೇತೇಽಭವನ್ ಸಾಕ್ಷಿಣಃ

ಪ್ರಹ್ಲಾದಶ್ಚ ವಿಭೀಷಣಶ್ಚ ಕರಿರಾಟ್ ಪಾಞ್ಚಾಲ್ಯಹಲ್ಯಾ ಧ್ರುವಃ || ೧ ||

ಪ್ರಹ್ಲಾದಾಸ್ತಿ ಯದೀಶ್ವರೋ ವದ ಹರಿಃ ಸರ್ವತ್ರ ಮೇ ದರ್ಶಯ

ಸ್ತಮ್ಭೇ ಚೈವಮಿತಿ ಬ್ರುವನ್ತಮಸುರಂ ತತ್ರಾವಿರಾಸೀದ್ಧರಿಃ |

ವಕ್ಷಸ್ತಸ್ಯ ವಿದಾರಯನ್ ನಿಜನಖೈಃ ವಾತ್ಸಲ್ಯಮಾಪಾದಯನ್

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೨ ||

ಶ್ರೀರಾಮಾತ್ರ ವಿಭೀಷಣೋಽಯಮನಘೋ ರಕ್ಷೋಭಯಾದಾಗತಃ

ಸುಗ್ರೀವಾನಯ ಪಾಲಯೈನಮಧುನಾ ಪೌಲಸ್ತ್ಯಮೇವಾಗತಮ್ |

ಇತ್ಯುಕ್ತ್ವಾಭಯಮಸ್ಯ ಸರ್ವವಿದಿತಂ ಯೋ ರಾಘವೋ ದತ್ತವಾನ್

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೩ ||

ನಕ್ರಗ್ರಸ್ತಪದಂ ಸಮುದ್ಧೃತಕರಂ ಬ್ರಹ್ಮಾದಯೋ ಭೋ ಸುರಾಃ

ಪಾಲ್ಯನ್ತಾಮಿತಿ ದೀನವಾಕ್ಯಕರಿಣಂ ದೇವೇಷ್ವಶಕ್ತೇಷು ಯಃ |

ಮಾ ಭೈಷೀರಿತಿ ಯಸ್ಯ ನಕ್ರಹನನೇ ಚಕ್ರಾಯುಧಃ ಶ್ರೀಧರಃ

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೪ ||

ಭೋ ಕೃಷ್ಣಾಚ್ಯುತ ಭೋ ಕೃಪಾಲಯ ಹರೇ ಭೋ ಪಾಣ್ಡವಾನಾಂ ಸಖೇ

ಕ್ವಾಸಿ ಕ್ವಾಸಿ ಸುಯೋಧನಾದಪಹೃತಾಂ ಭೋ ರಕ್ಷ ಮಾಮಾತುರಾಮ್ |

ಇತ್ಯುಕ್ತೋಽಕ್ಷಯವಸ್ತ್ರಸಂಭೃತತನುಂ  ಯೋಽಪಾಲಯದ್ದ್ರೌಪದೀಮ್

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೫ ||

ಯತ್ಪಾದಾಬ್ಜನಖೋದಕಂ ತ್ರಿಜಗತಾಂ ಪಾಪೌಘವಿಧ್ವಂಸನಮ್

ಯನ್ನಾಮಾಮೃತಪೂರಕಂ ಚ ಪಿಬತಾಂ ಸಂಸಾರಸಂತಾರಕಮ್ |

ಪಾಷಾಣೋಽಪಿ ಯದಙ್ಘ್ರಿಪದ್ಮರಜಸಾ ಶಾಪಾನ್ಮುನೇರ್ಮೋಚಿತಃ

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೬ ||

ಪಿತ್ರಾ ಭ್ರಾತರಮುತ್ತಮಾಸನಗತಂ ಚೌತ್ತಾನಪಾದಿರ್ಧ್ರುವೋ

ದೃಷ್ಟ್ವಾ ತತ್ಸಮಮಾರುರುಕ್ಷುರಧೃತೋ ಮಾತ್ರಾವಮಾನಂ ಗತಃ |

ಯಂ ಗತ್ವಾ ಶರಣಂ ಯದಾಪ ತಪಸಾ ಹೇಮಾದ್ರಿಸಿಂಹಾಸನಮ್

ಆರ್ತತ್ರಾಣಪರಾಯಣಃ ಸಃ ಭಗವಾನ್ ನಾರಾಯಣೋ ಮೇ ಗತಿಃ || ೭ ||

ಆರ್ತಾಃ ವಿಷಣ್ಣಾಃ ಶಿಥಿಲಾಶ್ಚ ಭೀತಾ

ಘೋರೇಷು ಚ ವ್ಯಾಧಿಷು ವರ್ತಮಾನಾಃ |

ಸಙ್ಕೀರ್ತ್ಯ ನಾರಾಯಣ ಶಬ್ದಮಾತ್ರಮ್

ವಿಮುಕ್ತದುಃಖಾಃ ಸುಖಿನೋ ಭವನ್ತಿ  || ೮ ||