. ಶ್ರೀ ಅಂಬಾಪಞ್ಚರತ್ನಮ್

. ಶ್ರೀ ಅಂಬಾಪಞ್ಚರತ್ನಮ್

ಅಮ್ಬಾ ಶಂಬರವೈರಿತಾತಭಗಿನೀ ಶ್ರೀಚನ್ದ್ರಬಿಮ್ಬಾನನಾ

ಬಿಮ್ಬೋಷ್ಠೀ ಸ್ಮಿತಭಾಷಿಣೀ ಶುಭಕರೀ ಕಾದಮ್ಬವಾಟ್ಯಾಶ್ರಿತಾ |

ಹ್ರೀಙ್ಕಾರಾಕ್ಷರಮನ್ತ್ರಮಧ್ಯಸುಭಗಾ ಶ್ರೋಣೀ ನಿತಮ್ಬಾಙ್ಕಿತಾ

ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾಽವತು || ೧ ||

ಕಲ್ಯಾಣೀ ಕಮನೀಯಸುನ್ದರವಪುಃ ಕಾತ್ಯಾಯನೀ ಕಾಲಿಕಾ

ಕಾಲಶ್ಯಾಮಲಮೇಚಕದ್ಯುತಿಮತೀ ಗಾಯತ್ರಿಪಞ್ಚಾಕ್ಷರೀ |

ಕಾಮಾಕ್ಷೀ ಕರುಣಾನಿಧಿಃ ಕಲಿಮಲಾರಣ್ಯಾತಿದಾವಾನಲಾ

ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾಽವತು || ೨ ||

ಕಾಞ್ಚೀಕಙ್ಕಣಹಾರಕುಣ್ಡಲವತೀ ಕೋಟೀ ಕಿರೀಟಾನ್ವಿತಾ

ಕನ್ದರ್ಪದ್ಯುತಿಕೋಟಿ ಕೋಟಿ ಸದನಾ ಪೀಯೂಷಕುಮ್ಭಸ್ತನಾ |

ಕೌಸುಮ್ಭಾರುಣಕಾಞ್ಚನಾಮ್ಬರವೃತಾ ಕೈಲಾಸವಾಸಪ್ರಿಯಾ

ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾಽವತು || ೩ ||

ಯಾ ಸಾ ಶುಮ್ಭನಿಶುಮ್ಭದೈತ್ಯಶಮನೀ ಯಾ ರಕ್ತಬೀಜಾಶನೀ

ಯಾ ಶ್ರೀ ವಿಷ್ಣುಸರೋಜನೇತ್ರಭವನಾ ಯಾ ಬ್ರಹ್ಮವಿದ್ಯಾಸನೀ |

ಯಾ ದೇವೀ ಮಧುಕೈಟಭಾಸುರರಿಪುಃ ಯಾ ಮಾಹಿಷಧ್ವಂಸಿನೀ

ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾಽವತು || ೪ ||

ಶ್ರೀವಿದ್ಯಾ ಪರದೇವತಾಽಽದಿಜನನೀ ದುರ್ಗಾ ಜಯಾ ಚಣ್ಡಿಕಾ

ಬಾಲಾ ಶ್ರೀತ್ರಿಪುರೇಶ್ವರೀ ಶಿವಸತೀ ಶ್ರೀರಾಜರಾಜೇಶ್ವರೀ |

ಶ್ರೀರಾಜ್ಞೀ ಶಿವದೂತಿಕಾ ಶ್ರುತಿನುತಾ ಶೃಙ್ಗಾರಚೂಡಾಮಣಿಃ

ಮಾಮಮ್ಬಾಪುರವಾಸಿನೀ ಭಗವತೀ ಹೇರಮ್ಬಮಾತಾಽವತು || ೫ ||

 

ಅಮ್ಬಾ ಪಞ್ಚಕಮದ್ಭುತಂ ಪಠತಿ ಚೇತ್ ಯೋ ವಾ ಪ್ರಭಾತೇಽನಿಶಂ

ದಿವ್ಯೈಶ್ವರ್ಯಶತಾಯುರುತ್ತಮಮಿದಂ ವಿದ್ಯಾಂ ಶ್ರಿಯಂ ಶಾಶ್ವತಮ್ |

ಲಬ್ಧ್ವಾ ಭೂಮಿತಲೇ ಸ್ವಧರ್ಮನಿರತಾಂ ಶ್ರೀಸುನ್ದರೀಂ ಭಾಮಿನೀಂ

ಅನ್ತೇ ಸ್ವರ್ಗಫಲಂ ಲಭೇತ್ ಸ ವಿಬುಧೈಃ ಸಂಸ್ತೂಯಮಾನೋ ನರಃ || ೬ ||