ಶಿವಷಡಕ್ಷರೀಸ್ತೋತ್ರಮ್

ಶಿವಷಡಕ್ಷರೀಸ್ತೋತ್ರಮ್

 

ಓಂಕಾರಂ ಬಿನ್ದುಸಂಯುಕ್ತಂ ನಿತ್ಯಂ ಧ್ಯಾಯನ್ತಿ ಯೋಗಿನಃ |

ಕಾಮದಂ ಮೋಕ್ಷದಂ ತಸ್ಮಾತ್ ಓಂಕಾರಾಯ ನಮೋ ನಮಃ || ೧ ||

ನಮನ್ತಿ ಮುನಯಃ ಸರ್ವೇ ನಮನ್ತ್ಯಪ್ಸರಸಾಂ ಗಣಾಃ|

ನರಾ ನಮನ್ತಿ ದೇವೇಶಂ ನಕಾರಾಯ ನಮೋ ನಮಃ || ೨ ||

ಮಹತ್ತತ್ವಂ ಮಹಾದೇವಂ ಮಹಾಜ್ಞಾನಪ್ರದಂ ಪರಮ್ |

ಮಹಾಪಾಪಹರಂ ದೇವಂ ಮಕಾರಾಯ ನಮೋ ನಮಃ || ೩ ||

ಶಿವಂ ಶಾನ್ತಂ ಜಗನ್ನಾಥಂ ಲೋಕಾನುಗ್ರಹಕಾರಕಮ್ |

ಶಿವಮೇಕಪದಂ ನಿತ್ಯಂ ಶಿಕಾರಾಯ ನಮೋ ನಮಃ || ೪ ||

ವಾಹನಂ ವೃಷಭೋ ಯಸ್ಯ ವಾಸುಕಿಃ ಕಣ್ಠಭೂಷಣಮ್ |

ವಾಮೇ ಶಕ್ತಿಧರೋ ದೇವಃ ವಕಾರಾಯ ನಮೋ ನಮಃ || ೫ ||

ಯತ್ರ ಯತ್ರ ಸ್ಥಿತೋ ದೇವಃ ಸರ್ವವ್ಯಾಪೀ ಮಹೇಶ್ವರಃ |

ಯೋ ಗುರುಃ ಸರ್ವದೇವಾನಾಂ ಯಕಾರಾಯ ನಮೋ ನಮಃ || ೬ ||

ಷಡಕ್ಷರಮಿದಂ ಸ್ತೋತ್ರಂ ಯಃ ಪಠೇಚ್ಛಿವಸನ್ನಿಧೌ |

ತಸ್ಯ ಮೃತ್ಯುಭಯಂ ನಾಸ್ತಿ ಶಿವೇನ ಸಹ ಮೋದತೇ || ೭ ||