ಶ್ರೀಭಗವಚ್ಛರಣಸ್ತೋತ್ರಮ್

ಶ್ರೀಭಗವಚ್ಛರಣಸ್ತೋತ್ರಮ್

            (ಸ್ವಾಮಿ ಬ್ರಹ್ಮಾನನ್ದಕೃತಂ)

ಸಚ್ಚಿದಾನನ್ದರೂಪಾಯ ಭಕ್ತಾನುಗ್ರಹಕಾರಿಣೇ |

ಮಾಯಾನಿರ್ಮಿತವಿಶ್ವಾಯ ಮಹೇಶಾಯ ನಮೋ ನಮಃ || ೧ ||

ರೋಗಾ ಹರನ್ತಿ ಸತತಂ ಪ್ರಬಲಾಃ ಶರೀರಮ್ |

ಕಾಮಾದಯೋಽಪ್ಯನುದಿನಂ ಪ್ರದಹನ್ತಿ ಚಿತ್ತಮ್ |

ಮೃತ್ಯುಶ್ಚ ನೃತ್ಯತಿ ಸದಾ ಕಲಯನ್ ದಿನಾನಿ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೨ ||

ದೇಹೋ ವಿನಶ್ಯತಿ ಸದಾ ಪರಿಣಾಮಶೀಲ-

ಶ್ಚಿತ್ತಂ ಚ ಖಿದ್ಯತಿ ಸದಾ ವಿಷಯಾನುರಾಗಿ |

ಬುದ್ಧಿಃ ಸದಾ ಹಿ ರಮತೇ ವಿಷಯೇಷು ನಾನ್ತಃ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೩ ||

ಆಯುರ್ವಿನಶ್ಯತಿ ಯಥಾಮಘಟಸ್ಥತೋಯಮ್

ವಿದ್ಯುತ್ಪ್ರಭೇವ ಚಪಲಾ ಬತ ಯೌವನಶ್ರೀಃ |

ವೃದ್ಧಾ ಪ್ರಧಾವತಿ ಯಥಾ ಮೃಗರಾಜಪತ್ನೀ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೪ ||

ಆಯಾದ್ವ್ಯಯೋ ಮಮ ಭವತ್ಯಧಿಕೋಽವಿನೀತೇ

ಕಾಮಾದಯೋ ಹಿ ಬಲಿನೋ ನಿಬಲಾಃ ಶಮಾದ್ಯಾಃ |

ಮೃತ್ಯುರ್ಯದಾ ತುದತಿ ಮಾಂ ಬತ ಕಿಂ ವದೇಯಮ್

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೫ ||

ತಪ್ತಂ ತಪೋ ನಹಿ ಕದಾಪಿ ಮಯೇಹ ತನ್ವಾ

ವಾಣ್ಯಾ ತಥಾ ನಹಿ ಕದಾಪಿ ತಪಶ್ಚ ತಪ್ತಮ್ |

ಮಿಥ್ಯಾಭಿಭಾಷಣಪರೇಣ ನ ಮಾನಸಂ ಹಿ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೬ ||

ಸ್ತಬ್ಧಂ ಮನೋ ಮಮ ಸದಾ ನಹಿ ಯಾತಿ ಸೌಮ್ಯಮ್

ಚಕ್ಷುಶ್ಚ ಮೇ ನ ತವ ಪಶ್ಯತಿ ವಿಶ್ವರೂಪಮ್ |

ವಾಚಾ ತಥೈವ ನ ವದೇನ್ಮಮ ಸೌಮ್ಯವಾಣೀಮ್

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೭ ||

ಸತ್ವಂ ನ ಮೇ ಮನಸಿ ಯಾತಿ ರಜಸ್ತಮೋಭ್ಯಾಮ್

ವಿದ್ಧೇ ತಥಾ ಕಥಮಹೋ ಶುಭಕರ್ಮವಾರ್ತಾ |

ಸಾಕ್ಷಾತ್ ಪರಂಪರತಯಾ ಸುಖಸಾಧನಮ್ ತತ್

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೮ ||

ಪೂಜಾಕೃತಾ ನಹಿ ಕದಾಪಿ ಮಯಾ ತ್ವದೀಯಾ

ಮನ್ತ್ರಂ ತ್ವದೀಯಮಪಿ ಮೇ ನ ಜಪೇದ್ರಸಜ್ಞಾ |

ಚಿತ್ತಂ ನ ಮೇ ಸ್ಮರತಿ ತೇ ಚರಣೌ ಹ್ಯವಾಪ್ಯ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೯ ||

ಯಜ್ಞೋ ನ ಮೇಽಸ್ತಿ ಹುತಿದಾನದಯಾದಿಯುಕ್ತೋ

ಜ್ಞಾನಸ್ಯಸಾಧನಗಣೋ ನ ವಿವೇಕಮುಖ್ಯಃ |

ಜ್ಞಾನಂ ಕ್ವ ಸಾಧನಗಣೇನ ವಿನಾ ಕ್ವ ಮೋಕ್ಷಃ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೦ ||

ಸತ್ಸಙ್ಗತಿರ್ಹಿ ವಿದಿತಾ ತವ ಭಕ್ತಿಹೇತುಃ

ಸಾಪ್ಯದ್ಯ ನಾಸ್ತಿ ಬತ ಪಣ್ಡಿತಮಾನಿನೋ ಮೇ |

ತಾಮನ್ತರೇಣ ನಹಿ ಸಾ ಕ್ವಚ ಬೋಧವಾರ್ತಾ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೧ ||

