ಶ್ರೀ ವಿಷ್ಣುಭುಜಙ್ಗಪ್ರಯಾತಸ್ತೋತ್ರಮ್

ಶ್ರೀ ವಿಷ್ಣುಭುಜಙ್ಗಪ್ರಯಾತಸ್ತೋತ್ರಮ್

        (ಶ್ರೀ ಶಂಕರಾಚಾರ್ಯಕೃತಮ್)

ಚಿದಂಶಂ ವಿಭುಂ ನಿರ್ಮಲಂ ನಿರ್ವಿಕಲ್ಪಮ್

ನಿರೀಹಂ ನಿರಾಕಾರಮೋಙ್ಕಾರವೇದ್ಯಮ್ |

ಗುಣಾತೀತಮವ್ಯಕ್ತಮೇಕಂ ತುರೀಯಮ್

ಪರಂ ಬ್ರಹ್ಮ ಯಂ ವೇದ ತಸ್ಮೈ ನಮಸ್ತೇ || ೧ ||

ವಿಶುದ್ಧಂ ಶಿವಂ ಶಾನ್ತಮಾದ್ಯನ್ತಶೂನ್ಯಮ್

ಜಗಜ್ಜೀವನಂ ಜ್ಯೋತಿರಾನನ್ದರೂಪಮ್ |

ಅದಿಗ್ದೇಶಕಾಲವ್ಯವಚ್ಛೇದನೀಯಮ್

ತ್ರಯೀ ವಕ್ತಿ ಯಂ ವೇದ ತಸ್ಮೈ ನಮಸ್ತೇ || ೨ ||

ಮಹಾಯೋಗಪೀಠೇ ಪರಿಭ್ರಾಜಮಾನೇ

ಧರಣ್ಯಾದಿತತ್ವಾತ್ಮಕೇ ಶಕ್ತಿಯುಕ್ತೇ |

ಗುಣಾಹಸ್ಕರೇ ವಹ್ನಿಬಿಮ್ಬಾರ್ಕಮಧ್ಯೇ

ಸಮಾಸೀನಮೋಂಕರ್ಣಿಕೇಽಷ್ಟಾಕ್ಷರಾಬ್ಜೇ || ೩ ||

ಸಮಾನೋದಿತಾನೇಕಸೂರ್ಯೇನ್ದುಕೋಟಿ-

ಪ್ರಭಾಪೂರತುಲ್ಯದ್ಯುತಿಂ ದುರ್ನಿರೀಕ್ಷ್ಯಮ್ |

ನ ಶೀತಂ ನ ಚೋಷ್ಣಂ ಸುವರ್ಣಾವಭಾತಮ್

ಪ್ರಸನ್ನಂ ಸದಾನನ್ದಸಂವಿತ್ಸ್ವರೂಪಮ್ || ೪ ||

ಸುನಾಸಾಪುಟಂ ಸುನ್ದರಭ್ರೂಲಲಾಟಮ್

ಕಿರೀಟೋಚಿತಾಕುಞ್ಚಿತಸ್ನಿಗ್ಧಕೇಶಮ್ |

ಸ್ಫುರತ್ಪುಣ್ಡರೀಕಾಭಿರಾಮಾಯತಾಕ್ಷಮ್

ಸಮುತ್ಫುಲ್ಲರತ್ನಪ್ರಸೂನಾವತಂಸಮ್ || ೫ ||

ಸ್ಫುರತ್ಕುಣ್ಡಲಾಮೃಷ್ಟಗಣ್ಡಸ್ಥಲಾನ್ತಮ್

ಜಪಾರಾಗಚೋರಾಧರಂ ಚಾರುಹಾಸಮ್ |

ಕಲಿವ್ಯಾಕುಲಾಮೋದಿಮನ್ದಾರಮಾಲಮ್

ಮಹೋರಸ್ಫುರತ್ಕೌಸ್ತುಭೋದಾರಹಾರಮ್ || ೬ ||

ಸುರತ್ನಾಙ್ಗದೈರನ್ವಿತಂ ಬಾಹುದಣ್ಡೈಃ

ಚತುರ್ಭಿಶ್ಚಲತ್ಕಙ್ಕಣಾಲಂಕೃತಾಗ್ರೈಃ |

ಉದಾರೋದರಾಲಂಕೃತಂ ಪೀತವಸ್ತ್ರಮ್

ಪದದ್ವನ್ದ್ವನಿರ್ಧೂತಪದ್ಮಾಭಿರಾಮಮ್ || ೭ ||

ಸ್ವಭಕ್ತೇಷು ಸನ್ದರ್ಶಿತಾಕಾರಮೇವಮ್

ಸದಾ ಭಾವಯನ್ ಸನ್ನಿರುದ್ಧೇನ್ದ್ರಿಯಾಶ್ವಃ |

ದುರಾಪಂ ನರೋ ಯಾತಿ ಸಂಸಾರಪಾರಮ್

ಪರಸ್ಮೈ ತಮೋಭ್ಯೋಽಪಿ ತಸ್ಮೈ ನಮಸ್ತೇ || ೮ ||