ದೃಷ್ಟಿರ್ನ ಭೂತವಿಷಯಾ ಸಮತಾಭಿಧಾನಾ

ವೈಷಮ್ಯಮೇವ ತದಿಯಂ ವಿಷಯೀಕರೋತಿ |

ಶನ್ತಿಃ ಕುತೋ ಮಮ ಭವೇತ್ ಸಮತಾ ನ ಚೇತ್ಸ್ಯಾತ್

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೨ ||

ಮೈತ್ರೀ ಸಮೇಷು ನ ಚ ಮೇಽಸ್ತಿ ಕದಾಪಿ ನಾಥ

ದೀನೇ ನ ತಥಾ ನ ಕರುಣಾ ಮುದಿತಾ ಚ ಪುಣ್ಯೇ |

ಪಾಪೇಽನುಪೇಕ್ಷಣವತೋ ಮಮ ಮುದ್ಕಥಂ ಸ್ಯಾತ್

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೩ ||

ನೇತ್ರಾದಿಕಂ ಮಮ ಬಹಿರ್ವಿಷಯೇಷು ಸಕ್ತಮ್

ನಾನ್ತರ್ಮುಖಂ ಭವತಿ ತಾನವಿಹಾಯ ತಸ್ಯ |

ಕ್ವಾನ್ತರ್ಮುಖತ್ವಮಪಹಾಯ ಸುಖಸ್ಯ ವಾರ್ತಾ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೪ ||

ತ್ಯಕ್ತಂ ಗೃಹಾದ್ಯಪಿ ಮಯಾ ಭವತಾಪಶಾನ್ತ್ಯೈ

ನಾಸೀದಸೌ ಹೃತಹೃದೋ ಮಮ ಮಾಯಯಾ ತೇ |

ಸಾ ಚಾಧುನಾ ಕಿಮು ವಿಧಾಸ್ಯತಿ ನೇತಿ ಜಾನೇ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೫ ||

ಪ್ರಾಪ್ತಾ ಧನಂ ಗೃಹಕುಟುಮ್ಬಗಜಾಶ್ವದಾರಾ

ರಾಜ್ಯಂ ಯದೈಹಿಕಮಥೇನ್ದ್ರಪುರಶ್ಚ ನಾಥ |

ಸರ್ವಂ ವಿನಶ್ವರಮಿದಂ ನ ಫಲಾಯ ಕಸ್ಮೈ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೬ ||

ಪ್ರಾಣಾನ್ನಿರುದ್ಧ್ಯ ವಿಧಿನಾ ನ ಕೃತೋ ಹಿ ಯೋಗೋ

ಯೋಗಂ ವಿನಾಸ್ತಿ ಮನಸಃ ಸ್ಥಿರತಾ ಕುತೋ ಮೇ |

ತಾಂ ವೈ ವಿನಾ ಮಮ ನ ಚೇತಸಿ ಶಾನ್ತಿವಾರ್ತಾ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೭ ||

ಜ್ಞಾನಂ ಯಥಾ ಮಮ ಭವೇತ್ ಕೃಪಯಾ ಗುರೂಣಾಮ್

ಸೇವಾಂ ತಥಾ ನ ವಿಧಿನಾಕರವಂ ಹಿ ತೇಷಾಮ್ |

ಸೇವಾಪಿ ಸಾಧನತಯಾವಿದಿತಾಸ್ತಿ ಚಿತ್ತೇ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೮ ||

ತೀರ್ಥಾದಿ ಸೇವನಮಹೋ ವಿಧಿನಾ ಹಿ ನಾಥ

ನಾಕಾರಿ ಯೇನ ಮನಸೋ ಮಮ ಶೋಧನಂ ಸ್ಯಾತ್ |

ಶುದ್ಧಿಂ ವಿನಾ ನ ಮನಸೋಽವಗಮಾಪವರ್ಗೌ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೧೯ ||

ವೇದಾನ್ತಶೀಲನಮಪಿ ಪ್ರಮಿತಿಂ ಕರೋತಿ

ಬ್ರಹ್ಮಾತ್ಮನಃ ಪ್ರಮಿತಿ ಸಾಧನ ಸಂಯುತಸ್ಯ |

ನೈವಾಸ್ತಿ ಸಾಧನ ಲವೋ ಮಯಿ ನಾಥ ತಸ್ಯಾಃ

ತಸ್ಮಾತ್ತ್ವಮದ್ಯ ಶರಣಂ ಮಮ ದೀನಬನ್ಧೋ || ೨೦ ||

ಗೋವಿನ್ದ ಶಂಕರ ಹರೇ ಗಿರಿಜೇಶ ಮೇಶ

ಶಂಭೋ ಜನಾರ್ದನ ಗಿರೀಶ ಮುಕುನ್ದ ಸಾಮ್ಬ |

ನಾನ್ಯಾ ಗತಿರ್ಮಮ ಕಥಞ್ಚನ ವಾಂ ವಿಹಾಯ

ತಸ್ಮಾತ್ ಪ್ರಭೋ ಮಮ ಗತಿಃ ಕೃಪಯಾ ವಿಧೇಯಾ || ೨೧ ||

ಏವಂ ಸ್ತವಂ ಭಗವದಾಶ್ರಯಣಾಭಿಧಾನಮ್

ಯೇ ಮಾನವಾ ಪ್ರತಿದಿನಂ ಪ್ರಣತಾಃ ಪಠನ್ತಿ |

ತೇ ಮಾನವಾಃ ಭವರತಿಂ ಪರಿಭೂಯ ಶಾನ್ತಿಮ್

ಗಚ್ಛನ್ತಿ ಕಿಂ ಚ ಪರಮಾತ್ಮನಿ ಭಕ್ತಿಮದ್ಧಾ || ೨೨ ||