ಶ್ರಿಯಾ ಶಾತಕುಂಭದ್ಯುತಿಸ್ನಿಗ್ಧಕಾನ್ತ್ಯಾ

ಧರಣ್ಯಾ ಚ ದೂರ್ವಾದಲಶ್ಯಾಮಲಾಙ್ಗ್ಯಾ |

ಕಲತ್ರದ್ವಯೇನಾಮುನಾ ತೋಷಿತಾಯ

ತ್ರಿಲೋಕೀಗೃಹಸ್ಥಾಯ ವಿಷ್ಣೋ ನಮಸ್ತೇ || ೯ ||

ಶರೀರಂ ಕಲತ್ರಂ ಸುತಂ ಬನ್ಧುವರ್ಗಮ್

ವಯಸ್ಯಂ ಧನಂ ಸದ್ಮ ಭೃತ್ಯಂ ಭುವಂ ಚ |

ಸಮಸ್ತಂ ಪರಿತ್ಯಜ್ಯ ಹಾ ಕಷ್ಟಮೇಕೋ

ಗಮಿಷ್ಯಾಮಿ ದುಃಖೇನ ದೂರಂ ಕಿಲಾಹಮ್ || ೧೦ ||

ಜರೇಯಂ ಪಿಶಾಚೀವ ಹಾ ಜೀವಿತೋ ಮೇ

ಮೃಜಾಮಸ್ಥಿರಕ್ತಂ ಚ ಮಾಂಸಂ ಬಲಂ ಚ |

ಅಹೋ ದೇವ ಸೀದಾಮಿ ದೀನಾನುಕಮ್ಪಿನ್

ಕಿಮದ್ಧಾಪಿ ಹನ್ತ ತ್ವಯೋದ್ಭಾಸಿತವ್ಯಮ್ || ೧೧ ||

ಕಫವ್ಯಾಹತೋಷ್ಣೋಲ್ಬಣಶ್ವಾಸವೇಗ-

ವ್ಯಥಾವಿಸ್ಫುರತ್ಸರ್ವಮರ್ಮಾಸ್ಥಿಬನ್ಧಾಮ್ |

ವಿಚಿನ್ತ್ಯಾಹಮನ್ತ್ಯಾಮಸಹ್ಯಾಮವಸ್ಥಾಮ್

ಬಿಭೇಮಿ ಪ್ರಭೋ ಕಿಂ ಕರೋಮಿ ಪ್ರಸೀದ || ೧೨ ||

ಲಪನ್ನಚ್ಯುತಾನನ್ತ ಗೋವಿನ್ದ ವಿಷ್ಣೋ

ಮುರಾರೇ ಹರೇ ನಾಥ ನಾರಾಯಣೇತಿ |

ಯಥಾಽನುಸ್ಮರಿಷ್ಯಾಮಿ ಭಕ್ತ್ಯಾ ಭವನ್ತಮ್

ತಥಾ ಮೇ ದಯಾಶೀಲ ದೇವ ಪ್ರಸೀದ || ೧೩ ||

ನಮೋ ವಿಷ್ಣವೇ ವಾಸುದೇವಾಯ ತುಭ್ಯಮ್

ನಮೋ ನಾರಸಿಂಹಸ್ವರೂಪಾಯ ತುಭ್ಯಮ್ |

ನಮಃ ಕಾಲರೂಪಾಯ ಸಂಹಾರಕರ್ತ್ರೇ

ನಮಸ್ತೇ ವರಾಹಾಯ ಭೂಯೋ ನಮಸ್ತೇ || ೧೪ ||

ನಮಸ್ತೇ ಜಗನ್ನಾಥ ವಿಷ್ಣೋ ನಮಸ್ತೇ

ನಮಸ್ತೇ ಗದಾಚಕ್ರಪಾಣೇ ನಮಸ್ತೇ |

ನಮಸ್ತೇ ಪ್ರಪನ್ನಾರ್ತಿಹಾರಿನ್ ನಮಸ್ತೇ

ಸಮಸ್ತಾಪರಾಧಂ ಕ್ಷಮಸ್ವಾಖಿಲೇಶ || ೧೫ ||

ಮುಖೇ ಮನ್ದಹಾಸಂ ನಖೇ ಚನ್ದ್ರಭಾಸಮ್

ಕರೇ ಚಾರುಚಕ್ರಂ ಸುರೇಶಾದಿವನ್ದ್ಯಮ್ |

ಭುಜಙ್ಗೇ ಶಯಾನಂ ಭಜೇ ಪದ್ಮನಾಭಮ್

ಹರೇರನ್ಯದೈವಂ ನ ಮನ್ಯೇ ನ ಮನ್ಯೇ || ೧೬ ||

ಭುಜಂಗಪ್ರಯಾತಂ ಪಠೇದ್ಯಸ್ತು ಭಕ್ತ್ಯಾ

ಸಮಾಧಾಯ ಚಿತ್ತೇ ಭವನ್ತಂ ಮುರಾರೇ |

ಸ ಮೋಹಂ ವಿಹಾಯಾಶು ಯುಷ್ಮತ್ಪ್ರಸಾದಾತ್

ಸಮಾಶ್ರಿತ್ಯ ಯೋಗಂ ವ್ರಜತ್ಯಚ್ಯುತಂ ತ್ವಾಮ್ || ೧೭ ||